Канон в Среду Сырной седмицы

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кано́н трио́ди. Творе́ние господи́на Андре́я Кри́тскаго, гла́с 4. Та́же трипе́снец Ио́сифа. Гла́с 2:

Пе́снь 1.

Ирмо́с: Воспою́ Тебе́ Го́споди Бо́же мо́й, я́ко изве́л еси́ лю́ди из рабо́ты еги́петския: покры́л же еси́ колесни́цы фарао́новы и си́лу.

Припев: Слава Тебе, Боже наш, слава Тебе.

Постя́ся Госпо́дь челове́чески, ко изображе́нию на́шему, побежда́ет искуси́теля, показу́я на́ше, и преде́лы подпису́я на́м.

Припев: Слава Тебе, Боже наш, слава Тебе.

Моисе́й боже́ственный на Сина́и, воздержа́нием Бо́гу лице́м к лицу́ глаго́лати сподо́бися: тому́ ве́рнии поревну́им.

Слава: Очи́сти Го́споди, лю́ди Твоя́, и призре́в я́ко Бо́г ми́лостивым о́ком, посети́ все́х мно́жеством ми́лости Твоея́.

И ныне. Богоро́дичен: К Тебе́ вси́ притека́ем Богоро́дице, я́ко побо́рнице тве́рдей, на моли́тву дви́жуще Тя́, изба́вити ста́до Твое́ от вся́каго обстоя́ния.

Пе́снь 3.

Ирмо́с: В Го́споде Бо́зе мое́м се́рдце мое́ утверди́ся: те́м немощству́ющии препоя́сашася си́лою.

Припев: Слава Тебе, Боже наш, слава Тебе.

Чу́дный Ено́х воздержа́нием преложи́ся от земли́: тому́ образорувну́юще преложи́мся от тли́ к животу́.

Припев: Слава Тебе, Боже наш, слава Тебе.

Моли́твами и поще́ньми Изба́вителя умо́лим: сра́дуется бо Созда́тель покая́нию созда́ний свои́х.

Припев: Слава Тебе, Боже наш, слава Тебе.

Гото́вися о душе́, и предочи́стися пре́жде стра́сти Христо́вы, да воскресе́нием духо́вно спра́зднуеши Ему́.

Припев: Пресвята́я Богоро́дице, спаси́ на́с.

Богоро́дичен: Я́ко ро́ждшая Бо́га, о на́с непреста́нно моли́ся: к Тебе́ бо Богоро́дице, гре́шнии прибега́ем.

Ирмо́с: Непло́дствовавший мо́й ум, плодоно́сен Бо́же покажи́ ми, Де́лателю до́брых, Насади́телю благи́х, благоутро́бием Твои́м.

Припев: Слава Тебе, Боже наш, слава Тебе.

Просте́рл еси́ дла́ни на кресте́ Твое́м, умертви́л еси́ умерщвле́нием Твои́м кля́тву, оживи́л еси́ стра́стию Твое́ю челове́ки. Те́мже пое́м Твое́ боже́ственное распя́тие, Иису́се Человеколю́бче Бо́же на́ш.

Припев: Слава Тебе, Боже наш, слава Тебе.

Сне́дию дре́ва умертви́вшеся, дре́вом ожи́хом Креста́ Твоего́. Того́ у́бо прино́сим Тебе́ в моли́тву: благода́ть и ми́лость на́м низпосли́, Благоде́телю Влады́ко многоми́лостиве.

Припев: Слава Тебе, Боже наш, слава Тебе.

Преддве́рия отверзо́шася поще́ния, по́прище приближа́ется воздержа́ния, горя́щим усе́рдием воста́нем, прие́млюще да́р богода́нный, утоля́ющий зно́й прегреше́ний.

Припев: Слава Тебе, Боже наш, слава Тебе.

Вре́мя блаже́нное поста́, лучи́ испуща́ющее покая́ния возсия́, присту́пим любоче́стно, отгоня́юще тьму́ глубоча́йшую ле́ности, вси́ веселя́щеся.

Припев: Слава Тебе, Боже наш, слава Тебе.

По́ст освяти́м любому́дренно, пропове́даим воздержа́ние страсте́й, возопии́м во слеза́х Влады́це: да́ждь на́м Го́споди благода́ть, соде́йствующую в Твоя́ хоте́ния, Многоми́лостиве.

Припев: Слава Тебе, Боже наш, слава Тебе.

Прии́мше дарова́ния поста́ просла́вим Да́вшаго во спасе́ние, и сие́ соде́лаим трудолю́бно, да оставле́ние согреше́ний на́ших от руки́ восприи́мем Сотво́ршаго.

Припев: Пресвята́я Богоро́дице, спаси́ на́с.

Богоро́дичен: Утоли́ смуще́ние страсте́й мои́х, исцели́ я́звы души́ моея́, воздви́гни мя́ от сна́ уны́ния хода́тайством Твои́м, и предста́тельством, Пресвята́я Влады́чице Ма́ти Де́во.

Припев: Слава Тебе, Боже наш, слава Тебе.

Возне́сшуся Ти Спа́се, во́лею на кре́ст, вся́ тва́рь земна́я подви́жеся, и раздра́ся хра́мная заве́са.

Припев: Слава Тебе, Боже наш, слава Тебе.

Уязви́лся еси́ на кресте́ Иису́се мо́й мене́ ра́ди, и прободе́н в ре́бра Бла́же: отню́дуже ве́рою покланя́юся боже́ственней держа́ве Твое́й.

Припев: Слава Тебе, Боже наш, слава Тебе.

По́стное время́, си́лою Твое́ю Христе́, освяти́в, спаси́ вся́ ны́ сете́й вра́жиих, покланя́ющияся Тебе́.

Сла́ва, тро́ичен: Прекло́нь коле́на на зе́млю, Отцу́, покланя́юся, Сы́на сла́влю, и Ду́ха воспева́ю, единово́льное нача́ло, и триипоста́сное.

И ныне. Богоро́дичен: Непостижи́мо е́сть та́инство Чи́стая, Твоего́ рожде́ния: ражда́еши бо Мари́е неискусому́жно Бо́га, и пребыва́еши нетле́нна.

Пе́снь 4.

Ирмо́с: Услы́шах слу́х Тво́й, и убоя́хся, разуме́х дела́ Твоя́, и ужасо́хся Го́споди.

Припев: Слава Тебе, Боже наш, слава Тебе.

Авраа́м доброде́телию и страннолю́бием Тро́ицу прия́т, а́нгельски прише́дшую.

Припев: Слава Тебе, Боже наш, слава Тебе.

Бога́тство некра́домое воздержа́ния е́сть да́р: и си́м обогати́выйся, обогати́тся Божество́м.

Сла́ва: Прииди́те, воспла́чим вку́пе сло́вом, ве́рою вопию́ще: Бо́же, очи́сти ны́ мно́го согре́шшыя.

И ныне. Богоро́дичен: Ма́ти непоро́чная, благослове́нная, чи́стая Де́во, Сы́ну Твоему́ и Бо́гу на́шему, о ми́ре моли́ся.

Пе́снь 5.

Ирмо́с: Возсия́вый све́т, и просвети́вый у́тро, и показа́вый де́нь: сла́ва Тебе́, сла́ва Тебе́, Иису́се Сы́не Бо́жий.

Припев: Слава Тебе, Боже наш, слава Тебе.

Пости́вся дре́вле Моисе́й в горе́ Сина́йстей, богови́дец яви́ся: и Илия́ на о́гненней колесни́це возноша́шеся.

Припев: Слава Тебе, Боже наш, слава Тебе.

Поще́нием иногда́ му́дрый Иса́ия, у́гля о́наго клеще́ю вкуша́ет, егда́ ко устна́м его́ прикосну́ся.

Сла́ва: Пости́вся пре́жде Дании́л, и трие́ о́троцы вку́пе, че́люсти льво́в сокруши́вше, горя́щий пла́мень попра́ша.

И ныне. Богоро́дичен: Богороди́тельнице чи́стая, Бо́га по чре́ве Твое́м носи́вшая нетле́нно, сохрани́ ста́до Твое́, и соблюди́ невреди́мо.

Пе́снь 6.

Ирмо́с: Я́коже проро́ка Ио́ну от ки́та изба́вил еси́ Христе́ Бо́же: и мене́ из глубины́ прегреше́ний возведи́, и спаси́ мя еди́не Человеколю́бче.

Припев: Слава Тебе, Боже наш, слава Тебе.

Ио́ну в ки́те честно́е спасе́ поще́ние иногда́: пости́мся у́бо от се́рдца, и убежи́м о́наго в гее́нне тле́ния.

Припев: Слава Тебе, Боже наш, слава Тебе.

Ниневи́тяне же па́ки гне́в Бо́жий претвори́ша те́плым покая́нием и любо́вию: те́м ны́не любе́зно вси́ поревну́им.

Сла́ва: Настоя́щий по́ст созыва́ет на́с на покая́ние: притеце́м у́бо с любо́вию, и уразуме́им, что́ е́сть да́р воздержа́ния.

И ныне. Богоро́дичен: Несказа́нно ро́ждшая Спа́са ми́ру Христа́ Бо́га на́шего, Того́ моля́щи не преста́й, ро́д ве́сь спасти́ воспева́ющих Тя́.

Пе́снь 7.

Ирмо́с: Оте́ц на́ших Бо́же, не посрами́ на́с, но да́руй на́м со дерзнове́нием вопи́ти Тебе́: благослове́н еси́ Бо́же оте́ц на́ших

Припев: Слава Тебе, Боже наш, слава Тебе.

Бу́дем и мы́ я́ко Дании́л о́ный, львы́ иногда́ посто́м укроти́вый в ро́ве рыка́ющия.

Припев: Слава Тебе, Боже наш, слава Тебе.

Ю́ношам тре́м поревну́им со стра́хом, да убе́гнем огня́ гее́нскаго, я́коже си́и вавило́нския пещи́.

Сла́ва: Пости́мся и мы́ чи́стым се́рдцем, и очи́стим те́ло, и ве́сь вся́ко дух Бо́гу посвяти́м.

И ныне. Богоро́дичен: Де́во Ма́ти чи́стая, из Тебе́ воплоще́ннаго преве́чнаго Сло́ва моля́щи не преста0й, спасти́ся душа́м на́шим.

Песнь 8.

Ирмо́с: Царя́ Христа́, Его́же испове́даша плене́нии о́троцы, в пещи́ глаго́люще ве́лиим гла́сом, вся дела́ по́йте Го́спода.

Припев: Слава Тебе, Боже наш, слава Тебе.

Пости́вся пре́жде Ио́сиф, смше́ния избеже́ беззако́нныя жены́, и ца́рство улучи́. Те́мже и мы́ угаси́м поще́нием разжже́нныя стре́лы врага́ велиа́ра.

Припев: Слава Тебе, Боже наш, слава Тебе.

Поще́нием Дави́д побе́ду поста́ви на иноплеме́нника, и ца́рство обре́те: те́мже и мы прии́мем воздержа́нием побе́ду на враги́, и во Го́споде венча́ни бу́дем.

Припев: Слава Тебе, Боже наш, слава Тебе.

Сохрани́м и мы́ доброде́тели их, И́овлево му́жество, Иа́ковле незло́бие, ве́ру Авраа́мову, целому́дрие Ио́сифово, и Дави́дову до́блесть.

Припев: Пресвята́я Богоро́дице, спаси́ на́с.

Богоро́дичен: Царя́ Христа́, Его́же роди́ на́м Де́ва Мари́я, и по рождестве́ пребы́сть Де́ва чи́стая, вся дела́ госпо́дня Го́спода по́йте, и превозноси́те Его́ во ве́ки.

Ирмо́с: В купине́ Моисе́ю Де́вы чу́до, на Сина́йстей горе́, прообрази́вшаго иногда́, по́йте, благослови́те, и превозноси́те во вся́ ве́ки.

Припев: Слава Тебе, Боже наш, слава Тебе.

Крестоявленно Моисей длани возводя на горе, враги побеждаше: Ты же Спасе, на кресте ру́це просте́р, умертви́л еси́ всепа́губное а́да мучи́тельство.

Припев: Слава Тебе, Боже наш, слава Тебе.

Гвоздьми́ прибие́н на кресте́, и в ре́бра прободе́н Христе́ Спа́се мо́й, кля́твы изба́вил еси́ земноро́дныя, и ра́дости несконча́емыя о́бщники показа́л еси́: те́мже благослови́м человеколю́бие Твое́.

Припев: Слава Тебе, Боже наш, слава Тебе.

Воздержа́ния вре́мя возсия́вшее мы́сленно просвеща́ет душе́вная чу́вства, и страсте́й мглу́ отго́нит: те́мже лобыза́им сие́ от се́рдца, превознося́ще во ве́ки.

Припев: Слава Тебе, Боже наш, слава Тебе.

Стра́сти всегуби́тельныя душе́вныя, сла́сти смертоно́сныя по́ст умерщвля́ет, и и́стинно в постоя́нии твори́т се́рдца устремле́ния и движе́ния: се́й у́бо ве́рою восприи́мем любе́зно.

Припев: Слава Тебе, Боже наш, слава Тебе.

Не поста́ нача́ло настоя́щий святы́й де́нь ве́рнии ве́дуще, се́й чи́стым помышле́нием почти́м, но вхо́д глаго́люще, и прише́ствие к преддве́рию по́стному.

Припев: Слава Тебе, Боже наш, слава Тебе.

Предприе́млет де́сно боголюбе́зную ду́шу предпу́тиями добре́йший по́ст, предочисти́тельных по́честей преподо́бный, степе́ньми и ле́ствицею, к се́й прило́жься ны́нешний де́нь.

Припев: Пресвята́я Богоро́дице, спаси́ на́с.

Богоро́дичен: Отверзи толкущим нам, и милость Твою призывающим, скорое человеков прибе́жище, и тве́рдая во все́х Де́во помо́щнице, и су́щим в ну́ждах изве́стная Засту́пнице.

Припев: Слава Тебе, Боже наш, слава Тебе.

Вознесы́йся на кре́ст все́х Влады́ко, Ада́ма со Е́вою па́ки воззва́л еси́, и в ра́й Христе́ Спа́се вве́л еси́, Тя воспева́ющия во вся́ ве́ки.

Припев: Слава Тебе, Боже наш, слава Тебе.

Тебе́ возне́сшуся Христе́ на кре́ст во́лею, лучи́ со́лнечныя стра́хом помрачи́шася, и за́йде де́нь: отоню́дуже Тя́ разбо́йник Бо́га испове́да во вся́ ве́ки.

Благослови́м Отца́, и Сы́на, и Свята́го Ду́ха, Го́спода.

Сла́ва, тро́ичен: Ра́вна Отцу́ Сы́на, и Свята́го Ду́ха ве́ровахом бы́ти Святу́ю Тро́ицу в Божестве́ еди́ном: Е́йже ве́рою покланя́емся, А́риево уче́ние при́сно попира́юще.

И ныне. Богоро́дичен: Ка́ко Тя́ воспою́, я́коже подоба́ет, Богоро́дице Де́во, смра́дными греха́ми аз ны́не помраче́нный; но у́бо Пресвята́я, прости́ мое́ дерзнове́ние убо́гаго моего́ пе́ния.

Пе́снь 9.

Ирмо́с: Велича́ем вси́ человеколю́бие Твое́ Христе́ Спа́се на́ш, сла́во раб Твои́х и ве́нче ве́рных, возвели́чивый па́мять ро́ждшия Тя́.

Припев: Слава Тебе, Боже наш, слава Тебе.

Моисе́й во Еги́пте мо́ре раздели́, и лю́ди проведе́, и сия́ препита́ в пусты́ни непрохо́дней, посто́м творя́ чудеса́.

Припев: Слава Тебе, Боже наш, слава Тебе.

Иису́с Нави́н воздержа́нием лю́ди освяти́, и насле́дствова зе́млю обетова́нную, Иорда́н преше́д пре́жде.

Припев: Слава Тебе, Боже наш, слава Тебе.

Гедео́н о́ный, то́кмо с треми́ сты́ муже́й хлепта́вшими, побежда́ет иноплеме́нники воздержа́нием и моли́твою: тому́ ревну́юще и мы́ уподо́бимся.

Припев: Пресвята́я Богоро́дице, спаси́ на́с.

Богоро́дичен: Ра́дуйся Всечестна́я, Чи́стая де́вства похвало́, А́нгелов утвержде́ние, челове́ков помо́щнице, ми́ра ра́досте, Мари́е, и Ма́ти, и рабо́ Бо́га на́шего.

Ирмо́с: Преесте́ственно пло́тию Заче́ншую во чре́ве, от Отца́ безле́тно предвозсия́вшее Сло́во, в пе́снех немо́лчных велича́ем ве́рнии.

Припев: Слава Тебе, Боже наш, слава Тебе.

На кресте́ просте́р боже́ственныя дла́ни, совокупи́л еси́ пре́жде расточе́ныя, Изба́вителю: и Отцу́ осужде́ное хода́тайством я́ко да́р прине́сл еси́ существо́ челове́ков: сего́ ра́ди пое́м пречи́стое Твое́ распя́тие.

Припев: Слава Тебе, Боже наш, слава Тебе.

Свята́го поста́ возсия́вшая благода́ть, лучи́ испуща́ет нам предочища́ющия, па́ки тече́ние помышле́ний, и зе́ницы тьму́ отгоня́ющия, ве́рнии: сего́ ра́ди усе́рдно се́й восприи́мем.

Припев: Слава Тебе, Боже наш, слава Тебе.

Светоно́сное поще́ние, дарова́ний боже́ственных ча́шу поче́рпшее на́м, дне́сь все́м предъя́вляет: хотя́щии сея́ причасти́тися на по́льзу души́, все́х Влады́це, соде́йствовати на́м помо́лимся.

Припев: Слава Тебе, Боже наш, слава Тебе.

Гвоздьми́ боже́ственных Твои́х ру́к пригвозди́л еси́ Ще́дре на́ша грехи́ на кресте́: копие́м же ре́бр Твои́х растерза́л еси́ лука́вое писа́ние согреше́ний, и паде́ний лю́тых. Сего́ ра́ди пое́м пречи́стое Твое́ распя́тие.

Припев: Слава Тебе, Боже наш, слава Тебе.

Доброде́телей добре́йшая отверза́еся стезя́, по́прище боже́ственных поще́ний, сие́ все́м благоукраша́ется: подвиза́тися зако́нно хотя́щии, проси́те Христа́, ми́рное от высоты́ вре́мя на́м дарова́ти.

Припев: Пресвята́я Богоро́дице, спаси́ на́с.

Богоро́дичен: Скоре́йшею моли́твою, бо́дрым Твои́м покро́вом, держа́вною Твое́ю Влады́чице чи́стая по́мощию, ны́не соблюди́ ве́рныя Твоя́ рабы́ от вся́каго сопроти́внаго прило́га, и страсте́й и прегреше́ний, и напа́стей спаси́.

Припев: Слава Тебе, Боже наш, слава Тебе.

На дре́ве кре́стнем во́лею пригво́ждься, все́х на́с свободи́л еси́ кля́твы зако́нныя: те́м Тя́ по до́лгу велича́ем Христе́.

Припев: Слава Тебе, Боже наш, слава Тебе.

Вси́ покланя́емся страсте́м Твои́м Спа́се, я́же во́лею восприя́л еси́, да свободи́ши ро́д челове́ческий рабо́ты вра́жия.

Сла́ва, тро́ичен: Присносу́щно Оте́ц и нетле́нно Сы́на роди́, и Ду́х е́сть единосу́щен Отцу́ же и Сы́нови, Неразде́льная Тро́ица.

И ныне. Богоро́дичен: Да́ти проще́ния прегреше́ний Мари́е преблагослове́нная, от Тебе вопло́щшагося моли́ Спа́са, на́м гре́шным.

Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.