Шрифт
Каноны Триоди Постной
Трипеснец в Понедельник Четвертой седмицы, Крестопоклонной
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 3.
Пе́снь 1
Ирмо́с: Пои́м Го́сподеви, сотво́ршему ди́вная чудеса́ в Чермне́м мо́ри: по́нтом бо покры́ проти́вныя, и спа́се Изра́иля. Тому́ еди́ному пои́м, я́ко просла́вися.
Припев: Поми́луй мя, Бо́же, поми́луй мя.
Светоно́сное Креста́ поклоне́ние все́м яви́ся, со́лнечную зарю́ спасе́ния испуща́ющее, и все́х озаря́ющее страсте́й омраче́нием одержи́мых: стеце́мся се́й чи́сте облобыза́ти.
Припев: Поми́луй мя, Бо́же, поми́луй мя.
Поста́ очи́стившеся благода́тию, Чи́стым умо́м, Чи́стому еди́ному, прииди́те, возопии́м гла́сом благодаре́ния: Ты́ кро́вь Твою́ Сло́ве за ны́ вся́ да́л еси́, Ты́ и Кресто́м освяща́еши ны́.
Припев: Поми́луй мя, Бо́же, поми́луй мя.
Запе́нся прило́ги змии́ными, паде́нием ужа́сным всегда́ лежу́, Спа́се, паде́ние первозда́ннаго стра́стию Твое́ю и Кресто́м испра́вивый, испра́ви, и наста́ви к хоте́ний Твои́х исполне́нию.
Припев: Пресвята́я Богоро́дице, спаси́ на́с.
Богоро́дичен: Предстоя́щи Кресту́ Твоему́ Го́споди, Неискусобра́чная, и Твоя́ я́звы зря́щи Влады́ко, уязвля́ема глаго́лаше: увы́ Мне́ Ча́до, боле́зни избе́гши в рождестве́ Твое́м, ны́не боле́зненно уязвля́юся.
Припев: Поми́луй мя, Бо́же, поми́луй мя.
Седми́ца свята́я сия́ и светоно́сная: Кре́ст всечестны́й предлага́ет ми́рови: прииди́те, поклони́мся, стра́хом же и любо́вию ду́шы просвети́вше, на не́м пригвозди́вшагося Христа́ в пе́снех сла́вяще.
Припев: Поми́луй мя, Бо́же, поми́луй мя.
Кресту́ Твоему́ вси́ покланя́емся Христе́, предпровожде́ние творя́ще Воскресе́ния Твоего́: пое́м гво́здия Твоя́, чти́м и копие́ Твое́, устна́ма и очи́ма, душе́ю же и те́лом си́ми очища́еми.
Припев: Поми́луй мя, Бо́же, поми́луй мя.
Четы́редесяте по́стных ста́дий преполовля́юще, прииди́те любо́вию со Христо́м и́дем к Боже́ственней стра́сти, да сраспе́ншеся Ему́, о́бщницы бу́дем Того́ Воскре́снию.
Сла́ва, тро́ичен: Тро́ице во еди́ном Существе́ пева́емая, О́тче, Сы́не, со Ду́хом Святы́м, безнача́льное, присносу́щное, несозда́нное Божество́, све́та исто́чниче и жи́зни: Тебе́ покланя́емся вси́ челове́цы, все́ осуществи́вшему.
И ныне. Богоро́дичен: Пое́м Тя́ Де́во Богоро́дице Чи́стая, херуви́мскую колесни́цу, из нея́же Бо́г роди́ся: Ты́ бо еди́на была́ еси́ исто́чник нетле́ния, источа́ющий все́м жи́знь, из него́же почерпа́юще исцеле́ние прие́млем.
Пе́снь 8
Ирмо́с: А́нгельми немо́лчно в вы́шних сла́вимаго Бо́га, небеса́ небе́с, земля́, и го́ры, и хо́лми, и глубина́, и ве́сь ро́д челове́ческий, пе́сньми Того́ я́ко Созда́теля, и Изба́вителя благослови́те, и превозно́сите во вся́ ве́ки.
Припев: Поми́луй мя, Бо́же, поми́луй мя.
Ядови́тыми страстьми́ и ду́шу и мы́сль уя́звлену стяжа́вшаго, Го́споди поми́луй, уще́дри Твои́м Кресто́м. Защити́ и от ре́бр Твои́х излия́нными ка́плями, да усе́рдно пою́: свяще́нницы благослови́те, лю́дие превозноси́те во вся́ ве́ки.
Припев: Поми́луй мя, Бо́же, поми́луй мя.
На горе́ дре́вле тебе́ Моисе́й прообрази́, ру́це возвы́сив, и Амали́ка побежда́я, Кре́сте всечестны́й, ему́же кла́няющеся дне́сь, побежда́ем де́монов иноплеме́нныя полки́, и ве́рою пое́м: свяще́нницы благослови́те, лю́дие превозноси́те во вся́ ве́ки.
Припев: Поми́луй мя, Бо́же, поми́луй мя.
Страстьми́ преклоне́на, враги́ запина́ема, обы́чаем лука́вым влеко́ма, уще́дри Благоутро́бне, Твои́м Кресто́м защити́, я́ко да пою́ неукло́нным се́рдцем: о́троцы благослови́те, свяще́нницы воспо́йте, лю́дие превозноси́те во вся́ ве́ки.
Припев: Пресвята́я Богоро́дице, спаси́ на́с.
Богоро́дичен: Боле́зненно стеня́щи, ма́терски восклица́ющи, и от вну́тренних ско́рби не терпя́щи, на Кре́ст взира́ла еси́ к Рожде́нному из Твоего́ чре́ва, Ча́до, вопию́щи, что́ виде́ние сие́? ка́ко стра́ждеши, естество́м безстра́стный, вся́ко хотя́ ро́д челове́ческий от тли́ свободи́ти?
Припев: Поми́луй мя, Бо́же, поми́луй мя.
В це́ркви предложе́нный Кре́ст Христо́в ви́дяще, стра́хом и ве́рою бра́тие прише́дше поклони́мся, Тому́ вопию́ще: Ты́ жи́знь процве́л еси́ челове́ком светоно́сне.
Припев: Поми́луй мя, Бо́же, поми́луй мя.
Победоно́сна в бра́нех, не́бо тя́ показа́ животво́рный на́м Кре́сте, ору́жие непобеди́мое, враго́м низложе́ние, Це́рквам ро́г, и ве́рным спасе́ние.
Припев: Поми́луй мя, Бо́же, поми́луй мя.
По́ст преполови́вше, дерза́им ду́хом на гряду́щее ю́ношески, благотеку́ще с Бо́гом бра́тие, я́ко да и Па́сху ра́достно у́зрим Христу́ воскре́сшу.
Слава. Тро́ичен: Отца́ Свята́го сла́влю, и Сы́на Свята́го чту́, и Ду́ха Свята́го пою́, единосу́щную Тро́ицу про́стую, Бо́га коего́ждо Си́х, Све́ты и Све́т, я́ко от со́лнца еди́наго происходя́ща.
И ныне. Богоро́дичен: Ра́дуйся две́ре непроходи́мая: ра́дуйся купино́ неопали́мая: ра́дуйся ру́чко злата́я: ра́дуйся горо́ несеко́мая: ра́дуйся Богоро́дице, упова́ние неруши́мое, и стено́ на Тя́ наде́ющымся.
Пе́снь 9
Ирмо́с: На Сина́йстей горе́, ви́де Тя́ в купине́ Моисе́й, неопа́льно о́гнь Божества́ заче́ншую во чре́ве: Дании́л же Тя́ ви́де го́ру несеко́мую: же́зл прозя́бший, Иса́иа взыва́ше, от ко́рене Дави́дова.
Припев: Поми́луй мя, Бо́же, поми́луй мя.
Вну́чата дре́вле Иа́ков благословля́я, прообража́ше све́тло Кре́ст честны́й, и́мже Ще́дре на́с благослови́, освяще́ния пода́тельную благода́ть подая́ покланя́ющымся ему́ и все́х Изба́вителя Тя́ прославля́ющым.
Припев: Поми́луй мя, Бо́же, поми́луй мя.
Поще́ния водо́ю ве́рнии очи́стившеся, и душе́ю и мы́слию, животода́тельное и боже́ственное Дре́во облобыза́им: предлежи́т бо я́ве все́м, источа́я боже́ственное оставле́ние, и све́т небе́сный, и жи́знь, и и́стинное ра́дование.
Припев: Поми́луй мя, Бо́же, поми́луй мя.
Судию́ Тя ве́м стра́шна, гряду́ща во сла́ве Божества́, все́х сокрове́нная обличи́ти тогда́ хотя́ща Го́споди. Те́мже Тебе́ зову́ Бла́же: согреши́х, прости́, не обличи́ моя́ мно́гая и лю́тая согреше́ния.
Припев: Пресвята́я Богоро́дице, спаси́ на́с.
Богоро́дичен: А́гнца дре́вле А́гница зря́щи на Кресте́ пригвожде́на, и омрача́ему со́лнечному сия́нию, пла́чущи глаго́лаше: Со́лнце сла́вы Иису́се, заше́л еси́ умерщвля́емь: но возсия́й воста́ния све́т лю́бящым Тя́.
Припев: Поми́луй мя, Бо́же, поми́луй мя.
На ме́сте, иде́же но́зе стоя́сте [Тебе́] Влады́ки и Бо́га, поклони́мся вси́ дне́сь Кресту́ всечестно́му, я́коже Дави́д взыва́ет богогла́снейший: и́бо вся́ содержа́й го́рстию, на се́м вознесе́ся.
Припев: Поми́луй мя, Бо́же, поми́луй мя.
На земли́ живу́щии приступи́те, посто́м чи́стии, и предлежа́щий ви́дяще дне́сь всечестны́й Кре́ст, поклони́теся стра́хом и ве́рою, весели́теся и сра́дуйтеся, освяще́ние душа́м почерпа́юще.
Припев: Поми́луй мя, Бо́же, поми́луй мя.
Благода́рную хвалу́ принесе́м Бо́гу вси́ лю́дие, я́ко ви́дяще ны́не облобыза́ем всесвяты́й Кре́ст. Разуме́йте у́бо и покаря́йтеся в се́м де́мони: язы́цы ва́рварстии разуме́йте, и покаря́йтеся, и́мже с на́ми Бо́г.
Сла́ва, тро́ичен: Существо́м Еди́ница е́сть несеко́ма, Пребоже́ственная Тро́ица, соединя́ема Естество́м, дели́тся Ли́цы сво́йственно: несеко́ма бо сече́тся, еди́но су́щи трои́тся. Сия́ Оте́ц е́сть, Сы́н, и Ду́х Живы́й, соблюда́ющая все́.
И ныне, Богоро́дичен: Деторо́дную де́ву кто́ слы́ша? и ма́терь без му́жа? Мари́е, соверша́еши чу́до: но скажи́ ми, ка́ко? Не испыту́й глубины́ Богорожде́ния Моего́. Сие́ всеи́стинное, па́че челове́ческаго ума́ постиже́ние.
Поклонение Кресту
Кресту́ Твоему́ покланя́емся, Влады́ко, / и свято́е Воскресе́ние Твое́ сла́вим. (Трижды с земным поклоном)
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
