Трипеснец в Пятницу Первой седмицы

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кано́н трипе́снец. Творе́ние господи́на Ио́сифа, гла́с 2.

Пе́снь 5

Ирмо́с: Но́щи преше́дшей прибли́жися день, и Свет ми́ру возсия́: сего́ ра́ди хва́лят Тя а́нгельстии чи́ни, и славосло́вят Тя вся́ческая.

Припев: Поми́луй мя, Бо́же, поми́луй мя.

Во мне зря грех, льстивому́дрый спеши́тся и соде́йствует греху́: ра́дуется бо вои́стинну о мое́й поги́бели: но Ты ми да́ждь исправле́ние, Спа́се, во о́наго убие́ние, молю́ся.

Припев: Поми́луй мя, Бо́же, поми́луй мя.

Нача́ла победи́вый тьмы, на Кресте́ Твое́м, сих изми́ мя злодея́ния, па́дшаго во глубину́ греха́, и в я́му безме́стных дея́ний, Твое́ю же ми́лостию спасти́ся упова́юща.

Припев: Поми́луй мя, Бо́же, поми́луй мя.

Умертви́выйся на Кресте́ просте́рт, умерщвле́нную грехо́м оживи́ ду́шу мою́: и честно́е Твое́ Воскресе́ние дости́гнути, в ми́ре, Христе́, сподо́би, де́лающа усе́рдно Твоя оправда́ния.

Припев: Пресвята́я Богоро́дице, спаси́ на́с.

Богоро́дичен: Просвеще́ние моея́ не́мощи, спасе́ние омраче́нныя души́ моея́, Чи́стая, спаси́ мя, спаси́ погиба́юща, Отрокови́це, и в ри́зу нетле́ния мя облецы́, истле́вшаго лю́тыми прегреше́ньми.

Припев: Поми́луй мя, Бо́же, поми́луй мя.

Ты на ме́сте Ло́бнем, пло́тию распя́тися изво́лил еси́, еди́не Безсме́ртне, челове́ческий род обезсме́ртствуя, и возобража́я, Го́споди.

Припев: Поми́луй мя, Бо́же, поми́луй мя.

Стра́сти Твоея́ доса́ду, тварь зря́щи вся пременя́шеся, Го́споди, иуде́йскаго рыда́ющи уби́йства: но претерпе́л еси́ спасти́ вся́ческая.

Припев: Поми́луй мя, Бо́же, поми́луй мя.

Ми́ру и су́щим в ми́ре ра́доватися прире́кшии, ны́не я́ко Христу́ сраспина́еми, претерпи́м доса́ду, руга́ние, и друга́я, да с Ним просла́вимся.

Сла́ва, тро́ичен: О Тро́ице Всесвята́я! Ты на́ше служе́ние, Ты и прибе́жище и держа́ва, в естестве́ еди́ном Тя воспева́ющим, очище́ние прегреше́ний низпосли́.

И ныне. Богоро́дичен: Многоимени́тая Отрокови́це, ра́дуйся, Богоро́дице, ковче́же, и ста́мно, и трапе́зо, светоно́сный све́щниче, огнезра́чная купино́, горо́ Бо́жия присе́нная.

Пе́снь 8

Ирмо́с: В купине́ Мои́сею, Де́вы чу́до, на Сина́йстей горе́ прообрази́вшаго иногда́, по́йте, благослови́те и превозноси́те во вся ве́ки.

Припев: Поми́луй мя, Бо́же, поми́луй мя.

Смири́вый Себе́, возне́слся еси́ за благоутро́бие на Крест, возвыша́яй па́дшаго сне́дию дре́ва иногда́: те́мже Тя, еди́не Преблаги́й, просла́вленнаго пое́м во ве́ки.

Припев: Поми́луй мя, Бо́же, поми́луй мя.

Невнима́ния дрема́нием греха́ тя́жкий подъя́х сон: но Ты, усну́вый на Кресте́ мене́ ра́ди, Христе́ мой, воздви́гни мя, падшаго, да мя не прии́мет нощь сме́ртная.

Припев: Поми́луй мя, Бо́же, поми́луй мя.

Ослепи́вся сластьми́, обношу́ ду́шу омраче́нную, и смее́тся зря мя льстивому́дрый враг: те́мже мя просвети́ и изба́ви сего́ зло́бы, Христе́, во ве́ки.

Припев: Пресвята́я Богоро́дице, спаси́ на́с.

Богоро́дичен: В ле́ности жизнь ижди́в, дрема́нием греха́ ду́шу отягчи́х: неусы́пной же Твое́й моли́тве притека́ю, не даждь мне в сме́рти, Де́во Пречи́стая, усну́ти.

Припев: Поми́луй мя, Бо́же, поми́луй мя.

Те́рнием венча́вся, и во оде́жду от порфи́ры обо́лкся, яви́лся еси́ красне́йший, Христе́, добро́тою, па́че всех сыно́в челове́ческих, сла́вою облистава́я.

Припев: Поми́луй мя, Бо́же, поми́луй мя.

Желчь и о́цет пия́, две струи́ пролива́еши, живота́ и нетле́ния, из Боже́ственных Твоих ребр, ве́рою Тя пою́щим, и славосло́вящим, Христе́, во вся ве́ки.

Припев: Поми́луй мя, Бо́же, поми́луй мя.

Кре́сте ски́птре Христо́в, Це́ркве ро́ге, царе́й побе́до и храни́телю христиа́н, ты еси́ просвеще́ние мое́, ты и похвала́ моя́ во вся ве́ки.

Слава. Тро́ичен: Божество́ Еди́но Тро́ице, Нераздели́мое Естество́, разде́льная же ли́цы, неги́блющая Держа́во, О́тче, Сы́не и Ду́ше, Тя песносло́вим во вся ве́ки.

И ныне. Богоро́дичен: Богороди́тельнице Чи́стая, небе́сная две́ре, спасительная врата́, всех христиа́н моле́ние приими́, Тебе́ блажа́щих во вся ве́ки.

Пе́снь 9

Ирмо́с: Чи́стую и Пречи́стую Ма́терь и Де́ву, пе́сньми пе́сней вси ве́рнии, благоче́стно я́ко Богоро́дицу велича́ем.

Припев: Поми́луй мя, Бо́же, поми́луй мя.

Прокаже́нную ду́шу мою́ безме́стными помышле́нии, окропле́нием кро́ве Твоея́ очи́сти, Бо́жий Сло́ве, и о́бщника мя сла́вы Твоея́ сотвори́, мене́ ра́ди безсла́вное претерпе́вый, Христе́, распя́тие.

Припев: Поми́луй мя, Бо́же, поми́луй мя.

Весь сляко́хся тягото́ю безме́стных, Христе́, дея́ний, и се́туя зову́ Ти, Человеколю́бче: души́ моея́ неисце́льныя я́звы исцели́ Твое́ю Честно́ю Кро́вию, да пою́ Твое́ Божество́.

Припев: Поми́луй мя, Бо́же, поми́луй мя.

Снедь зло́бу, и питие́ небреже́ние творя́, по всему́ пребыва́ю неиспра́влен, сне́дей оша́янием безвре́менно ра́дуюся: не сицево́му бо посту́ рече́ Госпо́дь бы́ти.

Припев: Пресвята́я Богоро́дице, спаси́ на́с.

Богоро́дичен: Лю́таго дре́вняго отрече́ния губи́тельницу, и прама́тере исправле́ние, ро́да к Бо́гу вину́ присвое́ния, к Зижди́телю мост, Тя, Богоро́дице, велича́ем.

Припев: Поми́луй мя, Бо́же, поми́луй мя.

На дре́ве распе́ншуся Ти тварь колеба́шеся, Бог сый пострада́л еси́ пло́тски за благоутро́бие щедро́т, да спасе́ши нас.

Припев: Поми́луй мя, Бо́же, поми́луй мя.

Креста́ Твоего́, Го́споди, си́ла вели́кая: и́бо образу́юще сего́ в себе́, а́бие де́монов кре́пость отража́ем.

Припев: Поми́луй мя, Бо́же, поми́луй мя.

Креста́ Твоего́, Го́споди, Боже́ственным могу́тством укрепи́ мя, непоро́чное и чи́стое вре́мя поста́ Тебе́ приноси́ти.

Сла́ва, тро́ичен: Еди́нице Триипоста́сная, Тро́ице Еди́нственная, Господонача́лие, Естество́ Равносла́вное, О́тче, Сы́не и Боже́ственный Ду́ше, спаси́ всех нас.

И ныне, Богоро́дичен: Ра́дуйся, очисти́лище ми́ру Богоро́дице, в не́же притека́юше вси гре́шнии, к Бо́гу примире́ние при́сно обрета́ем.

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)

Таже малых 12, глаголюще на кийждо поклон: Бо́же, очи́сти мя гре́шнаго.

И паки последи молитву всю:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.