Канон в Четверг Сырной седмицы

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Трипе́снец трио́ди. Творе́ние господи́на Ио́сифа, гла́с 4.

Пе́снь 4.

Ирмо́с: Прише́л еси́ от Де́вы не хода́тай, ни А́нгел, но Са́м Го́споди вопло́щься, и спа́сл еси́ всего́ мя челове́ка. Те́м зову́ Ти́: сла́ва си́ле Твое́й Го́споди.

Припев: Слава Тебе, Боже наш, слава Тебе.

Просия́ша в ми́ре зарю́ богоразу́мия ученицы́ Твои́ Го́споди, и пре́лесть помрачи́ша прельще́ния, разо́рше омраче́ние. Те́х моли́твами Ще́дре, спаси́ пою́щия Тя́.

Припев: Слава Тебе, Боже наш, слава Тебе.

Преддве́рия поста́, подвиго́в благопло́дии венча́нная прие́млют притека́ющих тре́звенно пе́сньми и пе́нии та́инстсвенными, тща́тельно ве́рнии вси́ стеце́мся.

Припев: Слава Тебе, Боже наш, слава Тебе.

Умерщвле́ния ри́зы прие́м, в де́рзость невоздержа́ния облеко́хся окая́нный: но Ты́ мя облецы́ Сы́не Бо́жий, оде́ждею све́тлою отрожде́ния.

Припев: Слава Тебе, Боже наш, слава Тебе.

Житие́ мое́ лука́вством, и вся́кою нечистото́ю сконча́ся: но к Тебе́ всеще́дрому прибега́ю, предвари́в у́бо спаси́ мя Христе́ Бо́же, Твое́ю благода́тию.

Припев: Пресвята́я Богоро́дице, спаси́ на́с.

Богоро́дичен: Зачала́ еси́ па́че сло́ва, и родила́ еси́ па́че естества́ Богороди́тельнице, влады́чествующаго тва́рию. Его́же непреста́нно моли́, изба́витися на́м от вся́каго гне́ва, Тебе́ ублажа́ющим.

Припев: Слава Тебе, Боже наш, слава Тебе.

Расточи́вше невоздержа́ния мглу́ апо́столи, уче́ний ва́ших сия́ньми, просвети́те воздержа́нием вся́ гре́шныя и пра́ведныя, я́ко всехва́льнии.

Припев: Слава Тебе, Боже наш, слава Тебе.

Я́коже я́снии би́серие сло́ва апо́столи, вся́ украси́сте воздержа́нием концы́, и удоботвори́вше ду́ш на́ших вои́стину ны́не благоро́дие.

Припев: Слава Тебе, Боже наш, слава Тебе.

Пе́щь страсте́й росо́ю поста́ апо́столи увяди́вше, вся́ челове́ки научи́сте, гра́д се́й некра́домый и жили́ще име́ти освяще́ния.

Сла́ва: Согреши́х па́че все́х челове́ков окая́нный, и не пока́яхся, я́ко манасси́я согреши́х: нра́вы покая́ния ми́ сотвори́ Го́споди, пре́жде да́же не разреши́т мя́ сме́рть.

И ныне. Богоро́дичен: Тебе́ приста́нище спасе́ния, и сте́ну неруши́мую Богоро́дице Влады́чице, вси́ ве́рнии ве́мы: Ты́ бо моли́твами Твои́ми от бе́д свобожда́еши ду́ши на́ша.

Песнь 8.

Ирмо́с: Устраши́ся отроко́в благочести́вых, сообра́знаго души́ нескве́рнаго те́ла, и устрани́ся воспита́нный в безме́рном веществе́, неутружде́н о́гнь: присноживу́щу же, изувя́дшу пла́меню, ве́чнующая пе́снь воспева́шеся: Го́спода вся́ дела́ по́йте, и превозноси́те во вся́ ве́ки.

Припев: Слава Тебе, Боже наш, слава Тебе.

Земля́ вся́ Го́споди, Твоего́ хвале́ния испо́лнися: всю́ бо обтече́ боже́ственных учени́к Твои́х веща́ние боже́ственное, из глубины́ неве́дения обраща́ющее к ра́зуму, пою́щую: благослови́те дела́ Госпо́дня Го́спода.

Припев: Слава Тебе, Боже наш, слава Тебе.

Благода́ть боже́ственная покая́ния яви́ся, спасе́ние нося́щи, сея́ наслажда́ющимся, побе́д и по́двигов, по́тов и боле́зней: те́мже тецы́ душе́ моя́ ко Влады́це твоему́, мно́гих твои́х прегреше́ний и́щущи прия́ти проще́ние.

Припев: Слава Тебе, Боже наш, слава Тебе.

По́прище отве́рзеся богода́нного воздержа́ния, све́тло усря́щем тре́бующии ми́лости: жа́ждет бо Благоутро́бный на́шего спасе́ния, и е́же да́ти проще́ние простира́ется, и́щущим его́ усе́рдно, и любо́вию рабо́тающим.

Припев: Слава Тебе, Боже наш, слава Тебе.

Посто́м заусти́ся, ми́рствующею мы́слею, напита́й же душе́ Го́спода, благодея́нием доброде́тели, бра́шна, я́ко благово́нныя же́ртвы, принося́щи Сему́, и взыва́ющи: дела́ благослови́те непреста́нно Го́спода.

Припев: Пресвята́я Богоро́дице, спаси́ на́с.

Богоро́дичен: Все́ми влады́чествующая, мольбы́ прие́млющи Влады́чице рабо́в Твои́х, Свята́я Богоро́дице, тьмы́ мя изба́ви и огня́ негаси́маго, зо́л мои́х мно́жества очища́ющи Твои́м хода́тайством, и еди́ною боже́ственною Твое́ю моли́твою.

Припев: Слава Тебе, Боже наш, слава Тебе.

Ва́с я́коже све́т, Христо́с в концы́ всея́ вселе́нныя апо́столы да́вый, ше́дше, рече́, научи́те во язы́цех: да в пло́ти Мя́ су́ща уви́дите воздержа́нием живу́ща, и вра́жию всю́ си́лу попира́юща, и пу́ть челове́ком явля́юща пра́вый.

Припев: Слава Тебе, Боже наш, слава Тебе.

Яви́л еси́ гряду́щее Христе́ воздержа́ние, во очище́ние челове́ком, страсте́й же отлуче́ние: си́м бо Твои́ апо́столи благоугоди́ша, и све́тлии свети́льницы на земли́ яви́шася, пропове́дающе Го́спода в тре́х ли́цех, во еди́ном же существе́, все́м воспева́ющим Его́.

Благослови́м Отца́, и Сы́на, и Свята́го Ду́ха, Го́спода.

Сла́ва, тро́ичен: Язы́ком пропове́дницы вы́ по́слани бы́сте от учи́теля Христа́, о ученицы́, уче́ньми боже́ственными просвеща́ти их помышле́ния, страсте́й же и бра́шен удержава́тися, жела́ти же воздержа́ния, и Го́спода зна́ти сего́, и Созда́теля, и Творца́ все́х и благоде́теля.

И ныне. Богоро́дичен: Блаже́нное бы́сть чре́во Богома́тере, я́ко прии́мшее Сло́во, дебельство́м пло́ти от Нея́ смеси́вшееся челове́ческому зра́ку, по ипоста́си: и яви́ся гра́д Бо́жий, в не́мже жи́ти Вы́шний благоволи́, и Госпо́дь Бо́г. Те́мже вопие́м Ти́: ра́дуйся Благода́тная, чи́стая Богоро́дице.

Пе́снь 9.

Ирмо́с: Невмести́маго Бо́га, во чре́ве вмести́вшая, и ра́дость ми́ру роди́вшая, Тя́ пое́м Богоро́дице Де́во.

Припев: Слава Тебе, Боже наш, слава Тебе.

Я́ко пла́мень ми́ру по́слани бы́сте неле́стный, избавля́юще глубины́ грехо́в: воспева́ем ра́достию Укрепи́вшаго ва́с, я́ко апо́столы Своя́.

Припев: Слава Тебе, Боже наш, слава Тебе.

Я́ко ва́с ми́ру объюроде́вшу, дре́вле Христо́с я́ко со́ль посла́ му́дрии, вразумля́ющия его́ к позна́нию Своему́, восхваля́ем ве́рно.

Припев: Слава Тебе, Боже наш, слава Тебе.

Я́ко мно́жества прегреше́ний обдержи́т мя́ лю́тых, со слеза́ми припа́даю Ти́ Христе́, проще́ния прося́, благовре́мение ми пода́ти во вре́мя поста́.

Припев: Слава Тебе, Боже наш, слава Тебе.

Я́ко вери́гами нереши́мыми свя́зан мои́х страсте́й, стеню́ и взыва́ю Ти́ Спа́се: свободи́ мя, я́ко да пою́ прера́дованно благоутро́бие Твое́.

Припев: Пресвята́я Богоро́дице, спаси́ на́с.

Богоро́дичен: Я́ко показа́ Тя Бо́г, Де́во чи́стая, по́мощь ро́ду челове́ческому, не преста́й приле́жно моля́щи Его́ о на́с ве́рных.

Припев: Слава Тебе, Боже наш, слава Тебе.

Апо́столов ли́к по́ст показа́, вселе́нней все́й возсия́ющий, и све́тлостию боже́ственною просвеща́ющий ми́р.

Припев: Слава Тебе, Боже наш, слава Тебе.

Учени́к Твои́х Иису́се ли́к Человеколю́бче, язы́ческия ро́ды научи́, воздержа́ния сокро́виществовати бога́тство.

Припев: Слава Тебе, Боже наш, слава Тебе.

Дванадесятостру́нное веща́ние учени́к Твои́х состоя́ние, воздержа́ния бога́тство да́рствует челове́ком, и исто́чник спасе́ния.

Сла́ва: Блу́днаго Ти́ гла́сом взыва́ю Го́споди: О́тче, согреши́х, спаси́ Ще́дре, да не сла́вы Твоея́ отлучи́ши мя́.

И ныне. Богоро́дичен: Во чре́ве Твое́м Бо́га я́ко челове́ка поноси́вшая, и живо́т ми́ру источи́вшая, Тя́ воспева́ем всесвята́я Де́во.

Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.