2 июня 2024 года - Воскресенье

Недели о самаряныне

Тропарь, глас 4:

Све́тлую воскpесе́ния пpо́поведь/ от А́нгела уве́девша Госпо́дни учени́цы/ и пpа́деднее осужде́ние отве́pгша,/ апо́столом хва́лящася глаго́лаху:/ испpове́pжеся смеpть,/ воскpе́се Хpисто́с Бог,// да́pуяй ми́pови ве́лию ми́лость.

Кондак, глас 8:

Ве́рою прише́дшая на кла́дязь самаряны́ня,/ ви́дя Тя прему́дрости во́ду,/ е́юже напои́шася оби́льно,// Ца́рствие вы́шнее насле́дова ве́чно, я́ко присносла́вная.

Мученику Фалалею Эгейскому (житие / история праздника)

Тропарь, глас 4:

Му́ченик Твой, Го́споди, Фалалей, во страда́нии свое́м вене́ц прия́т нетле́нный от Тебе́, Бо́га на́шего; име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того моли́твами спаси ду́ши на́ша.

Кондак, глас 8:

Му́чеником сострада́лец я́влься и ору́жник,/ во́ин изря́дный Царя́ сла́вы был еси́,/ искуше́ньми и му́кою возвыше́ние идолослужи́телей попра́л еси́,/ сего́ ра́ди честну́ю твою́ пое́м па́мять,// му́дре Фалале́е.

Святителю Алексию, митрополиту Московскому и всея Руси (житие / история праздника)

Тропарь, глас 2:

Я́ко сокро́вище пребога́тое, многоле́тно в земли́ сокрове́нное,/ честны́я мо́щи твоя́ обрето́шася чудоточа́щия,/ всеблаже́нне о́тче святи́телю Алекси́е:/ от ни́хже врачевство́ прие́млюще, обогаща́емся/ и Христа́ славосло́вим, глаго́люще:// сла́ва прославля́ющему святы́я Своя́.

Кондак, глас 8:

Я́ко со́лнце незаходи́мое, от гро́ба возсия́ нам/ от мног лет сокрове́ны честны́я твоя́ мо́щи нетле́нны,/ святи́телю Алекси́е,/ тобо́ю благода́ть прие́млем:/ всю бо страну́ сию́ и вся ны чудесы́ и добро́тою обогаща́еши,/ де́йством благода́ти, да пое́м ти:// ра́дуйся, о́тче, свети́ло Росси́и.

Молитва:

О, свяще́ннейший о́тче, святи́телю Христо́в Алекси́е, па́стырю и учи́телю наш, не отри́ни нас (имена), с ве́рою притека́ющих к твоему́ заступле́нию, но ско́ро потщи́ся помоли́тися Царю́ ца́рствующих и Го́споду госпо́дствующих, да изба́вит ста́до Свое́ от волко́в, гу́бящих е́, и вся́ку страну́ христиа́нскую огради́ и сохрани́ святы́ми твои́ми моли́твами от мирска́го мяте́жа и тру́са, наше́ствия иноплеме́нник и междоусо́бныя бра́ни, от гла́да же и губи́тельства, пото́па, и меча́, и огня́, и напра́сныя сме́рти, и я́коже исцеле́нием от слепоты́ цари́цы ага́рянския спасл еси́ оте́чество твое́, та́ко поми́луй и нас, умо́м, сло́вом и де́лом во тьме грехо́вней су́щих, и изба́ви нас гне́ва Бо́жия и ве́чныя ка́зни, я́ко да твои́м хода́тайством и по́мощию, Свои́м же милосе́рдием и благода́тию, Христо́с Бог ти́хое и безгре́шное житие́ даст нам пожи́ти в ве́це сем и на Стра́шнем суди́ще Свое́м сподо́бит десна́го стоя́ния со все́ми святы́ми. Ами́нь.

Благоверному князю Довмонту, в Крещении Тимофею, Псковскому (житие / история праздника)

Тропарь, глас 8:

И́же о́тчее нече́стие возненави́дев,/ преблаже́нне кня́же Дома́нте,/ и но́щи стра́стныя избе́г, е́же к и́долом тща́ние,/ прии́де мы́слию к Со́лнцу сла́вы — Христу́,/ озари́вся благода́тию Боже́ственнаго Креще́ния,/ и ны́не во све́те Пресвяты́я Тро́ицы предстоя́,/ моли́ Христа́ Бо́га сохрани́ти и спасти́ правосла́вныя лю́ди/ и град твой от безбо́жных ага́рян,/ и лати́н наше́ствия, и междоусо́бныя бра́ни// и спасти́ся душа́м на́шим.

Кондак, глас 8:

Любо́вию Христо́вою уязви́ся, преблаже́нне кня́же Дома́нте,/ ум впери́в заре́ю Ду́ха,/ и́дольскую пре́лесть оте́ческаго нече́стия возненави́дев,/ порожде́нием святы́я купе́ли Тимофе́й нарече́н еси́,/ слеза́ми и ми́лостынею ко Христу́ присво́ився,/ и жи́зни сей тече́ние до́бре сконча́в,/ ве́ру непоро́чну соблю́д,/ и ны́не мо́лим тя:/ моли́ Пресвяту́ю Тро́ицу и Пречи́стую Богоро́дицу/ за град Псков и за всех, притека́ющих к ра́це моще́й твои́х,/ изба́витися нам от вся́ких зол,// да тебе́ вси, я́ко те́пла засту́пника, непреста́нно почита́ем.

Молитва:

О, святы́й уго́дниче Христо́в, благове́рный кня́же Довмо́нте! Ве́дуще твое́ к Бо́гу дерзнове́ние, в сокруше́нии се́рдца смире́нно про́сим тя: моли́ся о нас гре́шных и непотре́бных рабе́х (имена) и испроси́ нам моли́твами твои́ми проще́ние грехо́в, исправле́ние жития́ на́шего, от боле́зней и вся́ких неду́гов исцеле́ние, от наве́тов и ко́зней диа́вольских избавле́ние, па́че же спасе́ние душа́м на́шим пода́ждь и Небе́сных благ восприя́тия сподо́би, благода́тию и человеколю́бием Пресвяты́я и Живонача́льныя Тро́ицы, Отца́ и Сы́на и Свята́го Ду́ха во ве́ки веко́в. Ами́нь.

Собору мучеников Холмских и Подляшских (житие / история праздника)

Тропарь, глас 8:

Благослове́н еси́ Христе́ Бо́же на́ш, му́ченики земли́ Хо́лмския и Подляшския просла́вивый, гоне́ния жесто́кая и му́ки Тебе́ ра́ди претерпевшия, и си́ми в стране́ на́шей свято́е Правосла́вие утвердившия, и́х же моли́твами Го́споди, единомы́слие и братолю́бие в сердца́х на́ших утверди́, ми́ру умире́ние, Це́ркви утвержде́ние, и все́м грехо́в оставле́ние да́руя.

Кондак, глас 2:

Любве́ Бо́жия сою́зом связавшеся, и кро́вию муче́ния украси́вшеся, Хо́лмския земли́ и Подляшския му́ченицы свя́ти, зло́бу челове́ческия не́нависти страда́ньми честны́ми разру́шили есте́, те́мже и ве́чную сла́ву насле́довасте. О на́с моли́теся ко Го́споду, дарова́ти все́м ве́лию и бога́тую ми́лость.