Четверопеснец в Субботу Третьей седмицы.

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Четверопе́снец, гла́с 8.

Пе́снь 6

Ирмо́с: Содержи́ма мя́ приими́ человеколю́бче, грехи́ мно́гими, и припа́дающа щедро́там твои́м, я́ко проро́ка го́споди, и спаси́ мя́.

Припев: Ди́вен Бо́г во святы́х Свои́х, Бог Израилев

Кро́вными напои́сте ка́плями благочести́вых сердца́, злочести́вых же полки́ я́ве в ни́х потопи́сте, страстоте́рпцы достосла́внии.

Припев: Ди́вен Бо́г во святы́х Свои́х, Бог Израилев

Просла́вивше удесы́ свои́ми все́х Влады́ку, ны́не прославля́етеся непреста́нно: сла́ва ве́рным страда́льцы су́ще, и вели́цыи засту́пницы.

Припев: Ди́вен Бо́г во святы́х Свои́х, Бог Израилев

В ро́ве положи́лся еси́ преиспо́днем, ве́рою у́бо уме́ршым поко́й Сло́ве пода́ждь, свяще́нных страда́лец мольба́ми, и согреше́ний проще́ние.

Припев: Пресвята́я Богоро́дице, спаси́ на́с.

Богоро́дичен: Да Тя́ гла́сы немо́лчными восхва́лим Де́во, гла́сы на́шя сия́ приими́, и очище́ние долго́в прия́ти, Сы́на Твоего́ умоли́.

Припев: Ди́вен Бо́г во святы́х Свои́х, Бог Израилев

Ны́не му́ченик торжество́, стеце́мся, и страда́ния и́х всечестна́я ублажа́юще, Христа́ си́х венча́вшаго воспои́м.

Припев: Ди́вен Бо́г во святы́х Свои́х, Бог Израилев

Боже́ственною разжига́еми любо́вию Христо́вою на у́глех огня́ преходи́сте я́ко на росе́, того́ пою́ще му́ченицы блаже́ннии.

Припев: Сла́ва Тебе́ Бо́же на́ш, сла́ва Тебе́.

Огня́ и меча́, и сме́рти не убоя́вшеся, испове́дание соблюдо́сте спасе́ния, от Христа́ блаже́ннии укрепля́еми.

Припев: Ду́шы и́х во благи́х водворя́тся.

В ме́ртвых свобо́дь, я́ко сы́й Нача́льник живота́ и сме́рти, Ты́ упоко́й я́же прия́л еси́, и во дворы́ Твоя́ всели́ человеколю́бче.

Сла́ва: Тя́ Тро́ице пребезнача́льная, и Боже́ственная Еди́нице, Све́т и Све́ты пою́, Живота́ и Животы́, Ума́, Сло́ва, Ду́ха же Свята́го, и Свя́та, еди́наго Бо́га.

И ныне. Богоро́дичен: От ко́рене твоего́ возсия́ цве́т жи́зни, Иессе́е пра́отче взыгра́й, спаса́яй ми́р, от Чи́стыя Отрокови́цы Христо́с Бо́г.

Пе́снь 7

Ирмо́с: А́нгелом о́троки из огня́ спасы́й, и гремя́щую пе́щь преложи́вый на ро́су, благослове́н еси́ Бо́же оте́ц на́ших.

Припев: Ди́вен Бо́г во святы́х Свои́х, Бог Израилев

Кому́ лю́бящи стра́сти безслове́сныя, вои́стинну душе́ уподо́билася еси́? кого́ превосходя́ща име́ла еси́ во гресе́х? Возопи́й Христу́: спаси́ мя Благи́й.

Припев: Ди́вен Бо́г во святы́х Свои́х, Бог Израилев

Святи́и, во святы́х Почива́ющаго моли́те приле́жно, в сия́ святы́я дни́ освяти́ти все́х благочести́вых мудрова́ния.

Припев: Ди́вен Бо́г во святы́х Свои́х, Бог Израилев

Вы́шний, в ми́лости бога́тый, и Благи́й, рабо́м Твои́м оставле́ние пре́жде усо́пшым пода́ждь, лико́м пра́ведных сия́ сопричита́я, я́ко Человеколю́бец.

Припев: Пресвята́я Богоро́дице, спаси́ на́с.

Богоро́дичен: Родила́ еси́ кроме́ зако́нов естества́, Созда́теля бы́вша Челове́ка, Чи́стая: Того́ у́бо моли́ все́х беззако́ния презре́ти ны́не и прегреше́ния.

Припев: Ди́вен Бо́г во святы́х Свои́х, Бог Израилев

Честны́х му́ченик показа́вый па́мяти, ра́дость Це́ркви Твое́й, и душе́вное утеше́ние: благослове́н еси́ во ве́ки Го́споди Бо́же оте́ц на́ших.

Припев: Ди́вен Бо́г во святы́х Свои́х, Бог Израилев

Не лже́м Ти́ Христе́, ни отмета́емся, му́ченицы вопия́ху, посреде́ муче́ний, беззако́нныя судии́ удивля́юще: благослове́н еси́ во ве́ки Го́споди Бо́же оте́ц на́ших.

Припев: Сла́ва Тебе́ Бо́же на́ш, сла́ва Тебе́.

Му́ченический ли́че богоизбра́нный, рабы́ твоя́ сподо́би, покло́нники бы́ти Боже́ственному и животворя́щему Спа́сову Кресту́.

Припев: Ду́шы и́х во благи́х водворя́тся.

Жи́зни сокро́вище, Царю́ безсме́ртне, я́же избра́л еси́ рабы́ Твоя́ в ве́ре и наде́жде, ве́чныя Твоея́ жи́зни сподо́би.

Сла́ва: В тре́х Ли́цех еди́но Естество́ чти́м, Отца́, и Сы́на, и Ду́ха, проро́чески вопию́ще: благослове́н еси́ во ве́ки Го́споди Бо́же оте́ц на́ших.

И ныне. Богоро́дичен: Ка́ко я́ко Ма́ти ражда́еши, и Де́ва пребыла́ еси́? Яко Бо́га роди́х, не испыту́й ми́ о́браза: ели́ка бо хо́щет, твори́т, Богоотрокови́ца вопие́т.

Пе́снь 8

Ирмо́с: Богоглаго́ливии о́троцы в пещи́, со огне́м пла́мень попира́юще поя́ху: благослови́те дела́ Госпо́дня Го́спода.

Припев: Ди́вен Бо́г во святы́х Свои́х, Бог Израилев

Небоя́зненным иду́ще мудрова́нием к боле́зненным трудо́м му́ченицы, боле́зни плотски́я подъя́сте, и к неболе́зненному наслажде́нию преста́вльшеся вся́кую боле́знь се́рдца облегча́ете.

Припев: Ди́вен Бо́г во святы́х Свои́х, Бог Израилев

Вы́шняя тле́нными измени́вше, плотски́ми мя́ истле́вша страстьми́, поще́нием спаси́те, и моли́твами приле́жными му́ченицы боже́ственнии, все́х Бо́га моля́ще.

Припев: Ди́вен Бо́г во святы́х Свои́х, Бог Израилев

Моли́твами Христе́ му́ченик Твои́х, ми́лости Твоя́ все́м низпосли́, и к Тебе́ благоутро́бному преста́вльшымся от жития́, разреше́ние пода́ждь долго́в, и Тоже́ственный поко́й.

Припев: Пресвята́я Богоро́дице, спаси́ на́с.

Богоро́дичен: Я́ко ро́ждшая Бо́га безгре́шнаго, на́шя грехи́ потреби́ ма́терними Твои́ми моли́твами Богоро́дице, и спаси́ вопию́щыя: благослови́те вся́ дела́ Госпо́дня Го́спода.

Припев: Ди́вен Бо́г во святы́х Свои́х, Бог Израилев

Огнепа́льныя му́ки претерпе́вше, я́ко ороше́ние страда́льцы, с ра́достию взыва́сте: благослови́те дела́ Госпо́дня Го́спода.

Припев: Ди́вен Бо́г во святы́х Свои́х, Бог Израилев

Богово́инственный по́лк му́ченик, победи́вый ле́сть, победи́тельно взыва́ше: благослови́те дела́ Госпо́дня Го́спода.

Припев: Сла́ва Тебе́ Бо́же на́ш, сла́ва Тебе́.

Страстоте́рпец моли́твами, Твоя́ рабы́, и поклони́тися и ви́дети Христе́ Спа́се сподо́би, животворя́щий Кре́ст, Твоея́ бла́гости.

Припев: Ду́шы и́х во благи́х водворя́тся.

Разори́вый держа́ву сме́рти, из ме́ртвых воста́нием Твои́м, преста́вльшыяся упоко́й со избра́нными Твои́ми, хвали́ти Тя́ Го́спода.

Слава: С Сы́ном Отцу́ поклони́мся, и Всесвято́му Ду́ху, вси́ ве́рно возопии́м: Тро́ице, Я́же во еди́нстве, спаси́ ду́шы на́шя.

И ныне. Богоро́дичен: Ты́ и Де́ва и Ма́ти яви́лася еси́, ро́ждши без му́жа, Бо́га все́х, Всечи́стая: но Того́ моли́, спасти́ рабы́ Твоя́.

Пе́снь 9

Ирмо́с: Велича́ем Тя́ Ма́терь Бо́жию, и сла́вим Тя́ Богоро́дице Де́во, я́ко Спа́са ро́ждшую ду́ш на́ших.

Припев: Ди́вен Бо́г во святы́х Свои́х, Бог Израилев

Укрепи́вше на ка́мени мы́сленном мудрова́ние, страстоте́рпцы, неразвра́тно, вся́ вра́жия кова́рства победи́сте: те́мже мя́ развраща́ема к страсте́м душетле́нным, утверди́те к Бо́гу моли́твами.

Припев: Ди́вен Бо́г во святы́х Свои́х, Бог Израилев

Боже́ственный и светоза́рный вои́стинну собо́ре му́ченик, моли́ преблага́го Влады́ку, во вре́мя воздержа́ния, проще́ние прегреше́ний на́м все́м дарова́ти, и ве́чное ра́дование.

Припев: Ди́вен Бо́г во святы́х Свои́х, Бог Израилев

Человеколю́бче еди́не Бла́же, рабы́ Твоя́ в наде́жди воскре́сния почи́вшыя: ве́чнаго све́та Твоего́ невече́рняго сподо́би причасти́тися, и пи́щи наслажде́ния, да Тя́ со стра́хом велича́ем.

Припев: Пресвята́я Богоро́дице, спаси́ на́с.

Богоро́дичен: Све́та жили́ще, Твоя́ бы́сть Всесвята́я утро́ба всесвята́я, те́мже ве́рно вопию́ Ти: зе́ницы души́ моея́ озари́, и стезю́ пра́вую покажи́, Тебе́ при́сно блажа́щему.

Припев: Ди́вен Бо́г во святы́х Свои́х, Бог Израилев

Му́чеников па́мять соверша́ем ве́рнии, да те́х причасти́мся сла́вы, восхваля́юще страда́льчество по́двигов и́х.

Припев: Ди́вен Бо́г во святы́х Свои́х, Бог Израилев

Ва́шего му́жества зве́рие убоя́шася зело́, угасе́ о́гнь, сокруши́шася лу́цы, в ва́с страда́льцы ди́вен Бо́г.

Припев: Сла́ва Тебе́ Бо́же на́ш, сла́ва Тебе́.

Моли́твенницы ми́ра, страстоте́рпцы Христо́вы, Того́ ви́дети Кре́ст, и поклони́тися сподо́бите все́х моли́твами ва́шими.

Припев: Ду́шы и́х во благи́х водворя́тся.

Иде́же истека́ет исто́чник жи́зни, Сы́не Бо́жий, и посеще́ния Твоего́ лица́ просвеще́ние, к Тебе́ преста́вльшыяся учини́.

Сла́ва: Пребезнача́льное Естество́, триипоста́сная Еди́нице, О́тче, Сы́не и Ду́ше Святы́й, Све́те и Жи́зне Богонача́льная, Тебе́ славосло́вящыя сохраня́й.

И ныне, Богоро́дичен: Благослови́м Тя́ Бо́га Изра́илева, от Де́вы яви́вшагося ми́ру, и воздви́гшаго ро́г спасе́ния на́шего.

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.