7 марта 2026 года - Суббота

Поминовение усопших

Тропари, глас 8:

Глубино́ю му́дрости человеколю́бно вся стро́яй / и поле́зное всем подава́яй, / Еди́не Соде́телю, упоко́й, Го́споди, ду́ши раб Твои́х, / на Тя бо упова́ние возложи́ша, / Творца́ и Зижди́теля и Бо́га на́шего.

Кондак, глас 8:

Со святы́ми упоко́й, / Христе́, ду́ши раб Твои́х, / иде́же несть боле́знь, ни печа́ль, / ни воздыха́ние, / но жизнь безконе́чная.

Молитва:

Помяни́, Го́споди Бо́же наш, в ве́ре и наде́жди живота́ ве́чнаго усо́пших раб Твои́х, (имена их), и я́ко благ и человеколю́бец, отпуща́яй грехи́, и потребля́яй непра́вды, осла́би, оста́ви, и прости́ вся во́льная их согреше́ния и нево́льная, возставля́я я во свято́е второ́е прише́ствие Твое́ в прича́стие ве́чных Твои́х благ, и́хже ра́ди в Тя еди́наго ве́рова, и́стиннаго Бо́га и человеколю́бца; я́ко Ты еси́ воскресе́ние и живо́т, и поко́й рабо́м Твои́м (имена их), Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и с Пресвяты́м Ду́хом, ны́не и при́сно и во ве́ки веко́в, ами́нь.

Мученикам, иже во Евгении (житие / история праздника)

Тропарь, глас 4:

Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего,/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами/ спаси́ ду́ши на́ша.

Кондак, глас 4:

От земли́ возсия́вше я́ко свети́ла пра́вды,/ нече́стия всю отрази́сте мглу/ и ве́рных просвеща́ете,/ му́ченицы Боже́ственнии,// Тро́ицы побо́рницы.

Преподобномученику Филарету (Пряхину) (житие / история праздника)

Тропарь, глас 5:

Учи́телю благоче́стия/, и́стинныя ве́ры Христо́вы ревни́телю/, новому́чениче Филаре́те/, Про́нския и Срезне́вския земли́ украше́ние/ стяжа́л еси́ в се́рдце твое́м Ду́ха Свята́го благода́ть/ Христа́ му́жественно испове́дал еси́/, к новому́чеником Росси́йским бы́в причте́н,/ сла́ву на небесе́х насле́довал еси́/. Моли́ся приле́жно Влады́ке Христу́, / да сохрани́т Оте́чество на́ше в ми́ре и благоде́нствии,// и спасе́т души́ на́ша.

Кондак, глас 2:

Чистото́ю душе́вною боже́ственне вооружи́вся и непреста́нныя моли́твы, я́ко копие́, вручи́в кре́пко, пробо́л еси́ бесо́вская ополче́ния, Филарете о́тче наш, моли́ непреста́нно о всех нас.

Священномученикам Иосифу Смирнову, Владимиру Ильинскому, Иоанну Касторскому и мученик Иоанну Перебаскину, Солигаличским новомученикам(житие / история праздника)

Тропарь, глас 3:

К сонму новомучеников Российских сопричтенные, страдальцы за Христа града Солигалича, священномученицы Иосифе, Владимире, Иоанне и мучениче Иоанне, венцами небесными увенчанные, дерзновенно Христа Бога молите даровати людям земли Костромской веры правыя укрепление и душам нашим спасение.

Кондак, глас 4:

Богохранимая земля Костромская многия святыя Богови воспита; ту ныне и новомученицы Солигаличские, кровию своею верность Христу запечатлевшия, молитися усердно о всех, страдания и подвиги ваша почитающия.

Молитва Солигаличским новомученикам:

О святые и преславные новомученицы града Солигалича, священноиереи Иосифе и Владимире, священнодиаконе Иоанне и мучениче Иоанне, от юности Христа Бога в сердце своем носившие, с любовию и послушанием на поприще церковном послужившие! Прежде страданий ваших много ко всякой пользе изрядней людей православных града Солигалича потрудившеся, скорбящих и немощствующих утешители, обидимым помощницы, юношей воспитатели, во узах сущих к жизни праведней наставницы были есте. Времени же сущу за Христа пострадати, суеты мирской с радостью совлекшеся, новомучеников Российских первейшие, кончину мученическую от безбожников приемше во славословии Страдальца Божественнаго Христа Бога нашего, кровью своею древнюю землю Соли Галицкой обильно оросили есте. О святые угодницы Божий, в подвиге добром Подвигоположнику Христу уподобившиеся, на многи подвиги в годину огненнаго искушения верных чад Церкви нашея утвердившие!

Ныне же приимите усердные моления наша и вознесите я ко Престолу Всеблагаго Бога Вседержителя. Во славе предстоя Ему в сонме новомучеников и исповедников земли Русския, со Святейшим Тихоном, Патриархом Всероссийским, святым священномучеником Никодимом, архиепископом Костромским, и со всеми святыми Костромскаго края покровителями, прилежно молите Христа Бога нашего, да утвердит Он Церковь Свою святую, юже стяжал есть честною Своею Кровию, да сохранит в нас дух правыя веры и благочестия, страждущую страну нашу от лютых безбожных и от междоусобныя брани да свободит, Костромстей земли мир глубок и неотъемлем и благословение да дарует, нам же, чтущим святую память вашу, да подаст спасение и во всем благое поспешение, да выну благодаряще Триипостаснаго Бога нашего, славу и благодарение Ему воссылаем, Отцу и Сыну и Святому Духу, ныне и присно и во веки веков. Аминь.