Шрифт
Каноны Триоди Постной
Трипеснец в Четверг Третьей седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 6.
Пе́снь 4
Ирмо́с: Услы́ша проро́к прише́ствие Твое́ Го́споди, и убоя́ся, я́ко хо́щеши от Де́вы роди́тися, и челове́ком яви́тися, и глаго́лаше: услы́шах слу́х тво́й и убоя́хся, сла́ва си́ле Твое́й Го́споди.
Припев: Поми́луй мя, Бо́же, поми́луй мя.
По́ст, сле́зы, моли́твы, ми́лостыню, благоумиле́нный нра́в, мы́сль пра́вую, жития́ чистоту́, пока́жем ве́рнии, я́ко да сла́вы наслади́мся.
Припев: Поми́луй мя, Бо́же, поми́луй мя.
Свети́льницы светя́щии на тве́рди честны́я Це́ркве, пресве́тло яви́стеся апо́столи: те́мже просвети́те на́ша сердца́ Боже́ственным Ду́хом.
Припев: Поми́луй мя, Бо́же, поми́луй мя.
Я́ко Боже́ственное у́глие вже́гшеся огне́м невеще́ственным, страстна́я вещества́ попали́те серде́ц на́ших, му́дрии Бо́га на́шего апо́столи.
Припев: Пресвята́я Богоро́дице, спаси́ на́с.
Богоро́дичен: Све́щниче негаси́мый, черто́же всесве́тлый, серафи́м превы́шшая, херуви́мская колесни́це Всенепоро́чная, грехо́в мя́ лю́тых и бе́д свободи́.
Припев: Поми́луй мя, Бо́же, поми́луй мя.
Свети́льницы богоявле́ния, апо́столи Спа́совы яви́вшеся, неве́дения но́щь разруши́сте, и Це́рковь уясни́вше, просвеща́ете вселе́нную огневеща́нными уче́ньми ва́шими.
Припев: Поми́луй мя, Бо́же, поми́луй мя.
Ми́р проте́кше, и́ный у́бо во и́ную страну́, во еди́ну ве́ру вся́ собра́сте апо́столи, и улучи́вше небе́сная, лику́ете, Христа́ непреста́нно моля́ще, спасти́ся все́м на́м.
Припев: Поми́луй мя, Бо́же, поми́луй мя.
Моли́твами ва́шими святы́ми, апо́столи Госпо́дни, да сподо́бимся животворя́щий Кре́ст облобыза́ти чи́стыми устна́ми и очи́ма, предлежа́щий су́щым в ми́ре, и покланя́емый.
Сла́ва, тро́ичен: Сы́на от Отца́, и Ду́ха сла́влю, я́ко от со́лнца све́т и лучу́: о́ваго у́бо рожде́ственне, зане́ и рожде́ние: о́ваго же происхо́дне, зане́ и происхожде́ние, собезнача́льную Боже́ственную Тро́ицу, покланя́емую от вся́кия тва́ри.
И ныне. Богоро́дичен: Де́ва Младе́нца роди́вшая, и чистоту́ соблю́дшая Чи́стая, ты́ яви́лася еси́, Бо́га ро́ждши и Челове́ка, еди́наго Того́ во обою́ зра́ку, чу́до Твое́ Де́во Ма́ти, ужаса́ет вся́кий слу́х и по́мысл.
Пе́снь 8
Ирмо́с: Преподо́бнии Твои́ о́троцы, в пещи́ херуви́мы подража́ху, трисвяту́ю пе́снь воспева́юще: благослови́те, по́йте и превозноси́те во вся́ ве́ки.
Припев: Поми́луй мя, Бо́же, поми́луй мя.
Моисе́а по́ст Богови́дца показа́, и Илию́ о́гненною колесни́цею взя́т: потщи́ся, помышле́ний вре́дных удержи́ся, я́ко да долувлеку́щия, душе́, изба́вишися пре́лести.
Припев: Поми́луй мя, Бо́же, поми́луй мя.
Поползну́вся в го́ршая впадо́х, и я́зве стру́п прилага́ю: исцели́ Христе́, окамене́нное моего́ се́рдца ожесточе́ние, апо́стольскими Ще́дре моли́твами.
Припев: Поми́луй мя, Бо́же, поми́луй мя.
Ми́ра свети́ла богоза́рная, страсте́й на́ших о́блаки разори́те, и покло́нники све́тлаго Воскре́сния покажи́те, пою́щыя Со́лнца сла́вы.
Припев: Пресвята́я Богоро́дице, спаси́ на́с.
Богоро́дичен: Ро́дове родо́в Тя́ Богоблаже́нная ублажа́ют, я́коже дре́вле прорекла́ еси́: еди́на бо челове́ком блаже́нное родила́ еси́ Сло́во несказа́нно, из Тебе́ воплоще́нное.
Припев: Поми́луй мя, Бо́же, поми́луй мя.
Во глубине́ пре́лести пла́вающыя улови́вше тро́стию ве́ры апо́столи, Го́сподеви приведо́сте сия́, благословя́щыя, пою́щыя и превознося́щыя Го́спода во ве́ки.
Припев: Поми́луй мя, Бо́же, поми́луй мя.
Ве́лия кре́пость Твоя́ во апо́столех я́ко се́ни и суда́рия и́х исцелева́ют боля́щыя, благословя́щыя, пою́щыя и превознося́щыя Го́спода во ве́ки.
Припев: Поми́луй мя, Бо́же, поми́луй мя.
Двоенадеся́тице святы́х апо́стол, честно́му Кресту́ сподо́би неосужде́нно поклони́тися мя́, благословя́ща, пою́ща и превознося́ща во вся́ ве́ки.
Слава. Тро́ичен: Безнача́льным и рождество́м же и происхожде́нием Отцу́ покланя́юся ро́ждшему, Сы́на прославля́ю ро́ждшася, и воспева́ю совозсия́вша Отцу́ же и Сы́ну Ду́ха Свята́го.
И ныне. Богоро́дичен: Его́же родила́ еси́ Де́во несказа́нно, всегда́ я́ко Человеколю́бца не преста́й моля́щи, да бе́д спасе́т к Тебе́ прибега́ющыя.
Пе́снь 9
Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́, те́мже Тя́ вси́ ро́ди, я́ко Богоневе́стную Ма́терь, правосла́вно велича́ем.
Припев: Поми́луй мя, Бо́же, поми́луй мя.
Бо́же и Го́споди Многоми́лостиве, моего́ се́рдца очи́сти я́звы, покая́ния мне́ прилага́я лечбы́: согреши́х, согреши́х Тебе́, уще́дри, спаси́ мя́ апо́стол Твои́х моли́твами, я́ко Многоми́лостив.
Припев: Поми́луй мя, Бо́же, поми́луй мя.
Стремле́нием безме́стным после́довах умовре́дно, и вне́ себе́ ве́сь бы́х, сластьми́ жесто́кими пита́емь, и спаси́тельныя лиша́емь сне́ди блу́дный: Христе́ уще́дри, и спаси́ мя́.
Припев: Поми́луй мя, Бо́же, поми́луй мя.
Душе́ зло́бы не очи́стившаяся, и сласте́й тлетво́рных себе́ не удали́вшая, что́ безвре́менно ра́дуешися постя́щися: сего́ бо поста́ не избра́ Госпо́дь, еди́н на́шего хотя́й исправле́ния.
Припев: Пресвята́я Богоро́дице, спаси́ на́с.
Богоро́дичен: Све́том Боже́ственным мене́ просвети́, Де́во Богоро́дице, Све́та роди́тельнице, и души́ моея́ мглу́ отжени́, я́ко да блажу́ Тя́, Ю́же блажа́т вси́ челове́честии ро́ди, я́коже предрекла́ еси́.
Припев: Поми́луй мя, Бо́же, поми́луй мя.
Сло́вом неве́жи, прему́дри яви́стеся ра́зумом, плете́ния слове́с мудрецо́в разруши́вше, вети́ям сугу́бствия, и число́ звездоче́тцов. Те́м апо́столи Христо́вы еди́ни, всея́ вселе́нныя показа́стеся учи́телие.
Припев: Поми́луй мя, Бо́же, поми́луй мя.
Пе́тр вети́йствует, и Плато́н умолче́: учи́т Па́вел, Пифаго́р постыде́ся: про́чий апо́стольский богосло́вяй собо́р, е́ллинское ме́ртвое веща́ние погреба́ет, и ми́р совозставля́ет к слу́жбе Христо́ве.
Припев: Поми́луй мя, Бо́же, поми́луй мя.
Кре́ст честны́й дре́во всесвято́е, е́же ми́ру спасе́ние процвете́, ви́дети и поклони́тися вси́ да сподо́бимся, чи́стыми устна́ми и душе́ю, моли́твами все́х ва́с святы́х апо́стол Христо́вых.
Сла́ва, тро́ичен: Еди́наго Единороди́телю, Единоро́днаго Сы́на О́тче: и еди́не еди́наго, све́те све́та сия́ние: и еди́ный еди́не, еди́наго Бо́га Святы́й Ду́ше, Го́спода, Госпо́дь вои́стинну сы́й. О Тро́ице Еди́нице Свята́я, спаси́ мя́ богосло́вяща Тя́.
И ныне, Богоро́дичен: Чу́до Рождества́ Твоего́ удивля́ет мя́ Всенепоро́чная, ка́ко зачина́еши безсе́менно необыме́ннаго? рцы́, ка́ко де́вствуеши, ро́ждши я́ко Ма́ти; е́же па́че естества́ ве́рою прие́м, Рожде́нному поклони́ся: ели́ка хо́щет бо, и мо́жет.
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
