Суббота 3-й седмицы Великого поста. Избранные службы Триоди Постной - богослужения Великого поста.

СУББОТА ТРЕТИЯ СВЯТЫХ ПОСТОВ

НА УТРЕНИ

Тропарь на Аллилуиа, глас 2:

Апо́столи, му́ченицы и проро́цы, / святи́телие, преподо́бнии и пра́веднии, / до́бре по́двиг соверши́вшии и ве́ру соблю́дшии, / дерзнове́ние иму́ще ко Спа́су, / о нас Того́, я́ко Бла́га, моли́те, / спасти́ся, мо́лимся, душа́м на́шим.

Слава, мертвен: Помяни́, Го́споди, я́ко Благ, рабы́ Твоя́, / и ели́ка в житии́ согреши́ша, прости́: / никто́же бо безгре́шен, то́кмо Ты, / моги́й и преста́вленным да́ти поко́й.

И ныне, Богородичен: Ма́ти Свята́я Неизрече́ннаго Све́та, / а́нгельскими Тя пе́сньми почита́юще, / благоче́стно велича́ем.

И стихословим едину кафисму: Рече́ Госпо́дь Го́сподеви моему́: Таже седальны мученичны Октоиха три, и мертвен, и Богородичен. И чтение в Шестодневце.

Таже, Блаже́ни непоро́чнии: поем на две статии, и поминает священник усопшия, якоже обычно.

В конец же кафисмы поем тропари мертвых, глас 5.

Припев: Благослове́н еси́ Го́споди, / научи́ мя оправда́нием Твои́м.

Святы́х лик обре́те исто́чник жи́зни и дверь ра́йскую, / да обря́щу и аз путь покая́нием: / поги́бшее овча́ аз есмь, / воззови́ мя, Спа́се, и спаси́ мя.

Благослове́н еси́ Го́споди, / научи́ мя оправда́нием Твои́м.

А́гнца Бо́жия пропове́давше, / и закла́ни бы́вше я́коже а́гнцы, / и к жи́зни нестаре́емей святи́и, / и присносу́щней преста́вльшеся. / Того́ приле́жно му́ченицы моли́те, / долго́в разреше́ние нам дарова́ти.

Благослове́н еси́ Го́споди, / научи́ мя оправда́нием Твои́м.

В путь у́зкий хо́ждшии приско́рбный, / вси в житии́ крест я́ко яре́м взе́мшии, / и Мне после́довавшии ве́рою, / прииди́те наслади́теся, / и́хже угото́вах вам по́честей, / и венцо́в небе́сных.

Благослове́н еси́ Го́споди, / научи́ мя оправда́нием Твои́м.

О́браз есмь неизрече́нныя Твоея́ сла́вы, / а́ще и я́звы ношу́ прегреше́ний: / уще́дри Твое́ созда́ние Влады́ко, / и очи́сти Твои́м благоутро́бием, / и возжеле́нное оте́чество пода́ждь ми, / рая́ па́ки жи́теля мя сотворя́я.

Благослове́н еси́ Го́споди, / научи́ мя оправда́нием Твои́м.

Дре́вле у́бо от не су́щих созда́вый мя, / и о́бразом Твои́м Боже́ственным почты́й, / преступле́нием же за́поведи / па́ки мя возврати́вый в зе́млю, от нея́же взят бых, / на е́же по подо́бию возведи́ / дре́внею добро́тою возобрази́тися.

Благослове́н еси́ Го́споди, / научи́ мя оправда́нием Твои́м.

Упоко́й, Бо́же, рабы́ Твоя́, / и учини́ я́ в раи́, / иде́же ли́цы святы́х, Го́споди, / и пра́ведницы сия́ют я́ко свети́ла, / усо́пшия рабы́ Твоя́ упоко́й, / презира́я их вся согреше́ния.

Слава: Трисия́тельное еди́наго Божества́, благоче́стно пое́м вопию́ще: / Свят еси́ О́тче Безнача́льный, / Собезнача́льный Сы́не, и Боже́ственный Ду́ше: / просвети́ нас ве́рою Тебе́ служа́щих, / и ве́чнаго огня́ исхити́.

И ныне: Ра́дуйся Чи́стая, Бо́га пло́тию ро́ждшая во спасе́ние всех, / Е́юже род челове́ческий обре́те спасе́ние: / Тобо́ю да обря́щем рай, / Богоро́дице Чи́стая благослове́нная.

Аллилу́иа, аллилу́иа, аллилу́иа, сла́ва Тебе́, Бо́же. Трижды.

Посем ектения о усопших: Па́ки и па́ки:

Иерей молитву: Бо́же духо́в: Мы же: Го́споди поми́луй, 40.

По 2-м же стихословии глаголем седален покоин, глас 5:

Поко́й Спа́се наш, / с пра́ведными рабы́ Твоя́, / и сия́ всели́ во дворы́ Твоя́, / я́коже есть пи́сано: / презира́я я́ко благ прегреше́ния их / во́льная и нево́льная, / и вся я́же в ве́дении и не в ве́дении, Человеколю́бче.

Слава: И вся я́же в ве́дении и не в ве́дении, Человеколю́бче.

И ныне, Богородичен: От Де́вы возсия́вый ми́ру Христе́ Бо́же, / и сы́ны све́та То́ю показа́вый, поми́луй нас.

Поем же канон Минеи, и святаго обители, и четверопеснец по чину их. Зде не стихословим Господеви поем, но абие глаголем ирмос Минеи. Четверопеснец егоже краегранесие сицево: Поет сия Иосиф. Творение господина Иосифа. И стихословятся песни, глас 4.

Песнь 6.

Ирмос: Приидо́х во глубины́ морски́я:

Кро́вными напои́сте ка́плями благочести́вых сердца́, / злочести́вых же полки́ я́ве в них потопи́сте, / страстоте́рпцы достосла́внии.

Просла́вивше удесы́ свои́ми всех Влады́ку, / ны́не прославля́етеся непреста́нно: / сла́ва ве́рным страда́льцы су́ще, / и вели́цыи засту́пницы.

В ро́ве положи́лся еси́ преиспо́днем, / ве́рою у́бо уме́ршим поко́й Сло́ве пода́ждь, / свяще́нных страда́лец мольба́ми, / и согреше́ний проще́ние.

Богородичен: Да Тя гла́сы немо́лчными восхва́лим Де́во, / гла́сы на́ша сия́ приими́, / и очище́ние долго́в прия́ти, / Сы́на Твоего́ умоли́.

Иный господина Феодора, глас 8.

Ирмос: Содержи́ма мя приими́ Человеколю́бче:

Ны́не му́ченик торжество́, стеце́мся, / и страда́ния их всечестна́я ублажа́юще, / Христа́ сих венча́вшаго воспои́м.

Боже́ственною разжига́еми любо́вию Христо́вою / на у́глех огня́ преходи́сте я́ко на росе́, / Того́ пою́ще му́ченицы блаже́ннии.

Слава, Троичен: Тя Тро́ице пребезнача́льная, и Боже́ственная Еди́нице, / Свет и Све́ты пою́, Живота́ и Животы́, / Ума́, Сло́ва, Ду́ха же Свята́го, / и Свя́та, еди́наго Бо́га.

Богородичен: От ко́рене твоего́ возсия́ цвет жи́зни, / Иессе́е пра́отче взыгра́й, / спаса́яй мир, от Чи́стыя Отрокови́цы Христо́с Бог.

Стих: Ди́вен Бог во святы́х Свои́х, Бог Изра́илев.

Огня́ и меча́, и сме́рти не убоя́вшеся, / испове́дание соблюдо́сте спасе́ния, / от Христа́ блаже́ннии укрепля́еми.

Стих: Ду́ши их во благи́х водворя́тся.

В ме́ртвых свобо́дь, / я́ко сый Нача́льник живота́ и сме́рти, / Ты упоко́й я́же прия́л еси́, / и во дворы́ Твоя́ всели́ Человеколю́бче.

Ирмос: Содержи́ма мя приими́, Человеколю́бче, / грехи́ мно́гими, / и припа́дающа щедро́там Твои́м, / я́ко проро́ка, Го́споди, и спаси́ мя.

Кондак, глас 8:

Со святы́ми упоко́й, / Христе́, / ду́ши раб Твои́х, / иде́же несть боле́знь, ни печа́ль, / ни воздыха́ние, / но жизнь безконе́чная.

Икос: Сам еди́н еси́ безсме́ртный, / сотвори́вый и созда́вый челове́ка: / земни́и у́бо от земли́ созда́хомся, / и в зе́млю ту́южде по́йдем, / я́коже повеле́л еси́, созда́вый мя и реки́й ми: / я́ко земля́ еси́, и в зе́млю оты́деши, / а́може вси челове́цы по́йдем, / надгро́бное рыда́ние, творя́ще песнь: / аллилу́иа.

Песнь 7.

Ирмос: Ю́ноши три:

Кому́ лю́бящи стра́сти безслове́сныя, / вои́стинну душе́ уподо́билася еси́? / Кого́ превосходя́ща име́ла еси́ во гресе́х? / Возопи́й Христу́: спаси́ мя, Благи́й.

Святи́и, во святы́х Почива́ющаго / моли́те приле́жно, в сия́ святы́я дни / освяти́ти всех благочести́вых мудрова́ния.

Вы́шний, в ми́лости бога́тый, и Благи́й, / рабо́м Твои́м оставле́ние пре́жде усо́пшим пода́ждь, / лико́м пра́ведных сия́ сопричита́я, / я́ко Человеколю́бец.

Богородичен: Родила́ еси́ кроме́ зако́нов естества́, / Созда́теля бы́вша Челове́ка, Чи́стая, / Того́ у́бо моли́ всех беззако́ния презре́ти ны́не / и прегреше́ния.

 

Иный. Ирмос: А́нгелом о́троки:

Честны́х му́ченик показа́вый па́мяти, / ра́дость Це́ркви Твое́й, и душе́вное утеше́ние, / благослове́н еси́ во ве́ки Го́споди / Бо́же оте́ц на́ших.

Не лжем Ти Христе́, ни отметаемся, му́ченицы вопияху, посреде мучений, беззаконныя судии удивляюще: благослове́н еси́ во ве́ки Го́споди Бо́же оте́ц на́ших.

Слава, Троичен: В трех Ли́цех еди́но Естество́ чтим, / Отца́, и Сы́на, и Ду́ха, / проро́чески вопию́ще: / благослове́н еси́ во ве́ки Го́споди / Бо́же оте́ц на́ших.

Богородичен: Ка́ко, я́ко Ма́ти, ражда́еши, и Де́ва пребы́ла еси́? / Я́ко Бо́га роди́х, не испыту́й ми о́браза, / ели́ка бо хо́щет, твори́т, / Богоотрокови́ца вопие́т.

Стих: Святы́м, и́же суть на земли́ Его́, удиви́ Госпо́дь вся хоте́ния Своя́ в них.

Му́ченический ли́че богоизбра́нный, / рабы́ твоя́ сподо́би, / покло́нники бы́ти Боже́ственному и животворя́щему / Спа́сову Кресту́.

Стих: Блаже́ни, я́же избра́л, и прия́л еси́ Го́споди.

Жи́зни сокро́вище, Царю́ безсме́ртне, / я́же избра́л еси́ рабы́ Твоя́ в ве́ре и наде́жде, / ве́чныя Твоея́ жи́зни сподо́би.

Ирмос: А́нгелом о́троки из огня́ спасы́й, / и гремя́щую пещь преложи́вый на ро́су, / благослове́н еси́ Бо́же оте́ц на́ших.

Песнь 8.

Ирмос: Изба́вителю всех:

Небоя́зненным иду́ще мудрова́нием / к боле́зненным трудо́м му́ченицы, / боле́зни плотски́я подъя́сте, / и к неболе́зненному наслажде́нию преста́вльшеся / вся́кую боле́знь се́рдца облегча́ете.

Вы́шняя тле́нными измени́вше, / плотски́ми мя истле́вша страстьми́, / поще́нием спаси́те, и моли́твами приле́жными / му́ченицы боже́ственнии, / всех Бо́га моля́ще.

Моли́твами Христе́ му́ченик Твои́х, / ми́лости Твоя́ всем низпосли́, / и к Тебе́ благоутро́бному преста́вльшимся от жития́, / разреше́ние пода́ждь долго́в, / и Боже́ственный поко́й.

Богородичен: Я́ко ро́ждшая Бо́га безгре́шнаго, / на́ша грехи́ потреби́ ма́терними Твои́ми моли́твами Богоро́дице, / и спаси́ вопию́щия: / благослови́те вся дела́ Госпо́дня Го́спода.

 

Иный. Ирмос: Богоглаго́ливии о́троцы:

Огнепа́льныя му́ки претерпе́вше, / я́ко ороше́ние страда́льцы, / с ра́достию взыва́сте: / благослови́те дела́ Госпо́дня Го́спода.

Богово́инственный полк му́ченик, / победи́вый лесть, / победи́тельно взыва́ше: / благослови́те дела́ Госпо́дня Го́спода.

Благослови́м Отца́ и Сы́на и Свята́го Ду́ха, Го́спода.

С Сы́ном Отцу́ поклони́мся, / и Всесвято́му Ду́ху, вси ве́рно возопии́м: / Тро́ице, Я́же во еди́нстве, / спаси́ ду́ши на́ша.

И ны́не и при́сно и во ве́ки веко́в, ами́нь.

Богородичен: Ты и Де́ва и Ма́ти яви́лася еси́, / ро́ждши без му́жа, Бо́га всех, Всечи́стая, / но Того́ моли́, спасти́ рабы́ Твоя́.

Стих: Ди́вен Бог во святы́х Свои́х, Бог Изра́илев.

Страстоте́рпец моли́твами, Твоя́ рабы́, / и поклони́тися, и ви́дети, Христе́ Спа́се, сподо́би, / животворя́щий Крест, Твоея́ бла́гости.

Стих: Ду́ши их во благи́х водворя́тся.

Разори́вый держа́ву сме́рти, / из ме́ртвых воста́нием Твои́м, / преста́вльшияся упоко́й со избра́нными Твои́ми, / хвали́ти Тя, Го́спода.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Ирмос: Богоглаго́ливии о́троцы в пещи́, / со огне́м пла́мень попира́юще поя́ху: / благослови́те дела́ Госпо́дня Го́спода.

Песнь 9.

Ирмос: Е́ва у́бо неду́гом:

Укрепи́вше на ка́мени мы́сленном мудрова́ние, / страстоте́рпцы, неразвра́тно, / вся вра́жия кова́рства победи́сте, / те́мже мя развраща́ема к страсте́м душетле́нным, / утверди́те к Бо́гу моли́твами.

Боже́ственный и светоза́рный вои́стинну собо́ре му́ченик, / моли́ преблага́го Влады́ку, во вре́мя воздержа́ния, / проще́ние прегреше́ний нам всем дарова́ти, / и ве́чное ра́дование.

Человеколю́бче еди́не Бла́же, / рабы́ Твоя́ в наде́жди воскресе́ния почи́вшия, / ве́чнаго све́та Твоего́ невече́рняго сподо́би причасти́тися, и пи́щи наслажде́ния, / да Тя со стра́хом велича́ем.

Богородичен: Све́та жили́ще, Твоя́ бысть Всесвята́я утро́ба всесвята́я, / те́мже ве́рно вопию́ Ти: / зе́ницы души́ моея́ озари́, / и стезю́ пра́вую покажи́, / Тебе́ при́сно блажа́щему.

 

Иный. Ирмос: Велича́ем Тя, Ма́терь Бо́жию:

Му́чеников па́мять соверша́ем ве́рнии, / да тех причасти́мся сла́вы, / восхваля́юще страда́льчество по́двигов их.

Ва́шего му́жества зве́рие убоя́шася зело́, / угасе́ огнь, сокруши́шася лу́цы, / в вас страда́льцы ди́вен Бог.

Слава, Троичен: Пребезнача́льное Естество́, триипоста́сная Еди́нице, / О́тче, Сы́не и Ду́ше Святы́й, / Све́те и Жи́зне Богонача́льная, / Тебе́ славосло́вящия сохраня́й.

Богородичен: Благослови́м Тя, Бо́га Изра́илева, / от Де́вы яви́вшагося ми́ру, / и воздви́гшаго рог спасе́ния на́шего.

Стих: Святы́м, и́же суть на земли́ Его́, удиви́ Госпо́дь вся хоте́ния Своя́ в них.

Моли́твенницы ми́ра, страстоте́рпцы Христо́вы, / Того́ ви́дети Крест, и поклони́тися / сподо́бите всех моли́твами ва́шими.

Стих: Блаже́ни, я́же избра́л, и прия́л еси́ Го́споди.

Иде́же истека́ет исто́чник жи́зни, Сы́не Бо́жий, / и посеще́ния Твоего́ лица́ просвеще́ние, / к Тебе́ преста́вльшияся учини́.

Ирмос: Велича́ем Тя, Ма́терь Бо́жию, / и сла́вим Тя, Богоро́дице Де́во, / я́ко Спа́са ро́ждшую душ на́ших.

Таже, Досто́йно есть:

Светилен:

Не́бо звезда́ми украси́вый, я́ко Бог, / и Твои́ми святы́ми всю зе́млю просвети́вый, / Соде́телю всех пою́щия Тя спаса́й.

Слава: Живы́ми и ме́ртвыми облада́яй, я́ко Бог, / упоко́й Твоя́ рабы́ в селе́ниих избра́нных, / а́ще бо и согреши́ша Спа́се, / но не отступи́ша от Тебе́.

И ныне: Сла́дость а́нгелов, скорбя́щих ра́дость, / христиа́н предста́тельнице, Де́во Ма́ти Госпо́дня, / заступи́ нас, и изба́ви ве́чных мук.

На хвалитех мученичны гласа. Слава, самогласен за упокой. И ныне, Богородичен.

На стиховне мертвены стихиры господина Феофана, прилучившагося гласа. Слава, и ныне, Богородичен.

НА ЛИТУРГИИ

Блаженна гласа, на 6.

По входе тропари, глас 2:

Апо́столи, му́ченицы и проро́цы, / святи́телие, преподо́бнии и пра́веднии, / до́бре по́двиг соверши́вшии и ве́ру соблю́дшии, / дерзнове́ние иму́ще ко Спа́су, / о нас Того́, я́ко Бла́га, моли́те, / спасти́ся, мо́лимся, душа́м на́шим.

Мертвен: Помяни́, Го́споди, я́ко Благ, рабы́ Твоя́, / и ели́ка в житии́ согреши́ша, прости́: / никто́же бо безгре́шен, то́кмо Ты, / моги́й и преста́вленным да́ти поко́й.

Слава, кондак, глас 8:

Со святы́ми упоко́й, / Христе́, / ду́ши раб Твои́х, / иде́же несть боле́знь, ни печа́ль, / ни воздыха́ние, / но жизнь безконе́чная.

И ныне, Богородичен, глас тойже: Тебе́ и Сте́ну и Приста́нище и́мамы, / и Моли́твенницу благоприя́тну к Бо́гу, / Его́же родила́ еси́, Богоро́дице безневе́стная, ве́рных спасе́ние.

Прокимен, глас 8:

Весели́теся о Го́споде, / и ра́дуйтеся, пра́веднии. Стих: Блаже́ни, и́хже оста́вишася беззако́ния и и́хже прикры́шася греси́.

И умершим, прокимен, глас 6: Ду́ши их / во благи́х водворя́тся.

Апостол дне ко евреем, зачало 325.

Бра́тие, воспомина́йте пе́рвыя дни ва́ша, в ни́хже просвети́вшеся, мно́гия стра́сти претерпе́сте страда́ний, о́во у́бо, поноше́ньми и скорбьми́ позо́р бы́вше, о́во же, о́бщницы бы́вше живу́щым та́ко. И́бо ю́зам мои́м спострада́сте и разграбле́ние име́ний ва́ших с ра́достию прия́сте, ве́дяще име́ти себе́ име́ние на небесе́х пребыва́ющее и лу́чшее. Не отлага́йте у́бо дерзнове́ния ва́шего, е́же и́мать мздовоздая́ние вели́ко. Терпе́ния бо и́мате потре́бу, да во́лю Бо́жию сотво́рше, прии́мете обетова́ние. И еще́ бо ма́ло ели́ко ели́ко, Гряды́й прии́дет и не укосни́т, а пра́ведный от ве́ры жив бу́дет.

Другий, за упокой, к солуняном, зачало 270.

Бра́тие, не хощу́ вас неве́дети о уме́рших, да не скорбите́, я́коже и про́чии не иму́щии упова́ния. А́ще бо ве́руем, я́ко Иису́с у́мре и воскре́се, та́ко и Бог уме́ршия во Иису́се приведе́т с Ним. Сие́ бо вам глаго́лем сло́вом Госпо́дним, я́ко мы живу́щии, оста́вшии в прише́ствие Госпо́дне, не и́мамы предвари́ти уме́рших. Я́ко Сам Госпо́дь в повеле́нии, во гла́се Арха́нгелове и в трубе́ Бо́жии сни́дет с небесе́, и ме́ртвии о Христе́ воскре́снут пе́рвее. Пото́м же мы, живу́щии оста́вшии, ку́пно с ни́ми восхище́ни бу́дем на о́блацех в сре́тение Госпо́дне на возду́се, и та́ко всегда́ с Го́сподем бу́дем.

Аллилуиа, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их. Стих: Мно́ги ско́рби пра́ведным, и от всех их изба́вит я́ Госпо́дь. И умершим, стих: Блаже́ни, я́же избра́л и прия́л еси́, Го́споди, и па́мять их в род и род.

Евангелие от Марка, зачало 8.

Во вре́мя о́но, мимогряды́й Иису́с ви́де Леви́ю Алфе́ова, седя́ща на мы́тнице, и глаго́ла ему́: по Мне гряди́. И воста́в в след Его́ и́де. И бысть возлежа́щу Ему́ в дому́ его́, и мно́зи мытари́ и гре́шницы возлежа́ху со Иису́сом и со ученики́ Его́, бя́ху бо мно́зи, и по Нем идо́ша. И кни́жницы и фарисе́е, ви́девше Его́ яду́ща с мытари́ и гре́шники, глаго́лаху ученико́м Его́: что я́ко с мытари́ и гре́шники яст и пие́т? И слы́шав Иису́с глаго́ла им: не тре́буют здра́вии врача́, но боля́щии, не приидо́х призва́ти пра́ведники, но гре́шники на покая́ние.

И за упокой, Евангелие от Иоанна, зачало 16.

Рече́ Госпо́дь ко прише́дшым к Нему́ иуде́ем: ами́нь, ами́нь глаго́лю вам, я́ко слу́шаяй словесе́ Моего́ и ве́руяй Посла́вшему Мя и́мать живо́т ве́чный, и на суд не прии́дет, но пре́йдет от сме́рти в живо́т. Ами́нь, ами́нь глаго́лю вам, я́ко гряде́т час, и ны́не есть, егда́ ме́ртвии услы́шат глас Сы́на Бо́жия и услы́шавше оживу́т. Я́коже бо Оте́ц и́мать живо́т в Себе́, та́ко даст и Сы́нови живо́т име́ти в Себе́ и о́бласть даде́ Ему́ и суд твори́ти, я́ко Сын Челове́чь есть. Не диви́теся сему́, я́ко гряде́т час, во́ньже вси су́щии во гробе́х услы́шат глас Сы́на Бо́жия, и изы́дут сотво́ршии блага́я в воскреше́ние живота́, а сотво́ршии зла́я в воскреше́ние суда́. Не могу́ Аз о Себе́ твори́ти ничесо́же. Я́коже слы́шу, сужду́, и суд Мой пра́веден есть, я́ко не ищу́ во́ли Моея́, но во́ли посла́вшаго Мя Отца́.

Причастен дне: Ра́дуйтеся, пра́веднии, о Го́споде, пра́вым подоба́ет похвала́. Другий за упокой: Блаже́ни, я́же избра́л, и прия́л еси́ Го́споди, и па́мять их в род и род. Аллилу́иа, трижды.