Шрифт
Каноны Триоди Постной
Трипеснец в Пятницу Третьей седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 1.
Пе́снь 5
Ирмо́с: От но́щи у́тренююще, воспева́ем Тя́ Христе́ Бо́же, обнища́вшаго на́с ра́ди, и Кре́ст и сме́рть пло́тию претерпе́вшаго.
Припев: Поми́луй мя, Бо́же, поми́луй мя.
Исцели́ мя Го́споди, и исцелю́ся я́звою Твое́ю, души́ моея́ очи́стив я́звы, пло́тию стра́сти Христе́ прие́мый.
Припев: Поми́луй мя, Бо́же, поми́луй мя.
Тебе́ я́коже ви́де пло́тию ви́сима Христе́ на Дре́ве, све́т во тьму́ прелага́ше со́лнце, и земля́ подви́жеся, и ка́мение распадо́шася.
Припев: Поми́луй мя, Бо́же, поми́луй мя.
Те́рнием обра́стшую и олядене́вшую мою́ ду́шу, вся́ких страсте́й ви́ды, Го́споди очи́сти, венча́выйся те́рнием, за кра́йнюю бла́гость.
Припев: Пресвята́я Богоро́дице, спаси́ на́с.
Богоро́дичен: Но́во породила́ еси́ я́ко Младе́нца Всечи́стая Соде́теля моего́: Его́же моли́, обетша́вшаго мя́ во мно́зе зло́бе обнови́ти Влады́чице.
Припев: Поми́луй мя, Бо́же, поми́луй мя.
На ме́сте Ло́бнем иуде́и Тебе́ распя́ша Христе́, покива́ша глава́ми свои́ми, смею́щеся и руга́ющеся: Ты́ же терпе́л еси́ во е́же спасти́ на́с.
Припев: Поми́луй мя, Бо́же, поми́луй мя.
На ти́тле Креста́ Твоего́, написа́в Пила́т трегу́бо, еди́наго от Тро́ицы Тя́, во́лею пострада́вша явля́ше, за все́х спасе́ние Христе́.
Припев: Поми́луй мя, Бо́же, поми́луй мя.
Кре́сте всечестны́й, спаси́тельный, ми́ру храни́телю, соблюди́ мя́ постя́щася, и досто́йна покажи́ твоего́ честна́го поклоне́ния.
Сла́ва, тро́ичен: Пресве́тлыя Тро́ицы, трисо́лнечное воспои́м ве́рнии, Све́т Отца́ чту́ще, Све́т Сы́на сла́вяще, Све́т и Ду́ха возвеща́юще.
И ныне. Богоро́дичен: А́нгел вы́шшую, из Тебе́ рожде́йся показа́ Тя Чи́стая: Его́же бо они́ трепе́щут я́ко Бо́га зре́ти, Ты́ на ру́ку но́сиши я́ко Сы́на Твоего́ Чи́стая.
Пе́снь 8
Ирмо́с: Песносло́вцы в пещи́ спа́сшаго де́ти, и громопла́менную прело́жшаго на ро́су, Христа́ Бо́га по́йте, и превозноси́те во вся́ ве́ки.
Припев: Поми́луй мя, Бо́же, поми́луй мя.
Просте́рл еси́ на Кресте́ Христе́ Твои́ дла́ни, руки́ пра́отца невоздержа́нное потребля́я: Дре́вом же дре́ва исцели́л еси́ кля́тву. Те́мже Тя́ пое́м во вся́ ве́ки.
Припев: Поми́луй мя, Бо́же, поми́луй мя.
Тебе́ воли́телю спасе́ния Сло́ве припа́даю, хоте́ния лука́вая уста́ви вско́ре от моего́ се́рдца, Кре́ст и страда́ние во́лею претерпе́вый.
Припев: Поми́луй мя, Бо́же, поми́луй мя.
Блу́дную жи́знь и оскверне́ное житие́ возжела́в, омрачи́хся а́з блу́дный: осия́й ми́ лучу́ обраще́ния Сло́ве, со́лнца сия́ние в страда́нии омрачи́вый.
Припев: Пресвята́я Богоро́дице, спаси́ на́с.
Богоро́дичен: Уста́ви мою́ многоболе́зненную всю́ серде́чную зло́бу, Ма́ти Христа́ Бо́га, сокруши́ стре́лы и лу́ки бесо́в, борю́щих смире́нную ду́шу мою́.
Припев: Поми́луй мя, Бо́же, поми́луй мя.
Что́ Тебе́ пострада́вшему принесе́м, все́х Влады́це мы́ окая́ннии: на́с бо ра́ди Кре́ст претерпе́л еси́ Христе́. пое́м безме́рныя ми́лости Твоея́ благода́ть.
Припев: Поми́луй мя, Бо́же, поми́луй мя.
На дре́ве воздвиго́ша Христе́ иуде́е, за́вистию уби́вшии Тя́, не ума́лиша держа́вы сла́вы Твоея́ беззако́ннии: еси́ бо все́х Влады́ка во́лею пострада́вый.
Припев: Поми́луй мя, Бо́же, поми́луй мя.
Преблаже́нне Кре́сте Христо́в, небопи́санная побе́до, от земли́ на́м прозя́бл еси́, твоего́ поклоне́ния досто́йны покажи́ ны вся́, посто́м очи́стившыяся.
Слава. Тро́ичен: Пресу́щественнаго Божества́ три́ Лица́ почита́ю: Отца́ безнача́льна, Сы́на, и Ду́ха Свята́го, Естество́м несеко́мое Существо́ сла́влю во ве́ки.
И ныне. Богоро́дичен: Небе́с вы́шшую, и херуви́м превы́шшую, святопе́рвую и нескве́рную Отрокови́цу все́х Бо́га пое́м, и превозно́сим во вся́ ве́ки.
Пе́снь 9
Ирмо́с: Тя́ Ю́же ви́де Моисе́й неопали́мую купину́, и ле́ствицу одушевле́нную, ю́же Иа́ков ви́де, и две́рь небе́сную, е́юже про́йде Христо́с Бо́г на́ш, пе́сньми Ма́ти Чи́стая велича́ем.
Припев: Поми́луй мя, Бо́же, поми́луй мя.
Окамене́нное ожесточе́ние души́ моея́ благоутро́бне Спа́се омы́й, и исто́чник да́ждь ми́ Бла́же, Боже́ственнаго умиле́ния, из ре́бр источи́вый мне́ жи́знь, беззако́ния моего́ пото́ки потребля́ющую.
Припев: Поми́луй мя, Бо́же, поми́луй мя.
Самаго́ себе́ вве́рг во глубины́ грехо́в, высоты́ оста́вив доброде́телей: но привлецы́ и спаси́ мя возше́дый на Кре́ст, и челове́чество привлеки́й к Себе́ Го́споди.
Припев: Поми́луй мя, Бо́же, поми́луй мя.
Сла́дость сы́й Го́споди и наслажде́ние, я́ко Соде́тель, же́лчи вкуси́л еси́ Христе́, от сла́дости су́щее отпаде́ние, е́же из Ада́ма Ты́ исправля́я: те́мже тя́ пое́м спа́сшиися Твои́ми страстьми́.
Припев: Пресвята́я Богоро́дице, спаси́ на́с.
Богоро́дичен: Всечи́стая Влады́чице, упова́ние мое́ и прибе́жище, я́звы души́ моея́ исцели́, у́м мо́й умири́. Да и а́з ра́дуяся, воспою́ вели́чия Твоя́ Богоро́дице Присноде́во.
Припев: Поми́луй мя, Бо́же, поми́луй мя.
Тебе́, Его́же беззако́ннии Христе́, оде́яша руга́тельно в порфи́ру и вене́ц, я́ко Царю́ руга́ющеся, тро́стию главу́ Твою́ ударя́юще, распина́юще за́вистию, и же́лчию напая́юще, пе́сньми вси́ ве́рнии велича́ем.
Припев: Поми́луй мя, Бо́же, поми́луй мя.
Тя́, Его́же со́лнце ви́дящее стра́ждуща на Кресте́, све́т сокры́, все́й вку́пе тва́ри, Влады́чним досажде́нием преклоня́ющейся и распа́дающымся ка́мением, пе́сньми Христе́ Спа́се велича́ем.
Припев: Поми́луй мя, Бо́же, поми́луй мя.
Тво́й спаси́тельный Кре́ст, просвети́теля ве́рных, сподо́би Го́споди воздержа́нием теку́щыя предвари́ти, ви́дети, и поклони́тися, во освяще́ние на́ше, да Тя́ и́м велича́ем.
Сла́ва, тро́ичен: Све́т и Жи́знь и Вседе́тель, трисо́лнечное Еди́нство, Бо́г же и Госпо́дь, еди́нем све́том сия́я, сооблиста́я треми́ начерта́ньми во еди́ном Божестве́, Сего́ вси́ ве́рнии велича́ем.
И ныне, Богоро́дичен: Тебе́ Ю́же Дави́д певе́ц пропове́да Сио́н, в ню́же всели́ся небесы́ невмести́мый, и созда́ от утро́бы Твоея́, ми́ру очище́ние, пе́сньми Ма́ти Чи́стая велича́ем.
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
