Шрифт
Каноны Триоди Постной
Трипеснец во Вторник Четвертой седмицы, Крестопоклонной
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 8.
Пе́снь 2
Ирмо́с: Ви́дите ви́дите, я́ко А́з е́смь Бо́г ва́ш, пре́жде ве́к рожде́нный от Отца́, и от Де́вы в после́дняя без му́жа заче́ншийся, и разруши́вый гре́х пра́отца Ада́ма, я́ко Человеколю́бец.
Припев: Поми́луй мя, Бо́же, поми́луй мя.
Среде́ тва́ри претерпе́л еси́ Кре́ст, Месси́а Сло́ве Бо́жий: ему́же поста́ дне́сь преполове́нием ве́рно покланя́емся, прося́ще ви́дети и Воскре́сние Твое́.
Припев: Поми́луй мя, Бо́же, поми́луй мя.
Жезло́м си́лы, проображе́нным Моисе́ю, мо́ре страсте́й пресека́юще, дости́гнем к земли́ обетова́ния, и ма́нны мы́сленныя насы́тимся бога́тно.
Припев: Поми́луй мя, Бо́же, поми́луй мя.
Кто́ не возрыда́ет тя́? кто́ не воспла́чет тя́ душе́, жела́ющую лука́вая, и не взыска́ющую любо́вию благи́х, пра́веднаго Судию́ презира́ющую при́сно, долготерпя́щаго на тебе́?
Припев: Пресвята́я Богоро́дице, спаси́ на́с.
Богоро́дичен: Пло́ть бы́вша непреме́нно, Христа́ Де́во ражда́еши: его́же приле́жно моли́, плотски́х страсте́й измени́ти покланя́ющыяся Кресту́, его́же пло́тию претерпе́.
Припев: Поми́луй мя, Бо́же, поми́луй мя.
Ви́дите ви́дите, я́ко А́з е́смь Бо́г, вселе́нней Кре́ст Мо́й подая́й ору́жие спасе́ния, во е́же ны́не поклони́тися ему́: я́ко да целу́ющии его́ упражня́ют вра́жия кова́рства.
Припев: Поми́луй мя, Бо́же, поми́луй мя.
Ве́лий еси́ Го́споди, многоми́лостивый, я́ко да́л еси́ животворя́щему Твоему́ поклони́тися ны́не Кресту́, иде́же ру́це Твои́ и но́зе пригвозди́шася, на не́мже кро́вь излия́ся пречи́стаго Твоего́ ребра́, жи́знь источи́ на́м.
Припев: Поми́луй мя, Бо́же, поми́луй мя.
Тя́ Моисе́й вели́кий прообразова́ Кре́сте на́м, ру́це распросте́р, и победи́в Амали́ка. Тя́ изъобража́юще в се́нех и возду́се, отвраща́ем и побежда́ем началозло́бнаго врага́, песносло́вяще Христа́.
Сла́ва, тро́ичен: Пресоверше́нная Еди́нице, Пребоже́ственная, триипоста́сная, нерожде́нне О́тче, и Сы́не единоро́дне, Ду́ше от Отца́ исходя́й, Сы́ном же явля́яйся, Существо́ еди́но и Естество́, Госпо́дство, Ца́рство, спаси́ все́х на́с.
И ныне. Богоро́дичен: Неизглаго́ланное чу́до Твоего́ Рождества́ Ма́ти Де́во: ка́ко бо и ражда́еши, и чиста́ еси́ в то́мже? ка́ко Отроча́ ражда́еши, и не ве́си иску́са му́жеска отню́д? Я́коже ве́сть па́че естества́, от Мене новоле́пно Сло́во Бо́жие ро́ждшееся.
Пе́снь 8
Ирмо́с: А́нгели и небеса́ на престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте и превозноси́те Его́ во ве́ки.
Припев: Поми́луй мя, Бо́же, поми́луй мя.
Соста́вивый основа́ния всея́ земли́, я́ко Бо́г возне́сся на Дре́во, недви́жимое все́м дарова́л еси́ ве́рным утвержде́ние Го́споди, спаси́тельное ору́жие Креста́ Твоего́: ему́же покланя́ющеся, Тя́ превозно́сим во вся́ ве́ки.
Припев: Поми́луй мя, Бо́же, поми́луй мя.
Облиста́емо зря́ще, па́че со́лнечныя зари́, Кре́стное дре́во, прииди́те посто́м облиста́еми, ны́не облобыза́им, почерпа́юще благода́ть светоно́сную, и тьму́ отгоня́ющую от превознося́щих Христа́ во ве́ки.
Припев: Поми́луй мя, Бо́же, поми́луй мя.
Вода́ жива́я неизме́нная, в ве́чную жи́знь, Ты́ су́щи Сло́ве, кро́вь и во́ду от ре́бр на Кресте́ источи́л еси́ Влады́ко, грехо́вныя пото́ки изсуша́я. Те́мже молю́ Тя: изсуши́ страсте́й мои́х лука́вная истица́ния.
Припев: Пресвята́я Богоро́дице, спаси́ на́с.
Богоро́дичен: Я́ко освяще́ние у́мное, во святы́х Бо́га почива́ющаго ражда́еши, свята́я Богома́ти Чи́стая, вся́ концы́ освяща́ющаго, боже́ственным поклоне́нием дне́сь Де́во Дре́ва пресвята́го, на не́мже пло́тию пригвозди́ся.
Припев: Поми́луй мя, Бо́же, поми́луй мя.
Прииди́те ви́дим лю́дие, живоно́сное Дре́во ны́не предлежа́щее, на не́мже пло́тию Христо́с водрузи́ся Бо́г на́ш, и со стра́хом пою́ще, сему́ покланя́емся во вся́ ве́ки.
Припев: Поми́луй мя, Бо́же, поми́луй мя.
Трисло́жный Кре́ст, я́ко Тро́ичный о́браз воспева́ем, и покланя́ющеся со стра́хом возопии́м, благословя́ще, пою́ще и превознося́ще Христа́ во ве́ки.
Припев: Поми́луй мя, Бо́же, поми́луй мя.
Слепа́го от рождества́ воочи́л еси́ сло́вом, ослепле́нныя мои́ серде́чныя о́чи па́ки отве́рзи, да узрю́ све́т повеле́ний Твои́х Христе́ во ве́ки.
Слава. Тро́ичен: Еди́н Бо́г у́бо Тро́ица, ни Отцу́ изступи́вшу в сыновство́, ниже́ Сы́ну премени́вшуся во исхожде́ние: но сво́йственная, и обое́ Све́т, Бо́га, три́ сла́влю во ве́ки.
И ныне. Богоро́дичен: Еди́на нетле́нно ражда́еши, еди́на дои́ши Младе́нца без бра́ка, еди́на Созда́теля Твоего́ ражда́еши и Влады́ку, а́ще и Ма́ти и Раба́: Тя́ Ма́ти Де́во, пое́м во ве́ки.
Пе́снь 9
Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м, в дому́ Дави́дове о́трока Своего́: в ни́хже посети́ на́с Восто́к с высоты́, и напра́вил ны́ е́сть на пу́ть ми́ра.
Припев: Поми́луй мя, Бо́же, поми́луй мя.
Благослове́н Госпо́дь Бо́г Изра́илев, Кресто́м Свои́м разруши́вый дре́внюю кля́тву, и сего́ на́м дарова́вый держа́ву, и прибе́жище и тве́рдое основа́ние, и́мже враги́ на́шя ны́не рога́ми избоде́м.
Припев: Поми́луй мя, Бо́же, поми́луй мя.
Я́ко плени́цами стя́гнут е́смь, безме́рными зло́бами, и стези́ Твоя́ спаси́тельныя Христе́, во́лею разуме́ти не хощу́: Твои́м мя́ обрати́ Кресто́м, омраче́ние мое́ разреша́я, за неизрече́нную ми́лость благоутро́бия Твоего́.
Припев: Поми́луй мя, Бо́же, поми́луй мя.
Фарисе́ево возноше́ние подража́в зле́, низведо́хся паде́нием лю́тым и боле́зненным, и лежу́ враго́м в попра́ние: но уще́дри и спаси́ мя Христе́, щедро́т ра́ди смири́вый Себе́ вы́шний Царю́ сла́вы.
Припев: Пресвята́я Богоро́дице, спаси́ на́с.
Богоро́дичен: Ро́дове Тя́ вси́ блажа́т, Чи́стая: Иису́с бо еди́н рожде́йся от Твоея́ утро́бы, То́й я́ко ве́сть, сотвори́ Отрокови́це Де́во, с Тобо́ю вели́чия: Его́же моли́ спасти́ся ста́ду, и лю́дем Твои́м.
Припев: Поми́луй мя, Бо́же, поми́луй мя.
Благослове́н Госпо́дь Бо́г Изра́илев, Кресто́м Свои́м разруши́вый дре́внюю кля́тву, и сего́ предложи́вый на́м в поклоне́ние. того́ целу́юще ве́рно, того́ и воспева́юще, Твою́ вели́кую ми́лость пое́м непреста́нно.
Припев: Поми́луй мя, Бо́же, поми́луй мя.
Це́ркви похвала́ ты́ еси́ честны́й Кре́сте, царе́й ору́жие и ми́ру всему́ ми́ра по́честь богоде́ланная, Кре́сте, правосла́вных ра́досте, вселе́нныя храни́телю, сохрани́, освяти́ тебе́ покланя́ющыяся.
Припев: Поми́луй мя, Бо́же, поми́луй мя.
Манасси́ю я́ко спа́сл еси́ пока́явшася Бо́же, спаси́ и мене́, слеза́ми ка́ющася го́рце, и не отврати́ раба́ Твоего́: уклони́х бо мою́ ду́шу, я́ко дре́вле Изра́иль о́ный, вся́ дни́ моя́ живы́й в блуде́.
Сла́ва, тро́ичен: Тро́ице свята́я, сла́ва Тебе́, единоче́стная Еди́нице, Боже́ственное Естество́, еди́но Ца́рство стра́шное, О́тче, Сы́не, со Ду́хом, све́те непристу́пный все́м, безнача́льное Божество́, спаси́ служа́щыя Тебе́, все́х Созда́телю.
И ныне, Богоро́дичен: У Креста́ я́ко стоя́ше А́гница Твоя́ Иису́се, Па́стыря и Влады́ку Своего́ зря́щи, го́рько рыда́ше, и утро́бу дви́жущи о Тебе́ Христе́ взыва́ше: что́ стра́нное виде́ние? Жи́зне, ка́ко умира́еши?
Поклонение Кресту
Кресту́ Твоему́ покланя́емся, Влады́ко, / и свято́е Воскресе́ние Твое́ сла́вим. (Трижды с земным поклоном)
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
