Шрифт
Каноны Триоди Постной
Трипеснец в Понедельник Первой седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Творе́ние господи́на Ио́сифа, гла́с 2.
Пе́снь 1
Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.
Припев: Поми́луй мя, Бо́же, поми́луй мя.
Ка́ко ны́не моего́ воспла́чу отпаде́ния? ко́е начало сотворю́ спасе́ния моего́, блу́дно пожи́вый, Ще́дре? и́миже судьба́ми ве́си, спаси́ мя.
Припев: Поми́луй мя, Бо́же, поми́луй мя.
Се вре́мя покая́ния, се день спаси́тельный, поще́ния вход: душе́, бо́дрствуй и страсте́й вхо́ды затвори́, ко Го́споду взира́ющи.
Припев: Поми́луй мя, Бо́же, поми́луй мя.
Грехо́в треволне́ние буря́щееся, во глубину́ низвлачи́т мя отча́яния: но к Твое́й прибега́ю пучине милости, спаси́ мя, Го́споди.
Припев: Поми́луй мя, Бо́же, поми́луй мя.
Еди́н аз греху́ порабо́тихся, еди́н аз страсте́м две́ри отверзо́х: Благоуве́тливе Сло́ве, обрати́ мя, Спа́се, благоутро́бием Твои́м.
Припев: Пресвята́я Богоро́дице, спаси́ на́с.
Богоро́дичен: Исто́чник безстра́стия ро́ждшая, уя́звлена страстьми́, Отрокови́це, исцели́, и огня́ ве́чнаго исхити́ мя, еди́на Богоблагода́тная.
Припев: Поми́луй мя, Бо́же, поми́луй мя.
Гряди́те, лю́дие, днесь восприи́мем поще́ний дарова́ние, я́ко Богодарова́нное вре́мя покая́ния, в сем Спа́са умилостивим.
Припев: Поми́луй мя, Бо́же, поми́луй мя.
Приспе́ ны́не, введе́ся по́двигов вре́мя, поста́ по́прище, усе́рдно вси начне́м сей, доброде́тели Го́сподеви, я́ко да́ры, нося́ще.
Припев: Поми́луй мя, Бо́же, поми́луй мя.
Колесни́ца о́гненная прия́т Илиию́ чу́днаго, посто́м вооруже́ннаго, Моисе́я показа́ зри́теля неизрече́нных, и мы сей прии́мше, у́зрим Христа́.
Припев: Поми́луй мя, Бо́же, поми́луй мя.
Бра́шно Ада́м яде́ и от рая́ того́ невоздержа́ние изри́ну; нас же, Го́споди, пост прие́мый, досто́йны покая́ния покажи́, Человеколю́бче.
Сла́ва, тро́ичен: Еди́нице Про́стая, Трисве́тлая, Нача́льственнейшая Едина, Всемо́щнейшая, Всежи́зненная, Бо́же и Го́споди, О́тче Вседержителю, Сыне и Ду́ше, спаса́й чту́щия Тя.
И ныне. Богоро́дичен: Бо́жию Святу́ю Го́ру воспои́м, Мари́ю нескве́рную, из Нея́же возсия́ Пра́вды Со́лнце, су́щим во тьме Христо́с, всех Жизнь.
Пе́снь 8
Ирмо́с: Дре́вле ороси́вшаго евре́йския о́троки в пламени и опали́вшаго Го́спода халде́и пресла́вно в нем, воспои́м, глаго́люще: благослови́те и превозноси́те Его во ве́ки.
Припев: Поми́луй мя, Бо́же, поми́луй мя.
Огнесожже́на сластьми́, и души́ зри́тельным помраче́на, огне́м Твоего́ стра́ха обновив, Христе́, све́том мя спасе́ния озари́, да Тя сла́влю во вся ве́ки.
Припев: Поми́луй мя, Бо́же, поми́луй мя.
Сы́тость возненави́девши страсте́й, напита́йся до́брых сла́достною пи́щею и услади́ся па́че от поста́ сла́достию, го́рести сласте́й уклоня́ющися, смире́нная душе́ моя́, и поживи́ во ве́ки.
Припев: Поми́луй мя, Бо́же, поми́луй мя.
Ослепле́н душе́ю и пия́нством страсте́й отемне́н, ника́коже взира́ю к Тебе́ Еди́ному Бо́гу: те́мже мя уще́дри и просвети́, и покая́ния отве́рзи ми врата́.
Припев: Пресвята́я Богоро́дице, спаси́ на́с.
Богоро́дичен: Онебеси́вшая на́ше земно́е и тле́нное, Чи́стая, существо́, те́плою Твое́ю моли́твою, упра́витися на́шим мольба́м и моле́нием сотвори́, к Твоему́ и всех Бо́гу, и Царю́.
Припев: Поми́луй мя, Бо́же, поми́луй мя.
Све́тло усря́щим поста́ вход, ве́рнии, и да не се́туим, но омы́им ли́ца на́ша безстра́стия водо́ю, благословя́ще и превозносяще Христа́ во ве́ки.
Припев: Поми́луй мя, Бо́же, поми́луй мя.
Елеем помазавше ми́лости души́ главу́, не многосло́вим Отцу́ на́шему, су́щему на небесе́х, моли́твы возсыла́юще, благословя́ще и превознося́ще Его во вся ве́ки.
Припев: Поми́луй мя, Бо́же, поми́луй мя.
Пости́вся Госпо́дь четыредеся́тную ме́ру дней, сия́ ны́не освяти́ и очи́сти дни, бра́тие, в ня́же дости́гше, зове́м: благослови́те и превозноси́те Христа́ во ве́ки.
Слава. Тро́ичен: Присносу́щна, Безнача́льна Отца́, воспои́м ве́рнии, Сы́на же Собезнача́льна, и Ду́ха Сопросия́вша из Отца́, Единосу́щна Ли́ца, Еди́наго су́ща Всеси́льнаго нача́ла и вла́сти.
И ныне. Богоро́дичен: Мари́е Богозва́нная, очисти́лище вои́стинну ве́рных, из Тебе́ бо оставле́ние подава́ется все́м бога́тно: Сы́на Твоего́ и Го́спода не преста́й моля́щи о пою́щих Тя.
Пе́снь 9
Ирмо́с: Преесте́ственно пло́тию заче́ншую во чре́ве, от Отца́ безле́тно предвозсия́вшее Сло́во, в пе́снех немо́лчных велича́ем ве́рнии.
Припев: Поми́луй мя, Бо́же, поми́луй мя.
Поста́ день, отложе́ние греха́ да бу́дет ти, душе́, и к Бо́гу ма́ние вку́пе, и присвое́ние: я́ко да убежи́ши зло́бныя про́пасти, и са́мыя то́кмо пути́ возлю́биши, веду́щия ко о́ному поко́ю.
Припев: Поми́луй мя, Бо́же, поми́луй мя.
И помышле́ньми поползну́вся и пло́тию прегреши́в, рыда́ю и стеню́, и вопию́: спаси́ мя, Го́споди, спаси́ мя, Незло́биве Еди́не, и не осуди́ мене́ во огнь гее́нны о́ныя, осуждения досто́йнаго.
Припев: Поми́луй мя, Бо́же, поми́луй мя.
Во све́тлую поста́ обле́кшеся ри́зу, пия́нства те́мныя и злотя́жкия совлеце́мся оде́жды, и све́тли бы́вше Боже́ственными доброде́тельми, светоза́рная Спа́сова ве́рою у́зрим страда́ния.
Припев: Пресвята́я Богоро́дице, спаси́ на́с.
Богоро́дичен: Изнемо́гшую все́ми прило́ги зло́бных бесо́в, стра́стную мою́ ду́шу исцели́, Пречи́стая Влады́чице, Цели́теля ро́ждшая Христа́, избавле́ние нас, ве́дущих Тя, Отрокови́цу, Деву нетле́нну.
Припев: Поми́луй мя, Бо́же, поми́луй мя.
Ны́не наста́ вре́мя святы́х посто́в, начне́м сего́ в до́брых пребыва́ниих: в суда́х бо и крамола́х не пости́теся, глаго́лет.
Припев: Поми́луй мя, Бо́же, поми́луй мя.
В горе́ Хори́в посто́м очи́щься, ви́де Бо́га Илия́: очи́стим и мы посто́м се́рдце, и у́зрим Христа́.
Припев: Поми́луй мя, Бо́же, поми́луй мя.
День еди́н у́бо, рече́, житие́ вся́ко земны́х, тружда́ющимся от любве́ четы́редесять суть дней поста́, я́же соверши́м светло.
Сла́ва, тро́ичен: Единому Естеству́ покланя́юся, Три Лица́ пою́, Еди́наго Бо́га всех, Отца́ и Сы́на и Свята́го Ду́ха, при́сносущное Нача́ло.
И ныне, Богоро́дичен: Чи́стая, Отроча́ ражда́еши, Де́ва, млеко́м дои́ши: ка́ко в сию́ двою́ де́вствуеши ро́ждши? Бог есть соде́явый, не взыску́й от Мене, е́же ка́ко.
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
