Шрифт
Каноны Триоди Постной
Трипеснец в Среду Шестой седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 2.
Пе́снь 3
Ирмо́с: Непло́дствовавший мо́й у́м, плодоно́сен Бо́же покажи́ ми, де́лателю до́брых, насади́телю благи́х, благоутро́бием Твои́м.
Припев: Поми́луй мя, Бо́же, поми́луй мя.
Си́лою Креста́ Твоего́ укрепи́в у́м мо́й, изнемо́гший прило́гми лука́выми, к хоте́нию твоему́ напра́ви Го́споди.
Припев: Поми́луй мя, Бо́же, поми́луй мя.
Уны́ния дрема́нием, на одре́ спя́ща мя́ сласте́й воздви́гни Го́споди, и Твои́м страсте́м покло́нника покажи́.
Припев: Поми́луй мя, Бо́же, поми́луй мя.
Просвети́вшеся душа́ми, посто́м чи́сты усре́сти по́йдем Христа́, ко Иерусали́му гряду́щаго пло́тию.
Припев: Пресвята́я Богоро́дице, спаси́ на́с.
Богоро́дичен: Неопали́вшаяся огне́м Божества́ Чи́стая, попали́ моя́ ве́щная стремле́ния страсте́й, я́ко да Ве́рно Чи́стая сла́влю Тя́.
Припев: Поми́луй мя, Бо́же, поми́луй мя.
Дне́сь Ла́зарь уме́рый, не утаи́ся всеви́дящаго о́ка Иису́сова. Те́мже сказу́ет сие́ ученико́м, вопия́: Ла́зарь дру́г На́ш у́спе, воскреси́ти его́ иду́.
Припев: Поми́луй мя, Бо́же, поми́луй мя.
Во Иуде́ю Го́споди па́ки ити́ ре́к, ученики́ устраши́л еси́, но де́рзостно вопия́ше Фома́: живо́т е́сть, и́дем, а́ще у́бо и у́мрем, а́бие оживе́м.
Припев: Поми́луй мя, Бо́же, поми́луй мя.
Ра́дуйся Сио́не, ны́не гряде́т Ца́рь тво́й кро́ток, я́коже проро́к возопи́, и но́сит жребя́ Сего́ пло́тски, руко́ю Свое́ю вся́ содержа́щаго: пое́м Держа́ву Его́.
Сла́ва, тро́ичен: Тро́ице Единосу́щная, вседержи́телю О́тче, Сы́не Собезнача́льный, с Сопресто́льным Боже́ственным Ду́хом, Еди́но Поклоне́ние, Божество́ Несозда́нное, Тебе́ пое́м вси́ челове́цы.
И ныне. Богоро́дичен: Де́во Ма́ти пречи́стая, ко́реню Иессе́ов, от него́же Христо́с возсия́, Живоно́сный Цве́т земноро́дных, Е́юже изба́вихомся тли́ и сме́рти, Тя́ пое́м вси́ Чи́стая.
Пе́снь 8
Ирмо́с: В купине́ Моисе́ю Девы чу́до, на Сина́йстей горе́, прообрази́вшаго иногда́, по́йте, благослови́те, и превозноси́те во вся́ ве́ки.
Припев: Поми́луй мя, Бо́же, поми́луй мя.
Смире́нныя моея́ души́ тя́жкий ка́мень лю́таго уны́ния отвали́ Христе́, и воздви́гни мя́ от гро́ба нечу́вствия в сла́ву Твою́ Сло́ве.
Припев: Поми́луй мя, Бо́же, поми́луй мя.
Сме́рть дру́га Твоего́ предсказа́л еси́ друго́м, за милосе́рдие ми́лости, Прови́дче и Бо́же: его́же име́л еси́ воздви́гнути из гро́ба четверодне́вна, к твоему́ славосло́вию.
Припев: Поми́луй мя, Бо́же, поми́луй мя.
Во Иуде́ю па́ки Христе́ гряде́ши, и́щущую жи́зни Тя́ Дре́во, Дре́вом уби́ти, жела́я обезсме́ртвити умерщвле́нныя Дре́ва сне́дию.
Припев: Пресвята́я Богоро́дице, спаси́ на́с.
Богоро́дичен: В тебе́ Де́во чи́стая, ви́дена бы́ша вся́ ше́ствия Бо́га, сохра́ншаго Твою́ чистоту́ по рождестве́, запечатле́нну я́ве во вся́ ве́ки.
Припев: Поми́луй мя, Бо́же, поми́луй мя.
Ла́зарь дне́сь уме́рый изно́сится, дру́г Христо́в, и рыда́ют су́щии с Мари́ею и Ма́рфою вси́: Христо́с же ра́достию прихо́дит к нему́, показа́ти лю́дем, я́ко То́й е́сть живо́т все́х.
Припев: Поми́луй мя, Бо́же, поми́луй мя.
Я́ко из горы́ Елео́нския, от высоты́ ми́лостыней, доброде́телей ве́твие лю́дие секу́ще, прииди́те угото́вим к на́м мы́сленно прише́ствие Христо́во, пою́ще, благословя́ще Его́, и превознося́ще во вся́ ве́ки.
Припев: Поми́луй мя, Бо́же, поми́луй мя.
Со о́троки и мы́ усря́щим Христа́ Бо́га, вме́сто ва́ий принося́ще ми́лостыню, в моли́тве серде́чней, с ве́твьми оса́нна вопию́ще: благослови́те, и превозноси́те Его́ во ве́ки.
Слава. Тро́ичен: Триипоста́сная Еди́нице, О́тче, Сы́не и Ду́ше Живы́й, Еди́но Божество́, Еди́но Ца́рство, Тя́ хва́лят незаходи́маго све́та А́нгельская во́инства, и мы́ земни́и пое́м, благослови́м, и превозно́сим во вся́ ве́ки.
И ныне. Богоро́дичен: Се́ вси́ ро́дове блажи́м Тя́ Пречи́стая, вели́чия Твоя́ зря́ще: Ты́ бо ражда́еши преесте́ственно все́х Творца́ Бо́га су́ща и челове́ка. Те́мже Тя́ благослови́м, и превозно́сим во ве́ки.
Пе́снь 9
Ирмо́с: От земноро́дных кто́ слы́ша таково́е? или кто́ ви́де когда́, я́ко Дева обре́теся во чре́ве иму́щая? и безболе́зненно Младенца поро́ждшая? таково́е Твое́ чу́до и Тя́ Чистая Богородице велича́ем.
Припев: Поми́луй мя, Бо́же, поми́луй мя.
Дании́л посто́м огражде́н, загради́ уста́ звере́й: сему́ ревну́ющи душе́ моя́, рыка́ющаго я́коже льва́ зми́я, и и́щущаго бра́шно сотвори́ти вся́кую ду́шу, кре́стною по́мощию отжени́.
Припев: Поми́луй мя, Бо́же, поми́луй мя.
Сло́ве Бо́жий, умерщвле́нную греха́ми ду́шу мою́, и затворе́нную во гро́бе преступле́ния, животода́тельным Твои́м сло́вом воскреси́в, принести́ Тебе́ ве́тви доброде́телей, победи́телю сме́рти, сподо́би.
Припев: Поми́луй мя, Бо́же, поми́луй мя.
Не́бо я́ко престо́л име́яй, и подно́жие зе́млю: Бо́га Отца́ Сло́во, на жребя́ти носи́мь, во гра́д вхо́дит Святы́й из у́ст младе́нец хвалу́ кра́сную, я́ко Ца́рь все́х соверши́ти.
Припев: Пресвята́я Богоро́дице, спаси́ на́с.
Богоро́дичен: В жена́х Ты́ еди́на украси́лася еси́, о Пречу́дная Чи́стая! красне́йшее Сло́во роди́вши, па́че все́х челове́к я́вльшагося красне́йша: Того́ у́бо моли́, скве́рну очи́стити, Де́во, се́рдца моего́.
Припев: Поми́луй мя, Бо́же, поми́луй мя.
Надгро́бныя сле́зы излива́ют Ла́заревы сестры́, зря́щыя сро́дника дне́сь под ка́менем го́рьким: Христо́с же мо́й издале́ча сие́ сказу́я, глаго́лаше апо́столом Свои́м, ра́дуюся ва́с ра́ди, не бе́х бо пло́тию та́мо.
Припев: Поми́луй мя, Бо́же, поми́луй мя.
Па́ки гряде́т к тебе́, уби́йце Иуде́е, Христо́с, спаси́тельную стра́сть жела́я испо́лнити я́ко Бо́г: Его́же иска́ла еси́ ка́мением уби́ти, се́ к Тебе́ самозва́н хотя́ прихо́дит ко уби́йству Твоему́, во е́же спасти́ на́с.
Припев: Поми́луй мя, Бо́же, поми́луй мя.
От фи́ник ва́иа спле́тше мы́сленно, и чу́вственно сре́тение Влады́це сотвори́м, гряду́щему к на́м: и́бо благослове́н Гряды́й во и́мя Го́спода же и Отца́, я́ко Сы́н и́стинный.
Сла́ва, тро́ичен: Божество́ еди́ница, и Тро́ица е́сть: о пресла́внаго обраще́ния! соединя́емая естество́м, дели́тся Ли́цы, сво́йственно: несеко́ма бо сече́тся, еди́но су́щи трои́тся: сия́ Оте́ц е́сть, Сы́н, и Ду́х Живы́й, соблюда́ющая все́.
И ныне, Богоро́дичен: Деторо́дную де́ву кто́ слы́ша, и ма́терь без му́жа? Мари́е соверша́еши чу́до: но скажи́ Ми, ка́ко? не испыту́й глубины́ Богорожде́ния Моего́: сие́ всеи́стинное, па́че челове́ча ума́ постиже́ние.
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
