19 октября 2025 года - Воскресенье

Воскресению

Тропарь, глас 2:

Егда́ снизше́л еси́ к сме́рти, Животе́ Безсме́ртный,/ тогда́ а́д умертви́л еси́ блиста́нием Божества́:/ егда́ же и уме́ршия от преиспо́дних воскреси́л еси́,/ вся́ си́лы небе́сныя взыва́ху:// Жизнода́вче, Христе́ Бо́же на́ш, сла́ва Тебе́.

Кондак, глас 2:

Воскре́сл еси́ от гро́ба, Всеси́льне Спа́се,/ и а́д ви́дев чу́до, ужасе́ся,/ и ме́ртвии воста́ша;/ тва́рь же ви́дящи сра́дуется Тебе́,/ и Ада́м свесели́тся,// и ми́р, Спа́се мо́й, воспева́ет Тя́ при́сно.

Апостолу Фоме Ди́диму (Близнецу) (житие / история праздника)

Тропарь, глас 2:

Учени́к Христо́в быв, Боже́ственнаго собо́ра апо́стольскаго соприча́стник,/ неве́рствием бо Христо́во Воскресе́ние извести́в,/ и Того́ пречи́стую страсть осяза́нием уве́рив, Фомо́ всехва́льне,// и ны́не нам проси́ ми́ра и ве́лия ми́лости.

Кондак, глас 4:

Прему́дрости благода́ти испо́лнен/ Христо́в апо́стол, и служи́тель и́стинный,/ в покая́нии вопия́ше Тебе́:// Ты мой еси́ Бог же и Госпо́дь.

Молитва:

О, святы́й апо́столе Христо́в Фомо́! Мо́лим тя: сохрани́ и соблюди́ нас моли́твами твои́ми от искуше́ний диа́вольских и паде́ний грехо́вных и испроси́ нам, раба́м Бо́жиим (имена), свы́ше по́мощь во вре́мя неве́рия, да не преткне́мся о ка́мень собла́зна, но неукло́нно ше́ствуем спаси́тельным путе́м за́поведей Христо́вых, до́ндеже дости́гнем о́ных блаже́нных оби́телей ра́йских. Ей, апо́столе Спа́сов! Не посрами́ нас, но бу́ди нам помо́щник и покрови́тель во всем житии́ на́шем и помози́ нам благоче́стно и богоуго́дно житие́ сие́ вре́менное сконча́ти, христиа́нскую кончи́ну получи́ти и до́браго отве́та сподо́битися на Стра́шнем Суде́ Христо́ве; да просла́вим великоле́пое и́мя Отца́ и Сы́на и Свята́го Ду́ха, во ве́ки веко́в. Ами́нь.

Священномученику Михаилу Союзову (житие / история праздника)

Тропарь, глас 2:

Священноиспове́дниче о́тче Михаи́ле,/ во дни гоне́ний безбо́жных на Це́рковь Ру́сскую/ поноше́ния, заточе́ние, изгна́ние и го́рькия рабо́ты,/ Христа́ ра́ди претерпе́л еси́,/ и ничто́же разлучи́ тя от любве́ Бо́жия./ Та́же, благоче́стно в ми́ре пожи́в,/ свиде́тельствовал еси́ Го́спода Иису́са Христа́,/ Его́же моли́ спасти́ся душа́м на́шым.

Кондак, глас 2:

Я́ко звезда́ но́вая Це́ркве Ру́сския яви́лся еси́, / терпеливоду́шне Михаи́ле священноиспове́дниче, / Христа́ Бо́га прасловля́я / и в нощи́ безбо́жия путь ве́рным указу́я; / те́мже мо́лим тя: / моли́ нам, сро́дником твои́м, / в ве́ре Правосла́вней утверди́тися // и спасти́ся душа́м на́шим.

Молитва:

О пресла́вный и добропобе́дный священноиспове́дниче Христо́в Михаи́ле, па́стырю до́брый, Це́ркве Ру́сския украше́ние, земли́ на́шея до́брое прозябе́ние, сро́дников твои́х похвало́ и о́бразе! Ты не убоя́вся мучи́телева преще́ния, ве́ру Правосла́вную небоя́зненно испове́дал еси́, и боле́зни и страда́ния с любо́вию ко Христу́ претерпе́в, врата́ми пра́вды в Небе́сное Ца́рство вшел еси́. Те́мже мо́лим тя: вознеси́ ны́не те́плую моли́тву твою́ ко Го́споду о Оте́честве на́шем, да утверди́т его́ в ве́ре Правосла́вней до сконча́ния ве́ка, нас же, чту́щих па́мять твою́, да укрепи́т спаси́тельныя за́поведи Его́ соблюда́ти: да изба́вльшеся от греха́ и ве́чныя му́ки, вку́пе с тобо́ю сподо́бимся воспева́ти достопоклоня́емое и́мя Отца́, и Сы́на, и Свята́го Ду́ха, во ве́ки веко́в. Ами́нь.