Трипеснец в Среду Первой седмицы

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кано́н трипе́снец. Творе́ние господи́на Ио́сифа, гла́с 2.

Пе́снь 3

Ирмо́с: Утверди́ нас в Тебе́, Го́споди, дре́вом умерщвле́й грех, и страх Твой всади́ в сердца́ нас, пою́щих Тя.

Припев: Поми́луй мя, Бо́же, поми́луй мя.

Распне́м у́ды воздержа́нием, трезви́мся в моли́твах, я́коже пи́сано есть, и по следу жи́тельствуим Пострада́вшаго, и стра́сти Умертви́вшаго.

Припев: Поми́луй мя, Бо́же, поми́луй мя.

Изблева́вше го́рький грех, потщи́мся во́лею желчь вкуси́вшему угоди́ти Христу́, Кресто́м низложи́вшу злонача́льника.

Припев: Поми́луй мя, Бо́же, поми́луй мя.

Обы́чай взем грех, влече́т мя во всеконе́чную па́губу: но Ты мя от сея́ изба́ви Кресто́м Твои́м, Ще́дре Многоми́лостиве.

Припев: Пресвята́я Богоро́дице, спаси́ на́с.

Богоро́дичен: Влады́чествующая все́ми тва́рьми Влады́чице: я́ко Влады́ку ро́ждши, рабо́ты мя свободи́ льсти́ваго, и еди́наго борца́.

Припев: Поми́луй мя, Бо́же, поми́луй мя.

Древо кре́стное воздержа́ние ми́ру процвете́: е́же любо́вию облобыза́вше, наслади́мся всепло́дия Боже́ственных за́поведей Христо́вых.

Припев: Поми́луй мя, Бо́же, поми́луй мя.

Воздержа́ние страсте́й и ны́не нося́ще, плоть распне́м Го́сподеви, и ме́ртвенно тоя́ мудрова́ние пока́жем вси Боже́ственней жи́зни.

Припев: Поми́луй мя, Бо́же, поми́луй мя.

Распя́тие пою́, и прободе́ние Боже́ственных ребр Твои́х, из ни́хже питие́ безсме́ртное че́рплю всегда́, Христе́, и освяща́юся.

Сла́ва, тро́ичен: Три Ли́ца Еди́наго Зра́ка сла́влю, Отца́, Сы́на и Ду́ха, Еди́ну Держа́ву Божества́, Ца́рство всех, и све́тлость.

И ныне. Богоро́дичен: Рождество́ Твое́, Чи́стая, стра́шно бысть: Бог бо есть вочелове́чивыйся, безнача́льно из Отца́ роди́выйся, и из Тебе́ напосле́док кроме́ му́жа ро́ждься.

Пе́снь 8

Ирмо́с: В купине́ Моисе́ю Де́вы чу́до, на Сина́йстей горе́ прообрази́вшаго иногда́, по́йте, благослови́те и превозноси́те во вся ве́ки.

Припев: Поми́луй мя, Бо́же, поми́луй мя.

Пещь страсте́й распаля́ет ду́шу мою́, но росо́ю ми́лости Твоея́ сию́ увяди́, источи́вый безстра́стия то́ки из нетле́нных Твоих ре́бр, распина́емь, Благодете́лю, мно́гаго ра́ди снизхожде́ния.

Припев: Поми́луй мя, Бо́же, поми́луй мя.

Возне́сл еси́ ны́ па́дшия в зло́бу на Кресте́ Твои́м вознесе́нием, Христе́: те́мже попо́лзшася в про́пасть греха́, возведи́, и утверди́ мя на ка́мени спасе́ния: я́ко да сла́влю держа́ву Твою́.

Припев: Поми́луй мя, Бо́же, поми́луй мя.

Копие́м Твои́м, Христе́, страсте́й гное́ние очи́стив от се́рдца моего́, всего́ мя исцели́, его́же змий уязви́ зубы́ ядови́тыми. И даждь ми непоколеби́мо к Боже́ственным стезя́м ходи́ти.

Припев: Пресвята́я Богоро́дице, спаси́ на́с.

Богоро́дичен: Тебе́ све́тлую свещу́ и све́щник, в Не́йже огнь Божества́ все́лься, просвети́ нощно́ю одержимых тле́ю, Нескве́рная, чтим вси благословя́ще, Благослове́нная, рождество́ Твое́.

Припев: Поми́луй мя, Бо́же, поми́луй мя.

Посреде́ разбо́йник распя́таго на дре́ве, и копие́м прободе́ннаго, в живото́чная ре́бра, по́йте, благослови́те и превозноси́те во вся ве́ки.

Припев: Поми́луй мя, Бо́же, поми́луй мя.

Судя́й всей земли́, суди́щу предста́л еси́, зауше́н был еси́ и пору́ган, на Кресте́ пове́шен был еси́, от тли мя пременя́я дре́вняго греха́, во вся ве́ки.

Припев: Поми́луй мя, Бо́же, поми́луй мя.

Кре́сте Христо́в, разбо́йника наста́вивый к ве́ре, и мене́ к тече́нию благоси́льно посто́м сподо́би, предвари́ти на поклоне́ние твое́, и оживотвори́тися.

Слава. Тро́ичен: Божество́ Еди́но Тро́ица, Неразде́льное Естество́, разде́льное же Ли́цы, Непоколеби́мая Держа́во, О́тче, Сы́не и Ду́ше, Тебе́ песносло́вим во вся ве́ки.

И ныне. Богоро́дичен: Богороди́тельнице Чи́стая, Небе́сная Врата́, Спаси́тельная Две́ре, всех христиа́н моле́ния приими́, блажа́щих Тя во вся ве́ки.

Пе́снь 9

Ирмо́с: Чи́стую и Пречи́стую, Ма́терь и Де́ву, пе́сньми пе́сней вси ве́рнии, благоче́стно я́ко Богоро́дицу велича́ем.

Припев: Поми́луй мя, Бо́же, поми́луй мя.

Со́лнца светле́е пост возсия́вый, многосве́тлая благода́ть, благовеству́ет всем кре́стныя лучи́, и зари́ честны́я Стра́сти, и Воскресе́ния день спаси́тельный.

Припев: Поми́луй мя, Бо́же, поми́луй мя.

Чистоту́ возлю́бим, блуда́ отбежи́м, чре́сла целому́дрием препоя́шим: я́ко да чи́сти яви́мся Чи́стому и еди́ному от всех и́щущему чистоты́, Спа́су душ на́ших.

Припев: Поми́луй мя, Бо́же, поми́луй мя.

Христе́, стра́ху Твоему́ пригвозди́ пло́ти моя, Кресту́ пригвозди́вый грех Ада́мов, разреши́ зол мои́х соу́зы, лука́ваго сокруши́ стре́лы копие́м Твои́м, Влады́ко, и сего́ вре́да изба́ви мя.

Припев: Пресвята́я Богоро́дице, спаси́ на́с.

Богоро́дичен: Судию́ Пра́веднейшаго и Еди́наго Благоуве́тливаго, ро́ждшая Де́во Христа́ Го́спода, изба́ви мя суда́, Отрокови́це, и огня́ и муче́ния, я́же ми исхода́таи греха́ наслажде́ние.

Припев: Поми́луй мя, Бо́же, поми́луй мя.

О благоутро́бия Твоего́! я́ко Крест претерпе́л еси́, гво́здие и копие́, Го́споди, мене́ ради осужде́ннаго тле́ю: те́мже пою́ Тя, Христе́.

Припев: Поми́луй мя, Бо́же, поми́луй мя.

Кресту́, тро́сти, гво́здием и копию́, жи́зненным Твои́м Страсте́м вси лю́дие покланя́ющеся, пе́сньми, Христе́, пое́м Тя.

Припев: Поми́луй мя, Бо́же, поми́луй мя.

Кресто́м Твои́м, Го́споди, и мене́ укрепи́в, посто́в мне да́руй Благи́й благомо́щно сконча́ти обхожде́ние.

Сла́ва, тро́ичен: Еди́нице Триипоста́сная, Тро́ице Еди́нственная. Господонача́льная, естество́ равносла́вное, О́тче, Сы́не и Боже́ственный Ду́ше, спаси́ всех нас.

И ныне, Богоро́дичен: Ра́дуйся, очисти́лище ми́ру, Богоро́дице, в не́же прибе́гши вси гре́шнии, к Бо́гу примире́ния при́сно обрета́ем.

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)

Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)

Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)

Таже малых 12, глаголюще на кийждо поклон: Бо́же, очи́сти мя гре́шнаго.

И паки последи молитву всю:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.