Шрифт
Каноны Триоди Постной
Трипеснец во Вторник Шестой седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 6.
Пе́снь 2
Ирмо́с: Ви́дите, ви́дите, я́ко А́з е́смь Бо́г: ма́нну одожди́вый, и во́ду из ка́мене источи́вый дре́вле в пусты́ни лю́дем Мои́м, десни́цею еди́ною, и кре́постию Мое́ю.
Припев: Поми́луй мя, Бо́же, поми́луй мя.
Во́лею обнища́л еси́, естество́м бога́тый Христе́: взалка́л еси́ пости́вся, насыща́яй вся́кое живо́тно. те́м мя́ насы́ти а́лчущаго Твоея́ благода́ти, и покажи́ та́мошния трапе́зы сло́ве о́бщника.
Припев: Поми́луй мя, Бо́же, поми́луй мя.
Ла́заря ни́щаго мя́ покажи́ грехо́в, Христе́, и расточи́ бога́тство, е́же зле́ собра́х, и соверше́нное Твое́ любле́ние ще́дре испо́лнив, та́мошняго изба́ви мя́ муче́ния стра́шнаго.
Припев: Поми́луй мя, Бо́же, поми́луй мя.
О́троки обостри́в си́льнейшыя огня́, иногда́ в Вавило́не соде́ла по́ст: те́м поревнова́вши о душе́ моя́, не уныва́й, и о́гнь сладостра́стий ду́ха угаси́ши росо́ю.
Припев: Пресвята́я Богоро́дице, спаси́ на́с.
Богоро́дичен: Ра́дуйся, Тебе́ вопие́м ро́ждшей ра́дость, Богоро́дице Де́во обра́дованная: Бо́га, Его́же родила́ еси́, умоли́, изба́витися от бе́д и тли́, воспева́ющым тя́ при́сно.
Припев: Поми́луй мя, Бо́же, поми́луй мя.
Ви́дите, ви́дите, я́ко А́з е́смь Бо́г, об ону́ страну́ Иорда́на ходя́й, слы́шав я́ко Ла́зарь боли́т, и реки́й: я́ко не у́мрет, но е́сть сие́ о сла́ве Мое́й.
Припев: Поми́луй мя, Бо́же, поми́луй мя.
Рыда́нием обложи́вшеся Ла́заревы сестры́, стра́сть Тебе́ Ве́детелю все́х явля́ют: но пребыва́еши ма́ло, да воздви́гнеши чу́до, и пока́жеши ученико́м Твои́м стра́шная.
Припев: Поми́луй мя, Бо́же, поми́луй мя.
Ны́не украси́ся о Вифа́ние ра́достию, сотвори́вши прия́телище Царя́ все́х, я́ко прии́дет к Тебе́, да Ла́заря пока́жет па́ки теку́ща от тле́ния в живо́т.
Сла́ва, тро́ичен: Единоца́рственная, Триипоста́сная Еди́нице, Госпо́дство и Ца́рство веко́в, Тя́ сла́вят Отца́, и Сына, и Свята́го Ду́ха, мно́жество А́нгел, и все́ естество́ челове́ческое.
И ныне. Богоро́дичен: Кто́ не диви́лся бы зря́ в Тебе́ Соде́теля Де́во, назда́вшаго Ада́ма па́дшаго, несказа́нным соедине́нием, из Тебе́ пло́тию рожде́нна, неизме́нно, во спасе́ние на́ше.
Пе́снь 8
Ирмо́с: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.
Припев: Поми́луй мя, Бо́же, поми́луй мя.
Помышля́ю мно́жество согреше́ний, и уя́звлен жа́лом со́вести, я́коже в пла́мени болю́ окая́нный: уще́дри мя́ Сло́ве Бо́жий, Твое́ю ми́лостию.
Припев: Поми́луй мя, Бо́же, поми́луй мя.
Презре́в Ла́зарева исправле́ния, неми́лостиваго бога́таго нра́вом позави́дех: благоутро́бне Бо́же, обрати́в мя́ уще́дри, да Тя́ сла́влю во ве́ки вся́.
Припев: Поми́луй мя, Бо́же, поми́луй мя.
Душе́вною боле́знию одержи́мь, и умре́ти хотя́ отча́янием, Твоего́ Иису́се посеще́ния тре́бую, оживотвори́вшаго Тебе́ призыва́ющыя.
Припев: Пресвята́я Богоро́дице, спаси́ на́с.
Богоро́дичен: Пресвята́я Де́во, ты́ мя спаси́, мое́й не́мощи бу́ди по́мощь, Воли́теля Ми́лости роди́вшая, Его́же превозно́сим во вся́ ве́ки.
Припев: Поми́луй мя, Бо́же, поми́луй мя.
Ра́дуйся Вифа́ние, Ла́зарево оте́чество: в тебе́ бо Христо́с предста́в вели́чие соверши́т, оживи́в Ла́заря.
Припев: Поми́луй мя, Бо́же, поми́луй мя.
Ла́зарь боле́знует, да Ты́ просла́вишися Сы́не Бо́жий о не́м: и пою́т Тя́ непреста́нно дела́ вся́ Го́спода.
Припев: Поми́луй мя, Бо́же, поми́луй мя.
Доброде́телей ве́тви к Сре́тению Христо́ву гото́вяще, ны́не зове́м: благослови́те дела́ Госпо́дня Го́спода.
Слава. Тро́ичен: Тро́ицу Всесвяту́ю во Отце́, и Сы́не, и Ду́хе, воспева́юще пое́м: благослови́те дела́ Госпо́дня Го́спода.
И ныне. Богоро́дичен: Неизрече́нное Твое́ Рождество́ вси́ пое́м Чи́стая, и чту́ще Его́ я́ко Бо́га, благослови́м вся́ дела́, я́ко Соде́теля и Го́спода.
Пе́снь 9
Ирмо́с: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю же, Всечи́стая, яви́ся челове́ком Сло́во Воплоще́нно, Его́же велича́юще, с небе́сными во́и Тя́ ублажа́ем.
Припев: Поми́луй мя, Бо́же, поми́луй мя.
Пре́жде вкуше́ние го́рькое челове́ка первозда́ннаго лю́те из рая́ изгна́, и сме́рти се́ти припряже́: пости́ся о душе́ моя́, бе́гай подража́ния, бе́гай наслажде́ния сла́сти многоболе́зненныя.
Припев: Поми́луй мя, Бо́же, поми́луй мя.
Во у́м прие́млю Твое́ суди́ще, и пла́мень неугаси́мый, Судие́ пра́веднейший, себе́ осужда́ю пре́жде суда́: ужасо́хся бо и трепе́щу, безме́рно прегреши́в Тебе́, я́ко и́н никто́же на земли́. Те́мже молю́ Тя, уще́дри мя́.
Припев: Поми́луй мя, Бо́же, поми́луй мя.
Страсте́й измы́емся омраче́ния, просвети́тельными моли́твами, и доброде́телей ве́тви нося́ще, сре́сти Христа́ потщи́мся, на жребя́ти ча́ема ны́не все́сти, гото́вяща же ся страда́ти, за е́же спасти́ на́с.
Припев: Пресвята́я Богоро́дице, спаси́ на́с.
Богоро́дичен: Из тебе́ Де́во Богоблагода́тная, в нощи́ страсте́й одержи́мым, возсия́ све́та и ми́ра Христо́с Пода́тель, от невня́тия разреша́яй преступле́ние, и избавле́ние на́м я́ве да́руяй.
Припев: Поми́луй мя, Бо́же, поми́луй мя.
Ны́не мертвогро́бная гото́ви Ла́заре му́дре, сконча́ешися бо от жи́зни, у́тро умре́ти имы́й, гро́б узри́, въоньже всели́шися: но тебе́ Христо́с па́ки оживи́т, воздви́г четверодне́вна.
Припев: Поми́луй мя, Бо́же, поми́луй мя.
Вифа́ние лику́й, к тебе́ бо прии́дет Христо́с, чу́до соверша́я ве́лие и стра́шное, связа́в сме́рть, воскреси́т вся́ко я́ко Бо́г Ла́заря уме́ршаго, и Зижди́теля велича́юща.
Припев: Поми́луй мя, Бо́же, поми́луй мя.
Прииди́те угото́вим Го́сподеви к сре́тению, ве́тви доброде́телей нося́ще Ему́: та́ко бо Его́ прии́мем, я́коже во гра́де Иерусали́ме в души́ на́шей, покланя́ющеся и пою́ще Его́.
Сла́ва, тро́ичен: Еди́но Существо́ Тя́ воспева́ю, Безнача́льная Тро́ице, Честна́я Живонача́льная, Несеко́мая Еди́нице, О́тче нерожде́нне, и рожде́нне Сло́ве и Сы́не, и Ду́ше Святы́й, спаси́ на́с пою́щих Тя́.
И ныне, Богоро́дичен: Па́че ума́ рождество́ Твое́ Богома́ти, без му́жа бо зача́тие в Тебе́, и Де́вственное Рождество́ бы́сть: и́бо Бо́г е́сть рожде́йся, Его́же велича́юще, Тя́ Де́во ублажа́ем.
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
