Трипеснец В Пятницу Четвертой седмицы по Пасхе

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

И тропарь, глас 5, трижды:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды) Слава, и ныне:

О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

В пято́к 4-я неде́ли по Па́сце, трипе́снец, его́же краегране́сие: Сла́ва Тебе́ Боже.

Гла́с 3.

Пе́снь 5.

Ирмо́с: Яко ви́де Иса́иа обра́зно на престо́ле превознесе́нна Бога, от ангел сла́вы дориноси́ма, окая́нный! Вопия́ше, а́з: прови́дех бо воплоща́ема Бога, Све́та Невече́рня, и ми́ром влады́чествующа.

Припев: Слава Тебе, Боже наш, слава Тебе.

Вя́жемь Ще́дре, и во́лею дре́ву пригвожда́емь, свя́занных вся́кими преступле́ньми избавля́еши, положи́в же ся во гро́бе, во гробе́х усну́вшыя мертвецы́ воздвиза́еши, пою́щыя Твое́ стра́шное Воскресе́ние.

Припев: Слава Тебе, Боже наш, слава Тебе.

Господь Воскре́се из ме́ртвых, я́коже рече́, тридне́вен и со апо́столы водворя́яся вопия́ше: в ве́сь ми́р ше́дше возвести́те я́сно, я́же ви́дите вели́кая Моя́ чудеса́.

Сла́ва: Диви́тся се́рдце и слу́х Спасе, Твоему́ Благоутро́бию, и смотре́нию, и снизхожде́нию: Пло́тию бо по земли́ ходя́, самаряны́ни же прося́щей жене́, во́ду жи́зни пода́л еси́ Боже́ственнаго ра́зума.

И ны́не, богоро́дичен: Свята́я Богородице, во святы́х Свята́го роди́вшая Сло́во, от Безнача́льнаго Отца́ возсия́вшее, того́ моли́ непреста́нно, освяти́ти и просвети́ти ду́шы на́шя, и сердца́ любо́вию пою́щих Тя́.

Пе́снь 8.

Ирмо́с: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни, Божественную пе́снь поя́ху: благослови́те вся́ дела́ Господня Господа, и превозноси́те во вся́ ве́ки.

Припев: Слава Тебе, Боже наш, слава Тебе.

На Крест возне́сся во́лею, все́ совозне́сл еси́ челове́ческое существо́, в ме́ртвых же Жи́знь Сы́й вмени́вся, оживи́л еси́ Спасе пою́щыя смотре́ние Твое́, и е́же со сла́вою восхожде́ние Ще́дре.

Припев: Слава Тебе, Боже наш, слава Тебе.

Ми́р ра́достию пра́зднует во свято́м Твое́м воста́нии Животода́вче, и́мже всю́ си́лу а́дову попра́л еси́, и сме́рти жа́ло притупи́л еси́ Сло́ве, и нетле́ние источи́л еси́ челове́ком.

Сла́ва: Ви́девши Тя́ жена́ самаряны́ня труди́вшася, Ще́дре, и прося́ща во́ду пи́ти, безсме́ртия прие́млет во́ды, вопию́щи: да́ждь ми́ во́ду живу́ю Господи, я́ко да не вжа́жду во все́ вре́мя живота́ моего.

И ны́не, богоро́дичен: До́м Божий показа́лася еси́ Пречистая Дево Богородице, сему́ Пло́ть одушевле́нную, отТтвои́х крове́й Пречистых взаи́м да́вши Отрокови́це: те́мже Тя́ почита́ем во вся́ ве́ки.

Пе́снь 9.

Ирмо́с: В зако́не се́ни и писа́ний о́браз ви́дим ве́рнии, вся́к му́жеский по́л ложесна́ разверза́я, свят Богу. Те́м Перворожде́нное Сло́во Отца́ Безнача́льна, Сына Первородя́щася Материю неискусому́жно велича́ем.

Припев: Слава Тебе, Боже наш, слава Тебе.

Диви́тся со́лнце, зря́ на Дре́ве пригвожде́нна Тебе́ Христе́, поколеба́шася концы́, и потрясе́ся вся́ земля́, и распаде́ся ка́мение, и а́д до́ле я́же от ве́ка ю́зники отреши́ воспева́ющыя Тя́.

Припев: Слава Тебе, Боже наш, слава Тебе.

Положи́лся еси́ Христе́ во гро́бе, Жи́знь и Воскресе́ние: Воскре́с же во Сла́ве, во дне́х мно́гих Свои́м соводворя́яся ученико́м, и си́х пропове́дники во ве́сь ми́р посыла́я стра́шнаго смотре́ния Твоего.

Сла́ва: Пути́ мне́ жи́зни показу́еши Милостиве, ми́лостию мно́гою ше́ствуеши, и седи́ши труди́вся от пути́: и жене́ прося́щей во́ды безсме́ртия посыла́еши, пою́щей мно́гое Твое́ смотре́ние.

И ны́не, богоро́дичен: Воплоща́ется Христо́с из Тебе́ па́че сло́ва, Сло́во Сы́й Отчее, Дево Богородице, и распина́ется хотя́ на́с ра́ди, и тридне́вным воста́нием ми́ру концы́ освеща́ет: с ни́ми же Тя́ по до́лгу ублажа́ем.

Вместо Достойно: поем:

А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся.

Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Господи, помилуй (трижды).

Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь

И паки: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. (Трижды.)

И нам дарова́ живо́т ве́чный, / покланя́емся Его́ / тридне́вному Воскресе́нию.