Неделя Всех святых. Избранные службы Цветной Триоди.

В СУББОТУ ВЕЧЕРА,
НА МАЛЕЙ ВЕЧЕРНИ

На Го́споди воззва́х: поставим стихи 4.
И поем стихиры воскресны, 4, глас 8:

Вече́рнюю песнь, / и слове́сную слу́жбу, / Тебе́, Христе́, прино́сим, / я́ко благоволи́л еси́ / поми́ловати нас Воскресе́нием.

Го́споди, Го́споди, / не отве́ржи нас от Твоего́ лица́, / но благоволи́ поми́ловати нас Воскресе́нием.

Ра́дуйся, Сио́не Святы́й, / ма́ти церкве́й, Бо́жие жили́ще, / Ты бо прия́л еси́ пе́рвый, / оставле́ние грехо́в, Воскресе́нием.

Е́же от Бо́га Отца́ Сло́во, / пре́жде век Ро́ждшееся, / в после́дняя же времена́, / То́ежде от Неискусобра́чныя вопло́щшееся во́лею, / распя́тие сме́ртное претерпе́, / и дре́вле умерщвле́ннаго челове́ка спасе́ / Свои́м Воскресе́нием.

Слава, глас 6: Му́ченик боже́ственный лик, / Це́ркви основа́ние, / благове́стию сконча́ние, / вы де́лом Спа́сова глаго́лания испо́лнисте, / ва́ми бо врата́ а́дова, на Це́рковь отве́рзшаяся, заключи́шася, / кро́ве ва́шея ли́тие и́дольския же́ртвы изсуши́, / закла́ние ва́ше породи́ Церко́вное исполне́ние, / безпло́тных удиви́сте, / Бо́гу венцено́сцы предстоите́, / Его́же непреста́нно моли́те о душа́х на́ших.

И ныне, Богородичен догматик, глас 8: Ка́ко Тя ублажи́м, Богоро́дице? / Ка́ко же воспое́м, Преблагослове́нная, / непостижи́мое та́инство рожде́ния Твоего́? / Веко́в бо Творе́ц, и на́шего Соде́тель естества́, / Свой о́браз уще́дрив, / низведе́ Самого́ Себе́ во истоща́ние неизсле́димое, / сый в невеще́ственных не́дрех О́тчих, / во утро́бе Твое́й, Чи́стая, всели́ся, / и плоть непрело́жно бысть, от Тебе́ Неискусобра́чная, / пребы́в у́бо е́же бе естество́м Бог. / Те́мже Ему́ покланя́емся, Бо́гу соверше́нну и Челове́ку соверше́нну, / Тому́ во обое́м зра́це, / и́бо о́ба естества́ в Нем суть вои́стинну. / Сугу́ба же вся пропове́дуем есте́ственная Его́ сво́йства, по сугу́бому существу́, / два почита́юще де́йства и хоте́ния, / единосу́щен бо сый Бо́гу и Отцу́, / самовла́стно хо́щет и де́йствует, я́ко Бог, / единосу́щен же сый и нам, / самовла́стно хо́щет и де́йствует, я́ко Челове́к. / Того́ моли́, Чи́стая Всеблаже́нная, / спасти́ся душа́м на́шим.

На стиховне стихира воскресна, глас 8.

Возше́л еси́ на Крест, Иису́се, / снизше́дый с Небесе́, / прише́л еси́ на смерть, Животе́ Безсме́ртный, / к су́щим во тьме Свет и́стинный, / к па́дшым всех Воскресе́ние, / просвеще́ние, и Спа́се наш, сла́ва Тебе́.

Таже Богородичны, подобны 3. Глас 8:
О пресла́внаго чудесе́!

Стих: Помяну́ и́мя Твое́ / во вся́ком ро́де и ро́де.

Ра́дуйся, Богоро́дице всепе́тая. / Ра́дуйся, исто́чниче, жизнь ве́рным источа́ющий. / Ра́дуйся, всех Влады́чице и Госпоже́ тва́ри Благослове́нная. / Ра́дуйся, Всенепоро́чная, Препросла́вленная. / Ра́дуйся, Всепречи́стая. / Ра́дуйся, пала́то. / Ра́дуйся, Боже́ственное селе́ние. / Ра́дуйся, Чи́стая. Ра́дуйся, Ма́ти Де́во. / Ра́дуйся Богоневе́сто.

Стих: Слы́ши Дщи и виждь, / и приклони́ у́хо Твое́.

Ра́дуйся, Богома́ти Пречи́стая. / Ра́дуйся, ве́рных наде́жде. / Ра́дуйся, ми́ра очище́ние. / Ра́дуйся, вся́кия ско́рби избавля́ющи рабы́ Твоя́. / Ра́дуйся, челове́ков утеше́ние живоно́сное. / Ра́дуйся, заступле́ние. / Ра́дуйся, предсто́лпие призыва́ющим Тя. / Ра́дуйся, Бо́жие Боже́ственное пребыва́ние, / и горо́ свята́я.

Стих: Лицу́ Твоему́ помо́лятся / бога́тии лю́дстии.

Ра́дуйся, Богоро́дице, Ма́ти Христо́ва. / Ра́дуйся, еди́на наде́жде, / челове́ков заступле́ние. / Ра́дуйся, прибе́жище. / Ра́дуйся, све́щниче све́та све́тлый. / Ра́дуйся, свеще́ освяще́нная. / Ра́дуйся, пала́то. / Ра́дуйся, раю́. / Ра́дуйся, Боже́ственное селе́ние. / Ра́дуйся, исто́чниче, / источа́ющь во́ды притека́ющим к Тебе́.

Слава, и ныне, Богородичен, глас тойже: Его́же не́бо не вмести́, Де́во Богоро́дице, / во чре́ве Твое́м нетесноме́стно вмести́ся, / и пребыла́ еси́, Чи́стая, сло́вом неизрече́нным, / ничи́мже де́вству оскве́рншуся. / Ты бо еди́на была́ еси́ в жена́х, и Ма́ти, и Де́ва, / и Ты, еди́на Пречи́стая, воздои́ла еси́ Сы́на Живода́вца, / и на объя́тиях Твои́х носи́ла еси́ недре́млющее О́ко. / Но не оста́ви не́дра О́тча, / я́коже пре́жде век предбы́сть, / но горе́ весь Бог со а́нгелы, / до́ле весь из Тебе́ с челове́ки, / и везде́ несказа́нно. / Того́ моли́, Всесвята́я Влады́чице, спасти́ся / правосла́вно Богоро́дицу Чи́стую испове́дающим Тя.

По Ны́не отпуща́еши: И по О́тче наш:

Тропарь воскресный, глас 8.

С высоты́ снизше́л еси́, Благоутро́бне, / погребе́ние прия́л еси́ тридне́вное, / да нас свободи́ши страсте́й, / Животе́ и Воскресе́ние на́ше, Го́споди, сла́ва Тебе́!

Слава, и ныне, Богородичен: И́же нас ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию смерть, / и воскресе́ние явле́й, я́ко Бог, / не пре́зри, я́же созда́л еси́ руко́ю Твое́ю; / яви́ человеколю́бие Твое́, Ми́лостиве, / приими́ ро́ждшую Тя Богоро́дицу, моля́щуюся за ны, / и спаси́, Спа́се наш, лю́ди отча́янныя.

Ектении. И отпуст.

НА ВЕЛИЦЕЙ ВЕЧЕРНИ

По обычном псалме первую кафисму всю.

На Го́споди воззва́х: поставим стихов 10.
И поем стихиры воскресны 3, и восточны 3, и святых 4.
Стихиры воскресны, глас 8:

Вече́рнюю песнь, / и слове́сную слу́жбу, / Тебе́, Христе́, прино́сим, / я́ко благоволи́л еси́ / поми́ловати нас Воскресе́нием.

Го́споди, Го́споди, / не отве́ржи нас от Твоего́ лица́, / но благоволи́ поми́ловати нас Воскресе́нием.

Ра́дуйся, Сио́не Святы́й, / ма́ти церкве́й, Бо́жие жили́ще, / Ты бо прия́л еси́ пе́рвый, / оставле́ние грехо́в, Воскресе́нием.

Восточны [Анатолиевы]:

Е́же от Бо́га Отца́ Сло́во, / пре́жде век Ро́ждшееся, / в после́дняя же времена́, / То́ежде от Неискусобра́чныя вопло́щшееся во́лею, / распя́тие сме́ртное претерпе́ / и дре́вле умерщвле́ннаго челове́ка спасе́ / Свои́м Воскресе́нием.

Е́же из ме́ртвых Твое́ Воскресе́ние славосло́вим Христе́, / и́мже свободи́л еси́ Ада́мский род от а́дова мучи́тельства, / и дарова́л еси́ мíрови я́ко Бог жизнь ве́чную / и ве́лию ми́лость.

Сла́ва Тебе́, Христе́ Спа́се, / Сы́не Бо́жий Единоро́дный, / пригвозди́выйся на Кресте́, / и воскресы́й из гро́ба тридне́вен.

Стихиры всем святым, глас 6.
Подобен: Всю отложи́вше:

Духо́внии вети́и, ученицы́ Спа́совы, / Ду́ху орга́ни бы́вше ве́рою, / разсе́яшася в концы́ земли́, / честно́е пропове́дание правосла́вне се́юще, / от ни́хже прозябо́ша боже́ственным земледе́лием, / и благода́тию му́ченик во́инства, / страсть честну́ю образу́юща, / многообра́зными раздробле́ний ра́нами и огне́м, / и со дерзнове́нием мо́лятся о душа́х на́ших.

Огне́м воспаля́еми Госпо́дни любве́, огня́ презре́ша, / и я́ко боже́ственное у́глие возжига́еми / честни́и му́ченицы во Христе́, / попали́ша хвра́стное ле́сти шата́ние, / звере́й же загради́ша уста́ честны́м призыва́нием, / и во главы́ усека́еми, / посеко́ша врага́ вся ополче́ния, / и крове́й пролива́юще пото́ки терпели́вно, / Це́рковь напои́ша ве́рою просвеща́ему.

Со зверьми́ бра́вшеся, бие́ми мече́м, / ноготьми́ растерза́еми, рука́ми отъе́млеми, / и му́чими тве́рдии му́ченицы, / и огне́м веще́ственным неща́дно пали́ми, / и пробода́еми, и соста́вы ссеца́еми, / претерпе́ша тверде́йше, / упокое́ние предви́деша бу́дущее, / и нетле́нныя венцы́, и сла́ву Христа́, / Ему́же со дерзнове́нием мо́лятся о душа́х на́ших.

Во всех конце́х страда́вшия ве́рно / апо́столы, му́ченики, свяще́нники богому́дрыя, / честны́х жен свяще́нное стека́ние, / свяще́нными пе́сньми по до́лгу восхва́лим, / я́ко соедини́шася небе́сным земни́и, / и страстьми́ безстра́стие благода́тию Христо́вою прия́ша, / и ны́не, я́ко зве́зды све́тлыя, озаря́юще нас, / со дерзнове́нием мо́лятся о душа́х на́ших.

Слава, глас тойже: Му́ченик боже́ственный лик, / Це́ркви основа́ние, / благове́стию сконча́ние, / вы де́лом Спа́сова глаго́лания испо́лнисте, / ва́ми бо врата́ а́дова, на Це́рковь отве́рзшаяся, заключи́шася, / кро́ве ва́шея ли́тие и́дольския же́ртвы изсуши́, / закла́ние ва́ше породи́ Церко́вное исполне́ние, / безпло́тных удиви́сте, / Бо́гу венцено́сцы предстоите́, / Его́же непреста́нно моли́те о душа́х на́ших.

И ныне, Богородичен, глас 8: Царь Небе́сный / за человеколю́бие на земли́ яви́ся, / и с челове́ки поживе́, / от Де́вы бо Чи́стыя плоть прие́мый, / и из Нея́ проше́дый с восприя́тием. / Еди́н есть Сын, сугу́б естество́м, / но не Ипоста́сию. / Те́мже соверше́нна Того́ Бо́га / и соверше́нна Челове́ка вои́стину пропове́дающе, / испове́дуем Христа́ Бо́га на́шего, / Его́же моли́, Ма́ти Безневе́стная, / поми́ловатися душа́м на́шим.

Вход. Све́те ти́хий: Прокимен дне: Госпо́дь воцари́ся: и чтения.

Пророчества Исаиина чтение. [Глава 43.]

Та́ко глаго́лет Госпо́дь: вси язы́цы собра́шася вку́пе, и соберу́тся кня́зи от них. Кто возвести́т сия́; или́ я́же от нача́ла, кто слы́шана сотвори́т вам? Да приведу́т свиде́тели своя́, и оправдя́тся, и да услы́шат, и да реку́т и́стину. Бу́дите Ми свиде́тели, и Аз свиде́тель, глаго́лет Госпо́дь Бог, и О́трок его́же избра́х, да позна́ете, и ве́руете Ми, и разуме́ете, я́ко Аз есмь, пре́жде Мене́ не бысть ин бог, и по Мне не бу́дет. Аз есмь Бог, и несть ра́зве Мене́ спаса́яй. Аз возвести́х и спасо́х, уничижи́х, и не бе в вас чу́ждий. Вы Мне свиде́тели, и Аз Госпо́дь Бог, и еще́ от нача́ла Аз есмь, и несть от рук Мои́х избавля́яй, сотворю́, и кто отврати́т то? Си́це глаго́лет Госпо́дь Бог, избавля́яй вас Святы́й Изра́илев.

Премудрости Соломони чтение. [Глава 3.]

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их. И е́же от нас ше́ствие сокруше́ние, они́ же суть в ми́ре. И́бо пред лице́м челове́ческим, а́ще и му́ку прии́мут, упова́ние их безсме́ртия испо́лнено. И в ма́ле нака́зани бы́вше, вели́кими благоде́тельствовани бу́дут, я́ко Бог искуси́ я́, и обре́те их досто́йны Себе́. Я́ко зла́то в горни́ле искуси́ их и я́ко всепло́дие же́ртвенное прия́т я́. И во вре́мя посеще́ния их возсия́ют, и я́ко и́скры по сте́блию потеку́т. Су́дят язы́ком и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему́. Я́ко благода́ть и ми́лость в преподо́бных Его́, и посеще́ние во избра́нных Его́.

Премудрости Соломони чтение. [Глава 5.]

Пра́ведницы во ве́ки живу́т, и в Го́споде мзда их, попече́ние их у Вы́шняго. Сего́ ра́ди прии́мут ца́рствие благоле́пия, и вене́ц добро́ты от руки́ Госпо́дни, зане́ десни́цею покры́ет я́, и мы́шцею защити́т их. Прии́мет всеору́жие рве́ние Свое́, и вооружи́т тварь в месть враго́м. Облече́тся в броня́ пра́вды, и возложи́т шлем, суд нелицеме́рен. Прии́мет щит непобеди́мый, преподо́бие, поостри́т же напра́сный гнев ору́жие, спобо́рет же с Ним мир на безу́мныя. По́йдут праволу́чныя стре́лы мо́лниины, и я́ко от благокру́гла лу́ка облако́в, на наме́рение полетя́т. И от каменоме́тныя я́рости, испо́лнь паду́т гра́ды. Вознегоду́ет на них вода́ морска́я, ре́ки же потопя́т я́ на́гло. Сопроти́в ста́нет им дух си́лы, и я́ко ви́хор разве́ет их, и опустоши́т всю зе́млю беззако́ние, и злоде́йство преврати́т престо́лы си́льных. Слы́шите у́бо ца́рие и разуме́йте, навы́кните судии́ конце́в земли́. Внуши́те держа́щии мно́жества, и гордя́щиися о наро́дех язы́к. Я́ко дана́ есть от Го́спода держа́ва вам, и си́ла от Вы́шняго.

На литии стихира храма.
Таже самогласны святых всех. Глас 1:

Ве́ры согла́сием мирско́е торжество́, / от ве́ка Бо́гу благоугоди́вших, / патриа́рхов честно́е и проро́ков сосло́вие, / апо́столов удобре́ние, му́чеников собра́ние, по́стников похвалу́, / всех святы́х па́мять духо́вне пра́зднуим, / мо́лят бо ся непреста́нно, / дарова́тися ми́ру ми́рови, / и душа́м на́шим ве́лией ми́лости.

Прииди́те, вси вернии, / святы́х всех всесла́вную па́мять, / во псалме́х, пе́ниих и пе́снех духо́вных восхва́лим, / Крести́теля Спаси́телева, / апо́столы, проро́ки и му́ченики, / священнонача́льники, учи́тели же и преподо́бныя, / по́стники и пра́ведныя, и святы́х жен боголю́бное состоя́ние, / че́стно ублажа́юще, согла́сно возопии́м: / Преблаги́й Христе́ Бо́же наш, / тех моли́твами пода́ждь мир Це́рквам Твои́м, / побе́ды на враги́ христолюби́вым лю́дем, / и душа́м на́шим ве́лию ми́лость.

Прииди́те вси духо́вне возвесели́мся о па́мяти святы́х, / се бо прии́де богатотво́рная нам дарова́ния принося́щи. / Те́мже во гла́се ра́дости и чи́стей со́вести / возопии́м, глаго́люще: / ра́дуйтеся, проро́ков сосло́вие, / и́же прише́ствие Христо́во ми́рови пропове́давше, / и я́же издале́ча, я́ко бли́зу предви́девше. / Ра́дуйтеся, апо́стольский ли́че, / язы́ков мре́жницы и ловцы́ челове́ков. / Ра́дуйтеся, му́чеников собо́ре, / от коне́ц земли́ собра́вшиися во еди́ну ве́ру, / и о той мук томле́ния претерпе́вшии, / и соверше́нне страда́ния вене́ц прие́мшии. / Ра́дуйтеся, отце́в наслажде́ние, / своя́ телеса́ поще́нием иста́явше, / и умертви́вше стра́сти плотски́я, / ум боже́ственным раче́нием впери́сте, / на небеса́ возлете́сте, и со а́нгелы водворя́ющеся, / восприе́млете ве́чная блага́я. / Но о проро́цы, апо́столи, и му́ченицы с по́стники, / вас Венча́вшаго приле́жно моли́те, / изба́витися от враг ви́димых и неви́димых, / в ве́ре и любви́ соверша́ющим при́сно / честну́ю па́мять ва́шу.

Слава, глас 5: Ны́нешнему торжеству́ стеце́мся ве́рнии, / предлага́ется и нам духо́вная трапе́за, / и ча́ша та́инственная от сла́дких бра́шен, / весе́лия испо́лнена му́ченических доброде́телей. / Си́и бо терпеливоду́шнии от коне́ц земли́, / теле́сное всеразли́чным преда́вше ра́нам, / Бо́гу принесо́ша же́ртву слове́сну, вся́кий во́зраст, / о́ви у́бо во главы́ усека́еми, / о́вии же по хребту́ стру́жеми, / друзи́и же рук отсече́ние и всех удо́в, / вси вку́пе святи́и Христо́вым страда́нием о́бщницы бы́ша. / Но венцы́ тем возме́здие мук пода́вый, Го́споди, / во след тех жи́тельствовати сподо́би нас, / я́ко Человеколю́бец.

И ныне, Богородичен, глас тойже: Храм и Дверь еси́, / Пала́та и Престо́л Царе́в, / Де́во Всечестна́я, / Е́юже Изба́витель мой, Христо́с Госпо́дь, / во тьме спя́щим яви́ся, / Со́лнце Сый пра́вды, / просвети́ти хотя́, я́же созда́ по о́бразу Своему́ руко́ю Свое́ю. / Те́мже, Всепе́тая, / я́ко Ма́терне дерзнове́ние к Нему́ стяжа́вшая, / непреста́нно моли́ / спасти́ся душа́м на́шым.

На стиховне стихиры воскресны. Глас 8:

Возше́л еси́ на Крест, Иису́се, / снизше́дый с Небесе́, / прише́л еси́ на смерть, Животе́ Безсме́ртный, / к су́щим во тьме Свет и́стинный, / к па́дшым всех Воскресе́ние, / просвеще́ние, и Спа́се наш, сла́ва Тебе́.

Ины стихиры восточны [Анатолиевы] по алфавиту.

Стих: Госпо́дь воцари́ся, / в ле́поту облече́ся.

Христа́ славосло́вим, воскре́сшаго от ме́ртвых, / ду́шу бо и те́ло прие́м, / стра́сти отъобою́ду отсече́, / пречи́стей у́бо души́ во ад соше́дшей, / его́же и плени́, / во гро́бе же истле́ния не ви́де свято́е те́ло, / Изба́вителя душ на́ших.

Стих: И́бо утверди́ вселе́нную, / я́же не подви́жется.

Псалмы́ и пе́сньми славосло́вим, Христе́, / от ме́ртвых Твое́ Воскресе́ние, / и́мже нас свободи́л еси́ мучи́тельства а́дова, / и я́ко Бог дарова́л еси́ жизнь ве́чную, / и ве́лию ми́лость.

Стих: До́му Твоему́ подоба́ет святы́ня, / Го́споди, в долготу́ дний.

О Влады́ко всех Непостижи́ме, / Тво́рче небесе́ и земли́, / кресто́м пострада́вый, мне безстра́стие источи́л еси́, / погребе́ние же прие́м и воскре́с во сла́ве, / совоскреси́л еси́ Ада́ма руко́ю всеси́льною. / Сла́ва Твоему́ тридне́вному воста́нию, / и́мже дарова́л еси́ нам ве́чную жизнь, / и очище́ние грехо́в, / я́ко Еди́н Благоутро́бен.

Слава, глас 6: Прииди́те, ве́рнии, / днесь лик совокупи́вше, / благоче́стно торжеству́им, / и всех святы́х пресла́вную и честну́ю па́мять / сла́вно почти́м, глаго́люще: / ра́дуйтеся, апо́столи сла́внии, / проро́цы, и му́ченицы, и священнонача́льницы. / Ра́дуйтеся, преподо́бных собо́ре и пра́ведных. / Ра́дуйтеся, честны́х жен ли́че, / и Христа́ о мiре моли́те, / побе́ды на сопроти́вныя дарова́ти, / и душа́м на́шим ве́лию ми́лость.

И ныне, Богородичен: Творе́ц и Изба́витель мой, Пречи́стая, / Христо́с Госпо́дь из Твои́х ложе́сн проше́д, / в мя Оболки́йся, / пе́рвыя кля́твы Ада́ма свободи́. / Те́мже Ти, Всечи́стая, / я́ко Бо́жии Ма́тери же и Де́ве, / вои́стинну вопие́м немо́лчно: / ра́дуйся А́нгельски, ра́дуйся, Влады́чице, / Предста́тельство и Покро́ве, / и Спасе́ние душ на́ших.

По Трисвятом тропарь: Богоро́дице Де́во ра́дуйся: дважды. И святых единощи. И благословение хлебов. И чтение Послания соборнаго Иаковля.

Аще ли убо не творится бдение, на Го́споди воззва́х: воскресны 3: и восточен [анатолиев] един, и святых на 6. Подобен: Отложивше:

По Трисвятом тропарь воскресен: Сла́ва: святым: И ны́не: Богородичен: писаны в начале Утрени. И отпуст. На Полунощнице канон Троичный от Октоиха, гласа.

В НЕДЕЛЮ ВСЕХ СВЯТЫХ
НА УТРЕНИ

На Бог Госпо́дь: тропарь воскресный, глас 8.

С высоты́ снизше́л еси́, Благоутро́бне, / погребе́ние прия́л еси́ тридне́вное, / да нас свободи́ши страсте́й, / Животе́ и Воскресе́ние на́ше, Го́споди, сла́ва Тебе́! [Дважды.]

Слава, святым тропарь, глас 4:

И́же во всем ми́ре му́ченик Твои́х, / я́ко багряни́цею и ви́ссом, / кровьми́ Це́рковь Твоя́ украси́вшися, / те́ми вопие́т Ти, Христе́ Бо́же, / лю́дем Твои́м щедро́ты Твоя́ низпосли́, / мир жи́тельству Твоему́ да́руй, / и душа́м на́шим ве́лию ми́лость.

И ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

По 1-м стихословии
седален воскресен, глас 8:

Воскре́сл еси́ из ме́ртвых, Животе́ всех, / и а́нгел све́тел жена́м вопия́ше: преста́ните от слез, / апо́столом благовести́те, возопи́йте пою́ща, / я́ко воскре́се Христо́с Госпо́дь, / благоволи́вый спасти́, я́ко Бог, род челове́ческий.

Стих: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Челове́цы, Спа́се, гроб Твой запеча́таша, / А́нгел ка́мень от двере́й отвали́, / жены́ ви́деша воста́вша из ме́ртвых, / и ты́я благовести́ша ученико́м Твои́м в Сио́не, / я́ко воскре́сл еси́, Животе́ всех, и разреши́шася у́зы сме́ртныя, / Го́споди, сла́ва Тебе́.

Слава, и ныне, Богородичен: И́же нас ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию смерть, / и воскресе́ние явле́й, я́ко Бог, / не пре́зри, я́же созда́л еси́ руко́ю Твое́ю; / яви́ человеколю́бие Твое́, Ми́лостиве, / приими́ ро́ждшую Тя Богоро́дицу, моля́щуюся за ны, / и спаси́, Спа́се наш, лю́ди отча́янныя.

И чтение во Евангелии толковом.

По 2-м стихословии седален, глас 8.
Подобен: Повеле́нное та́йно:

Белонося́й Гаврии́л све́тел предста́, / я́ко в ви́де мо́лнии, Христо́ву гро́бу, / и ка́мень отвали́ от гро́ба, / и страх ве́лий содержа́ше Твоя́ стра́жи, / и внеза́пу пребы́ша вси а́ки ме́ртви. / От гро́ба страже́й, и ка́мене печа́ти устыди́теся, пребеззако́ннии, / разуме́йте, я́ко воскре́се Христо́с.

Другий седален.
Подобен: Прему́дрости Сло́ва:

Воскре́с от гро́ба, я́ко вои́стинну, / преподо́бным повеле́л еси́ жена́м / пропове́дати воста́ние апо́столом, я́коже пи́сано есть, / и ско́рый Петр предста́ гро́бу, и свет во гро́бе зря ужаса́шеся. / Те́мже и ви́дев плащани́цы еди́ны, / кроме́ Боже́ственнаго те́ла, в нем лежа́щия, / со стра́хом возопи́: сла́ва Тебе́, Христе́ Бо́же, / я́ко спаса́еши вся, Спа́се наш, О́тчее бо еси́ сия́ние.

Слава, и ныне, Богородичен,
[не седяще поем, но стояще и со страхом
и благоговением глаголем] настоящий:

О Тебе́ ра́дуется, Благода́тная, вся́кая тварь, / а́нгельский собо́р, и челове́ческий род, / освяще́нный хра́ме, и раю́ слове́сный, де́вственная похвало́, / из Нея́же Бог воплоти́ся, и Младе́нец бысть, / пре́жде век сый Бог наш, / ложесна́ бо Твоя́ престо́л сотвори́, / и чре́во Твое́ простра́ннее небе́с соде́ла. / О Тебе́ ра́дуется, Благода́тная, вся́кая тварь, сла́ва Тебе́.

И чтение во Евангелии толковом.

По Непорочнах тропари: А́нгельский собо́р:

И по них ипакои, глас 8:

Мvроно́сицы Жизнода́вца предстоя́ща гро́бу, / Влады́ку иска́ху в ме́ртвых, Безсме́ртнаго, / и ра́дость благове́щения от А́нгела прие́мша, апо́столом возвеща́ху, / я́ко воскре́се Христо́с Бог, / подая́й ми́рови ве́лию ми́лость.

Степенна, глас 8. Антифон 1:

От ю́ности моея́ враг мя искуша́ет, сластьми́ пали́т мя, / аз же наде́яся на Тя, Го́споди, побежда́ю сего́.

Ненави́дящии Сио́на, / да бу́дут у́бо пре́жде исторже́ния я́ко трава́, / ссе́чет бо Христо́с вы́я их, усече́нием мук.

Слава: Святы́м Ду́хом, Е́же жи́ти вся́ческим, / Свет от Све́та, Бог Вели́к, / со Отце́м пое́м Ему́, и с Сло́вом.

И ныне, тойже.

Антифон 2:

Се́рдце мое́ стра́хом Твои́м да покры́ется смиренному́дрствующее, / да не возне́сшееся отпаде́т от Тебе́, Всеще́дре.

На Го́спода име́вый наде́жду, не устраши́тся тогда́, / егда́ огне́м вся суди́ти и́мать, и му́кою.

Слава: Святы́м Ду́хом, всяк кто боже́ственный ви́дит, и предглаго́лет, / чудоде́йствует вы́шняя, в Трие́х Еди́наго Бо́га поя́: / а́ще бо и трисия́ет, единонача́льствует Божество́.

И ныне, тойже.

Антифон 3:

Воззва́х Тебе́, Го́споди, вонми́, / приклони́ ми у́хо Твое́, вопию́щу, / и очи́сти, пре́жде да́же не во́змеши мене́ отсю́ду.

К ма́тери свое́й земли́ отходя́й всяк, па́ки разреша́ется, / прия́ти му́ки, или́ по́чести пожи́вших.

Слава: Святы́м Ду́хом, богосло́вие Еди́ница Трисвята́я, / Оте́ц бо безнача́лен, от Него́же роди́ся Сын безле́тно, и Дух сопресто́лен, / сообра́зен, от Отца́ спросия́вший.

И ныне, тойже.

Антифон 4:

Се ны́не что добро, или́ что красно́, но е́же жи́ти бра́тии вку́пе? / В сем бо Госпо́дь обеща́ живо́т ве́чный.

О ри́зе свое́й, И́же кри́ны се́льныя украша́яй повелева́ет, / я́ко не подоба́ет пещи́ся.

Слава: Святы́м Ду́хом, единови́дною вино́ю, вся содержа́тся миропода́тельне, / Бог бо Сей есть, Отцу́ же и Сы́нови единосу́щен госпо́дственне.

И ныне, тойже.

Прокимен, глас 8:

Воцари́тся Госпо́дь во век, / Бог твой Сио́не, в род и род. Стих: Хвали́, душе́ моя́, Го́спода, восхвалю́ Го́спода в животе́ мое́м.

Таже другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Матфеа воскресно, 1 утреннее,
зачало 116. [Мф. 28, 16 – 20.]

Во вре́мя о́но, единиина́десять ученицы́ идо́ша в Галиле́ю, в го́ру, а́може повеле́ им Иису́с. И ви́девше Его́, поклони́шася Ему́, о́ви же усумне́шася. И присту́пль Иису́с, рече́ им, глаго́ля: даде́ся Ми вся́ка власть на небеси́ и на земли́. Ше́дше научи́те вся язы́ки, крестя́ще их во и́мя Отца́ и Сы́на и Свята́го Ду́ха, уча́ще их блюсти́ вся, ели́ка запове́дах вам. И се, Аз с ва́ми есмь во вся дни, до сконча́ния ве́ка. Ами́нь.

От сего убо дне утренняя Евангелиа воскресна начинаем чести по ряду.

Таже глаголем:

Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному, / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим. / Ты бо еси́ Бог наш, / ра́зве Тебе́ ино́го не зна́ем, / и́мя Твое́ имену́ем. / Прииди́те вси ве́рнии, / поклони́мся Свято́му Христо́ву Воскресе́нию, / се бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́, / распя́тие бо претерпе́в, / сме́ртию смерть разруши́.

И псалом 50. Слава: Моли́твами святы́х апо́столов: И ныне: Моли́твами Богоро́дицы: Стихира, глас 6: Воскре́с Иису́с от гро́ба:

Каноны 4: воскресен со ирмосом на 4, крестовоскресен на два, и Богородице на два, и всем святым на 6.

Канон воскресен, глас 8.
Песнь 1.

Ирмос: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в, / и раздели́в мо́ре, / Изра́иля же беглеца́, пешехо́дца спасе́, / песнь Бо́гови воспева́юща.

Припев: Сла́ва Го́споди, свято́му Воскресе́нию Твоему́.

Всеси́льну Христо́ву Божеству́ ка́ко не диви́мся; / от страсте́й у́бо всем ве́рным, безстра́стие и нетле́ние точа́щу, / от ребра́ же Свята́го исто́чник безсме́ртия иска́пающу, / и Живо́т из гро́ба Присносу́щный.

Я́ко благоле́пен жена́м А́нгел ны́не яви́ся, / све́тлыя нося́ о́бразы есте́ственныя невеще́ственныя чистоты́, / зра́ком же возвеща́я свет воскресе́ния, зовы́й: воскре́се Госпо́дь.

Богородичен: Пресла́вная возглаго́лашася о Тебе́ в роде́х родо́в, / Бо́га Сло́ва во чре́ве вме́щшая, / чиста́ же пребы́вши Богоро́дице Мари́е. / Те́мже Тя вси почита́ем, су́щее по Бо́зе заступле́ние на́ше.

Канон крестовоскресен.

Ирмос: Во́ду проше́д я́ко су́шу:

Взя́шася врата́ боле́зненная, / и ужасо́шася вра́тницы а́довы, / зря́ще в преиспо́днейшая Соше́дшаго, / И́же на высоте́ всех превы́ше естества́.

Удиви́шася чи́ни а́нгельстии, / зря́ще на престо́ле посажде́но О́тчи, / отпа́дшее естество́ челове́ческое, / затворе́ное в преиспо́дних земли́.

Ин канон Пресвятей Богородице.

Ирмос: Пои́м Го́сподеви, прове́дшему лю́ди Своя́:

Пречи́стая Богоро́дице, / вопло́щшееся Присносу́щное и Пребоже́ственное Сло́во, / па́че естества́ ро́ждши, пое́м Тя.

Грозд Тя Живоно́сен, / всеми́рнаго иска́пающ сла́дость спасе́ния, / Де́ва, Христе́, роди́.

Канон всем святым. Глас 8.
Егоже краестрочие: Святы́х всех многоиме́нныя чи́ны пою́.

Ирмос: Колесницегони́теля фарао́ня:

Твои́х святы́х воспева́я чи́ны, / Твои́м све́том души́ мое́й моли́твами сих озари́тися молю́ся, / Ты бо еси́ свет непристу́пный, неве́дения мрак отгоня́, / Твои́ми светлостьми́, Сло́ве Бо́жий Светода́вче Христе́. [Дважды.]

Я́ко возвы́сился еси́ на Дре́ве, / привле́кл еси́ к Твоему́ позна́нию / язы́ков все насле́дие, Влады́ко, / и све́том уясни́л еси́ Святы́я Тро́ицы, / апо́столы святы́ми Твои́ми, / и́миже мглу пре́лести отгна́л еси́.

Законоположе́нием Твои́м, Христе́, / увещава́еми Твои́ апо́столи, / я́же на земли́ вся благоче́стно отри́нуша, / и све́том благода́ти освети́ша всю вселе́нную сла́внии, / ева́нгельски Тя пропове́дающе.

Слава: Ра́дующеся му́ченицы, крест Твой взе́мше, / и честну́ю страсть неукло́нно подража́юще, / мучи́тельскаго не убоя́шася преще́ния, до́блии, / ни огня́, ни меча́, ни ран, / но ниже́ гла́да, ниже́ сме́рти.

И ныне, Богородичен: Наме́рение му́жеское де́вы, Всечи́стая, восприе́мше я́ве, / му́ченическая бо страда́ния неукло́нно подража́юще, / и псало́мски в след Тебе́, Сы́ну Твоему́, Де́во, / боже́ственне сра́дующеся, Всецарю́ приведо́шася.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3.

Ирмос: Утвержде́й в нача́ле Небеса́ ра́зумом, / и зе́млю на вода́х основа́вый, / на ка́мени мя, Христе́, за́поведей Твои́х утверди́, / я́ко несть свят, па́че Тебе́ / Еди́не Человеколю́бче.

Осужде́на бы́вша Ада́ма вкуше́нием греха́, / пло́ти Твоея́ спаси́тельною стра́стию оправда́л еси́, Христе́, / Сам бо непови́нен сме́ртнаго иску́са был еси́, Безгре́шне.

Воскресе́ния свет возсия́ / су́щим во тьме, и се́ни сме́ртней седя́щим, / Бог мой Иису́с, / и Свои́м Божество́м кре́пкаго связа́в, / сего́ сосу́ды расхи́тил есть.

Богородичен: Херуви́мов и серафи́мов превы́шши яви́лася еси́, Богоро́дице, / Ты бо Еди́на прия́ла еси́ Невмести́маго Бо́га в Твое́м чре́ве, Нескве́рная, / те́мже Тя ве́рнии вси пе́сньми, Чи́стая, ублажа́ем.

Ин. Ирмос: Небе́снаго кру́га Верхотво́рче Го́споди:

Отве́ргшагося пре́жде за́поведи, Го́споди, / изринове́на мя от Тебе́ сотвори́л еси́, / в него́же вообрази́вся, послуша́нию же навы́к, / Себе́ па́ки назда́л еси́ распя́тием.

Прему́дростию вся проуве́девый, Го́споди, / и ра́зумом Твои́м водрузи́вый преиспо́дняя, / не не сподо́бил еси́ снизхожде́нием Твои́м, Сло́ве Бо́жий, / воскреси́ти, е́же по о́бразу Твоему́.

Ин. Ирмос: Ты еси́ утвержде́ние:

Даждь нам по́мощь Твои́ми моли́твами, Всечи́стая, / прило́ги отража́ющи лю́тых обстоя́ний.

Е́ве прама́тери Ты исправле́ние бы́ла еси́, / Нача́льника жи́зни ми́рови, Христа́ Богоро́дице, ро́ждши.

Ин. Ирмос: Утвержде́й в нача́ле Небеса́:

Свяще́нством свяще́нным свяще́нницы и па́стырие обле́кшеся, / и то му́дрственно окорми́вше Христу́, / досто́йно украси́ша учи́тельства сло́во, / свы́ше вои́стинну обогати́вшеся. [Дважды.]

Украси́вшеся удобре́ньми пе́рваго добротворе́ния, / и яви́вшеся я́ко непреле́стная свети́ла, / онебеси́сте Це́рковь Христо́ву, святи́и, / оты́нуду и́наго ту разли́чно украси́вше. [Дважды.]

Слава: Зако́ну повину́ющеся Твоему́ блаже́нных собо́ри, / многообра́зными доброде́тельми просвети́вшеся, / насле́доваша оби́тели небе́сныя, Влады́ко, ра́дующеся, / и́ную бо и́ный, вси ты́я досто́йно испо́лниша.

Богородичен: От чре́ва де́вственна, / И́же от Бо́га Бо́га Сло́ва родила́ еси́ нам, Богома́ти, / Его́же де́вы чи́стыя боголе́пно возлюби́ша, / и в след Тебе́ вся Сему́ я́ве после́доваша.

Катавасия: Твоя́ песносло́вцы, Богоро́дице, / Живы́й и Незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Седален, глас 8.
Подобен: Прему́дрости Сло́ва:

Пра́отец, оте́ц, патриа́рх, / апо́стол, му́ченик, проро́к, / святи́телей и преподо́бных Твои́х, / по́стников и пра́ведных же, / и вся́каго и́мене пи́саннаго в кни́зе жи́зни, / святу́ю па́мять соверша́юще, Христе́ Бо́же, / всех подвиза́ем на моли́тву, моля́щеся: / умири́ мир Твой те́ми, я́ко Человеколю́бец, да вси вопие́м Ти: / Бо́же, прославля́емый в сове́те святы́х Твои́х, / Ты еси́ вои́стинну просла́вивый досто́йно па́мять их.

Слава: тойже.

И ныне, Богородичен: Небе́сную дверь и киво́т, пресвяту́ю го́ру, / све́тлый о́блак воспои́м, неопали́мую купину́, слове́сный рай, / Е́вы воззва́ние, вселе́нныя всея́ вели́кое сокро́вище, / я́ко спасе́ние в Ней соде́лася ми́рови, / и оставле́ние дре́вних согреше́ний. / Сего́ ра́ди вопие́м Ей: / моли́ся Сы́ну Твоему́, прегреше́ний оставле́ние дарова́ти, / благоче́стно покланя́ющимся всесвято́му Рождеству́ Твоему́.

Песнь 4.

Ирмос: Ты моя́ кре́пость Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча, / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.

Ты врага́ су́ща мя зело́ возлюби́л еси́, / Ты истоща́нием стра́нным соше́л еси́ на зе́млю, Благоутро́бне Спа́се, / после́дняго моего́ досажде́ния не отве́ргся, / и пребы́в на высоте́ пречи́стыя Твоея́ сла́вы, / пре́жде безче́ствованнаго просла́вил еси́.

Кто зря, Влады́ко, ны́не не ужаса́ется, / стра́стию смерть разруша́ему; / Кресто́м бежа́щее тле́ние, / и сме́ртию ад бога́тства истощава́емый, / Боже́ственною си́лою Тебе́ распя́таго; / чу́дно де́ло, Человеколю́бче!

Богородичен: Ты ве́рным похвала́ еси́, Безневе́стная, Ты Предста́тельнице, / Ты и прибе́жище христиа́н, стена́ и приста́нище, / к Сы́ну бо Твоему́ мольбы́ но́сиши, Всенепоро́чная, и спаса́еши от бед, / ве́рою и любо́вию Богоро́дицу Чи́стую Тебе́ зна́ющих.

Ин. Ирмос: Услы́шах Го́споди:

На Кресте́ Тя пригвозди́ша законопресту́пных де́ти, Христе́ Бо́же, / и́мже спасл еси́ я́ко Благоутро́бен, сла́вящия Твоя́ страда́ния.

Воскре́с от гро́ба, вся совоскреси́л еси́ су́щия во а́де ме́ртвыя, / и просвети́л еси́ я́ко Благоутро́бен, сла́вящия Твое́ воскресе́ние.

Ин. Ирмос тойже.

Клас возрасти́вшая животво́рный, неора́нная Ни́во, / подаю́щаго ми́рови жизнь, Богоро́дице, / спаса́й пою́щия Тя.

Богоро́дицу Тя, Всечи́стая, просве́щшиися вси пропове́дуем, / Со́лнце бо пра́вды родила́ еси́, Присноде́во.

Ин. Ирмос: Ты моя́ кре́пость Го́споди:

Совоку́плься собо́р святы́х Твои́х любо́вию, / и Тебе́ наслажда́яйся, / и́стинно же и чи́сто в ра́дости, / лик неразруша́емый а́нгелом слику́ет, / о Тебе́, Всеви́дче, Бо́зе всех и Го́споде. [Дважды.]

Ю́ношески сла́внии священному́ченицы, / му́ченическим венце́м увязо́стеся, богоде́тельным пома́занием, / е́же пе́рвее свяще́нства укра́шени пребога́тии. / Те́мже сугу́бы венцы́ досто́йно прие́мше, / со Христо́м ве́чно ра́дуетеся.

Плотско́е мудрова́ние все ду́ху, богоно́снии, вои́стинну повину́сте, / по́стнически сего́ стремле́ния неудержи́мая посто́м увяди́вше, / и ны́не безстра́стия све́том просвети́вшеся, / мзды трудо́в прия́сте.

Слава: Я́ко Христа́, му́ченицы, Первому́ченика, му́ки зело́ претерпе́сте, / терпели́во же и до́блественне, / я́ко в чужди́х страда́льчествующе телесе́х, сла́внии, / и ны́не Ца́рствия насле́дницы показа́вшеся, / ве́рным исцеле́ния источа́ете.

И ныне, Богородичен: Неве́ста Бо́жия была́ еси́, Богороди́тельнице, / Сего́ бо Сло́во преве́чное, теле́сне родила́ еси́ нам, / в Не́мже и жены́ свя́то пожи́вше, / и страда́льчествы всеразли́чными Тобо́ю украси́вшеся, / прама́тернее паде́ние испра́виша.

Катавасия: Седя́й в Сла́ве / на Престо́ле Божества́ / во о́блаце ле́гце, / прии́ди Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.

Песнь 5.

Ирмос: Вску́ю мя отри́нул еси́ / от лица́ Твоего́, Све́те Незаходи́мый, / и покры́ла мя есть чужда́я тьма, окая́ннаго; / но обрати́ мя, / и к све́ту за́поведей Твои́х / пути́ моя́ напра́ви, молю́ся.

Оде́ятися претерпе́л еси́ в багряни́цу / пре́жде стра́сти Твоея́, Спа́се, поруга́емь, / первозда́ннаго покрыва́я безобра́зное обнаже́ние, / и наг пригвозди́лся еси́ на Кресте́ пло́тию, / совлача́я, Христе́, ри́зу умерщвле́ния.

От пе́рсти сме́ртныя, / Ты па́дшее мое́ па́ки назда́л еси́ существо́, воскре́с, / и нестаре́ющееся, Христе́ устро́ил еси́, / яви́в па́ки я́коже ца́рский о́браз, / нетле́ния жизнь блиста́ющ.

Богородичен: Ма́тернее дерзнове́ние, е́же к Сы́ну Твоему́ иму́щи, Всечи́стая, / сро́днаго промышле́ния, е́же о нас, не пре́зри, мо́лимся, / я́ко Тебе́ и Еди́ну христиа́не ко Влады́це очище́ние ми́лостивно предлага́ем.

Ин. Ирмос: Просвети́ нас:

Наста́ви нас си́лою Креста́ Твоего́, Христе́, / тем бо Тебе́ припа́даем, / мир пода́ждь нам Человеколю́бче.

Окорми́ живо́т наш, я́ко Преблаги́й, / пою́щих Твое́ воста́ние, / и мир пода́ждь нам, Человеколю́бче.

Ин. Ирмос: У́тренююще, вопие́м Ти:

Утоли́ нестерпи́мую бу́рю страсте́й мои́х, / Я́же Бо́га ро́ждшая, Окорми́теля и Го́спода.

Слу́жат рождеству́ Твоему́, Пречи́стая Богоро́дице, / а́нгельстии чи́нове, и челове́ков собра́ние.

Ин. Ирмос: Вску́ю мя отри́нул еси́:

Предзре́ти, я́коже проро́цы боже́ственнии, / хотя́щая бы́ти сподо́бистеся, / и возжеле́сте благоро́дию души́ / очи́ститися житие́м чи́стым, о богоно́снии, / просвеща́еми си́лою Духо́вною. [Дважды.]

Лик святы́х ны́не све́тится Боже́ственными дарова́ньми, / и́же пре́жде зако́на вси патриа́рси, проро́цы, / апо́столи и му́ченик собо́ри, / и по́стников, и учи́телей, / и пра́ведных со священному́ченики. [Дважды.]

Слава: Светя́щееся зря́ще Твои́х святы́х днесь собра́ние, / Твое́ю, Спа́се, све́тлостию, и свеща́ми неугаса́емыми благода́ти, / Твое́ Боже́ственное бога́тство благи́х и изоби́лие / воспева́ем непреста́нно, Человеколю́бче.

Богородичен: Преди́вное Твое́ Рождество́ возлюби́вше жены́ пречестны́я, / кра́сная жития́ нивочто́же вмени́ша, Всечи́стая, / Его́ еди́ни рачи́тельно жела́юще све́тлости и Боже́ственнаго осия́ния.

Катавасия: Ужасо́шася вся́ческая / о Боже́ственней сла́ве Твое́й, / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Песнь 6.

Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся, / к Тебе́ бо возопи́х, / и услы́ши мя, / Бо́же спасе́ния моего́.

Дре́вом кре́пко низложи́ мя началозло́бный, / Ты же, Христе́, возне́сся на Кресте́, / крепча́е низложи́л еси́, посрами́в сего́, / па́дшаго же воскреси́л еси́.

Ты уще́дрил еси́ Сио́на, возсия́вый от гро́ба, / но́ваго вме́сто ве́тхаго соверши́в, я́ко Благоутро́бен, Боже́ственною Твое́ю кро́вию, / и ны́не ца́рствуеши в нем во ве́ки, Христе́.

Богородичен: Да изба́вимся от лю́тых прегреше́ний, / мольба́ми Твои́ми, Богороди́тельнице Чи́стая, / и да улучи́м, Пречи́стая, Боже́ственное сия́ние, / из Тебе́ неизрече́нно воплоще́ннаго Сы́на Бо́жия.

Ин. Ирмос: Моли́тву пролию́ ко Го́споду:

Дла́ни на Кресте́ распросте́рл еси́, / исцеля́яй неудержа́нно просте́ртую во Еде́ме ру́ку первозда́ннаго, / и Твое́ю во́лею же́лчи вкуси́в, / и спасл еси́, Христе́, я́ко Си́лен, / сла́вящия Твоя́ страда́ния.

Сме́рти Изба́витель вкуси́, дре́вняго осужде́ния, / я́ко да и тле́ния ца́рство разруши́т, / и во а́дская сшед, воскре́се Христо́с, / и спасе́, я́ко Си́лен, пою́щия Его́ воскресе́ние.

Ин. Ирмос: Ри́зу мне пода́ждь све́тлу:

Храм Тя Бо́жий и Ковче́г, / и черто́г одушевле́нный, и дверь Небе́сную, / Богоро́дице, ве́рнии возвеща́ем.

Тре́бищ разруши́тель, я́ко Бог, / бы́вшее рождество́ Твое́, Мари́е Богоневе́сто, / покланя́емо есть со Отце́м и Ду́хом.

Ин. Ирмос: Очи́сти мя Спа́се:

Я́ко честны́й, избра́нный, положе́нный ка́мень краеуго́льный, / святи́и в Сио́не обре́тше Тя, Влады́ко, основа́ние непоколеби́мое, / избра́нное ка́мение себе́ назда́ша. [Дважды.]

Пронзе́нным Твои́м ре́бром, / ка́пли кро́ве иска́паша, с водо́ю богоде́тельно, / мiр обнови́ша, / и боже́ственный собо́р святы́х всех Благоде́телю призда́ша. [Дважды.]

Слава: Пое́м всеблагоче́стно / му́ченик о́блак боже́ственный, благода́тию просвеще́нный, / и возсия́вший светле́е багряни́цею кро́ве, / и червлени́цею их тве́рдаго страда́ния.

Богородичен: Ма́терь всеи́стинную Бо́жию Тя вси зна́ем, / Е́юже естество́ же́нское изба́вльшееся, Всенепоро́чная, о Христе́ предпострада́, / доброде́тели же вся́кия благоче́стно бысть испо́лнено.

Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Кондак святым, глас 8:

Я́ко нача́тки естества́, Насади́телю тва́ри, / вселе́нная прино́сит Ти, Го́споди, богоно́сныя му́ченики, / тех моли́твами в ми́ре глубо́це / Це́рковь Твою́, жи́тельство Твое́, / Богоро́дицею соблюди́, Многоми́лостиве.

Икос: И́же по всей земли́ му́чившиися и на небеса́ пресели́вшиися, / и́же стра́сти Христо́вы подража́вшии и стра́сти на́ша отъе́млющии, / зде днесь собира́ются, перворожде́нных показу́юще Це́рковь, / я́ко го́рния о́браз содержа́щу и Христу́ вопию́щу: / Бог мой еси́ Ты, Богоро́дицею соблюди́ мя, Многоми́лостиве.

И чтем Пролог. Синаксарь в Неделю всех святых.

Песнь 7.

Ирмос: Бо́жия снизхожде́ния / огнь устыде́ся в Вавило́не иногда́. / Сего́ ра́ди о́троцы в пещи́ ра́дованною ного́ю, / я́ко во цве́тнице лику́юще поя́ху: / благослове́н еси́, Бо́же оте́ц на́ших.

Сла́вное истоща́ние, / Боже́ственное бога́тство Твоея́ нищеты́, Христе́, удивля́ет а́нгелы, / на Кресте́ зря́щия Тя пригвожда́ема, / за е́же спасти́ ве́рою зову́щия: / благослове́н еси́ Бо́же оте́ц на́ших.

Боже́ственным Твои́м соше́ствием све́та испо́лнил еси́ преиспо́дняя, / и тьма прогна́на бысть пре́жде гоня́щая. / Отню́дуже воскресо́ша и́же от ве́ка ю́зницы, зову́ще: / благослове́н Бог оте́ц на́ших.

Троичен: Всем у́бо Го́спода, / Еди́наго же еди́ному Единоро́дному Сы́ну правосла́вно Отца́, / богосло́вяще Тя возвеща́ем, / и Еди́наго ве́дяще от Тебе́ исходя́ща Ду́ха Пра́ваго, / Соесте́ственна и Соприсносу́щна.

Ин. Ирмос: От Иуде́и доше́дше:

Спасе́ние соде́лал еси́ посреде́ вселе́нныя, проро́чески Бо́же, / на дре́во бо вознесе́н быв, вся призва́л еси́ ве́рою зову́щия: / оте́ц на́ших Бо́же, благослове́н еси́.

Воскре́с от гро́ба, я́коже от сна, Ще́дре, / всех изба́вил еси́ от тли, / тварь же уверя́ется апо́столы пропове́дающими воста́ние: / отце́в Бо́же, благослове́н еси́.

Ин. Ирмос тойже.

От Де́вственных ложе́сн вопло́щься, / яви́лся еси́ на Спасе́ние на́ше. / Те́мже Твою́ Ма́терь ве́дяще Богоро́дицу, правосла́вно зове́м: / отце́в Бо́же, благослове́н еси́.

Жезл прорасти́ла еси́, Де́во, / от ко́рене Иессе́ова, Всеблаже́нная, / Плод цветонося́щи спаси́тельный, / ве́рою Сы́ну Твоему́ зову́щим: / отце́в Бо́же, благослове́н еси́.

Ин. Ирмос: Бо́жия снисхожде́ния:

Святы́х чи́нове, / во святы́х почива́ющаго немо́лчно пою́ще, / сла́дости боже́ственныя ны́не наслажда́ются, / и ра́дующеся, лику́ют пою́ще: / благослове́н Бог оте́ц на́ших.

Боже́ственными сия́ньми трисо́лнечнаго светопроли́тия, / че́стне святы́х собо́ри осия́вшеся, / Еди́ницу тричи́сленную богосло́вят, / Отца́ безнача́льна, и Сы́на благоче́стно, и Ду́ха Свята́го.

Неизрече́нною сла́вою Твое́ю, / егда́ яви́шися, Бо́же, посреде́ бого́в, / досто́йная подая́, и да́ры раздая́, и венцы́ дая́, / тогда́, Спа́се, сподо́би пе́ти Тебе́: / благослове́н Бог оте́ц на́ших.

Слава: Ра́дующеся пои́м святы́х всех собо́р, отвсю́ду собра́вшихся, / и ро́ды вку́пе и досто́инства, и жи́тельства, и с ни́ми пое́м: / благослове́н Бог оте́ц на́ших.

И ныне, Богородичен: Мари́ю Пречи́стую и Пресвяту́ю Богороди́тельницу, / отрокови́цы вся, лик боже́ственный ку́пно соста́вивше, / велегла́сно ра́дующеся возопи́йте: / ра́дуйся, ра́дости исто́чник нам источа́ющая.

Катавасия: Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.

Песнь 8.

Ирмос: Седмери́цею пещь халде́йский мучи́тель / Богочести́вым неи́стовно разжже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.

Иису́сова Божества́ Пребоже́ственная си́ла, / в нас боголе́пно возсия́ла есть, / пло́тию бо вкуш за всех смерть кре́стную, / разруши́ а́дову кре́пость. / Его́же непреста́нно де́ти благослови́те, свяще́нницы воспо́йте, / лю́дие превозноси́те во вся ве́ки.

Распны́йся воста́, великовы́йный паде́, / пады́й и сокруше́нный испра́вися, / тля отве́ржена бысть, и нетле́ние процвете́, / Жи́знию бо ме́ртвенное поже́рто бысть. Де́ти благослови́те, свяще́нницы воспо́йте, лю́дие превозноси́те во вся ве́ки.

Троичен: Трисве́тлое Божество́, / Еди́ну сия́ющее зарю́ от Еди́наго Триипоста́снаго Естества́, Роди́теля Безнача́льна, / Единоесте́ственно же Сло́во Отцу́, и Сца́рствующаго Единосу́щнаго Ду́ха, / де́ти благослови́те, свяще́нницы воспо́йте, / лю́дие превозноси́те во вся ве́ки.

Ин. Ирмос: Победи́тели мучи́теля:

На дре́ве ру́це мне просте́ршаго, обнаже́нному, призыва́юща мя, / Свое́ю благообра́зною согре́яти нагото́ю, / благослови́те вся дела́ Госпо́дня, / и превозноси́те Его́ во ве́ки.

Из преиспо́дняго а́да возне́сша мя, па́дшаго, / и высокопресто́льною сла́вою Роди́теля поче́тшаго, / благослови́те, вся дела́ Госпо́дня, Го́спода, / и превозноси́те Его́ во ве́ки.

Ин. Ирмос: Царя́ Небе́снаго:

Сопроти́вных разжже́нныя и пламенови́дныя на нас угаси́ стре́лы, / я́ко да пое́м Тя во вся ве́ки.

Преесте́ственне Соде́теля и Спа́са, / Бо́га Сло́ва родила́ еси́, Де́во, / те́мже Тя пое́м, и превозно́сим во вся ве́ки.

Ин. Ирмос: Седмери́цею пещь:

Ра́дуйтеся му́ченицы, проро́цы, апо́столи, / священному́ченик честны́й собо́ре, / пра́ведных, преподо́бных же и учи́телей боже́ственный ли́че, / с мироно́сицами жена́ми сладкопою́ще: / о́троцы благослови́те, свяще́нницы воспо́йте, / лю́дие превозноси́те во вся ве́ки.

Я́же па́че ума́ све́тлостию, / насыща́еми святи́и боже́ственнаго весе́лия, / и ра́дости исполня́еми, / бо́зи быва́ете, к Бо́гу приближе́нием, / богоде́тельным све́тлостем обща́ющеся, / и сла́вы неизрече́нныя просвети́вшеся луча́ми, / Христа́ превозноси́те во вся ве́ки.

Благослови́м Отца́ и Сы́на и Свята́го Ду́ха, Го́спода.

Яви́вшеся святи́и, я́ко зве́зды многосве́тлыя, / церко́вное не́бо уясня́ете разли́чными дарова́ньми и разли́чными добро́тами, / в пра́вде, целому́дрии, му́жестве, ра́зуме, / Влады́ку свяще́нницы воспо́йте, / лю́дие превозноси́те во вся ве́ки.

И ны́не и при́сно и во ве́ки веко́в, ами́нь.

С весе́лием вся жены́ богому́дрыя, сконча́вшияся, / пою́т Ду́хом Де́ву Пречи́стую, / и́стинную Ма́терь Бо́жию, / от кля́твы прама́тере Е́вы нас изба́вившую, / благогове́йно предстоя́ще, / Тоя́ воспо́йте Плод во ве́ки.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: О́троки благочести́выя в пе́щи / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Таже поем: Честне́йшую херуви́м:

Песнь 9.

Ирмос: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски, / и чре́во Твое́ бысть простра́ннейшее Небе́с. / Тем Тя, Богоро́дицу, / А́нгелов и челове́к чинонача́лия велича́ют.

Боже́ственным и Безнача́льным Естество́м прост сый, / сложи́лся еси́ прия́тием пло́ти, в Тебе́ Само́м Сию́ соста́вив, Сло́ве Бо́жий, / и пострада́в я́ко челове́к, пребы́л еси́ кроме́ страсте́й, я́ко Бог. / Те́мже Тя во Двою́ Существу́ неразде́льно и неслия́нно велича́ем.

Отца́ по Существу́ Боже́ственному, / я́коже естество́м быв челове́к, / рекл еси́ Бо́га Вы́шний, рабо́м снизходя́, / воскре́с от гро́ба, благода́тию Отца́ / земноро́дным поло́ж, и́же по естеству́ Бо́га же и Влады́ку, / с Ни́мже Тя вси велича́ем.

Богородичен: Яви́лася еси́, о Де́во Ма́ти Бо́жия, / па́че естества́ ро́ждши пло́тию Бо́га Сло́ва, / Его́же Оте́ц отры́гну от се́рдца Своего́ пре́жде всех век, я́ко Благ, / Его́же ны́не и теле́с превы́шша разуме́ем, а́ще и в те́ло облече́ся.

Ин. Ирмос: Устраши́ся:

Бо́жия Тя естество́м у́бо Сы́на, / зача́таго во утро́бе све́мы Богома́тере, / и бы́вшаго нас ра́ди Челове́ка, / и зря́ще Тя на Кресте́ естество́м у́бо стра́ждуща челове́ческим, / безстра́стна же, я́ко Бо́га пребыва́юща, велича́ем.

Разруши́ся тьма дря́хлая, / от а́да бо возсия́ Со́лнце Пра́вды Христо́с, / земли́ просвеща́я вся концы́, / сия́я Божества́ све́том, Небе́сный Челове́к, Бог земны́й, / Его́же во двою́ естеству́ велича́ем.

Ин. Ирмос: Вои́стинну Богоро́дицу:

Ра́дости и весе́лия испо́лнь есть па́мять Твоя́, / приступа́ющим исцеле́ния точа́щи, / и благоче́стно Богоро́дицу Тя возвеща́ющим.

Псалмы́ Тя воспева́ем Благода́тная, / и немо́лчно, е́же ра́дуйся, прино́сим, / Ты бо источи́ла еси́ всем ра́дость.

Ин. Ирмос: Ужасе́ся о сем не́бо:

Наде́ждею и любо́вию вооруже́нно, / и ве́рно огражде́нно счине́ние избра́нных, / вся мучи́телей преще́ния, му́ки, и ра́ны ра́дующеся претерпе́ша, / благосла́вно от Христа́ обогати́вшеся, / победотворя́щаго в страда́ниих и́стины, первому́ченики.

Приста́нище спасе́ния, / Крести́теля, апо́столы, проро́ки / и му́ченики с по́стники, / боже́ственныя учи́тели и свяще́нники, / патриа́рхов же собра́ние, и священному́ченики благосла́вныя, / жены́ боголюби́выя, преподо́бныя и пра́ведныя / ны́не досто́йно восхва́лим.

Слава: Огне́м искуси́вшеся искуше́ний, / и сластьми́ не прельсти́вшеся, ра́дуетеся чи́сте, / престо́лу Влады́чню светови́дному предстоя́ще, / сла́внии собо́ри святы́х на небесе́х, / разреши́вшимся зерца́лом, / се́ни же мимоше́дшей и́стинными явле́ньми.

И ныне, Богородичен: Яви́лася еси́ разстоя́щимся совокупи́тельная, / Тобо́ю бо а́нгелом единосе́льницы на небесе́х челове́цы бы́ша вои́стинну, / и свиде́тельствуют чи́нове всех святы́х, / ны́не с ни́ми пою́ще Твое́ Рождество́, Де́во Богоро́дице, в ве́чных пе́снех.

Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице, Чи́стая Присноде́во.

Свят Госпо́дь Бог наш: поем по гласу.

Таже експостиларий воскресен:

Со ученики́ взы́дем на го́ру Галиле́йскую, / ве́рою Христа́ ви́дети / глаго́люща власть прия́ти вы́шних и ни́жних, научи́мся, / ка́ко учи́т креща́ти во и́мя Отца́ и Сы́на и Свята́го Ду́ха, язы́ки вся, / и пребыва́ти с таи́нники, я́коже обеща́ся, до сконча́ния ве́ка.

Слава:
Светилен всем святым. Подобен:

Крести́теля и Предте́чу, / апо́столы, проро́ки, му́ченики, / священнонача́льники же, по́стники / и преподо́бныя, священному́ченики, / ку́пно боголюби́выя жены́ и пра́ведныя вся, и а́нгелов чи́ны, / до́лжно пе́сньми увязе́м моля́щеся, / сла́ву сих получи́ти от Христа́ Спа́са.

И ныне, Богородичен: И́же горе́ прославля́емый боже́ственне от а́нгелов, / от недр О́тчих, Пречи́стая, не отсту́пль неизрече́нно, с до́льними поживе́, / Ты же Сего́ была́ еси́ спасе́ния хода́таица, / от чи́стых Твои́х крове́й Сему́, Чи́стая, па́че сло́ва плоть заимода́вши. / Его́же моли́ рабо́м Твои́м избавле́ние да́ти прегреше́ний.

На хвалитех,
Вся́кое дыха́ние: поставим стихов 8,
и поем стихиры воскресны, глас 8:

Го́споди, а́ще и суди́лищу предста́л еси́ от Пила́та суди́мый, / но не отступи́л еси́ от престо́ла со Отце́м седя́, / и воскре́с из ме́ртвых, / мiр свободи́л еси́ от рабо́ты чужда́го, / я́ко Щедр и Человеколю́бец.

Го́споди, а́ще и я́ко ме́ртва / во гро́бе иуде́и положи́ша, / но я́ко Царя́ спя́ща во́ини Тя стрежа́ху, / и я́ко живота́ сокро́вище, печа́тию печа́таша, / но воскре́сл еси́, / и по́дал еси́ нетле́ние душа́м на́шым.

Го́споди, ору́жие на диа́вола / Крест Твой дал еси́ нам, / трепе́щет бо и трясе́тся, не терпя́ взира́ти на си́лу Его́, / я́ко ме́ртвыя возставля́ет, и смерть упраздни́. / Сего́ ра́ди покланя́емся / погребе́нию Твоему́ и воста́нию.

А́нгел Твой, Го́споди, / Воскресе́ние пропове́давый, / стра́жи у́бо устраши́, / жена́м же возгласи́, глаго́ля: / что и́щете Жива́го с ме́ртвыми; / воскре́се Бог сый, / и вселе́нней жизнь дарова́.

Ина стихира восточная [анатолиева]
тогожде гласа:

Пострада́л еси́ Кресто́м, Безстра́стный Божество́м, / погребе́ние прия́л еси́ тридне́вное, / да нас свободи́ши от рабо́ты вра́жия, / и обезсме́ртив оживотвори́ши нас Христе́ Бо́же, / воскресе́нием Твои́м, Человеколю́бче.

Ины стихиры всем святым, глас 4.
Подобен: Я́ко до́бля:

Святы́я Госпо́дь и́же на земли́ удиви́, / Того́ бо ра́ны и страда́ния в пло́ти восприя́ша, / в сих крася́щеся, / и боже́ственными удобре́ньми явле́нно удобря́еми, / я́же воспои́м я́ко неувяда́ющия цве́ты, / я́ко зве́зды непреле́стныя Це́ркве, / я́ко во́льная заколе́ния.

Стих: Воззва́ша пра́веднии / и Госпо́дь услы́ша их.

С проро́ки апо́столи, / с преподо́бными учи́телие, / со священному́ченики вси пра́веднии, / и жен пострада́вшее, и любо́вию пости́вшееся святы́х мно́жество, / и пра́ведных чи́нове, / да восхва́лятся свяще́нными пе́сньми, / я́ко го́рняго Ца́рствия насле́дницы, / я́ко рая́ жи́телие.

Стих: Ди́вен Бог во святы́х Свои́х, / Бог Изра́илев.

И́же зе́млю онебеси́вшии доброде́телей све́тлостию, / и́же Христо́ву смерть подража́вшии, / безсме́ртия хода́тайственный путь ше́ствовавшии, / и́же стра́сти челове́ком рукоде́йствием благода́ти очи́стившии, / и́же во всем ми́ре единоду́шно страда́льчествовавшии, / до́блественне да восхва́лятся му́ченицы.

Слава:
стихира утренняя евангельская, 1-я. Глас 1:

На го́ру ученико́м иду́щим за земно́е вознесе́ние, / предста́ Госпо́дь, и поклони́вшеся Ему́, / и да́нныя вла́сти везде́ научи́вшеся, / в поднебе́сную посыла́хуся / пропове́дати е́же из ме́ртвых воскресе́ние, / и е́же на небеса́ возше́ствие, / и́мже и во ве́ки спребыва́ти нело́жный обеща́ся Христо́с Бог, / и Спас душ на́ших.

И ныне: Преблагослове́нна еси́ Богоро́дице Де́во:

Славословие великое. По Трисвятом тропарь воскресен точию, ектении и отпуст. И час 1-й в притворе, и поучение Студитово, и совершенный отпуст.

НА ЛИТУРГИИ

Блаженна воскресна гласа, на 4. Глас 8:

Помяни́ нас, Христе́ Спа́се мíра, / я́коже помяну́л еси́ разбо́йника на дре́ве, / и сподо́би всех, Еди́не Ще́дре, / Небе́снаго Ца́рствия Твоего́.

На дре́ве пригво́ждся, Спа́се наш, во́лею, / дре́вом Ада́ма от кля́твы изба́вил еси́, / воздава́я, я́ко Щедр, е́же по о́бразу, и рая́ вселе́ние.

Слы́ши, Ада́ме, и ра́дуйся со Е́вою, / я́ко обнажи́вый дре́вле обои́х, / и пре́лестию взе́мый плене́нны нас, / Кресто́м Христо́вым упраздни́ся.

Днесь Христо́с воскре́с от гро́ба, / всем ве́рным подая́ нетле́ние, / и ра́дость обновля́ет мvроно́сицам по стра́сти и воста́нии.

И от канона всех святых песнь 6-я, на 4.

По входе тропарь воскресный, глас 8.

С высоты́ снизше́л еси́, Благоутро́бне, / погребе́ние прия́л еси́ тридне́вное, / да нас свободи́ши страсте́й, / Животе́ и Воскресе́ние на́ше, Го́споди, сла́ва Тебе́!

И святым, тропарь, глас 4:

И́же во всем ми́ре му́ченик Твои́х, / я́ко багряни́цею и ви́ссом, / кровьми́ Це́рковь Твоя́ украси́вшися, / те́ми вопие́т Ти, Христе́ Бо́же, / лю́дем Твои́м щедро́ты Твоя́ низпосли́, / мир жи́тельству Твоему́ да́руй, / и душа́м на́шим ве́лию ми́лость.

Слава, и ныне, кондак святым, глас 8:

Я́ко нача́тки естества́, Насади́телю тва́ри, / вселе́нная прино́сит Ти, Го́споди, богоно́сныя му́ченики, / тех моли́твами в ми́ре глубо́це / Це́рковь Твою́, жи́тельство Твое́, / Богоро́дицею соблюди́, Многоми́лостиве.

Прокимен, глас 8:

Помоли́теся и воздади́те / Го́сподеви Бо́гу на́шему. Стих: Ве́дом во Иуде́и Бог, во Изра́или ве́лие И́мя Его́.

И святым, глас 4: Ди́вен Бог во святы́х Свои́х, Бог Изра́илев.

Апостол ко Евреом, зачало 330.
[Евр. 11, 33 – 12, 2.]

Бра́тие, святи́и вси ве́рою победи́ша ца́рствия, соде́яша пра́вду, получи́ша обетова́ния, загради́ша уста́ львов, угаси́ша си́лу о́гненную, избего́ша о́стрея меча́, возмого́ша от не́мощи, бы́ша кре́пцы во бране́х, обрати́ша в бе́гство полки́ чужи́х. Прия́ша жены́ от воскресе́ния ме́ртвыя своя́, ини́и же избие́ни бы́ша, не прие́мше избавле́ния, да лу́чшее воскресе́ние улуча́т, друзи́и же руга́нием и ра́нами искуше́ние прия́ша, еще́ же и уз и темни́ц. Ка́мением побие́ни бы́ша, претре́ни бы́ша, искуше́ни бы́ша, уби́йством меча́ умро́ша, проидо́ша в ми́лотех, и в ко́зиях ко́жах, лише́ни, скорбя́ще, озло́блени. И́хже не бе досто́ин [весь] мир, в пусты́нях скита́ющеся, и в гора́х, и в верте́пах, и в про́пастех земны́х. И си́и вси послу́шествовани бы́вше ве́рою, не прия́ша обетова́ния, Бо́гу лу́чшее что о нас предзре́вшу, да не без нас соверше́нство прии́мут. Те́мже у́бо и мы, толи́к иму́ще облежа́щь нас о́блак свиде́телей, го́рдость вся́ку отло́жше, и удо́бь обстоя́тельный грех, терпе́нием да тече́м на предлежа́щий нам по́двиг, взира́юще на нача́льника ве́ры и соверши́теля Иису́са.

Аллилуиа, глас 4:

Стих: Воззва́ша пра́веднии и Госпо́дь услы́ша их. Стих: Мно́ги ско́рби пра́ведным и от всех их изба́вит я́ Госпо́дь.

Евангелие Матфеа, зачало 38.
[Мф. 10, 32 – 33, 37 – 38; 19, 27 – 30.]

Рече́ Госпо́дь Свои́м ученико́м: всяк у́бо и́же испове́сть Мя пред челове́ки, испове́м его́ и Аз пред Отце́м Мои́м, и́же на Небесе́х, а и́же отве́ржется мене́ пред челове́ки, отве́ргуся его́ и Аз пред Отце́м Мои́м, и́же на Небесе́х. И́же лю́бит отца́ или́ ма́терь па́че Мене́, несть Мене́ досто́ин, и и́же лю́бит сы́на или́ дщерь па́че Мене́, несть Мене́ досто́ин. И и́же не прии́мет креста́ своего́, и вслед Мене́ гряде́т, несть Мене́ досто́ин. Тогда́ отвеща́в Петр, рече́ Ему́: се, мы оста́вихом вся и вслед Тебе́ идо́хом, что у́бо бу́дет нам? Иису́с же рече́ им: ами́нь глаго́лю вам, я́ко вы ше́дшии по Мне, в пакибытие́, егда́ ся́дет Сын Челове́ческий на престо́ле сла́вы Своея́, ся́дете и вы на двоюна́десяте престо́лу, судя́ще обемана́десяте коле́нома Изра́илевома. И всяк, и́же оста́вит дом, или́ бра́тию, или́ сестры́, или́ отца́, или́ ма́терь, или́ жену́, или́ ча́да, или́ се́ла, и́мене Моего́ ра́ди, стори́цею прии́мет и живо́т ве́чный насле́дит. Мно́зи же бу́дут пе́рви после́днии, и после́дни пе́рвии.

Причастный:

Хвали́те Го́спода с Небе́с, / хвали́те Его́ в вы́шних. Другий: Ра́дуйтеся, пра́веднии, о Го́споде, / пра́вым подоба́ет похвала́. / Аллилу́иа, трижды.

На трапезе утешение братии, готовящимся к постному подвигу.

Подобает ведати: аще храм всех святых: На Малей и Велицей вечерни, и на Утрени, и на Литургии, подобне поем, якоже случится в Неделю великаго святаго. Емуже бывает бдение. Точию на Утрени поем полиелей.

По полиелеи:

Велича́ем вас / апо́столи, му́ченицы, проро́цы, и вси святи́и, / и чтем святу́ю па́мять ва́шу, / вы бо мо́лите о нас / Христа́ Бо́га на́шего.

Псалом избранный: Блаже́н муж бояйся Го́спода: И седален святым, писан в каноне по 3-й песни. Степенна гласа. Прокимен: Вся́кое дыха́ние: И Евангелие святым. Воскресе́ние Христо́во: и псалом 50. Слава: Моли́твами всех святы́х: И ныне: Моли́твами Богоро́дицы: Вместо Воскре́с Иису́с: стихира всем святым, кую волиши. Канон воскресен со ирмосом на 4, и Богородицы на 2, и святым на 8. И прочее, якоже предписася.