Шрифт
Каноны Триоди Постной
Трипеснец в Пятницу Шестой седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 4.
Пе́снь 5
Ирмо́с: Возсия́й ми́ Го́споди све́т повеле́ний Твои́х, я́ко к Тебе́ ду́х мо́й у́тренюет и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.
Припев: Поми́луй мя, Бо́же, поми́луй мя.
На Кресте́ Го́споди Твое́м усну́в, преложи́л еси́ на со́н влады́ко сме́рть. Вопи́л бо еси́: дру́г Ла́зарь у́спе, но по́йдем возбуди́ти его́ ны́не.
Припев: Поми́луй мя, Бо́же, поми́луй мя.
Проро́к пропове́дания исполня́я прорече́ния, в пророкоуби́йственный гра́д Христе́ ще́дрый прише́л еси́, убие́н бы́ти во́лею, убие́нна мя́ тле́ю, спаса́я.
Припев: Поми́луй мя, Бо́же, поми́луй мя.
Те́ло непокори́вое сло́ву повину́вше, воздержа́нием и мольба́ми, мона́си и прости́и лю́дие Христа́ усря́щите, на жребя́ все́дша, гряду́ща же пострада́ти.
Припев: Пресвята́я Богоро́дице, спаси́ на́с.
Богоро́дичен: Кропле́нием ми́лости Твоея́ напо́й Пречи́стая, изсо́хшую мою́ мы́сль, пла́менем греха́ и угаше́нный се́рдца моего́ вожжи́ све́щник, две́ре све́та.
Припев: Поми́луй мя, Бо́же, поми́луй мя.
Дво́ицу ученик твои́х, внегда́ хоте́л еси́ дости́гнути в Вифа́нию Христе́, посыла́еши привести́ Тебе́ жребя́, на не́же никто́же от челове́к все́де: кроме́ бо Тебе́ Спа́се никто́же безслове́сныя язы́ки повину́.
Припев: Поми́луй мя, Бо́же, поми́луй мя.
Сни́деся Иуде́ов от Иерусали́ма в Вифа́нию мно́жество, и с сро́дницами Ла́заревыми дне́сь стра́ждут: нау́трие же разуме́вше сего́ из гро́ба ска́чуща, дви́жутся на убие́ние Христо́во.
Припев: Поми́луй мя, Бо́же, поми́луй мя.
Се́ угото́вася Христо́с предста́ти Иерусали́му, и́же в гора́х вси́ и пусты́нях, собери́теся мона́си, того́ ра́достию усре́сти, со все́ю поднебе́сною.
Сла́ва, тро́ичен: Тро́ице Пресвята́я О́тче, и Сы́не, и Ду́ше Вседе́тельный, Блаже́нное Божество́, Безнача́льное Существо́, и Трисия́нный Све́те, Всезри́тельная Держа́во, рабы́ твоя́ сохрани́.
И ныне. Богоро́дичен: На кресте́ Тя ви́дящи пригвожде́нна гвоздьми́ Христе́ Ма́ти Твоя́, и из ре́бр живо́тных теку́щую кро́вь и во́ду, уязвля́шеся Ма́терним милосе́рдием, Сына бо Тя́ позна́ своего́.
Пе́снь 8
Ирмо́с: Земля́, и вся я́же на не́й, мо́ре и вси исто́чницы, небеса́ небес, све́т и тьма, мраз и зной, сы́нове челове́честии, свяще́нницы благослови́те Господа, и превозноси́те Его во ве́ки.
Припев: Поми́луй мя, Бо́же, поми́луй мя.
Воскресе́ние и живо́т иму́ще жены́ любе́зное, что́ рыда́ете го́рько? И́дет оживи́ти бли́жняго дру́га, свои́м Воскресе́нием, воста́ние все́х провозвеща́яй, Все́х Благоде́тель.
Припев: Поми́луй мя, Бо́же, поми́луй мя.
Жили́ща мона́хов собери́теся я́ко а́гнцы слове́снии, Началопа́стыря Христа́ усря́щите, ны́не ве́тви нося́ще: предгряде́т во́лею, я́ко а́гнец закла́тися Госпо́дь, я́ко да от во́лча изме́т мучи́тельства.
Припев: Поми́луй мя, Бо́же, поми́луй мя.
Гряду́щу Ти́ к Виффаги́и, топта́ние Твои́х но́г, вра́г ощуща́ше а́д, и нога́ма Ла́заревыма прикаса́шеся, глаго́ля: а́ще восхо́щет зва́ти Тя́ Жи́знь, не облени́ся, но изы́ди: разуме́х бо мое́ разруше́ние вско́ре.
Припев: Пресвята́я Богоро́дице, спаси́ на́с.
Богоро́дичен: Свяще́ннии гла́си тя́ проро́ков пропове́дуют обра́зно, две́рь, и го́ру, и се́нь, зе́млю святу́ю, све́тлый о́блак: из него́же су́щым во тьме́ и се́ни седя́щым, возсия́ со́лнце, Де́во, Еди́н Светода́тель.
Припев: Поми́луй мя, Бо́же, поми́луй мя.
Дво́ица ученик по́сланная привести́ подъяре́мника на о́блацех Восходя́щему, Его́же вся́ пою́т, и превозно́сят во вся́ ве́ки.
Припев: Поми́луй мя, Бо́же, поми́луй мя.
При две́рех Христо́с, про́чее Вифа́ние не се́туй: в ра́дость бо преложи́т пла́чь тво́й, твое́ воспита́ние воздви́г Ла́заря из гро́ба, пою́ща и превознося́ща Христа́ во ве́ки.
Припев: Поми́луй мя, Бо́же, поми́луй мя.
Сады́ доброде́телей, и чу́вственно ве́твьми я́ко сугу́ба Христа́ угото́вимся вси́ прия́ти, носи́ма на жребя́ти: Его́же превозно́сим во вся́ ве́ки.
Слава. Тро́ичен: Еди́н Бо́г у́бо Тро́ица, ни Отцу́ изступи́вшу в сыновство́, ниже́ Сы́ну премени́вшуся во исхожде́ние: но сво́йственная и обое́, све́т Бо́га Три́, сла́влю во ве́ки.
И ныне. Богоро́дичен: Еди́на нетле́нная ражда́еши, Еди́на дои́ши младе́нца небра́чная, Еди́на Зижди́теля ражда́еши и Влады́ку Твоего́, а́ще и Ма́терь и Раба́: Тя́ Де́во Ма́ти пое́м во ве́ки.
Пе́снь 9
Ирмо́с: Я́ко сотвори́ Мне́ вели́чия Си́льный и свя́то и́мя Его́, и ми́лость Его́ в ро́д и ро́д боя́щимся Его́.
Припев: Поми́луй мя, Бо́же, поми́луй мя.
Се́ предвозгласи́л еси́ Иису́се, взы́дем ко гра́ду свято́му, и рука́ма уби́йц вои́стинну преда́мся Кресту́, уби́тися пло́тию.
Припев: Поми́луй мя, Бо́же, поми́луй мя.
От сме́рти хотя́ Сло́ве, восхи́тити дру́га Твоего́, пло́тию умертви́тися на́с ра́ди пригвожда́ешися, челове́ки обезсмертвля́я ве́рныя, Еди́не Безсме́ртне.
Припев: Поми́луй мя, Бо́же, поми́луй мя.
Ва́иа целому́дрия принесе́м Христу́, на жребя́ти смири́вшуся пло́тию, и рце́м Ему́: на стра́сть прише́дый, благослове́н еси́ Спа́се.
Припев: Пресвята́я Богоро́дице, спаси́ на́с.
Богоро́дичен: Стра́шное твое́ рожде́ние, Богоро́дице Ма́ти Христа́: те́мже Тя́ блажи́м ве́рно, и сла́вим че́стно, ро́дове родо́в во ве́ки, ами́нь.
Припев: Поми́луй мя, Бо́же, поми́луй мя.
Ны́не посыла́я ученики́, Христо́с рече́: отреши́вше мне́ жребя́ приведи́те все́сти, да разрешу́ язы́ки от безслове́сия, и покорю́ я́ко Сы́н Отцу́.
Припев: Поми́луй мя, Бо́же, поми́луй мя.
Гряде́т Госпо́дь, отве́рзи твоя́ две́ри Вифа́ние, приими́ ве́рою влады́ку: и́бо гряде́т воскреси́ти от гро́ба Ла́заря, я́ко еди́н всеси́лен.
Припев: Поми́луй мя, Бо́же, поми́луй мя.
В пусты́нях и гора́х, и в верте́пех су́щии, прииди́те собери́теся с на́ми ваиено́сцы, сре́сти Царя́ и Влады́ку: гряде́т бо спасти́ ду́шы на́шя.
Сла́ва, тро́ичен: Трисия́нное Го́споди Твоего́ единонача́лия, све́тлыми сия́ньми, у́м на́ш облиста́я, от ле́сти многообра́зныя обраща́ет на́с к соедини́тельному обоже́нию.
И ныне, Богоро́дичен: Ра́дуйся Пала́то все́х Царя́, Е́юже Ца́рство Небе́сное отве́рзеся су́щым на земли́, Богоро́дице Де́во, и со А́нгелы житие́.
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
