Трипеснец в Понедельник Шестой седмицы

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кано́н трипе́снец. Гла́с 1.

Пе́снь 1

Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Припев: Поми́луй мя, Бо́же, поми́луй мя.

Стра́сти умертви́м воздержа́нием, и ду́х оживи́м Боже́ственными де́тельми, я́ко да у́зрим стра́сть Христо́ву честну́ю чи́стым умо́м.

Припев: Поми́луй мя, Бо́же, поми́луй мя.

Неми́лостиваго поревнова́вша бога́таго нра́вом, Ще́дре Человеколю́бче молю́ Тя, сочини́ мя Ла́зарю убо́гому, избавля́я мя́ пла́мене, и негаси́маго огня́.

Припев: Поми́луй мя, Бо́же, поми́луй мя.

От все́х пости́хся исправле́ний, в сы́тость наслади́хся прегреше́ний, Го́споди: ны́не у́бо а́лчуща мя́ спаси́тельным и честны́м насы́ти бра́шном.

Припев: Пресвята́я Богоро́дице, спаси́ на́с.

Богоро́дичен: Мене́ осужде́ннаго во осужде́нии, Пречи́стая Влады́чице, пове́рженнаго де́лы мои́ми, спаси́, уще́дри, всеще́драго Бо́га ро́ждшая.

Припев: Поми́луй мя, Бо́же, поми́луй мя.

Светоно́сный пра́здник сря́щим ве́рнии, предпра́зднствующе его́ дне́сь све́тло, да живоно́сную сподо́бимся стра́сть ви́дети.

Припев: Поми́луй мя, Бо́же, поми́луй мя.

Гряде́т, и и́дет Христо́с ко Иерусали́му я́ко Ца́рь, седя́ на жребя́ти о́сли, язы́ческое подклони́ти безслове́сие под яре́м Отцу́.

Припев: Поми́луй мя, Бо́же, поми́луй мя.

Се́ гряде́т Христо́с ко гра́ду Виффаги́и, ра́дуйся Ла́зарево оте́чество Вифа́ние, я́ко тебе́ пока́жет чу́до ве́лие, Ла́заря возставля́я из ме́ртвых.

Сла́ва, тро́ичен: В Божестве́ еди́ном триипоста́сная Еди́нице, О́тче нерожде́нне Бо́же, и Сы́не Единоро́дне, и Еди́не Святы́й Ду́ше, Единоца́рственная Держа́во, спаси́ вся́ ны́.

И ныне. Богоро́дичен: Пресла́вная возглаго́лашася о Тебе́ всю́ду, я́ко родила́ еси́ пло́тию все́х Творца́, Богоро́дице Мари́е безневе́стная и неискусобра́чная.

Пе́снь 8

Ирмо́с: Его́же ужаса́ются а́нгели и вся́ во́инства, я́ко Творца́ и Го́спода, по́йте свяще́нницы, просла́вите о́троцы, благослови́те лю́дие, и превозноси́те во вся́ ве́ки.

Припев: Поми́луй мя, Бо́же, поми́луй мя.

Непло́дными обогати́хся окая́нный помышле́ньми, ду́шу оскверни́х беззако́нными сластьми́, и тьма́ окружа́ет мя́ отча́яния: озари́ мне́ сия́ние, Бо́же мо́й, покая́ния.

Припев: Поми́луй мя, Бо́же, поми́луй мя.

Я́коже дре́вле просвети́л еси́ слепа́го от рожде́ния, ду́шу мою́ озари́, не ви́дящую све́та Твоего́ ми́лостиве, но во тьме́ лю́таго забве́ния погре́бшуюся, и попече́ний жите́йских.

Припев: Поми́луй мя, Бо́же, поми́луй мя.

Пости́вся Илиа́, отве́рзе небеса́, и ту́чами напои́ жа́ждущую зе́млю: пости́мся, струи́ почерпа́юще душе́вных сле́з, я́ко да поми́луемся.

Припев: Пресвята́я Богоро́дице, спаси́ на́с.

Богоро́дичен: Я́ко одушевле́нная лоза́, процвела́ еси́ на́м гро́зд зре́лый, источа́ющий на́м, Чи́стая Де́во, вино́ оставле́ния, и грехо́вное изсуша́ющее пия́нство.

Припев: Поми́луй мя, Бо́же, поми́луй мя.

Отве́рзеся преддве́рие Ла́зарева животво́рия: Христо́с бо гряде́т, я́ко от сна́ воздви́гнути уме́ршаго, побори́ти жи́знию сме́рть.

Припев: Поми́луй мя, Бо́же, поми́луй мя.

Ве́лия тебе́ похвала́, о Вифа́ние, я́ко Зижди́теля странноприя́ти сподо́билася еси́, вопию́щи: благослови́те дела́ Госпо́дня Го́спода.

Припев: Поми́луй мя, Бо́же, поми́луй мя.

Пе́снь Тебе́ прино́сим, я́ко на жребя́ти но́сишися, в вы́шних на Херуви́мех восходя́й, да все́х повине́ши Христе́ держа́ве Твое́й.

Слава. Тро́ичен: Тя́ Пресу́щная, Трегу́бая Еди́нице, совокупля́емая в разделе́нии зра́ком Ли́ц, Отца́, и Сына, и Ду́ха Боже́ственнаго сла́вим.

И ныне. Богоро́дичен: Е́же ра́дуйся, веща́ем Тебе́ со А́нгелом, я́ко воздви́гла еси́ ра́дость, Спа́са Ми́ра: Его́же моли́ Де́во Всепе́тая.

Пе́снь 9

Ирмо́с: Живоприе́мный исто́чник приснотеку́щий, светоно́сный свети́льник благода́ти, хра́м одушевле́нный, се́нь пречи́стую, небесе́ и земли́ простра́ннейшую, Богородицу ве́рнии велича́ем.

Припев: Поми́луй мя, Бо́же, поми́луй мя.

Умерщвле́н бы́в мно́гими прегреше́ньми, небреже́ния во гро́бе одержи́мь е́смь, ка́мень отча́яния име́яй надлежа́щий: его́же расто́рг Христе́ Твое́ю ми́лостию, я́коже Ла́заря дре́вле, ны́не воскреси́ мя.

Припев: Поми́луй мя, Бо́же, поми́луй мя.

Бога́таго убежи́м подража́ния, осужде́ннаго в пла́мень неугаси́мый: и Ла́зарево возлю́бим в боле́знех терпе́ние, я́ко да отсю́ду на́с отше́дших Авраа́м в не́дро восприи́мет.

Припев: Поми́луй мя, Бо́же, поми́луй мя.

Страстоуби́йцу по́ст возлю́бим, в моли́твах приле́жно упраздни́мся, пла́чим, рыда́им, и те́пле воздо́хнем, я́ко да на́с Иису́с уте́шит, и Ца́рствия прича́стники соде́лает.

Припев: Пресвята́я Богоро́дице, спаси́ на́с.

Богоро́дичен: Де́вства боже́ственное сокро́вище, пра́отец еди́ное исправле́ние, исто́чник точа́щий благоутро́бия бе́здну, добро́ту Иа́ковлю, Богоро́дицу, Е́юже спаса́емии воспои́м.

Припев: Поми́луй мя, Бо́же, поми́луй мя.

Дне́сь Христу́ явля́ется, об ону́ страну́ Иорда́на ходя́щу, боле́знь Ла́зарева, и я́ко прове́дец глаго́лет: боле́знь сия́ не́сть ны́не к сме́рти.

Припев: Поми́луй мя, Бо́же, поми́луй мя.

Благоугото́вися Вифа́ние, украси́ Твоя́ Боже́ственныя вхо́ды, разшири́ преддве́рия: се́ бо Влады́ка прихо́дит со апо́столы, овча́ свое́ оживля́я.

Припев: Поми́луй мя, Бо́же, поми́луй мя.

С добротворе́ния ве́твьми, и чистоты́ нося́ще ва́иа, угото́вимся вси́ Христа́ сре́сти, ко Иерусали́му гряду́щаго я́ко Бо́га на́шего.

Сла́ва, тро́ичен: Тя́ Триипоста́сную Еди́ницу, и Неразде́льное Существо́, е́же шестокри́льная славосло́вят во́инства, и челове́ческий ро́д пе́сньми велича́ем.

И ныне, Богоро́дичен: Тя́ от Отца́ безле́тно, и от ма́тере несказа́нно, в ле́то ро́ждшагося во все́х спасе́ние, я́ко Творца́ и Влады́ку пе́сньми велича́ем.

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)

Таже малых 12, глаголюще на кийждо поклон: Бо́же, очи́сти мя гре́шнаго.

И паки последи молитву всю:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.