Богослужебные чтения 3 октября 2026 года

Паримии на святых мученик князя Михаила и болярина его Феодора Черниговских

1. Проро́чества Иса́иина чте́ние.

Та́ко глаго́лет Госпо́дь: вси язы́цы собра́шася вку́пе, и соберу́тся кня́зи от них. Кто возвести́т сия́ в них? Или́ я́же от нача́ла, кто слы́шана сотвори́т вам? Да приведу́т свиде́тели своя́, и оправдя́тся, и да услы́шат, и да реку́т и́стину. Бу́дите Ми свиде́тели, и Аз Свиде́тель, глаго́лет Госпо́дь Бог, и О́трок Его́же избра́х. Да позна́ете, и ве́руете Ми, и разуме́ете, я́ко Аз есмь, пре́жде Мене́ не бысть ин бог и по Мне не бу́дет. Аз есмь Бог, и несть ра́зве Мене́ спаса́яй. Аз возвести́х и спасо́х; уничижи́х, и не бе в вас чу́ждий. Вы Мне свиде́тели, и Аз Госпо́дь Бог, и еще́ от нача́ла Аз есмь, и несть от рук Мои́х избавля́яй. Сотворю́, и кто отврати́т то? Си́це глаго́лет Госпо́дь Бог, избавля́яй вас, Святы́й Изра́илев.

Ис 43:9–14

2. Прему́дрости Соломо́новы чте́ние.

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и е́же от нас ше́ствие сокруше́ние, они же суть в ми́ре. И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я́ и обре́те их досто́йны Себе́. Я́ко зла́то в горни́ле, искуси́ их и, я́ко всепло́дие же́ртвенное, прия́т я́. И во вре́мя посеще́ния их возсия́ют и, я́ко и́скры по сте́блию, потеку́т. Су́дят язы́ком, и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему́. Я́ко благода́ть и ми́лость в преподо́бных Его́, и посеще́ние во избра́нных Его́.

Прем 3:1–9

3. Прему́дрости Соломо́новы чте́ние.

Пра́ведник, а́ще пости́гнет сконча́тися, в поко́и бу́дет: ста́рость бо честна́ не многоле́тна, ниже́ в числе́ лет исчита́ется. Седи́на же есть му́дрость челове́ком, и во́зраст ста́рости житие́ нескве́рно. Благоуго́ден Бо́гу быв, возлю́блен бысть, и живы́й посреде́ гре́шник преста́влен бысть, восхище́н бысть, да не зло́ба измени́т ра́зума его́ или́ лесть прельсти́т ду́шу его́. Раче́ние бо зло́бы помрача́ет до́брая и паре́ние по́хоти пременя́ет ум незло́бив. Сконча́вся вма́ле, испо́лни ле́та до́лга, уго́дна бо бе Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ положи́вше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Прем 4:7–15

Субботы по Воздвижении: 1 Кор., 125 зач. (от полу'), I, 26–29. Ин., 30 зач., VIII, 21–30. Ряд. (под зачало): 1 Кор., 162 зач., XV, 39–45. Мф., 78 зач., XIX, 3–12. Вмч. или свв.: Еф., 233 зач., VI, 10–17. Лк., 106 зач., XXI, 12–19.

Послание к коринфяном первое, зачало 125В

Бра́тие, ви́дите зва́ние ва́ше, я́ко не мно́зи ли прему́дри по пло́ти, не мно́зи ли си́льни, не мно́зи ли благоро́дни? Но бу́яя ми́ра избра́ Бог, да прему́дрыя посрами́т, и не́мощная ми́ра избра́ Бог, да посрами́т кре́пкая, и худоро́дная ми́ра и уничиже́нная избра́ Бог, и не су́щая, да су́щая упраздни́т, я́ко да не похва́лится вся́ка плоть пред Бо́гом.

Евангелие от Иоанна, зачало 30

Рече́ Госпо́дь ко прише́дшым к Нему́ иуде́ем: Аз иду, и взы́щете Мене́, и во гресе́ ва́шем у́мрете, а́може Аз иду́, вы не мо́жете приити́. Глаго́лаху у́бо иуде́е: еда́ Ся Сам убие́т, я́ко глаго́лет, а́може Аз иду́, вы не мо́жете приити́? И рече́ им: вы от ни́жних есте́, Аз от вы́шних есмь, вы от ми́ра сего́ есте́, Аз несмь от ми́ра сего́. Рех у́бо вам, я́ко у́мрете во гресе́х ва́ших, а́ще бо не и́мете ве́ры, я́ко Аз есмь, у́мрете во гресе́х ва́ших. Глаго́лаху у́бо Ему́: Ты кто еси́? И рече́ им Иису́с: Нача́ток, я́ко и глаго́лю вам. Мно́га и́мам о вас глаго́лати и суди́ти, но Посла́вый Мя и́стинен есть, и Аз, я́же слы́шах от Него́, сия́ глаго́лю в ми́ре. Не разуме́ша у́бо, я́ко Отца́ им глаго́лаше. Рече́ же им Иису́с: егда́ вознесе́те Сы́на Челове́ческаго, тогда́ разуме́ете, я́ко Аз есмь, и о Себе́ ничесо́же творю́, но я́коже научи́ Мя Оте́ц Мой, сия́ глаго́лю. И посла́вый Мя со Мно́ю есть, не оста́ви Мене́ еди́наго Оте́ц, я́ко Аз уго́дная Ему́ всегда́ творю́. Сия́ Ему́ глаго́лющу, мно́зи ве́роваша в Него́.

Послание к коринфяном первое, зачало 162

Бра́тие, не вся́ка плоть та́же плоть, но и́на у́бо плоть челове́ком, и́на же плоть ското́м, и́на же ры́бам, и́на же пти́цам. И телеса́ небе́сная, и телеса́ земна́я, но и́на у́бо небе́сным сла́ва, и и́на земны́м. И́на сла́ва со́лнцу, и и́на сла́ва луне́, и и́на сла́ва звезда́м: звезда́ бо от звезды́ ра́знствует во сла́ве. Та́кожде и воскресе́ние ме́ртвых: се́ется в тле́ние, востае́т в нетле́нии, се́ется не в честь, востае́т в сла́ве, се́ется в не́мощи, востае́т в си́ле, се́ется те́ло душе́вное, востае́т те́ло духо́вное. Есть те́ло душе́вное, и есть те́ло духо́вное. Та́ко и пи́сано есть: бысть пе́рвый челове́к Ада́м в ду́шу жи́ву, после́дний Ада́м в дух животворя́щь.

Евангелие от Матфеа, зачало 78

Во вре́мя о́но, приступи́ша ко Иису́су фарисе́е искуша́юще Его́ и глаго́лаша Ему́: а́ще досто́ит челове́ку пусти́ти жену́ свою́ по вся́кой вине́? Он же отвеща́в рече́ им: не́сте ли чли, я́ко Сотвори́вый искони́, му́жеский пол и же́нский сотвори́л я́ есть? И рече́: сего́ ра́ди оста́вит челове́к отца́ своего́ и ма́терь и прилепи́тся к жене́ свое́й, и бу́дета о́ба в плоть еди́ну, я́коже ктому́ не́ста два, но плоть еди́на. Е́же у́бо Бог сочета́, челове́к да не разлуча́ет. Глаго́лаша Ему́: что у́бо Моисе́й запове́да да́ти кни́гу распу́стную и отпусти́ти ю́? Глаго́ла им: я́ко Моисе́й по жестосе́рдию ва́шему повеле́ вам пусти́ти жены́ ва́ша, изнача́ла же не бысть та́ко. Глаго́лю же вам, я́ко и́же а́ще пу́стит жену́ свою́, ра́зве словесе́ прелюбоде́йна, и оже́нится ино́ю, прелюбы́ твори́т, и женя́йся пущени́цею прелюбы́ де́ет. Глаго́лаша Ему́ ученицы́ Его́: а́ще та́ко есть вина́ челове́ку с жено́ю, лу́чше есть не жени́тися. Он же рече́ им: не вси вмеща́ют словесе́ сего́, но и́мже дано́ есть. Суть бо скопцы́, и́же из чре́ва ма́терня роди́шася та́ко, и суть скопцы́, и́же скопи́шася от челове́к, и суть скопцы́, и́же искази́ша са́ми себе́ Ца́рствия ра́ди Небе́снаго. Моги́й вмести́ти да вмести́т.

Послание ко ефесеем, зачало 233

Бра́тие, возмога́йте о Го́споде и в держа́ве кре́пости Его́, облецы́теся во вся ору́жия Бо́жия, я́ко возмощи́ вам ста́ти проти́ву ко́знем диа́вольским, я́ко несть на́ша брань к кро́ви и пло́ти, но к нача́лом и ко власте́м и к миродержи́телем тмы ве́ка сего́, к духово́м зло́бы поднебе́сным. Сего́ ра́ди приими́те вся ору́жия Бо́жия, да возмо́жете проти́витися в день лют и вся соде́явше ста́ти. Ста́ните у́бо препоя́сани чресла́ ва́ша и́стиною, и обо́лкшеся в броня́ пра́вды, и обу́вше но́зе во угото́вание благовествова́ния ми́ра, над все́ми же восприи́мше щит ве́ры, в не́мже возмо́жете вся стре́лы лука́ваго разжже́нныя угаси́ти. И шлем спасе́ния восприими́те, и мечь духо́вный, и́же есть глаго́л Бо́жий.

Евангелие от Луки, зачало 106

Рече́ Госпо́дь Свои́м ученико́м: внемли́те от челове́к, возложа́т на вы ру́ки своя́ и иждену́т, предаю́ще на со́нмища и темни́цы, ведо́мы к царе́м и влады́кам, и́мене Моего́ ра́ди, прилучи́тся же вам во свиде́тельство. Положи́те у́бо на сердца́х ва́ших, не пре́жде поуча́тися отвещава́ти. Аз бо дам вам уста́ и прему́дрость, е́йже не возмо́гут проти́витися или́ отвеща́ти вси противля́ющиися вам. Пре́дани же бу́дете и роди́тели и бра́тиею и ро́дом и дру́ги, и умертвя́т от вас. И бу́дете ненави́дими от всех и́мене Моего́ ра́ди. И влас главы́ ва́шея не поги́бнет. В терпе́нии ва́шем стяжи́те ду́шы ва́ша.