Шрифт
Каноны Триоди Постной
Трипеснец в Среду Третьей седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 2.
Пе́снь 3
Ирмо́с: Утверди́ на́с в Тебе́ Го́споди, Дре́вом умерщве́й гре́х, и стра́х Тво́й всади́ в сердца́ на́с пою́щих Тя́.
Припев: Поми́луй мя, Бо́же, поми́луй мя.
Сраспина́ема на́с ра́ди распе́ншемуся, умертви́м вся́ плотски́я у́ды в посте́х, и моли́твах, и моле́ниих.
Припев: Поми́луй мя, Бо́же, поми́луй мя.
Те́рние греха́ искорени́вый Кресто́м Твои́м Го́споди, терно́вная помышле́ния ума́ моего́ исто́ргни.
Припев: Поми́луй мя, Бо́же, поми́луй мя.
Вооружи́вше мы́сли посто́м, побежда́им чужди́я полки́ бесо́вския, си́лою Креста́ огражда́еми.
Припев: Пресвята́я Богоро́дице, спаси́ на́с.
Богоро́дичен: Воплоща́емое из Тебе́ про́йде Сло́во, паде́ние Пречи́стая пра́отец, за милосе́рдие щедро́т, исправля́я.
Припев: Поми́луй мя, Бо́же, поми́луй мя.
Тво́й животво́рный Кре́ст Го́споди, печа́ть мне́ е́сть во спасе́ние: те́м бо сопротивоборца́ упражня́я, воспева́ю Тя́ я́ко Бо́га Всеси́льнаго.
Припев: Поми́луй мя, Бо́же, поми́луй мя.
Дре́во Кре́стное пло́д принесе́ ми́ру, оживле́ния присносу́щнаго: его́же мы́ вкуша́юще, от сме́рти Христе́ избавля́емся.
Припев: Поми́луй мя, Бо́же, поми́луй мя.
Благода́ть Креста́ предпросия́вши ми́ру к Боже́ственным Твои́м страсте́м Ще́дре, призыва́ет вся́ ны́: и́мже ве́рно поклони́тися сподо́би.
Сла́ва, тро́ичен: Три́ еди́наго зра́ка Ли́ца сла́влю, Отца́, Сы́на, и Ду́ха еди́ну держа́ву Божества́: ца́рствующи бо и единонача́льствует я́ко Бо́г.
И ныне. Богоро́дичен: Рождество́ Твое́ Чи́стая, стра́шно е́сть: Бо́г бо е́сть вочелове́чивыйся, безле́тно от Отца́ рожде́йся, и из Тебе́ в после́дняя без му́жа роди́вся.
Пе́снь 8
Ирмо́с: В купине́ Моисе́ю Де́вы чу́до, на Сина́йстей горе́, прообрази́вшаго иногда́, по́йте, благослови́те и превозноси́те во вся́ ве́ки.
Припев: Поми́луй мя, Бо́же, поми́луй мя.
Кресто́м нача́ла победи́вый, и вла́сти те́мныя, Светода́вче, егда́ прии́деши со вла́стию суди́ти ми́ру всему́, да не моя́ Сло́ве объяви́ши та́йная, да мно́гое Твое́ прославля́ю благоутро́бие.
Припев: Поми́луй мя, Бо́же, поми́луй мя.
Суди́мь Судия́ пред суди́щем ста́л еси́, осужда́я вражду́ Кресто́м Твои́м, долготерпели́ве правосу́де. Те́мже осужде́ния ве́чнаго изба́ви, стра́хом зову́щыя и превознося́щыя Твое́ человеколю́бие.
Припев: Поми́луй мя, Бо́же, поми́луй мя.
Поста́ огне́м обостри́вшеся де́ти благочести́вии, возвыше́ный дре́вле пла́мень, Боже́ственною росо́ю угаси́ша вои́стинну. и мы́ постя́щеся, пе́щи все́х страсте́й угаси́м, я́ко да гее́нскаго избе́гнем пла́мене.
Припев: Пресвята́я Богоро́дице, спаси́ на́с.
Богоро́дичен: Из Тебе́ Бо́жия му́дрость хра́м Себе́ созда́вши, воплоти́ся неизрече́нным снизхожде́нием, Отрокови́це неискусобра́чная: Ты́ бо еди́на от все́х родо́в избра́нна еси́ нетле́нная, нетле́ннаго в жили́ще Сло́ва.
Припев: Поми́луй мя, Бо́же, поми́луй мя.
Нося́й вся́ сло́вом, мене́ ра́ди вся́ терпи́ши, зауше́ния, и оплева́ния, и распя́тие Христе́: хвалю́ вели́чия Твоего́ человеколю́бия во вся́ ве́ки.
Припев: Поми́луй мя, Бо́же, поми́луй мя.
Закала́ешися Христе́ я́ко А́гнец, прободе́н в ре́бра Твоя́, да мя́ овча́ заблу́ждшее спасе́ши от се́ти диа́воли, и до́брей твое́й огра́де причте́ши во ве́ки.
Припев: Поми́луй мя, Бо́же, поми́луй мя.
О Кресте́ Твое́м Христе́, свяще́нницы хва́лятся, и́ноки укрепля́ются, вся́кий просвеща́ется ве́рный: сподо́би мя́ сего́ ви́дети, и поклони́тися, и пе́ти во ве́ки.
Слава. Тро́ичен: Божество́ еди́но Тро́ице, неразде́льное Естество́, разде́льно же Ли́цы, присносу́щная держа́во, О́тче, Сы́не, и Ду́ше Святы́й, Тя́ песносло́вим во вся́ ве́ки.
И ныне. Богоро́дичен: Богороди́тельнице Чи́стая, небе́сная две́ре, спаси́тельная врата́, все́х христиа́н мольбу́ приими́, Тебе́ блажа́щих во вся́ ве́ки.
Пе́снь 9
Ирмо́с: Тебе́ мы́сленную и одушевле́нную ле́вствицу, на не́йже Бо́г на́ш утверди́ся, е́юже к небеси́ обрето́хом восхожде́ние, пе́сньми Богоро́дице велича́ем.
Припев: Поми́луй мя, Бо́же, поми́луй мя.
Зми́я Моисе́й на дре́во возне́с, образова́ше Тя́ Иису́се на Кресте́ во́лею вознесе́на, и лука́ваго ядови́тую зло́бу изгна́вшаго, к Себе́ же челове́ки привле́кша, Человеколю́бче.
Припев: Поми́луй мя, Бо́же, поми́луй мя.
Огне́м мя́ Твоего́ стра́ха очи́сти, возжига́я в мое́й души́ Боже́ственную Твою́ любо́вь, и Кресто́м Твои́м огради́ мя, е́же прельсти́ ве́тхий запина́тель, сластьми́ омрачи́в мое́ Христе́ помышле́ние.
Припев: Поми́луй мя, Бо́же, поми́луй мя.
Скве́рных помышле́ний, и дея́ний злы́х, пости́мся бра́тие, очи́стим сердца́, впери́мся боже́ственными доброде́тельми, и долере́вностныя зло́бы стремле́ний уклони́мся, да Па́сху вели́кую светоно́снии у́зрим.
Припев: Пресвята́я Богоро́дице, спаси́ на́с.
Богоро́дичен: Из Тебе́ в на́шу нищету́ Де́во, хотя́ облече́ся, Бога́тый естество́м, ви́димь же на́м бы́сть Неви́димый вы́шними ли́ки пева́емый, сокруше́нный о́браз обновля́я благосты́нею.
Припев: Поми́луй мя, Бо́же, поми́луй мя.
Тебе́ на Кресте́ ру́це распросте́рша и четвероконе́чная присво́ивша, И́мже ко Отцу́ обрето́хом вхо́д, Сы́не Бо́жий, вси́ велича́ем.
Припев: Поми́луй мя, Бо́же, поми́луй мя.
Тебе́ те́рнием Христе́ венча́вше, беззако́ннии бия́ху, и распя́ша, Его́же ра́ди поднебе́сная колеба́шася вся́: мы́ же спа́сшеся Тя́ велича́ем.
Припев: Поми́луй мя, Бо́же, поми́луй мя.
Ты́ на́м све́т, свято́е сложе́ние, одоле́ние побе́ды, Христо́в Кре́сте, ты́ на́м воздержа́ние услади́, и тебе́ поклони́тися сподо́би.
Сла́ва, тро́ичен: Тя́ трисве́тлое Свято́е Божество́, все́ содержа́щее, и храня́щее при́сно, Отца́, Сы́на же, и Ду́ха Жива́го, пе́сньми немо́лчными велича́ем.
И ныне, Богоро́дичен: Тя́ све́тлый о́блак Ду́ха, из него́же на́м возсия́ све́т непристу́пный, Христо́с, пра́вды вели́кое Со́лнце, пе́сньми Богоро́дице велича́ем.
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
