Трипеснец В Четверг Четвертой седмицы по Пасхе

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

И тропарь, глас 5, трижды:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды) Слава, и ныне:

О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

В четверто́к 4-я неде́ли по Па́сце, трипе́снец, его́же краегране́сие: Хвала́ Господу. Гла́с 3

Пе́снь 4.

Ирмо́с: Приосене́нную го́ру Авваку́м прозря́ше Пречистую Твою́ утро́бу Чи́стая, те́м взыва́ше: от ю́га прии́дет Бог и Святы́й от горы́ приосене́нныя ча́щи.

Припев: Слава Тебе, Боже наш, слава Тебе.

Неизрече́нным соедине́нием уподо́бився челове́ком, Еди́н Пресу́щный, Крест Пло́тию претерпе́в, и вмени́вся в ме́ртвых, тридне́вно воскре́сл еси́ Жи́знь все́х.

Припев: Слава Тебе, Боже наш, слава Тебе.

Иисусе Боже на́ш, Вода́ Жи́зни Сы́й, ше́ствуеши тружда́яся в пло́ти ко исто́чнику, соседя́ же и самаряны́не жене́, прему́дрости Твоея́ во́ду та́йно пролива́еши.

Сла́ва: Неду́гов разли́чных приходя́щих к Тебе́ Сло́ве, очища́я повеле́нием Твои́м, Крест во́лею претерпе́л еси́ во гро́бе положи́вся, воскреси́л еси́ естество́ челове́ческое истле́вшее.

И ны́не, богоро́дичен: На Тя́ Прему́дрость Отца́ Безнача́льнаго сни́де, я́ко до́ждь на руно́ Чи́стая, и вопло́щши кроме́ преложе́ния, пути́ жи́зни показа́ла еси́ на́м ве́дущым Тя́ Деву по рождестве́ и Матерь.

Пе́снь 8.

Ирмо́с: В пла́мень ко отроко́м евре́йским снизше́дшаго, Божиею Си́лою, и я́вльшагося Господа, свяще́нницы благослови́те, и превозноси́те во вся́ ве́ки.

Припев: Слава Тебе, Боже наш, слава Тебе.

Ты́ на Кресте́ возне́сся, челове́ческое все́ естество́ совозне́сл еси́ Сло́ве, и положи́вся во гро́бе, во гробе́х спя́щыя воздви́гл еси́ Боже́ственным воста́нием Твои́м Ще́дре.

Припев: Слава Тебе, Боже наш, слава Тебе.

Иерихо́н и Сали́м бли́жняя с вода́ми мно́гими преше́д, к студенцу́ Иа́ковлю прии́де, исто́чник прему́дрости, во́ду спасе́ния самаряны́не дая́.

Сла́ва: Ты́ слепца́ просвети́вый сло́вом, и разсла́бленных повеле́нием Твои́м стягну́вый, и ме́ртв тридне́вно возсия́вый из гро́ба, умерщвле́нную воскреси́ ду́шу мою́.

И ны́не, богоро́дичен: Ми́рови всему́ Богородице Мари́е Ты́ еси́ прибе́жище, мирски́х мя́ собла́зн и страсте́й теле́сных, и ве́чнующия изба́ви гее́нны, я́ко да песносло́влю Тя́.

Пе́снь 9.

Ирмо́с: Тебе́ неопали́мую купину́, и Святу́ю Деву, Матерь Све́та и Богородицу, наде́жду все́х на́с, велича́ем.

Припев: Слава Тебе, Боже наш, слава Тебе.

Просте́рл еси́ дла́ни на дре́ве, зле́ просте́ртых пра́отца ру́к, к дре́ва сне́ди, потребля́я вре́д, Христе́ Многоми́лостиве.

Припев: Слава Тебе, Боже наш, слава Тебе.

Глаго́лом разсла́бленнаго стягну́вый, и хромы́я испра́вивый, распя́лся еси́, Иисусе, и воскре́сл еси́, ученико́м на мно́гия дни́ явля́яся.

Сла́ва: Ви́де самаряны́ня жена́ Тебе́, прише́дши почерпсти́, и во́ду жи́зни от Тебе́ прии́мши, насы́тися, Христе́ Боже, воспева́ющи Тя́.

И ны́не, богоро́дичен: О па́че ума́, Твои́х чуде́с Пречи́стая Дево, Ты́ бо родила́ еси́ Бога воплоще́нна, Боже́ственным воста́нием Свои́м все́х спа́сшаго.

Вместо Достойно: поем:

А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся.

Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Господи, помилуй (трижды).

Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь

И паки: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. (Трижды.)

И нам дарова́ живо́т ве́чный, / покланя́емся Его́ / тридне́вному Воскресе́нию.