Шрифт
Каноны Триоди Постной
Трипеснец в Четверг Шестой седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 5.
Пе́снь 4
Ирмо́с: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.
Припев: Поми́луй мя, Бо́же, поми́луй мя.
Заре́ю Ва́шего утеше́ния, затворе́нных в се́ни грехо́вней просвети́те, благоче́стно светоно́снии Ва́с восхваля́ющих апо́столи.
Припев: Поми́луй мя, Бо́же, поми́луй мя.
Любо́вь с милосе́рдием спря́гше, и на умоле́ние Христу́ вернии посла́ти потщи́мся, я́ко да и на́с воскреси́т от гро́ба та́йных страсте́й на́ших.
Припев: Поми́луй мя, Бо́же, поми́луй мя.
Любве́ плотски́я не пощади́м, умерщвле́ни душе́ю, и любо́вию прилепи́мся Изба́вителю, я́ко да от а́дова на́с изба́вит стра́шнаго осужде́ния.
Припев: Поми́луй мя, Бо́же, поми́луй мя.
Проре́кл еси́ Ла́зарево успе́ние, его́же по ма́ле воздви́г, от ссу́щих цветонося́щих прия́л еси́ хвалу́, стра́сти Твоея́ Спа́се мо́й о́бразы.
Припев: Пресвята́я Богоро́дице, спаси́ на́с.
Богоро́дичен: Из тебе́ Боже́ственная Вода́ истече́ безсме́ртия и жи́зни, Богороди́тельнице Всенепоро́чная: ю́же вкуша́ющии, жа́жды чи́стая смертоно́сныя избавля́ются.
Припев: Поми́луй мя, Бо́же, поми́луй мя.
Погреба́ется Ла́зарь, и на гро́бе я́же о Ма́рфе ны́не рыда́ют и пла́чут, предста́ти тебе́ Животода́вцу, жела́ющыя.
Припев: Поми́луй мя, Бо́же, поми́луй мя.
Сме́рть начина́ет трепета́ти, е́же к не́й сни́тия Твоего́ Христе́ ощуща́ющи: я́ко жи́знь бо, тще́тну сию́ показа́л еси́ конце́м.
Припев: Поми́луй мя, Бо́же, поми́луй мя.
Сни́дитеся, прииди́те, и́же в пусты́нях и пеще́рах, сре́сти гряду́щаго на жребя́ти, Го́спода Сла́вы в пе́снех.
Сла́ва, тро́ичен: Еди́нице Про́стая, Несозда́нная, Безнача́льное Естество́, в Тро́ице пева́емое ипоста́сьми, спаси́ ны ве́рою покланя́ющыяся держа́ве Твое́й.
И ныне. Богоро́дичен: Из Отца́ безле́тна Сына, в ле́то Богороди́тельнице, неискусому́жно родила́ еси́, стра́нно чу́до, пребы́вши Де́ва доя́щи.
Пе́снь 8
Ирмо́с: Тебе́ Вседе́телю в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.
Припев: Поми́луй мя, Бо́же, поми́луй мя.
Ка́мень тя́жкий от се́рдца моего́ отя́ти, моли́те Всеще́драго, ка́мение яви́вшеся, краеуго́льнаго ка́мене, богоглаго́ливии апо́столи Госпо́дни.
Припев: Поми́луй мя, Бо́же, поми́луй мя.
И́дем, Твои́м провозглаша́л еси́ друго́м, дру́г Мо́й Ла́зарь уже́ у́спе: сего́ воздвиза́я, усплю́ сме́рти всепа́губную зло́бу во ве́ки.
Припев: Поми́луй мя, Бо́же, поми́луй мя.
Кро́тцы душе́ю, и смире́ни нра́вом бы́вше, благода́тию прии́мем кро́ткаго все́х гряду́щаго Влады́ку, горды́ню сокруши́ти лука́ваго.
Припев: Пресвята́я Богоро́дице, спаси́ на́с.
Богоро́дичен: Две́рь Тя́ све́та просвеще́нную ви́дит проро́к, Всенепоро́чная, Светода́вца бо ражда́еши несказа́нно, на́м уподо́бившася: его́же превозно́сим во вся́ ве́ки.
Припев: Поми́луй мя, Бо́же, поми́луй мя.
Мари́а же и Ма́рфа ны́не рыда́ют, во гро́бе лежа́ща ви́дяще Ла́заря, и боле́зненно вопию́т: а́ще бы бы́л Христо́с зде́, сро́дник на́ш не бы́ у́мерл.
Припев: Поми́луй мя, Бо́же, поми́луй мя.
А́д да ча́ет погуби́тися, и́бо Жи́знь прихо́дит Ла́заря воздви́гнути вопию́ща: благослови́те, по́йте, и превозноси́те во вся́ ве́ки.
Припев: Поми́луй мя, Бо́же, поми́луй мя.
Доброде́тели я́ко ве́тви, и я́ко ва́иа, ко сре́тению угото́вим, и Царю́ Христу́ ве́рнии возопие́м: благослови́те, по́йте, и превозноси́те во вся́ ве́ки.
Слава. Тро́ичен: Безнача́льным и Рождество́м же и происхожде́нием, Отцу́ покланя́юся ро́ждшему, Сына прославля́ю ро́ждшася, воспева́ю совозсия́вша Отцу́ же и Сы́ну, Ду́ха Свята́го.
И ныне. Богоро́дичен: Его́же родила́ еси́ Де́во несказа́нно, всегда́ я́ко Человеколю́бца не преста́й моля́щи, да от бе́д спасе́т к Тебе́ прибега́ющыя.
Пе́снь 9
Ирмо́с: Иса́ие лику́й, Де́ва име́ во чре́ве, и роди́ Сына Емману́ила, Бо́га же и челове́ка, Восто́к и́мя ему́: Его́же велича́юще, Де́ву ублажа́ем.
Припев: Поми́луй мя, Бо́же, поми́луй мя.
Дру́жбы изба́ви мя́ льсти́ваго влады́ко Христе́, дру́ги Твоя́ му́дрыя ученики́ показа́вый, с ни́миже ше́д возста́вил еси́ дру́га Твоего́ ве́рнаго, спа́се Ла́заря, благода́рно воспева́юща Тя́.
Припев: Поми́луй мя, Бо́же, поми́луй мя.
Исполне́нием Го́споди поста́, испо́лни на́ша сердца́ же и у́м, Благоутро́бне, ра́дости, апо́стол Твои́х мольба́ми, чи́сте возлюби́вших Тя́, Спа́са ду́ш на́ших.
Припев: Поми́луй мя, Бо́же, поми́луй мя.
Смердя́ гнойми́ зло́бы, во гро́бе живу́ ле́ности Христе́. Те́мже вопию́ Ти: воздви́гни, спаси́ мя, я́ко да и а́з с ве́твьми доброде́телей усря́щу Тя́, взыва́я оса́нна Бо́гу.
Припев: Пресвята́я Богоро́дице, спаси́ на́с.
Богоро́дичен: Во дву́ во́лю и существу́ родила́ еси́ на́м Сына Отрокови́це, единоро́дна Отцу́, бы́вша челове́ка, да на́с пока́жет о́бщники естества́, Пречи́стая, Боже́ственнейшаго, Пребоже́ственный.
Припев: Поми́луй мя, Бо́же, поми́луй мя.
В гро́бе Ла́зарь двоеде́нствует дне́сь, и над ни́м пролива́ете сле́зы Мари́а же и Ма́рфа, я́ко сестры́ родны́я: Христо́с же гряде́т к нему́ с боже́ственными апо́столы, показа́ти ве́лие чу́до.
Припев: Поми́луй мя, Бо́же, поми́луй мя.
Сме́рте всепа́губная, приими́ разруше́ние, вра́тницы же твои́ закле́пы да блюду́т: и́бо глаго́лом сокруши́т твоя́ врата́ Христо́с, Ла́заря возста́вив. пи́й пе́рвое сие́ а́де проро́к Тебе́ вопие́т с на́ми.
Припев: Поми́луй мя, Бо́же, поми́луй мя.
Госпо́дь гряде́т все́сти, я́коже пи́сано, на жребя́: лю́дие гото́витеся со стра́хом прия́ти Царя́ Все́х с ва́ием, я́ко Победи́теля Сме́рти, из а́да воздви́гшаго Ла́заря.
Сла́ва, тро́ичен: Еди́наго Единороди́телю, единоро́днаго Сына О́тче: и еди́не еди́наго Све́те, Све́та Сия́ние: и еди́ный Еди́не еди́наго Бо́га, Святы́й Ду́ше, Го́спода Госпо́дь, вои́стинну сы́й. о Тро́ице Еди́нице свята́я, спаси́ мя богосло́вяща Тя́.
И ныне, Богоро́дичен: Чу́до Рождества́ Твоего́ удивля́ет мя́ Всенепоро́чная, ка́ко зачина́еши безсе́менно Необиме́ннаго? рцы́, ка́ко де́вствуеши, ро́ждши я́ко Ма́ти? е́же па́че естества́ ве́рою прие́м, Рожде́нному поклони́ся, ели́ка хо́щет бо и мо́жет.
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
