Богослужебные чтения 5 декабря 2025 года

Послание к Тимофею первое, зачало 285А

Ча́до Тимофе́е, вся́кое созда́ние Бо́жие добро́, и ничто́же отме́тно, со благодаре́нием прие́млемо, освяща́ется бо сло́вом Бо́жиим и моли́твою. Сия́ вся сказу́я бра́тии, добр бу́деши служи́тель Иису́са Христа́, пита́емь словесы́ ве́ры и до́брым уче́нием, ему́же после́довал еси́. Скве́рных же и ба́биих ба́сней отрица́йся, обуча́й же себе́ ко благоче́стию. Теле́сное бо обуче́ние вма́ле есть поле́зно, а благоче́стие на все поле́зно есть, обетова́ние име́юще живота́ ны́нешняго и гряду́щаго. Внима́й себе́ и уче́нию и пребыва́й в них: сия́ бо творя́, и сам спасе́шися и послу́шающии тебе́.

Евангелие от Луки, зачало 95

Рече́ Госпо́дь при́тчу сию́: челове́к не́кий добра́ ро́да и́де на страну́ дале́че прия́ти себе́ ца́рство и возврати́тися. Призва́в же де́сять раб свои́х, даде́ им де́сять мнас и рече́ к ним: ку́плю де́йте, до́ндеже прииду́. И гра́ждане его́ ненави́дяху его́ и посла́ша моли́тву в след его́, глаго́люще: не хо́щем сему́, да ца́рствует над на́ми. И бысть егда́ возврати́ся прии́м ца́рство, рече́ пригласи́ти рабы́ ти́и, и́мже даде́ сребро́, да уве́сть, какову́ ку́плю суть сотвори́ли. Прии́де же пе́рвый, глаго́ля: го́споди, мнас твоя́ приде́ла де́сять мнас. И рече́ ему́: благи́й ра́бе до́брый, я́ко о ма́ле ве́рен был еси́, бу́ди о́бласть име́я над десятию́ градо́в. И прии́де вторы́й, глаго́ля: го́споди, мнас твоя́ сотвори́ пять мнас. Рече́ же и тому́: и ты бу́ди над пятию́ градо́в. И други́й прии́де, глаго́ля: го́споди, се мнас твоя́, ю́же име́х положе́ну во убру́се. Боя́хся бо тебе́, я́ко челове́к яр еси́, взе́млеши, его́же не положи́, и жне́ши, его́же не се́яв. Глаго́ла же ему́: от уст твои́х сужду́ ти, лука́вый ра́бе, ве́дяше, я́ко аз челове́к яр есмь, вземлю́, его́же не положи́в, и жну, его́же не се́яв, и почто́ не вдал еси́ моего́ сребра́ купце́м, и аз прише́д с ли́хвою истяза́л бых е́? И предстоя́щым рече́: возьми́те от него́ мнас и дади́те иму́щему де́сять мнас. И ре́ша ему́: го́споди, и́мать де́сять мнас. Глаго́лю бо вам, я́ко вся́кому иму́щему да́стся, а от неиму́щаго, и е́же и́мать, оти́мется от него́. Оба́че враги́ моя́ о́ны, и́же не восхо́теша мне, да царь бых был над ни́ми, приведи́те се́мо и изсецы́те пре́до мно́ю. И сия́ рек, идя́ше преди́, восходя́ во Иерусали́м.

Послание к Филимону, зачало 302В

Па́вел, ю́зник Иису́с Христо́в, и Тимофе́й брат, Филимо́ну возлю́бленному и споспе́шнику на́шему, и Апфи́и сестре́ возлю́бленней, и Архи́ппу сово́инственнику на́шему, и дома́шней твое́й це́ркви, благода́ть вам и мир от Бо́га Отца́ на́шего, и Го́спода Иису́са Христа́. Благодарю́ Бо́га моего́, всегда́ па́мять о тебе́ творя́ в моли́твах мои́х, слы́шав любо́вь твою́ и ве́ру, ю́же и́маши ко Го́споду Иису́су и ко всем святы́м. Я́ко да обще́ние твоея́ ве́ры де́йственно бу́дет в ра́зуме вся́каго бла́га, е́же в вас, о Христе́ Иису́се. Ра́дость бо и́мам мно́гу и утеше́ние о любви́ твое́й, я́ко утро́бы святы́х почи́ша тобо́ю, бра́те. Сего́ ра́ди мно́гое дерзнове́ние име́я во Христе́ повелева́ти тебе́, е́же потре́бно есть, любве́ же ра́ди па́че молю́, тако́в сый я́коже Па́вел ста́рец, ны́не же и ю́зник Иису́са Христа́, молю́ тя о мое́м ча́де, его́же роди́х во у́зах мои́х Они́сима, иногда́ тебе́ непотре́бнаго, ны́не же тебе́ и мне благопотре́бна, его́же возпосла́х тебе́, ты же его́, си́речь мою́ утро́бу, приими́. Его́же аз хоте́х у себе́ держа́ти, да в тебе́ ме́сто послу́жит ми во у́зах благовествова́ния. Без твоея́ же во́ли ничто́же восхоте́х сотвори́ти, да не а́ки по ну́жди благо́е твое́ бу́дет, но по во́ли. Не́гли бо ра́ди сего́ разлучи́ся на час, да ве́чна того́ прии́меши, не ктому́ а́ки раба́, но вы́ше раба́, бра́та возлю́бленна, па́че же мне, кольми́ же па́че тебе́, и по пло́ти и о Го́споде. А́ще у́бо и́маши мене́ о́бщника, приими́ сего́ я́коже мене́. А́ще же в чесо́м оби́де тебе́, или́ до́лжен есть, мне сие́ вмени́. Аз Па́вел написа́х руко́ю мое́ю, аз возда́м, да не реку́ тебе́, я́ко и сам себе́ ми еси́ до́лжен. Ей, бра́те, аз да получу́ е́же прошу́ у тебе́ о Го́споде: упоко́й мою́ утро́бу о Го́споде. Наде́явся послуша́нию твоему́ написа́х тебе́, ве́дый, я́ко и па́че, е́же глаго́лю, сотвори́ши. Ку́пно же и угото́ви ми оби́тель: упова́ю бо, я́ко моли́твами ва́шими дарова́н бу́ду вам. Целу́ет тя Епафра́с, спле́нник мой о Христе́ Иису́се, Ма́рко, Ариста́рх, Дима́с, Лука́, споспе́шницы мои́. Благода́ть Го́спода на́шего Иису́са Христа́ со ду́хом ва́шим. Ами́нь.

Евангелие от Луки, зачало 50А

Во вре́мя о́но, яви́ Госпо́дь и ине́х се́дмьдесят учени́к Свои́х, и посла́ их по двема́ пред лице́м Свои́м во всяк град и ме́сто, а́може хотя́ше Сам ити́. Глаго́лаше же к ним: жа́тва у́бо мно́га, де́лателей же ма́ло, моли́теся у́бо Господи́ну жа́тве, да изведе́т де́латели на жа́тву Свою́. Иди́те, се Аз посыла́ю вы я́ко а́гнцы посреде́ волко́в. Не носи́те влага́лища, ни пи́ры, ни сапоги́, и ни кого́же на пути́ целу́йте. Во́ньже а́ще дом вни́дете, пе́рвее глаго́лите: мир до́му сему́. И а́ще у́бо бу́дет ту сын ми́ра, почи́ет на нем мир ваш, а́ще ли же ни, к вам возврати́тся. В том же дому́ пребыва́йте, я́дуще и пию́ще, я́же суть у них, досто́ин бо есть де́латель мзды своея́. Не преходи́те из до́му в дом. И во́ньже а́ще град вхо́дите, и прие́млют вы, яди́те предлага́емая вам, и исцели́те неду́жныя, и́же суть в нем, и глаго́лите им: прибли́жися на вы Ца́рствие Бо́жие. И во́ньже а́ще град вхо́дите, и не прие́млют вас, изше́дше на распу́тия его́, рцы́те: и прах, приле́пший нам от гра́да ва́шего, оттряса́ем вам. Оба́че сие́ ве́дите, я́ко прибли́жися на вы Ца́рствие Бо́жие. Глаго́лю вам, я́ко Содо́мляном в день той отра́днее бу́дет, не́же гра́ду тому́. Го́ре тебе́, Хорази́не, го́ре тебе́, Вифсаи́до, я́ко а́ще в Ти́ре и Сидо́не бы́ша си́лы бы́ли бы́вшыя в ва́ю, дре́вле у́бо во вре́тищи и пе́пеле седя́ще пока́ялися бы́ша, оба́че Ти́ру и Сидо́ну отра́днее бу́дет на суде́, не́же ва́ма. И ты, Капернау́ме, и́же до небе́с вознесы́йся, до а́да низведе́шися.