Шрифт

Каноны Триоди Постной

Канон Феодору Тирону в Субботу Первой седмицы.

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Тропарь, глас 2:

Ве́лия ве́ры исправле́ния, во исто́чнице пла́мене, я́ко на воде́ упокое́ния, святы́й му́ченик Фео́дор ра́довашеся: огне́м бо всесожже́гся, я́ко хлеб сла́дкий Тро́ице принесе́ся. Того́ моли́твами, Христе́ Бо́же, спаси́ ду́ши на́ша.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кано́н святаго Феодора, гла́с 4.

Пе́снь 1

Ирмо́с: Отве́рзу уста́ моя́, и напо́лнятся ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́.

Припев: Святый великомучениче Феодоре, моли Бога о нас!

Всех Превы́шший, Тя неизрече́нно роди́вшую, всех предположи́ вы́шшую Своих избра́нных: те́мже днесь сего́ вене́чника пою́ще, Всепе́тая, Тебе́ предначина́ем.

Припев: Святый великомучениче Феодоре, моли Бога о нас!

Вели́каго в му́ченицех, страда́льца пресве́тлаго, имени́таго и пресла́внаго в чудесе́х, от коне́ц земли́ и до коне́ц знамени́таго, пе́сньми воспо́ю Фео́дора.

Припев: Святый великомучениче Феодоре, моли Бога о нас!

День весе́лый в ско́рбех возсия́, и се́тование сих уясни́, предпра́зднственная предпу́тия издале́ча, просия́вша благода́тию боже́ственнаго му́ченика.

Припев: Святый великомучениче Феодоре, моли Бога о нас!

Кропи́т очище́ния Це́рковь, кровьми́ свято́е заколе́ние, е́же прия́т пожре́нный и в же́ртву прия́тый, страда́льчествовавшаго Божественныя ра́ди сла́вы Его́.

Припев: Пресвята́я Богоро́дице, спаси́ на́с.

Богоро́дичен: Красно́ а́ще и незре́ло, е́же пра́здновати узако́нися: украси́вшая бо вся Влады́чица, и ны́не показа́ сея́ па́мяти приобща́ющияся предбе́дствующему кро́вию.

Припев: Святый великомучениче Феодоре, моли Бога о нас!

Чу́дный во святы́х вои́стинну Бо́же, во мне удиви́ ми́лости Твоя́, Христе́, сло́во ми да́руя, я́ко да чу́дная восхвалю́ Твоего́ му́ченика.

Припев: Святый великомучениче Феодоре, моли Бога о нас!

Тве́рдое в страда́льчестве, и терпели́вое в боле́знех показа́л еси́, страстоте́рпче Христо́в: ско́рое же па́ки на нас по́мощи явля́я твоея́, Фео́доре.

Сла́ва: Благочести́вую оте́ц ве́ру, от души́ его́ мучи́тель отрева́я зле, нечести́вый сове́т Бо́гу прирази́в, восхоте́ при́сно ити́.

И ныне. Богоро́дичен: Богоре́чивых прорече́ния дре́вле муже́й, на Тебе́ испо́лнишася, Ма́ти Де́во, я́ве: я́ко Бо́га ро́ждшая и́стиннаго, и Челове́ка и́стиннаго, па́че естества́ и ужа́сно.

Пе́снь 3

Ирмо́с: Твоя́ песносло́вцы, Богоро́дице, живы́й и незави́стный исто́чниче, лик Себе́ совоку́пльшия духо́вно утверди́, в Боже́ственней Твое́й сла́ве, венце́в сла́вы сподо́би.

Припев: Святый великомучениче Феодоре, моли Бога о нас!

Ви́дети день Сы́на Твоего́ жела́юще христоимени́тии лю́дие, во о́браз сего́, Влады́чице, тому́ ны́не предпра́зднствуют, Тебе́ нося́ще показа́ние, и сла́внаго страстоте́рпца Твоего́.

Припев: Святый великомучениче Феодоре, моли Бога о нас!

Побеждаю́т вся́кими о́бразы лу́чшая: вели́кий бо во страда́льцех в весе́лие измени́ вре́менную скорбь, свята́го зе́льное поста́ обрати́в во ослабле́ние.

Припев: Святый великомучениче Феодоре, моли Бога о нас!

Сво́йственный и подо́бный тебе́ дар, и́бо от свои́х, страда́льче: и́хже бо сам всели́л еси́ в сей ча́стице твое́й, обра́дованно да́ры тебе́ похва́л прино́сим.

Припев: Святый великомучениче Феодоре, моли Бога о нас!

Добре́йшее основа́ние положи́л еси́, твои́ми изря́дствы, изря́дне, зве́ря всегуби́тельна, огне́м и уби́йством ды́шуща, низложи́в я́ко безде́льна, преесте́ственною до́блестию.

Припев: Святый великомучениче Феодоре, моли Бога о нас!

Неи́стовствовав но́вый отсту́пник по ра́вному лю́те дре́внему, же́ртвы бра́шном я́коже я́дом смеси́, но ло́жный окая́нник премудри́ся му́чеником.

Припев: Пресвята́я Богоро́дице, спаси́ на́с.

Богоро́дичен: Испо́лнися у́бо вся, Де́во, зна́ти Го́спода земля́, из Тебе́ ми́ру я́вльшася, но боже́ственным му́чеником благода́ть мно́гая, утверди́вшим саме́ми собо́ю и́стину.

Припев: Святый великомучениче Феодоре, моли Бога о нас!

Пе́рвее в Е́вины у́ши пошепта́вый ле́стно, и Ада́ма то́юже прельсти́вый ле́стно, той и ны́не яд зло́бы к ле́сти излия́.

Припев: Святый великомучениче Феодоре, моли Бога о нас!

Лестца́ имя́ше на него́, пита́ше неи́стовство проти́ву правоживу́щим, вре́мя взыска́ше пра́вое, во́ньже ме́рзость сотвори́ти поуча́шеся пребеззако́ннейший.

Сла́ва: Дней нача́ток святы́х наста́ посто́в, в ни́хже вся́кий христиа́нин самого́ себе́ воздержа́нием мно́гим очи́стив, всех оша́яся.

И ныне. Богоро́дичен: Наде́ждо ми́ру держа́вная, покро́ве и предста́тельство Всесвята́я Де́во, не пре́зри, Блага́я, моле́ния рабо́в, от любве́ Тя при́сно ублажа́ющих.

Седален, глас 8:

Боже́ственное всеору́жие восприи́м, и и́долов лесть низложи́в, А́нгелы воздви́гл еси́ восхваля́ти по́двиги твоя́: боже́ственным бо жела́нием ум распали́в, смерть во огни́ до́блественно презре́л еси́. Те́мже именоно́сно прося́щим тя да́руй Боже́ственныя да́ры, исцеле́ний подая́ния, страстоте́рпче Фео́доре: моли́ся Христу́ Бо́гу, согреше́ний оставле́ние дарова́ти, пра́зднующим любо́вию святу́ю па́мять твою́.

Сла́ва Отцу́ и Сы́ну и Свято́му Ду́ху.

Максимиа́новыми ласка́ньми не уклони́вся, Христо́выми же словесы́ му́жествовав, и́дольское ка́пище во огни́ испепели́л еси́, страда́льчески победи́в до́бре сопроти́вника, проро́чески преше́л еси́ огнь, я́коже в воде́. Те́мже досто́йно воздая́ние подвиго́в, источа́еши исцеле́ния, страстоте́рпче Фео́доре: моли́ся Христу́ Бо́гу, прегреше́ний оставле́нию дарова́тися, пра́зднующим любо́вию святу́ю па́мять твою́.

И ны́не и при́сно и во ве́ки веко́в. Ами́нь.

Я́ко Всенепоро́чная Неве́ста Творца́, я́ко Неискусому́жная Ма́ти Изба́вителя, я́ко прия́телище су́щи Вы́шняго, Всепе́тая, беззако́ния мя су́ща скве́рное жили́ще, и в ра́зуме бы́вша бесо́в игра́лище, потщи́ся и сих злоде́йствия мя изба́вити, све́тлое жили́ще доброде́телию стяжа́вшая, светоприе́мнице нетле́нная: разжени́ о́блак страсте́й, и го́рния све́тлости сподо́би, и све́та невече́рняго моли́твами Твои́ми.

Пе́снь 4

Ирмо́с: Седя́й в сла́ве, на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й.

Припев: Святый великомучениче Феодоре, моли Бога о нас!

О но́ваго и пресла́внаго смеше́ния же и растворе́ния! Де́вству рождество́ соедини́ роди́выйся Богочелове́к: се́тованным же днем весе́лие, Своего́ почита́я страда́льца, вмеси́.

Припев: Святый великомучениче Феодоре, моли Бога о нас!

Виждь, ка́ко Христа́ любя́ше, Христо́ви во́инствуяй! Враги́ бо се́го ре́вностию и огне́м погуби́, и себе́ коне́чне до́брую и прия́тную Ему́ же́ртву усе́рдно отдаде́.

Припев: Святый великомучениче Феодоре, моли Бога о нас!

Победоносный от страда́льчеств до́блий разреши́, дерзнове́нно глаго́ля, и презре́нием муче́ний зри́тели удиви́в, и быв всей тва́ри но́вое и пресла́вное позо́рище.

Припев: Святый великомучениче Феодоре, моли Бога о нас!

Кость у́бо не сокруши́ся Бо́га и Влады́ки моего́, о долготерпе́ния, и по умерщвле́нии стра́ждуща! Во́ина же Его огнь прие́м, и ко́ло устыде́ся, уме́ршу прикосну́тися.

Припев: Пресвята́я Богоро́дице, спаси́ на́с.

Богоро́дичен: Соуме́ршии Влады́це, Живота́ служи́тели, и совоста́вшии живу́т у Него́ ны́не ве́чно: и Сы́ну Ма́терь спрославля́ют, благословя́ще Отца́, Сы́на и Ду́ха Свята́го.

Припев: Святый великомучениче Феодоре, моли Бога о нас!

Сове́т совещава́ет нечести́вейший, зри́те я́ко вои́стинну есть стра́шно: разуме́ бо окая́нный ме́рзскими бра́шны лю́ди Христо́вы оскверни́ти.

Припев: Святый великомучениче Феодоре, моли Бога о нас!

В де́ло приведе́ сове́т беззако́нный: возбрани́ти бо повеле́в чи́стых яде́ний бра́шно, и предложи́ти я́же он оскверни́ кровьми́.

Сла́ва: Бысть я́вственно и оглаше́нно беззако́ние всем христиа́ном: те́мже я́коже уве́деша, стеко́шася вси ку́пно в храм Госпо́день святы́й.

И ныне. Богоро́дичен: Тя, ро́ждшую Предве́чнаго, от Отца́ рожде́ннаго, ны́не ве́рнии Моли́твенницу предлага́ем: Тоя́ моли́твами, Христе́, преклоне́н, благоуве́тлив бу́ди рабо́м Твои́м.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, всем воспева́ющим Тя, мир подава́ющая.

Припев: Святый великомучениче Феодоре, моли Бога о нас!

Отверза́ются днесь преддве́рия благода́ти, и упокое́ние ны́не са́мое прообража́ет воскресе́ние, си́це светоно́сне све́тлую Влады́чицу почита́юще, и сла́внаго му́ченика.

Припев: Святый великомучениче Феодоре, моли Бога о нас!

Да́рует тезоимени́тый дар Бог, Фео́дора, возлюби́вшим я́вльшаго возлю́бленнаго явле́ние, пресла́вных дел творца́ и Боже́ственных сил самоде́теля содева́емаго.

Припев: Святый великомучениче Феодоре, моли Бога о нас!

Ничто́же к му́ченику лу́цы и стре́лы твоя́, вра́же челове́ческаго спасе́ния: и уме́рый бо живе́т, и возбну́, и злоде́йством твои́м противля́яйся спасает вся́каго правосла́внаго.

Припев: Пресвята́я Богоро́дице, спаси́ на́с.

Богоро́дичен: Стра́нное бя́ше пре́жде чу́до, Богоотрокови́це, страда́льческими же свиде́тельствы прия́т ве́ру несумне́нну, и ве́руемое при́сно пребыва́ет чуди́мое, и ве́рне покланя́емое.

Припев: Святый великомучениче Феодоре, моли Бога о нас!

Тогда́шний у́бо архиере́й весь ужасну́вся, нечести́ваго я́коже уве́де сове́т, пе́сньми всено́щными Бо́га моля́ше, не презре́ти в коне́ц люде́й жре́бия его́.

Припев: Святый великомучениче Феодоре, моли Бога о нас!

Но ско́рый вои́стинну помо́щник, во исти́не и теплоте́ призываю́щих, моле́ния их не презре́ вся́каго: но скоре́йшее им соделова́ет разреше́ние начина́ния.

Сла́ва: От вы́шних помо́щник посыла́ется я́ко скоре́е на зе́млю, страстоте́рпец Фео́дор, и пастыренача́льнику явля́ется, разреше́ние науча́я беззако́ннаго сове́та.

И ныне. Богоро́дичен: Никто́же притека́я к Твоему́, Влады́чице, заступле́нию те́пле, посрами́тся когда́: но про́сит благода́ти, и дар прие́млет, к поле́зному скоре́йший проше́ния.

Пе́снь 6

Ирмо́с: Боже́ственное сие́ и всечестно́е, соверша́юще пра́зднество, богому́дрии Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Святый великомучениче Феодоре, моли Бога о нас!

Пости́тися, Спа́се, не мо́гут, дру́зи и сы́нове черто́га Твоего́: Тебе́ бо Жени́ха с Ма́терию и с дру́гом Твои́м учрежда́ют предстоя́ща, и слу́жат.

Припев: Святый великомучениче Феодоре, моли Бога о нас!

Отступи́ Бо́га спаса́ющаго, отступи́ и от ра́зума злоимени́тый, и киче́нием воста́ на ве́ру: но вме́сто сего́ обре́те великоимени́таго.

Припев: Святый великомучениче Феодоре, моли Бога о нас!

Пострада́в предста́ му́дрший, и сотво́рь до́блий те́пльший, к мучи́телем бо бра́нию, и побе́дою до́бре обучи́вся, ниже́ у́мер отступи́ исправле́ния.

Припев: Пресвята́я Богоро́дице, спаси́ на́с.

Богоро́дичен: Изба́вльшеся днесь, Влады́чице, беды́ душетле́нныя, чудесе́м страстоте́рпца Твоего́, по Твоему́ Боже́ственному промышле́нию, благода́ть обои́м возлага́ем.

Припев: Святый великомучениче Феодоре, моли Бога о нас!

Стра́нному ужаса́яся виде́ния Твоего́, архиере́й проти́во рече́: ты кто еси́, го́споди, глаго́ляй мне? вразуми́ и научи́, ка́ко обря́щем скоре́йшую по́мощь?

Припев: Святый великомучениче Феодоре, моли Бога о нас!

Фео́дор рече́: аз есмь я́вственно страстоте́рпец, и слы́ши: пшени́цу свари́в, раздели́ лю́дем, и та́ко спасу́тся от скве́рных бра́шен преле́стника.

Сла́ва: Ко́ль ве́лие чу́до твое́, и пресла́вное твое́ заступле́ние, Фео́доре: те́мже дерза́юще вси чи́сто к тебе́ прибега́ем, и мо́лимся: спаси́ рабы́ твоя́.

И ныне. Богоро́дичен: Све́та жили́ще и прия́телище чи́стое Сло́ва была́ еси́, Отца́ благоволе́нием, и к Тебе посеще́нием Ду́ха Свята́го: те́мже мя просвети́.

Кондак, глас 8:

Ве́ру Христо́ву я́ко щит внутрь прие́м в се́рдце твое́м, проти́вныя си́лы попра́л еси́, многострада́льче, и венце́м небе́сным венча́лся еси́ ве́чно, Фео́доре, я́ко непобеди́мый.

Икос:

На престо́ле све́та носи́маго, благода́рственно ве́рою воспева́ем Тя, я́ко дарова́ние Боже́ственное дарова́л еси́, до́бляго страда́ньми Фео́дора, в житии́ треблаже́ннаго, я́ко побо́рника су́ща и́стины: и́же благочести́вым помышле́нием стяжа́в Христа́, держа́вный бысть победи́тель на ле́стнаго, я́ко непобеди́мый.

Пе́снь 7

Ирмо́с: Не послужи́ша тва́ри богому́дрии па́че Созда́вшаго, но о́гненное преще́ние му́жески попра́вше, ра́довахуся пою́ще: препе́тый отце́в, Госпо́дь и Бог, благослове́н еси́.

Припев: Святый великомучениче Феодоре, моли Бога о нас!

Зако́ну рекл еси́ не лежа́ти пра́ведником Твои́м, пра́ведный Влады́ко: те́мже Ма́ти Твоя́, и многочу́дный сей раб Твой, све́тлостию па́мяти, сих днесь зако́ны разоря́ют поще́ния.

Припев: Святый великомучениче Феодоре, моли Бога о нас!

Коль сла́дкое и вели́кое, и ра́достное ны́нешнее торжество́! е́же му́чеников нам до́блейший и преве́лий ны́не вообрази́, еди́нем чудесе́м от нечи́стых чи́стыя лю́ди Христо́вы соверши́в.

Припев: Святый великомучениче Феодоре, моли Бога о нас!

К зми́ем лю́тым сопроти́вльшагося, и возмо́гшаго на душетле́ннаго же, и оскверня́ющаго одушевле́нная телеса́, венча́им побе́дными пе́сньми, и венце́в похвала́ми.

Припев: Пресвята́я Богоро́дице, спаси́ на́с.

Богоро́дичен: Родонача́льник у́бо проуве́дев душетле́нное бра́шно не убеже́: Твои́ же ве́рнии лю́дие от Твоего́ му́ченика преднаучи́вшеся, и избе́гше всепа́губныя пи́щи, с сим, Влады́чице, спаси́тельная Тебе́ жрут.

Припев: Святый великомучениче Феодоре, моли Бога о нас!

Росода́вец печа́ли, и распале́ния о́блак яви́лся еси́, пресла́вне, и спасл еси́ от пе́щи мучи́тельския, зову́щия вся ве́рныя: благослове́н еси́, Бо́же, оте́ц на́ших.

Припев: Святый великомучениче Феодоре, моли Бога о нас!

Царю́ пребеззако́ннейший, посрами́ся, и да заградя́тся уста́ твоя́, поуча́ющаяся на нас беззако́нному сове́ту: разруши́ бо твою́ кре́пость ца́рствуяй Царь и всех Госпо́дь.

Сла́ва: Иулиа́не безу́мне, сердце твое́ все зло́бы испо́лнися, обава́ется же от прему́драго Бо́га на́шего, излия́вшееся ле́стно на нас, вопию́щих к Нему́: благода́ть подава́еши нам.

И ныне. Богоро́дичен: Па́че сло́ва Твое́ бысть зача́тие, и па́че ума́ рождество́ Твое́, Всенепоро́чная: Бо́га бо родила́ еси́ пло́тию, спа́сшаго вся от тле́ния, Благослове́нная. Те́мже ны́не, Богоро́дице, Тя сла́вим.

Пе́снь 8

Ирмо́с: О́троки благочести́выя в пещи́, рождество́ Богоро́дичо спасло́ есть, тогда́ у́бо образу́емое, ны́не же де́йствуемое, вселе́нную всю воздвиза́ет пе́ти Тебе́: Го́спода по́йте дела́, и превозноси́те Его́ во вся ве́ки.

Припев: Святый великомучениче Феодоре, моли Бога о нас!

Ра́дости рождество́м испо́лнившая небе́сная и земна́я, вре́менным се́тованием благода́ть благовре́менную подае́т вене́чнику, спле́щущи све́тло пра́зднственная.

Припев: Святый великомучениче Феодоре, моли Бога о нас!

Суббо́тствуим, челове́цы, днесь, от трудо́в вчера́шних почи́вше, за благослови́вшаго настоя́щий день упокое́нием, и ны́не торжество́м му́ченика.

Припев: Святый великомучениче Феодоре, моли Бога о нас!

Вои́стинну сия́ пе́рвая в суббо́тах, и суббо́т бы глаго́лалася суббо́та: му́ченическия же благода́ти и си́лы Боже́ственныя испо́лнена, спасе́ния вели́каго воспомина́ние.

Припев: Святый великомучениче Феодоре, моли Бога о нас!

Царя́ Бо́га чи́стыми бра́шны, ца́рствия беззако́ннаго скверне́ния чи́стый упраздни́, и пресла́вным о́бразом чудоде́йства святу́ю седми́цу освяти́.

Припев: Пресвята́я Богоро́дице, спаси́ на́с.

Богоро́дичен: Извеща́ет Твое́, Отрокови́це, та́инство му́чеников усе́рдная смерть, я́ко бо Бо́гу ве́ровавше ро́ждшемуся, а́ще и стра́сть во́лею претерпе́, саме́х себе́ до́блии пожро́ша.

Припев: Святый великомучениче Феодоре, моли Бога о нас!

Из пла́мене я́ко изба́вился еси́, му́чениче Фео́доре, Боже́ственною си́лою: си́це и ны́не нас спасл еси́ сам, предста́тельством боже́ственным твои́м, беззако́ннаго сове́та злоко́зненнаго.

Припев: Святый великомучениче Феодоре, моли Бога о нас!

Ве́чер водвори́ся плач рабо́м Твои́м, от лука́ваго лови́тельства супоста́та на́шего: но во у́трие ра́дость возсия́, му́чениче терпеливоно́сче, те́плою твое́ю по́мощию.

Слава: Изба́вителя тя обре́тше в беды́ мы впа́дше, и изба́вителя ко́зни вра́жия, му́чениче Христо́в страстоте́рпче Фео́доре, тя славосло́вим во вся ве́ки.

И ныне. Богоро́дичен: Недоумева́ет ум челове́ческий Твоего́ рождества́, Чи́стая, та́инство изрещи́: и сего́ ра́ди Тя ве́рою благоче́стно, я́ко Богоро́дицу почита́ем, и славосло́вим во вся ве́ки.

Пе́снь 9

Ирмо́с: Всяк земноро́дный да взыгра́ется ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Святый великомучениче Феодоре, моли Бога о нас!

Стека́ется мно́жество отвсю́ду, в сень сведе́ния, и живу́щую благода́ть, предпросия́вшаго в сла́ве всех му́чеников, со Влады́чицею всех велича́ем.

Припев: Святый великомучениче Феодоре, моли Бога о нас!

Мужа́йся, Христо́ва Це́рковь, и держа́вствуй всу́е борю́щими: Христо́вы бо дру́зи и предстоя́щии о тебе́ пеку́тся, и отстоя́щии я́коже до́блии, ему́же соверша́еши благода́рственная.

Припев: Святый великомучениче Феодоре, моли Бога о нас!

Возмне́вшася дре́вле умре́ти, ве́щи показу́ют жи́ти и по кончи́не, и ве́ры па́ки предста́тельствовати с ра́вною ре́вностию, е́юже богатя́щеся Благоде́теля велича́ем.

Припев: Пресвята́я Богоро́дице, спаси́ на́с.

Богоро́дичен: Я́ко Боже́ственную Тя печа́ть, пе́сньми запеча́танную Бо́жию кни́гу налага́ю нося́, и собира́ю похвалы́ в Тебе́, Де́во, си́це прославля́я наипа́че Твоего́ му́ченика.

Припев: Святый великомучениче Феодоре, моли Бога о нас!

До́бре яви́лся еси́ побо́рник, пресла́вне, и держа́вное заступле́ние нам чту́щим твою́ честну́ю и ве́чную па́мять ны́не, и твои́х страда́льчеств исправле́ния, и бы́вшее в нас Боже́ственное заступле́ние.

Припев: Святый великомучениче Феодоре, моли Бога о нас!

Твое́ всеблаже́нне чу́до, Фео́доре, соверше́нное святы́ми ту́чами, пое́тся на весь мир, блаже́нне: те́мже и ле́тно собира́ющеся, сла́ву возсыла́ем Христу́, тебе́ просла́вльшему.

Сла́ва: Зря любо́вь восхваля́ющих тя, му́чениче Христо́в, благода́ть возда́рствуй вя́щшую, и ве́ру ве́дый ели́ка есть, пресла́вне, не преста́й, молйтвенниче тепле́йший му́чениче, и хода́тай к Бо́гу на́шему явля́яся.

И ныне, Богоро́дичен: Пе́ти, Де́во, Тя не престае́м помо́щницу, покро́в, ско́рое заступле́ние, и предста́тельницу нашу непосты́дную: соблюди́ Твоя́ рабы́ вся́каго озлобле́ния, вся́кия ко́зни лука́ваго свобожда́ющи при́сно.

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго мученика Феодора Тирона и всех святы́х, помилуй и спаси́ мя, гре́шнаго. Аминь.

Песнопения Великого Поста, каноны трипеснцы