Шрифт
Каноны Триоди Постной
Трипеснец во Вторник Сырной седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́ны трипе́снцы два. Творе́ние господи́на Ио́сифа, гла́с 3.
Пе́снь 2
Ирмо́с: Я́ко ту́ча на тро́скот, и я́ко и́ней на се́но, да сни́дут на зе́млю, глаго́ли мои́.
Припев: Слава Тебе, Боже наш, слава Тебе.
Я́ко у́тро возсия́ на́м, покая́ния зари́, преддве́рия све́тло воздержа́ния.
Припев: Слава Тебе, Боже наш, слава Тебе.
Тьмы́ мя изба́ви Христе́ вне́шния, мно́жеством ми́лости Твоея́, я́ко еди́н ми́лостив.
Припев: Слава Тебе, Боже наш, слава Тебе.
Огня́ мя исхи́ти, и че́рвия Спа́се неусыпа́ющаго, покая́ния прилежа́нием очище́нна.
Припев: Пресвята́я Богоро́дице, спаси́ на́с.
Богоро́дичен: Де́во всепе́тая, бу́ди на́м пу́ть покая́ния, ко спасе́ния веду́щий две́рем.
Припев: Слава Тебе, Боже наш, слава Тебе.
Вре́мя покая́ния наста́, потщи́мся христолю́бцы очи́ститися всех прегреше́ний, и яви́тися Влады́це блаже́нни.
Припев: Слава Тебе, Боже наш, слава Тебе.
По́ст чи́стый, безгре́шный потщи́мся соверши́ти ны́не непреста́нно, да обря́щем прегреше́ний оставле́ние.
Припев: Слава Тебе, Боже наш, слава Тебе.
Еси́ во Христе́ многоми́лостив все́х Бла́же, при́сно прие́мляй в покая́ние: те́мже вси́ Тя при́сно сла́вим.
Сла́ва, тро́ичен: Тро́ицу во еди́нице просла́вим, несеко́мую, неслия́нну, неразде́льну существо́м, разде́льна же ли́цы Бо́га.
И ныне. Богоро́дичен: Чи́стая Де́во Ма́ти, умоли́, Его́же воплоти́ла еси́ я́ко челове́ка Де́во, и Сло́ва: да спасе́т от бе́д рабы́ Твоя́.
Пе́снь 8
Ирмо́с: В купине́ Моисе́ю Де́вы чу́до, на сина́йстей горе́, прообрази́вшаго иногда́, по́йте, благослови́те и превозноси́те во вся́ ве́ки.
Припев: Слава Тебе, Боже наш, слава Тебе.
Раска́яния вре́мя, покая́ния показа́ти плоды́ досто́йны Бо́гу, душе́ моя́ потщи́ся, воста́ни, и возопи́й приле́жно, в поще́ниих и моли́твах: по́йте, благослови́те и превозноси́те Христа́ во ве́ки.
Припев: Слава Тебе, Боже наш, слава Тебе.
Предочи́стим бра́тие душе́вная чу́вства, и Го́сподеви ны́не прилепи́мся о́бразы умиле́ния, вопию́ще чи́сте покая́нием чи́стым: по́йте, благослови́те и превозноси́те Христа́ во ве́ки.
Припев: Слава Тебе, Боже наш, слава Тебе.
Уловля́ющаго врага́ ласкосе́рдыми воспомина́ньми, и невоздержа́нием сла́сти кра́ткия паля́ща чу́вство, умертви́ти потщи́мся приле́жною моли́твою, пою́ще, благословя́ще и превознося́ще Христа́ во ве́ки.
Припев: Пресвята́я Богоро́дице, спаси́ на́с.
Богоро́дичен: Оневеси́вшая на́ше земно́е Отрокови́це смеше́ние, оляде́вшую и истле́вшую души́ моея́ бразду́, ту́чами Твои́х щедро́т, плодоно́сну доброде́тельми покажи́ вопию́щу, и превознося́щу Христа́ во ве́ки.
Припев: Слава Тебе, Боже наш, слава Тебе.
Предочи́стимся ны́не, не бра́шны то́кмо, но и дея́ньми, и начне́м ве́рнии те́плым помышле́нием: да Созда́телю све́тли яви́мся во ве́ки.
Припев: Слава Тебе, Боже наш, слава Тебе.
Си́це нам пости́тися подоба́ет, не во вражде́ и бра́ни, не в за́висти и рве́нии, не во тщесла́вии и ле́сти сокрове́нней, но я́коже Христо́с, в смиренному́дрии.
Припев: Слава Тебе, Боже наш, слава Тебе.
Ми́лующии, рече́ ни́щия, Спа́су взаи́м даю́т разу́мно. От ра́дости неуподоби́мыя! Подае́т бо бога́тно воздая́ния до́брых, во вся́ ве́ки.
Слава. Тро́ичен: Сла́ва Отцу́, и Сы́ну, и Свято́му Ду́ху: Еди́н бо Бо́г, три́. Со А́нгелы непреста́нно челове́цы восхваля́ем Тя́, Всесвята́я Тро́ице: во вся́ ве́ки.
И ныне. Богоро́дичен: Ра́дуйся Де́во чи́стая Богоро́дице Мари́е, очисти́лище ми́ра, правосла́вных ро́г, моли́ изба́витися от негаси́маго огня́, Тя славосло́вящим во вся́ ве́ки.
Пе́снь 9
Ирмо́с: Де́вство Твое́ Богоро́дице нескве́рная, е́же не опали́ о́гнь боже́ственный, велича́ем.
Припев: Слава Тебе, Боже наш, слава Тебе.
Отве́рзи на́м ми́лости Твоея́ пречи́стыя утро́бы, покая́ние челове́ком во спасе́ние дарова́вый еди́не Спа́се многоми́лостиве.
Припев: Слава Тебе, Боже наш, слава Тебе.
Увы́ мне́, ко́е стра́шное о́ное неумы́тное суди́лище, на не́мже и́мамы на́зи твори́ти сло́во, и́хже в житии́ зле́ соде́яхом;
Припев: Слава Тебе, Боже наш, слава Тебе.
Одожди́ на́м благоутро́бия Благоде́телю ка́плю, потопля́ющую на́шу скве́рну всю́, вины́ покая́ния на́м подава́я.
Припев: Слава Тебе, Боже наш, слава Тебе.
Вси́ усе́рдным се́рдцем, в свята́го поста́ преддве́рия све́тло совше́дше, благода́рственныя пе́сни Христу́ принесе́м.
Припев: Пресвята́я Богоро́дице, спаси́ на́с.
Богоро́дичен: Тя кре́пкую Предста́тельницу, и изве́стную наде́жду, воспева́юще благоче́стно, мо́лим: Сы́на Твоего́ моли́ Де́во спасти́ся на́м.
Припев: Слава Тебе, Боже наш, слава Тебе.
Ны́не предочи́стимся в посте́ и слеза́х, и в ве́лиих исправле́ниих, да обря́щем ве́лию ми́лость.
Припев: Слава Тебе, Боже наш, слава Тебе.
Ны́не подража́им Илию́ пости́вшася, и бежа́вша от лука́выя Иезабе́ли, да та́ко вознесе́мся от земли́.
Сла́ва, тро́ичен: Святы́й, святы́й, святы́й, трисвяты́й, О́тче Вседержи́телю, и Сы́не Единосу́щне со Ду́хом, еди́но Божество́.
И ныне, Богоро́дичен: О Тебе́ хва́лимся, и к Тебе́ прибега́ем, Чи́стая, Присноде́во честна́я, муче́ния изба́ви вся́ ны́.
Досто́йно есть я́ко вои́стинну блажи́ти Тя, Богоро́дицу, / Присноблаже́нную и Пренепоро́чную и Ма́терь Бо́га на́шего. / Честне́йшую Херуви́м и сла́внейшую без сравне́ния Серафи́м, / без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
