Трипеснец в Четверг Первой седмицы

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кано́н трипе́снец. Творе́ние господи́на Ио́сифа, гла́с 2.

Пе́снь 4

Ирмо́с: Дела́ смотре́ния Твоего́, Го́споди, ужаси́ша проро́ка Авваку́ма: изше́л бо еси́ на спасе́ние люде́й Твои́х, спасти́ пома́занныя Твоя́ прише́л еси́.

Припев: Поми́луй мя, Бо́же, поми́луй мя.

Воздержа́ния зари́ прие́млющи, облиста́йся, душе́, и отбе́гни грехо́внаго омраче́ния: я́ко да возси́яет ти оставле́ния свет, Боже́ственным Ду́хом.

Припев: Поми́луй мя, Бо́же, поми́луй мя.

У́дицею мя сла́сти прельсти́в льсти́вый, пле́нника восхи́ти: но мир, апо́столи, сло́вом улови́вшии, от того́ мя зло́бы изба́вите.

Припев: Поми́луй мя, Бо́же, поми́луй мя.

Яви́стеся Со́лнца сла́вы заре́ния, апо́столи сла́внии, пре́лести тьму отгоня́ще: и мене́ у́бо просвети́те, вся́кою зло́бою омраче́ннаго.

Припев: Пресвята́я Богоро́дице, спаси́ на́с.

Богоро́дичен: Воззову́ в нощи́ и во дни оскорбля́емь к Тебе́, и спасу́ся, и сла́сти прейду́, Стено́ и По́моще, Твое́ю, Де́во, си́лою огражда́емый.

Припев: Поми́луй мя, Бо́же, поми́луй мя.

Со́лнца пра́вды су́ще, апо́столи, свети́ла всесве́тлая, просвеща́ете земны́й мир, мрак пре́лести отгоня́ще.

Припев: Поми́луй мя, Бо́же, поми́луй мя.

Ли́ра су́ще Спа́сова духодви́жимая, апо́столи, позна́вшеся на земли́, доброгла́сную пое́те нам пе́снь, и мир к Бо́гу обраща́ете.

Припев: Поми́луй мя, Бо́же, поми́луй мя.

Апо́стольская двоенадеся́тице, боже́ственная и всечестна́я, моли́ Христа́ о нас, мо́лимся прейти́ нам благомо́щно четыредесятодне́вное по́прище.

Сла́ва, тро́ичен: Тро́ицу во еди́нственном Существе́ сла́вяще, Еди́наго Го́спода Бо́га воспои́м, нерожде́нна Отца́, Сы́на рожде́ннаго, и Ду́ха живу́щаго.

И ныне. Богоро́дичен: Де́ва зача́т во чре́ве, Го́споди, и роди́ Тебе́ Емману́ила: изше́л бо еси́ во спасе́ние люде́й Твои́х, спасти́ благи́я Твоя́, Человеколю́бче.

Пе́снь 8

Ирмо́с: Преподо́бнии Твои́ о́троцы, в пещи́, Христе́, воспева́юще глаго́лаху: благослови́те вся дела́ Госпо́дня, Го́спода.

Припев: Поми́луй мя, Бо́же, поми́луй мя.

Пости́мся от вся́кия сла́сти, утучня́юще чу́вства посто́м, и умиле́ния питие́ те́пле пие́м, пою́ще: благослови́те дела́ Госпо́дня, Го́спода.

Припев: Поми́луй мя, Бо́же, поми́луй мя.

Стоя́ния одесну́ю о́бщника мя бы́ти моли́теся, егда́ ся́дете суди́ти челове́ком со Христо́м, апо́столи, мно́гим грехо́м и суду́ пови́ннаго.

Припев: Поми́луй мя, Бо́же, поми́луй мя.

На колесни́цу боже́ственных доброде́телей, посто́м очи́стившеся взы́дем, и на возду́шную высоту́ ум впери́м, пою́ще: благослови́те дела́ Госпо́дня, Го́спода.

Припев: Пресвята́я Богоро́дице, спаси́ на́с.

Богоро́дичен: Пребыла́ еси́ неопали́ма огнь ро́ждши Божества́, Де́во: но попали́ стра́сти душ, ве́рою пою́щих Ти глас А́нгелов, ра́дости еди́на Хода́таице.

Припев: Поми́луй мя, Бо́же, поми́луй мя.

Ду́ха трубы́ Христо́вы ученики́ воспева́юще, вопие́м: благослови́те дела́ Госпо́дня, Го́спода.

Припев: Поми́луй мя, Бо́же, поми́луй мя.

Я́ко моли́твенники ми́ра, и пре́лести прогони́тели, ученики́ пои́м Христо́вы: благослови́те, вопию́ще, дела́ Госпо́дня, Го́спода.

Припев: Поми́луй мя, Бо́же, поми́луй мя.

Апо́столи, моли́теся, в ми́ре нам очисти́тельныя дни сконча́ти: благослови́те, вопию́щим, дела́ Госпо́дня, Го́спода.

Слава. Тро́ичен: Тро́ицу Всесвяту́ю, во Отце́ и Сы́не и Ду́се, воспева́юще пое́м: благослови́те дела́ Госпо́дня, Го́спода.

И ныне. Богоро́дичен: Неизглаго́ланное Твое́ Рождество́ вси пое́м челове́цы, благоче́стно взыва́юще, Чистая: благослови́те дела́ Госпо́дня, Го́спода.

Пе́снь 9

Ирмо́с: Велича́ем, Христе́, Твою Всенепоро́чную Ма́терь Чи́стую: я́ко роди́ Тя преесте́ственно пло́тию, от вся́кия ле́сти и тли нас избавля́юща.

Припев: Поми́луй мя, Бо́же, поми́луй мя.

Отве́ржен в глубо́кую пучи́ну сласте́й, Твоего́ благоутро́бия бе́здну призыва́ю: Ко́рмчий, спаси́ мя.

Припев: Поми́луй мя, Бо́же, поми́луй мя.

Благоутро́бия исто́чниче, даждь ми ны́не умиле́ние, воздыхание, я́ко да воспла́чу злых мои́х безме́рная моря́.

Припев: Поми́луй мя, Бо́же, поми́луй мя.

Ученико́в Твои́х, Иису́се, честны́ми моле́нии, честно́му даждь ми Воскресе́нию поклони́тися, и Боже́ственным Твои́м Страсте́м.

Припев: Пресвята́я Богоро́дице, спаси́ на́с.

Богоро́дичен: Онебеси́вшая на́ше земно́е смеше́ние, в Тебе́, Всенепоро́чная, Бо́жиим вселе́нием, изба́ви вся от бед.

Припев: Поми́луй мя, Бо́же, поми́луй мя.

Из исто́чников проро́чески Спа́совых, поче́рпше апо́столи во́ду безсме́ртия, жа́ждущия преда́ниями жи́зни напая́ют всегда́.

Припев: Поми́луй мя, Бо́же, поми́луй мя.

Царя́ Небе́снаго я́вльшеся кня́зи апо́столи, повину́сте вселе́нную всю, Сего́ еди́наго че́сти, покланя́тися, и славосло́вити я́ко Бо́га.

Припев: Поми́луй мя, Бо́же, поми́луй мя.

Апо́стольский ли́че, воспева́ющия тя, спаса́й: и сподо́би во умиле́нии се́рдца, дни вся прейти́ светотво́рных посто́в.

Сла́ва, тро́ичен: Тро́ице Неразде́льная, Еди́нице Вседе́тельная и Всеси́льная, О́тче, Сы́не и Святы́й Ду́ше: Ты Бог мой, Го́сподь и Свет, и Тебе́ воспева́я покланя́юся.

И ныне, Богоро́дичен: Тя, Ма́ти и Де́во Чи́стая, ублажа́ем ро́ди родо́в, я́ко была́ е́си очисти́лище ми́ра, Спа́са и Соде́теля неизглаго́ланно ро́ждши.

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)

Таже малых 12, глаголюще на кийждо поклон: Бо́же, очи́сти мя гре́шнаго.

И паки последи молитву всю:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.