Суббота 4-й седмицы. Избранные службы Триоди Постной - богослужения Великого поста.

СУББОТА ЧЕТВЕРТАЯ СВЯТЫХ ПОСТОВ

НА УТРЕНИ

Аллилуиа, и тропари, глас 2:

Апо́столи, му́ченицы и проро́цы, / святи́телие, преподо́бнии и пра́веднии, / до́бре по́двиг соверши́вшии и ве́ру соблю́дшии, / дерзнове́ние иму́ще ко Спа́су, / о нас Того́, я́ко Бла́га, моли́те, / спасти́ся, мо́лимся, душа́м на́шим.

Слава, мертвен: Помяни́, Го́споди, я́ко Благ, рабы́ Твоя́, / и ели́ка в житии́ согреши́ша, прости́: / никто́же бо безгре́шен, то́кмо Ты, / моги́й и преста́вленным да́ти поко́й.

И ныне, Богородичен: Ма́ти Свята́я Неизрече́ннаго Све́та, / а́нгельскими Тя пе́сньми почита́юще, / благоче́стно велича́ем.

И стихословим едину кафисму: Рече́ Госпо́дь Го́сподеви моему́: Таже седальны мученичны Октоиха три, и мертвен, и Богородичен. И чтение в Шестодневце.

Таже, Блаже́ни непоро́чнии: поем на две статии, и поминает священник усопшия, якоже обычно.

В конец же кафисмы поем тропари мертвых, глас 5.

Припев: Благослове́н еси́ Го́споди, / научи́ мя оправда́нием Твои́м.

Святы́х лик обре́те исто́чник жи́зни и дверь ра́йскую, / да обря́щу и аз путь покая́нием: / поги́бшее овча́ аз есмь, / воззови́ мя, Спа́се, и спаси́ мя.

Благослове́н еси́ Го́споди, / научи́ мя оправда́нием Твои́м.

А́гнца Бо́жия пропове́давше, / и закла́ни бы́вше я́коже а́гнцы, / и к жи́зни нестаре́емей святи́и, / и присносу́щней преста́вльшеся. / Того́ приле́жно му́ченицы моли́те, / долго́в разреше́ние нам дарова́ти.

Благослове́н еси́ Го́споди, / научи́ мя оправда́нием Твои́м.

В путь у́зкий хо́ждшии приско́рбный, / вси в житии́ крест я́ко яре́м взе́мшии, / и Мне после́довавшии ве́рою, / прииди́те наслади́теся, / и́хже угото́вах вам по́честей, / и венцо́в небе́сных.

Благослове́н еси́ Го́споди, / научи́ мя оправда́нием Твои́м.

О́браз есмь неизрече́нныя Твоея́ сла́вы, / а́ще и я́звы ношу́ прегреше́ний: / уще́дри Твое́ созда́ние Влады́ко, / и очи́сти Твои́м благоутро́бием, / и возжеле́нное оте́чество пода́ждь ми, / рая́ па́ки жи́теля мя сотворя́я.

Благослове́н еси́ Го́споди, / научи́ мя оправда́нием Твои́м.

Дре́вле у́бо от не су́щих созда́вый мя, / и о́бразом Твои́м Боже́ственным почты́й, / преступле́нием же за́поведи / па́ки мя возврати́вый в зе́млю, от нея́же взят бых, / на е́же по подо́бию возведи́ / дре́внею добро́тою возобрази́тися.

Благослове́н еси́ Го́споди, / научи́ мя оправда́нием Твои́м.

Упоко́й, Бо́же, рабы́ Твоя́, / и учини́ я́ в раи́, / иде́же ли́цы святы́х, Го́споди, / и пра́ведницы сия́ют я́ко свети́ла, / усо́пшия рабы́ Твоя́ упоко́й, / презира́я их вся согреше́ния.

Слава: Трисия́тельное еди́наго Божества́, благоче́стно пое́м вопию́ще: / Свят еси́ О́тче Безнача́льный, / Собезнача́льный Сы́не, и Боже́ственный Ду́ше: / просвети́ нас ве́рою Тебе́ служа́щих, / и ве́чнаго огня́ исхити́.

И ныне: Ра́дуйся Чи́стая, Бо́га пло́тию ро́ждшая во спасе́ние всех, / Е́юже род челове́ческий обре́те спасе́ние: / Тобо́ю да обря́щем рай, / Богоро́дице Чи́стая благослове́нная.

Аллилу́иа, аллилу́иа, аллилу́иа, сла́ва Тебе́, Бо́же. Трижды.

Посем ектения о усопших: Па́ки и па́ки:

Иерей молитву: Бо́же духо́в: Мы же: Го́споди поми́луй, 40.

И по ектении седален мертвен, глас 5:

Поко́й Спа́се наш, / с пра́ведными рабы́ Твоя́, / и сия́ всели́ во дворы́ Твоя́, / я́коже есть пи́сано: / презира́я я́ко благ прегреше́ния их / во́льная и нево́льная, / и вся я́же в ве́дении и не в ве́дении, Человеколю́бче.

Слава: И вся я́же в ве́дении и не в ве́дении, Человеколю́бче.

И ныне, Богородичен: От Де́вы возсия́вый ми́ру Христе́ Бо́же, / и сы́ны све́та То́ю показа́вый, поми́луй нас.

Таже канон Минеи, и святаго обители, и настоящия четверопеснцы по чину их. Четверопеснец, егоже краегранесие: Песнь на мученики, господина Иосифа. И стихословятся песни, глас 4.

Песнь 6.

Ирмос: Пучи́ною жите́йскою:

Преидо́сте преде́лы плотски́я страда́льцы / мно́гим терпе́нием, претерпе́вше му́ки и боле́зни. / Те́мже вся́кую боле́знь и скорбь облегча́ете, / вас воспева́ющих.

Тьмам а́нгел во́инство совокупи́ся / святы́х страстоте́рпец, / и мо́лит Всеблага́го Бо́га, / согреше́ний тьмочи́сленных нас изба́вити, / я́ко Христу́ угоди́вшии.

Умертви́вся и во гро́бе Христе́ усну́в, / возста́вил еси́ ме́ртвыя, / и в ве́ре уме́ршим дае́ши бла́гости бога́тство, Христе́, / поко́й я́ со все́ми святы́ми.

Богородичен: Бо́жие Бог Сло́во, / иски́й обожи́ти челове́ка Чи́стая, / из Тебе́ воплоща́ется, и зе́млен ви́дится, / Его́же непреста́нно моли́, / обрести́ нам ми́лость во вре́мя отве́та.

Иный господина Феодора, глас тойже.

Ирмос: Бу́рею грехо́вною:

Пло́ти и кро́ве святи́и не пощаде́вше, / ко вся́кому муче́нию ста́сте небоя́зненни, / Христа́ не отмета́ющеся, / те́мже с небе́с низпосла́ Христо́с вам венцы́.

Му́ченик торжество́ усря́щим, / просвети́вшеся де́тельми, / и возопии́м богодухнове́нными пе́сньми, / вы есте́ вои́стинну денни́цы на земли́, / Христо́вы му́ченицы.

Троичен: Тро́ице Свята́я сла́влю Тя, / Естество́ безнача́льное, / еди́наго Бо́га, еди́наго Го́спода, три Ли́ца, Отца́, Сы́на и Ду́ха, / нерожде́нна, рожде́нна, исхо́дна, / Ту́южде и присносу́щну.

Богородичен: О блаже́нная Богоневе́сто, / ка́ко родила́ еси́ без му́жа, и пребыла́ еси́ я́коже пре́жде? / Бо́га бо родила́ еси́, чу́до стра́шное, / но моли́ спасти́ся пою́щим Тя.

Стих: Ди́вен Бог во святы́х Свои́х, Бог Изра́илев.

Мученичен: Усече́ния удо́в ва́ших зря́ще, / наслажда́стеся кровьми́ ра́дующеся, / но моли́те о нас приле́жно Го́спода, / му́ченицы присносла́внии.

Стих: Ду́ши их во благи́х водворя́тся.

От земли́ созда́вый мя, и оживи́вый мя, / и в зе́млю возврати́тися мне па́ки реки́й, / я́же прия́л еси́ рабы́ Твоя́ упоко́й, / и от тли сме́ртныя возведи́, Го́споди.

Ирмос: Бу́рею грехо́вною погружа́емь, / я́ко во чре́ве ки́тове содержи́мь, / с проро́ком зову́ Ти: / возведи́ от тли живо́т мой, / Го́споди, и спаси́ мя.

Кондак, глас 8:

Со святы́ми упоко́й, / Христе́, / ду́ши раб Твои́х, / иде́же несть боле́знь, ни печа́ль, / ни воздыха́ние, / но жизнь безконе́чная.

Икос: Сам еди́н еси́ безсме́ртный, / сотвори́вый и созда́вый челове́ка: / земни́и у́бо от земли́ созда́хомся, / и в зе́млю ту́южде по́йдем, / я́коже повеле́л еси́, созда́вый мя и реки́й ми: / я́ко земля́ еси́, и в зе́млю оты́деши, / а́може вси челове́цы по́йдем, / надгро́бное рыда́ние, творя́ще песнь: / аллилу́иа.

Песнь 7.

Ирмос: О́бразу злато́му:

Обо́лкшеся страда́льцы в нетле́ние боже́ственное, / обнаже́нием тле́нныя пло́ти, / нас ра́ди плоть от нетле́нныя Прие́мшему Жены́, / ны́не предстоите́ све́тлии, / сего́ ра́ди мя облецы́те во оде́жду свяще́нную / обнаже́ннаго зло́бою.

Воздержа́нием пожи́вый, страда́льческий собо́р, / воздержа́ния нас по́прище укрепи́те тещи́ невозбра́нно, / я́ко пропове́давый Христа́ на по́прищи му́жественно, / и предстоя́й престо́лу венцено́сный, / в наслажде́ние мы́сленно со а́нгелы.

Моли́твами, Бо́же, Твои́х святы́х му́ченик, / усо́пшия ве́рно рабы́ Твоя́, / рая́ жи́тели покажи́, / и све́та мы́сленнаго сподо́би я́, / непреста́нно вопию́щия Тебе́: / благослове́н Бог отце́в на́ших.

Богородичен: Тя еди́ну благу́ю мо́лим Де́во, / озло́бленныя ны ублажи́, / и приле́жно Христа́ моли́ естество́м су́ща блага́го, / воздержа́ния вре́мя, блага́я де́ющим, / испо́лнити нам пою́щим Его́: / благослове́н Бог отце́в на́ших.

 

Иный. Ирмос: Глаго́лавый на горе́:

Возвели́чивый святы́я Твоя́ вся, / зна́меньми удиви́в я́ в ми́ре, / благослове́н еси́ во ве́ки Го́споди / Бо́же отце́в на́ших.

Вся́кий вид ран проше́дше, / и коле́на Ваа́лу не поко́ршеся преклони́ти, / венцы́ сла́вы взя́сте от Бо́га / Христо́вы му́ченицы.

Троичен: Во Еди́нице Тро́ице, покланя́емое Существо́, / О́тче, Сы́не и Ду́ше, / воспева́ющия Тя сохраня́й, / Бо́же отце́в на́ших.

Богородичен: Де́во Ма́ти Отрокови́це всесве́тлая, / еди́на к Бо́гу хода́тайство, / не преста́й, Влады́чице, моли́ти / спасти́ся нам.

Стих: Святы́м, и́же суть на земли́ Его́, удиви́ Госпо́дь вся хоте́ния Своя́ в них.

Безсме́ртному Царю́ во́инствовавше, / и ве́ру к Нему́ показа́вше соверше́нную, / кровь свою́ му́ченицы / за Него́ излия́сте.

Стих: Блаже́ни, я́же избра́л, и прия́л еси́ Го́споди.

Иде́же свет Твой жи́зни истека́ет, / преложи́ я́же преста́вил еси́ от вре́менных, / ве́рныя Твоя́ рабы́, / Го́споди Бо́же оте́ц на́ших.

Ирмос: Глаго́лавый на горе́ с Моисе́ем, / и о́браз де́вства явле́й в купине́, / благослове́н еси́ Бо́же оте́ц на́ших.

Песнь 8.

Ирмос: Во огни́ пла́меннем:

Великоимени́тии Христо́вы страда́льцы, / и честни́и в Бо́зе, / вся воспева́ющия па́мяти ва́ша, / вели́ких согреше́ний, и та́мошних мук изба́вите ны, / к Нему́ ва́шими вели́кими моли́твами.

Святоизбра́нное Христа́ Бо́га, / и тве́рдое вои́стинну во́инство, / му́ченик собо́ры освяти́те наш ум и се́рдце, / в сия́ святы́я дни по́стныя, / ва́шими святы́ми моли́твами.

Изба́ви че́рвия му́чащаго, / и скре́жета зу́бнаго, Го́споди, / и вне́шния тьмы несвети́мыя, / вся я́же ве́рою прия́л еси́, / и учини́ сия́, иде́же свет лица́ Твоего́ Христе́, / сия́ет во ве́ки.

Богородичен: Крест Христо́в честны́й, Богоро́дице Чи́стая, / ви́девшия и от се́рдца поклони́вшияся ны, / Твои́ми ко Влады́це сподо́би моли́твами, / ви́дети и стра́сти честны́я, / страсте́й очище́нных.

 

Иный. Ирмос: Земля́, и вся я́же на ней:

О до́браго измене́ния, / и́мже обрето́сте сме́ртию живо́т, / священному́ченицы Христо́вы, / огня́ и меча́, мра́за и звере́й ника́коже убоя́вшеся, / и вопию́ще: по́йте Го́спода, / и превозноси́те во вся ве́ки.

Горе́ лик а́нгельский, до́ле же мы, земни́и, / хва́лим му́ченицы Христо́вы, стра́нная страда́ния, / и по́двиги ва́шего му́жества, / благословя́ще, пою́ще Го́спода, / и превознося́ще во вся ве́ки.

Благослови́м Отца́ и Сы́на и Свята́го Ду́ха, Го́спода.

Свет, Живо́т же и Животы́, / почита́ю Тя, Отца́, и Сы́на, и Ду́ха исхо́дна, / Естество́ еди́но, три Ипоста́си, Бо́га Еди́наго поя́, / благословлю́ Тя, пою́ Тя, Го́спода, / и превозношу́ Тя во вся ве́ки.

И ны́не и при́сно и во ве́ки веко́в, ами́нь.

Богородичен: Кто не воспое́т Тя от земноро́дных, / нескве́рная Чи́стая голуби́ца? / Ты бо родила́ еси́ нам Свет вели́кий, / жи́зни бога́тство, Иису́са Спа́са, / Его́же пое́м хва́ляще, я́ко Го́спода, / и превозно́сим во вся ве́ки.

Стих: Ди́вен Бог во святы́х Свои́х, Бог Изра́илев.

По́двиги чу́дныя, му́ченицы, сла́вяще ва́ша, / благоде́теля и Бо́га благослови́м и покланя́емся, / на по́прище по́двигов вас укрепи́вшаго, / Его́же превозно́сим во вся ве́ки.

Стих: Ду́ши их во благи́х водворя́тся.

Ты сме́рти и живота́ Госпо́дь сый и Бог, / преста́вльшихся благоче́стно воздвиза́яй, / та́мо преложи́ в селе́ниих пра́ведных, / благословя́щия, пою́щия Тя, Го́споди, / и превознося́щия во вся ве́ки.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Ирмос: Земля́, и вся я́же на ней, / мо́ре и вси исто́чницы, / небеса́ небе́с, / свет и тьма, мраз и зной, / сы́нове челове́честии, / свяще́нницы благослови́те Го́спода, / и превозноси́те Его́ во ве́ки.

Песнь 9.

Ирмос: Я́ко сотвори́ Мне:

Свети́льницы су́ще неле́стнии, / Христо́вы страда́льцы, / просвети́те на́ша по́мыслы, / утверди́те твори́ти светоза́рная и чи́стая / Бо́жия хоте́ния.

Ору́жия зрите́ся закала́ющая враги́, / до́блии Христо́вы страда́льцы, / но изба́вите нас от стрел лука́ваго / предста́тельствы ва́шими.

Поко́й, Ще́дре, в не́дрех Авраа́мовых / рабы́ Твоя́, ве́рою от нас отше́дшия, / к Тебе́, вся́ческих Зижди́телю и Преблаго́му.

Богородичен: Пло́ти моея́ умертви́ движе́ния, / Бо́га пло́тию Ро́ждшая па́че ума́, / и пода́ждь просвеще́ние мы́сли мое́й, / чи́стый о́блак су́щи све́та.

 

Иный. Ирмос: Велича́ем вси:

Воспева́ем вси па́мяти ва́ша, / му́ченицы прехва́льнии, / по́двиги ви́дяще свяще́нных ва́ших страда́ний, / и удиви́вшеся Христа́ велича́ем.

Друг ко дру́гу стра́ждуще глаго́лаху страстоте́рпцы: / пло́ти не пощади́м, прииди́те, у́мрем о Христе́, / да во вся ве́ки поживе́м / лику́юще непреста́нно.

Троичен: О Тро́ице во еди́ном Естестве́, / Тя воспева́ющия, / О́тче нерожде́нный, и рожде́нный Сы́не, и Ду́ше исхо́дный, / Твое́ю ми́лостию невреди́мы соблюди́.

Богородичен: Ра́дуйся, Всечестна́я Чи́стая, / де́вства похвало́, ма́терей утвержде́ние, / челове́ков по́моще, и ми́ра ра́досте, / Мари́е Ма́ти, и Рабо́ Бо́га на́шего.

Стих: Ди́вен Бог во святы́х Свои́х, Бог Изра́илев.

Ли́че святы́х, приими́ мольбу́ мою́, / и я́ко сподо́бил мя еси́ Крест целова́ти, / и спаси́тельней стра́сти поклони́тися мне, / Христа́ моли́те.

Стих: Блаже́ни, я́же избра́л, и прия́л еси́ Го́споди.

Осла́би, оста́ви, Ще́дре, / к Тебе́, Человеколю́бцу, преста́вленным, / и сих поко́й в селе́ниих избра́нных, / Ты бо еси́ Жизнь и Воскресе́ние.

Ирмос: Велича́ем вси человеколю́бие Твое́, / Христе́ Спа́се наш, / сла́во раб Твои́х, / и ве́нче ве́рных, / возвели́чивый па́мять Ро́ждшия Тя.

Ексапостиларий:

Не́бо звезда́ми украси́вый, я́ко Бог, / и Твои́ми святы́ми всю зе́млю просвети́вый, / Соде́телю всех, пою́щия Тя спаса́й.

Слава: Живы́ми и ме́ртвыми облада́яй, я́ко Бог, / упоко́й Твоя́ рабы́ в селе́ниих избра́нных, / а́ще бо и согреши́ша, Спа́се, / но не отступи́ша от Тебе́.

И ныне: Сла́дость а́нгелов, скорбя́щих ра́дость, / христиа́н предста́тельнице, Де́во Ма́ти Госпо́дня, / заступи́ нас, и изба́ви ве́чных мук.

На хвалитех мученичны гласа. Слава, самогласен за упокой. И ныне, Богородичен.

На стиховне мертвены стихиры господина Феофана, прилучившагося гласа. Слава, и ныне, Богородичен.

НА ЛИТУРГИИ

Изобразительная, и блаженны гласа.

По входе тропари, глас 2:

Апо́столи, му́ченицы и проро́цы, / святи́телие, преподо́бнии и пра́веднии, / до́бре по́двиг соверши́вшии и ве́ру соблю́дшии, / дерзнове́ние иму́ще ко Спа́су, / о нас Того́, я́ко Бла́га, моли́те, / спасти́ся, мо́лимся, душа́м на́шим.

Мертвен: Помяни́, Го́споди, я́ко Благ, рабы́ Твоя́, / и ели́ка в житии́ согреши́ша, прости́: / никто́же бо безгре́шен, то́кмо Ты, / моги́й и преста́вленным да́ти поко́й.

Слава, кондак, глас 8: Со святы́ми упоко́й, / Христе́, / ду́ши раб Твои́х, / иде́же несть боле́знь, ни печа́ль, / ни воздыха́ние, / но жизнь безконе́чная.

И ныне, Богородичен, глас тойже: Тебе́ и Сте́ну и Приста́нище и́мамы, / и Моли́твенницу благоприя́тну к Бо́гу, / Его́же родила́ еси́, Богоро́дице безневе́стная, ве́рных спасе́ние.

Прокимен, глас 8:

Весели́теся о Го́споде, / и ра́дуйтеся, пра́веднии. Стих: Блаже́ни, и́хже оста́вишася беззако́ния и и́хже прикры́шася греси́.

И умершим, прокимен, глас 6: Ду́ши их / во благи́х водворя́тся.

Апостол дне ко евреем, зачало 313.

Бра́тие, наде́емся о вас, возлю́бленнии, лу́чших и придержа́щихся спасе́ния, а́ще и та́ко глаго́лем. Не оби́длив бо Бог, забы́ти дела́ ва́шего и труда́ любве́, ю́же показа́сте во и́мя Его́, послужи́вше святы́м и служа́ще. Жела́ем же, коего́ждо вас явля́ти то́же тща́ние ко извеще́нию упова́ния да́же до конца́, да не лени́ви бу́дете, но подража́тели насле́дствующих обетова́ния ве́рою и долготерпе́нием.

И за упокой:
Послание к коринфяном первое, зачало 163.

Бра́тие, пе́рвый челове́к от земли́ пе́рстен, вторы́й Челове́к Госпо́дь с небесе́. Яко́в пе́рстный, такови́ и пе́рстнии, и яко́в небе́сный, та́цы же и небе́снии. И я́коже облеко́хомся во о́браз пе́рстнаго, да облече́мся и во о́браз Небе́снаго. Сие́ же глаго́лю, бра́тие, я́ко плоть и кровь Ца́рствия Бо́жия насле́дити не мо́гут, ниже́ тле́ние нетле́ния насле́дствует. Се та́йну вам глаго́лю: вси бо не у́спнем, вси же измени́мся. Вско́ре, во мгнове́нии о́ка, в после́дней трубе́: востру́бит бо, и ме́ртвии воста́нут нетле́нни, и мы измени́мся. Подоба́ет бо тле́нному сему́ облещи́ся в нетле́ние, и ме́ртвенному сему́ облещи́ся в безсме́ртие. Егда́ же тле́нное сие́ облече́тся в нетле́ние, и сме́ртное сие́ облече́тся в безсме́ртие, тогда́ бу́дет сло́во напи́санное: поже́рта бысть смерть побе́дою. Где ти сме́рте, жа́ло; где ти а́де, побе́да? Жа́ло же сме́рти грех, си́ла же греха́ зако́н. Бо́гу же благодаре́ние, да́вшему нам побе́ду Го́сподем на́шим Иису́с Христо́м.

Аллилуиа, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь. И умершим, стих: Блаже́ни, я́же избра́л и прия́л еси́, Го́споди, и па́мять их в род и род.

Евангелие от Марка, зачало 31.

Во вре́мя о́но, изше́д Иису́с от преде́л Ти́рских и Сидо́нских, прии́де на мо́ре Галиле́йско, между́ преде́лы Декапо́льски. И приведо́ша к Нему́ глу́ха и гугни́ва, и моля́ху Его́, да возложи́т нань ру́ку. И пое́м его́ от наро́да еди́наго, вложи́ пе́рсты Своя́ во у́ши его́, и плю́нув косну́ его́ в язы́к. И воззре́в на не́бо, воздохну́ и глаго́ла ему́: еффафа́, е́же есть разве́рзися. И а́бие разверзо́стася слу́ха его́, и разреши́ся у́за язы́ка его́, и глаго́лаше пра́во. И запрети́ им, да никому́же пове́дят, ели́ко же им Той запреща́ше, па́че и́злиха пропове́даху. И преи́злиха дивля́хуся, глаго́люще: до́бре все твори́т, и глухи́я твори́т слы́шати, и немы́я глаго́лати.

И за упокой, Евангелие от Иоанна, зачало 16.

Рече́ Госпо́дь ко прише́дшым к Нему́ иуде́ем: ами́нь, ами́нь глаго́лю вам, я́ко слу́шаяй словесе́ Моего́ и ве́руяй Посла́вшему Мя и́мать живо́т ве́чный, и на суд не прии́дет, но пре́йдет от сме́рти в живо́т. Ами́нь, ами́нь глаго́лю вам, я́ко гряде́т час, и ны́не есть, егда́ ме́ртвии услы́шат глас Сы́на Бо́жия и услы́шавше оживу́т. Я́коже бо Оте́ц и́мать живо́т в Себе́, та́ко даст и Сы́нови живо́т име́ти в Себе́ и о́бласть даде́ Ему́ и суд твори́ти, я́ко Сын Челове́чь есть. Не диви́теся сему́, я́ко гряде́т час, во́ньже вси су́щии во гробе́х услы́шат глас Сы́на Бо́жия, и изы́дут сотво́ршии блага́я в воскреше́ние живота́, а сотво́ршии зла́я в воскреше́ние суда́. Не могу́ Аз о Себе́ твори́ти ничесо́же. Я́коже слы́шу, сужду́, и суд Мой пра́веден есть, я́ко не ищу́ во́ли Моея́, но во́ли посла́вшаго Мя Отца́.

Причастен дне: Ра́дуйтеся, пра́веднии, о Го́споде, пра́вым подоба́ет похвала́. Другий за упокой: Блаже́ни, я́же избра́л, и прия́л еси́ Го́споди, и па́мять их в род и род. Аллилу́иа, трижды.