Канон в Пятницу Сырной седмицы

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кано́н трио́ди. Творе́ние господи́на Ио́сифа. Гла́с 8. Та́же трипе́снец Ио́сифа. Гла́с 6:

Пе́снь 1.

Ирмо́с: Во́ду проше́д, я́ко су́шу, / и еги́петскаго зла избежáв, / изрáильтянин вопия́ше: / Избáвителю и Бо́гу на́шему пои́м.

Припев: Слава Тебе, Боже наш, слава Тебе.

Воздержа́ния боже́ственное вре́мя возсия́ все́м, покая́ния просвеще́ние, тьму́ отъе́млющее прегреше́ний: сие́ усе́рдным се́рдцем прии́мем.

Припев: Слава Тебе, Боже наш, слава Тебе.

Се́ покая́ния добро́та ду́ши разширя́ет, поще́ния пригвожде́нием: в сие́ тре́звенно вше́дше, и прегреше́ний ве́рнии разреше́ние прии́мем.

Слава: Нача́ла, вла́сти, и херуви́ми, и вся́ си́лы моли́теся, вре́мя на́м по́стное соверши́ти в покая́нии и вся́кой чистоте́.

И ныне. Богоро́дичен: Свята́я Де́во, ве́рных заступле́ние еди́на, моли́тву Твою́ споспе́шную, во вре́мя поще́ния все́м пода́ждь, Богоро́дицу чи́стую Тя́ ве́дущим.

Пе́снь 3.

Ирмо́с: Небе́снаго кру́га Верхотво́рче, Го́споди, / и Це́ркве Зижди́телю, / Ты ме́не утверди́ в любви́ Твое́й, / желáний крáю, ве́рных утвержде́ние, / Еди́не Человеколю́бче.

Припев: Слава Тебе, Боже наш, слава Тебе.

Всегуби́тельных страсте́й душе́вных убежи́м подъя́тием поста́, и умиле́ния пока́жем плоды́, пе́рвее греха́ми Бо́га благоутро́бнаго преогорчи́вшии.

Припев: Слава Тебе, Боже наш, слава Тебе.

Свещы́ еле́ем благи́х дея́ний, вси́ ны́не вжещи́ тща́тельно возусе́рдствуим, я́ко да вни́дем с му́дрыми де́вами во све́тлый черто́г ра́дующеся.

Сла́ва: Богоглаго́ливии проро́цы, богови́днии му́ченицы, и боже́ственнии ученицы́ Спа́совы, Того́ моли́те, до́бре нача́ти и благоуго́дно сконча́ти поще́ния по́прище, вси́ помо́лимся.

И ныне. Богоро́дичен: Я́ко вину́ Тя все́х благи́х Влады́чице, вси́ приле́жно мо́лим: е́же совни́ти на́м Твои́м хода́тайством в по́стный по́двиг, и концу́ дарова́тися сего́ спаси́тельному.

Пе́снь 4.

Ирмо́с: Услы́шах Го́споди, смотре́ния Твоего́ та́инство, разуме́х дела́ Твоя́, и просла0вих Твое́ Божество́.

Припев: Слава Тебе, Боже наш, слава Тебе.

Я́коже у́тро прини́кши, ны́не поще́ния благода́ть предла́гает покая́ния вре́мя на́м, долго́в тьму́ разреша́ющее.

Припев: Слава Тебе, Боже наш, слава Тебе.

Напита́им ни́щия, ми́лость ми́лостию восприе́млюще, и поще́ния боже́ственною водо́ю душе́вныя скве́рны отмы́ем.

Сла́ва: Небе́снии А́нгели Благода́вца умоли́те, умиле́нное на́ше покая́ние, щедро́тами безме́рными прия́ти.

И ныне. Богоро́дичен: Чи́стое очисти́лище согреша́ющих, свята́я Влады́чице, хода́тайством Твои́м раздери́ согреше́ний мои́х рукописа́ние.

Пе́снь 5.

Ирмо́с: Вску́ю мя́ отри́нул еси́ от лица́ Твоего́ Све́те незаходи́мый, и покры́ла мя́ е́сть чужда́я тьма́ окая́ннаго; но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Слава Тебе, Боже наш, слава Тебе.

Настоя́щий де́нь, нача́ток творя́ще жития́ чистоты́, себе́ усе́рдно к подвиго́м ве́рнии угото́вим, плотски́я боле́зни, и душе́вное благопло́дие Влады́це все́х принося́ще.

Припев: Слава Тебе, Боже наш, слава Тебе.

Моисе́я по́ст, боже́ственнаго боговиде́ния показа́ прича́стника: сего́ у́бо душе́ моя́ подража́ющи, по́ст приими́, боже́ственная восхожде́ния в себе́ расположи́вши, я́ко да ви́диши Бо́жию све́тлость.

Припев: Слава Тебе, Боже наш, слава Тебе.

Свяще́нных апо́стол, и священноимени́тых му́ченик мольба́ми, поще́ния вре́мя прейти́ на́с сподо́би Иису́се ще́дрый, в покая́нии, и вся́ком отложе́нии греха́, мо́лимся.

Припев: Пресвята́я Богоро́дице, спаси́ на́с.

Богоро́дичен: В поще́ния две́рь хотя́щии вни́ти, мо́лим Тя́ Бо́жию две́рь, совни́ти рабо́м Твои́м Влады́чице, и разшири́ти вся́ко помышле́ния, и мы́сли, спаси́тельная твори́ти хоте́ния.

Ирмо́с: Бо́жиим све́том Твои́м, Бла́же, у́тренюющих Ти ду́ши любо́вию озари́, молю́ся, Тя ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Слава Тебе, Боже наш, слава Тебе.

На кресте́ ру́це пригвозди́в, копие́м в ре́бра прободе́н, писа́ние Человеколю́бче па́дшаго Ада́ма растерза́л еси́: те́мже Тя́ Жизнода́вче, пе́сньми сла́вим.

Припев: Слава Тебе, Боже наш, слава Тебе.

Ле́стно зми́й лука́вый стра́сти наложи́в ми́ душе́вныя, от рая́ изгна́: Ты́ же дла́ни на кресте́ пригвозди́в, к высоте́ нетле́ния Спа́се привле́кл еси́.

Припев: Слава Тебе, Боже наш, слава Тебе.

Поста́ боже́ственное вре́мя, стра́сти очища́ющее душе́вныя, и теле́сныя омыва́ющее я́звы, прии́де ны́не, наста́: ве́рнии стеце́мся, и сие́ любому́дренно прии́мем.

Припев: Слава Тебе, Боже наш, слава Тебе.

Вре́мя яви́ся благо́е, в боже́ственное души́ весе́лие, вся́кое лице́ облача́ющее: приди́те, ве́село сие́ прии́мем, посто́м и моли́твою предочища́ющеся.

Припев: Слава Тебе, Боже наш, слава Тебе.

По́ст, сле́зы, моли́тву, обы́чай смире́нный, на́с ра́ди Смири́вшемуся принесе́м: я́ко да в де́нь воздержа́ния проще́ние пода́ст прегреше́ний на́ших.

Припев: Пресвята́я Богоро́дице, спаси́ на́с.

Богоро́дичен: Светолу́чными Твои́ми блиста́ньми, Влады́чице блага́я ми́ра, души́ моея́ тьму́ отжени́, и но́щь греха́ моего́: да усе́рдно пою́, и блажу́ Тя.

Припев: Слава Тебе, Боже наш, слава Тебе.

Кресту́ Твоему́ покланя́юся Го́споди Человеколю́бче, и́мже мя́ спа́сл еси́, и пою́ стра́сти спаси́тельныя и боже́ственныя Влады́ко, и́миже страсте́й мои́х боле́зненных изба́вихся Сло́ве, в жи́знь преходя́ невре́дную.

Припев: Слава Тебе, Боже наш, слава Тебе.

Кресту́ наде́ющеся, ле́сти проти́вных отвраща́емся, в не́м водрузи́вшеся, ве́рнии позна́ни бы́хом Бо́гу, я́ко а́гнцы новорожде́ннии избра́ннии, и неле́стное млеко́ испи́хом.

Припев: Слава Тебе, Боже наш, слава Тебе.

Пра́вый пу́ть Тво́й Го́споди, испра́ви все́м рабо́м Твои́м чту́щим любо́вию, поста́ по́прище утверди́, и приведе́ньми на лу́чшее свята́го Твоего́ ца́рствия на́с сподо́би.

Сла́ва: Отца́, и Сло́во вси́, и Свята́го Ду́ха, сла́вим во Еди́ном Естестве́, позна́ние све́тлое излага́юще: покланя́ющеся Обои́м, и разделя́юще ли́цы, неслия́нно, непрело́жно служа́ще.

И ныне. Богоро́дичен: Упова́ние конце́м, ра́дость рабо́м Твои́м Ты́ еси́ Де́во чи́стая, чту́щия любо́вию о́браз Тво́й, сохраня́й Пречи́стая: и Твои́ми моли́твами все́х на́с чужда́го свободи́, я́ко Премилосе́рднейшая.

Пе́снь 6.

Ирмо́с: Очи́сти мя́ Спа́се, мно́го бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́ Бо́же спасе́ния моего́.

Припев: Слава Тебе, Боже наш, слава Тебе.

Пости́вся Изба́витель, настоя́щее вре́мя на́м определи́ душе́вных скве́рн очисти́тельное: те́плым ве́рнии присту́пим се́рдцем, я́ко да прии́мем проще́ние.

Припев: Слава Тебе, Боже наш, слава Тебе.

Мытаре́во Христе́ воздыха́ние прие́м, и блудни́цы от души́ пла́ч приноси́мый, приими́ я́ко Человеколю́бец на́ша мольбы́, очище́ние на́м да́руя.

Сла́ва: Пропове́дник и проро́к, му́ченик и апо́стол Твои́х, преподо́бных и святи́телей, и все́х пра́ведных Твои́х Христе́ умоле́ньми, очище́ние прегреше́ний душа́м на́шим низпосли́.

И ныне. Богоро́дичен: Еди́ная немощно́е челове́ческаго естества́, боже0ственным Твои́м рождество́м Чи́стая утверди́вшая, поспе́шница мне́ яви́ся, к по́стному входя́щу боже́ственному по́прищу.

Пе́снь 7.

Ирмо́с: О́троцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́ Го́споди Бо́же во ве́ки.

Припев: Слава Тебе, Боже наш, слава Тебе.

Дре́вле на колесни́це о́гненной ноша́шеся Илия́, посто́м просвети́вся: о душе́! Сего́ подража́ющи, плотски́я умертви́ по́хоти воздержа́нием.

Припев: Слава Тебе, Боже наш, слава Тебе.

Се́ вре́мя воздержа́ния, явля́ющее Тебе́ све́т спасе́ния, не небрези́ душе́, Бо́гу долготерпя́щу, но усе́рдно возопи́й: Благи́й уще́дри мя́.

Сла́ва: О́троки огради́вший по́ст, соблюде́ от огня́ неопали́мы: Иису́се, те́х моли́твами, огня́ мя ве́чнаго изба́ви мно́гим Твои́м милосе́рдием.

И ныне. Богоро́дичен: Еди́ная по́мощь челове́ков, помо́щница на́м рабо́м Твои́м бу́ди, во вре́мя воздержа́ния, я́ко да покая́нием благоугожда́юще, прии́мем небе́сное ца́рство.

Песнь 8.

Ирмо́с: Седмери́цею пе́щь халде́йский мучи́тель богочести́вым неи́стовно разжже́: си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Припев: Слава Тебе, Боже наш, слава Тебе.

Покая́ния пе́щь усе́рдно возжже́м, и сла́сти в не́й попали́м вся́ теле́сныя: и огня́ бу́дущаго иску́с не прия́ти, бога́таго в ми́лости про́сим, вопию́ще: свяще́нницы благослови́те, лю́дие превозноси́те во вся́ ве́ки.

Припев: Слава Тебе, Боже наш, слава Тебе.

Вхо́дное вре́мя поста́ на́м бу́дет вся́каго греха́ отложе́ния вино́вное, да не до́лу преклони́мся, ниже́ уны́ло теце́м, я́ко да в кра́тких и ма́лых дне́х, мно́гия скве́рны умиле́нием се́рдца измы́ем, еди́наго Бо́га на́шего пою́ще.

Припев: Слава Тебе, Боже наш, слава Тебе.

А́нгельстии чи́ни, му́ченик собра́ние, боже́ственных апо́стол ли́к святы́й, преподо́бных собо́р, святи́телей же и проро́ков, Тебе́ мо́лятся благи́й Человеколю́бче: покая́ние и́стинное Твои́м рабо́м пода́ждь, во вре́мя воздержа́ния ны́не вводи́маго.

Припев: Пресвята́я Богоро́дице, спаси́ на́с.

Богоро́дичен: Богороди́тельнице всечи́стая, к Тебе́ прибега́ем, уще́дри на́с благо́ю Твое́ю моли́твою, и да́ждь благопримири́тельна Твоего́ Сы́на и Го́спода все́м на́м, во вре́мя поще́ния ны́не вводи́маго, во спасе́ние ве́рных, Тебе́ песносло́вящих во вся́ ве́ки.

Ирмо́с: А́нгели и небеса́ на престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте, и превозноси́те Его́ во ве́ки.

Припев: Слава Тебе, Боже наш, слава Тебе.

Насле́дие оте́ческое не сохрани́вше, грехо́вным зако́ном порабо́тихомся: но просте́р дла́ни Твоя́ на кресте́ боже́ственнем, свобо́ду все́м дарова́л еси́ и́м: его́же Ти́ ве́рою приво́дим во дне́х святы́х, поми́луй ны́ Ми́лостиве, Тебе́ превознося́щия во вся́ ве́ки.

Припев: Слава Тебе, Боже наш, слава Тебе.

Кресто́м Твои́м разстоя́ние, и граде́жа средосте́ние разори́вый, и ми́р в конца́х обнови́вый бога́тый ми́рствующим, да́руй на́м прейти́ Христе́ постоя́нием бу́дущее поще́ние, Го́спода пою́щим непреста́нно, и превознося́щим во вся́ ве́ки.

Припев: Слава Тебе, Боже наш, слава Тебе.

Поста́ благода́ть дне́сь со́лнечныя лучи́ все́м предлага́ет, предочища́ющи мра́к от греха́: содержи́ми страстьми́ разли́чными, в ра́дости преше́дше прии́мем да́р любому́дренно, Го́спода по́йте, вопию́ще, и превозноси́те во вся́ ве́ки.

Припев: Слава Тебе, Боже наш, слава Тебе.

Го́рько объе́м первозда́нный, в раи́ дре́вле сне́дь безслове́сно, отве́ржеся и осужде́н, от сла́дости изгна́н бы́сть: но на дре́ве гвоздьми́ Пригвожде́н, лука́вное писа́ние пригвозди́л еси́ греха́ его́. Те́мже Твое́ мно́гое благоутро́бие воспева́ем во вся́ ве́ки.

Припев: Слава Тебе, Боже наш, слава Тебе.

Зако́н поста́ отри́нувше, в про́пасти греха́ поползо́хомся, и поста́ востре́бовахом ны́не вводи́маго: его́же Ще́дре провожда́ющим на́м, благода́ть с небесе́ низпосли́, и ми́р бога́тый: Го́спода по́йте дела́, и превозноси́те во вся́ ве́ки.

Припев: Пресвята́я Богоро́дице, спаси́ на́с.

Богоро́дичен: Па́дающих исправле́ние, гре́шников хода́таице, стра́нных прохлажде́ние, ско́рбных утеше́ние, Пресвята́я Де́во, души́ моея́ печа́ль разори́ Чи́стая, и утеше́ние свы́ше от Бо́га пода́ти ми́ моли́ся пою́щу усе́рдно, Тя́ превознося́щу во вся́ ве́ки.

Припев: Слава Тебе, Боже наш, слава Тебе.

Пригвожде́ннаго пло́тию на кресте́ Ще́дре, ви́дящи Тя́ тва́рей естество́ пременя́шеся: све́т дне́ во тьму́, дви́жашеся земля́, и вся́ колеба́хуся.

Припев: Слава Тебе, Боже наш, слава Тебе.

На высоту́ креста́ челове́ческое естество́ совозвы́сив, и от ре́бр Твои́х боже́ственных бога́тство источи́л еси́ спасе́ния, ве́рою покланя́ющимся Спа́се Пречи́стей стра́сти Твое́й.

Припев: Слава Тебе, Боже наш, слава Тебе.

Покая́ние на́ше, я́ко Благи́й естество́м прие́м, вра́жиих сете́й изба́ви Го́споди, да ве́рою и любо́вию Твое́ ны́не воспои́м свято́е влады́чество.

Благослови́м Отца́, и Сы́на, и Свята́го Ду́ха, Го́спода.

Тро́ичен: Еди́н Бо́г у́бо Тро́ица, ни Отцу́ изступи́вшу в сыновство́, ниже́ Сы́ну премени́вшуся во исхожде́ние: но сво́йственная и обое́, све́т, Бо́га, Три́ сла́влю во ве́ки.

И ныне. Богоро́дичен: Ка́ко родила́ еси́ рцы́, от Отца́ безле́тно препросия́вша, и со Святы́м Ду́хом воспева́ема; или́ я́коже ве́сть Еди́н, благоволи́вый роди́тися из Тебе́ во ве́ки.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с: те́м Тя́ Богоро́дицу А́нгелов и челове́к чинонача́лия велича́ют.

Припев: Слава Тебе, Боже наш, слава Тебе.

Се́ светоно́сное прии́де вре́мя, святы́й де́нь просия́, мра́чных страсте́й твои́х отбе́гни, о душе́! И зари́ восприми́ наставля́ющия тя́ к све́ту, умиле́ние я́ко вино́ пию́щи весели́ся, и сласте́й пия́нство возненави́ждь.

Припев: Слава Тебе, Боже наш, слава Тебе.

Обы́чно ми́лости Твоя́ на на́с излива́яй Ще́дре бога́тыя, да́ждь на́м сле́зы, очища́ющия скве́рны и помышле́ния лю́бящих Тя́: ве́ру и любо́вь чи́стую, бога́тное покая́ние, присвое́ние к Тебе́ еди́ному многоми́лостивому.

Припев: Слава Тебе, Боже наш, слава Тебе.

Все́х А́нгелов боже́ственное мно́жество, и святы́х ли́цы достохва́льнии, Блага́го ны́не моли́те приле́жно: я́ко да боже́ственное по́прище сие́, поще́ния настоя́щее, тещи́ непреткнове́нно ны́ укрепи́т, и победоно́сцы соде́лает.

Припев: Пресвята́я Богоро́дице, спаси́ на́с.

Богоро́дичен: Благолюби́вая Де́во, Блага́го ро́ждшая Спа́са, ублажи́ вся́ ны́, страстьми́ безме́рными, и помышле́ньми озло́бленныя Влады́чице, и отягче́нныя грехо́в бре́меньми неудобоно́сными: я́ко да Тя́ по до́лгу, я́ко Богоро́дицу велича́ем.

Ирмо́с: Чу́жде ма́терем де́вство, и стра́нно де́вам деторожде́ние: на Тебе́ Богоро́дице обоя́ устро́ишася. Те́м Тя́ вся́ племена́ земна́я непреста́нно велича́ем.

Припев: Слава Тебе, Боже наш, слава Тебе.

Недоуме́ет вся́кое естество́, а́нгелов и челове́ков, Твое́ благоутро́бие благодари́ти Благоде́телю: я́ко пло́тию хотя́ на́с ра́ди обнища́л еси́, и на дре́ве о на́с распросте́рлся еси́, кля́тва бы́в, да пе́рвую оты́меши кля́тву челове́чества.

Припев: Слава Тебе, Боже наш, слава Тебе.

Све́тлый де́нь воздержа́ния наста́, све́тлым лице́м прииди́те, усря́щим душе́ моя́ Влады́ку, благода́ти низпосла́тися свы́ше на́м прося́ще, и мно́гих прегреше́ний исправле́ние обрести́: я́ко да стра́шнейшею гее́нною не искуси́мся та́мо.

Припев: Слава Тебе, Боже наш, слава Тебе.

Во тьме́ грехо́в содержи́мым, покая́ния ны́не свяще́ннии вхо́ды наста́ша, все́х ду́ши просвеща́ющия. Те́мже душе́ моя́, омраче́ния уклони́ся сы́тости страсте́й, потщи́ся, да сла́дости ве́чныя наслади́шися та́мо.

Припев: Слава Тебе, Боже наш, слава Тебе.

На дре́ве ру́це во́лею распросте́р, разстоя́щаяся вся́ собра́л еси́ Жизнода́вче: копие́м же Твоя́ отве́рзл Долготерпели́ве ре́бра, побежде́ние от ре́бр прозя́бшее испра́вил еси́ на́м. Те́мже благодаря́ще пое́м благоутро́бие Твое́.

Припев: Слава Тебе, Боже наш, слава Тебе.

Светоно́сный ны́не надходя́щий по́ст, прие́млет трапе́зу подвиго́в предложе́нную, сего́ ра́ди сея́ тре́звенно вси́, честну́ю ча́шу чисти́тельных сле́з восприи́мем ве́рнии: да неисце́льными слеза́ми не искуси́мся та́мо.

Припев: Пресвята́я Богоро́дице, спаси́ на́с.

Богоро́дичен: Предста́тельство все́х на Тя́ наде́ющихся, в беда́х бо́драя су́щи Предста́тельнице Богоро́дице, ве́чнующия изба́ви на́с гее́нны, и належа́щих му́к го́рьких: я́ко да до́лжно пое́м вели́чия Твоя́.

Припев: Слава Тебе, Боже наш, слава Тебе.

Я́звам покланя́емся Твои́м Жизнода́вче, и́миже греха́ страсте́й изба́вльшеся, честны́м Кресто́м Твои́м позна́хомся запеча́тствовани, во спасе́ние и заступле́ние от вся́каго прило́га вра́жия.

Припев: Слава Тебе, Боже наш, слава Тебе.

Озари́ Креста́ Твоего́ сия́ньми, укрествова́выйся во́лею за все́х спасе́ние, ду́ши пою́щих стра́сти Твоя́ Всеми́лостиве: и на стезю́ жи́знь на́шу упра́ви и наста́ви.

Припев: Слава Тебе, Боже наш, слава Тебе.

Согреши́хом преступи́вше за́поведи Твоя́, и пути́ боже́ственных зачине́ний Твои́х Спа́се, уклони́хомся дале́че Человеколю́бче, нераде́нием: но Ще́дрый, воззови́ от ле́сти ду́ши на́ша.

Сла́ва, тро́ичен: Хвала́, че́сть Тро́ице ле́потствует, и сла́ва я́ко еди́ному Госпо́дьству, и еди́ному Ца́рству, несли́тно, несе́чно, Еди́нице Божество́м покланя́емой, несе́чной бо естество́м, непреста́нно велича́емей.

И ныне. Богоро́дичен: Уми́лостивися моли́твами всечи́стыя Ма́тере Твоея́ Всеще́дре Всецарю́ сла́вы, егда́ прии́деши суди́ти рабы́ Твоя́, я́ко ми́лостив: в Тя0 бо вси́ ве́ровахом, и Тя́ Бо́га зна́ем.

Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.