Богослужебные чтения 24 августа 2024 года

Послание к римляном, зачало 113

Бра́тие, му́дрствуяй день, Го́сподеви му́дрствует, и не му́дрствуяй день, Го́сподеви не му́дрствует. Яды́й, Го́сподеви яст, благодари́т бо Бо́га, и не яды́й, Го́сподеви не яст, и благодари́т Бо́га. Никто́же бо нас себе́ живе́т, и никто́же себе́ умира́ет. А́ще у́бо живе́м, Го́сподеви живе́м, а́ще же умира́ем, Го́сподеви умира́ем, а́ще у́бо живе́м, а́ще умира́ем, Госпо́дни есмы́. На сие́ бо Христо́с и у́мре и воскре́се и оживе́, да и ме́ртвыми и живы́ми облада́ет.

Евангелие от Матфеа, зачало 64

Во вре́мя о́но, призва́в Иису́с ученики́ Своя́, рече́ им: милосе́рдую о наро́де сем, я́ко уже́ дни три приседя́т Мне и не и́мут чесо́ я́сти, и отпусти́ти их не я́дша не хощу́, да не ка́ко ослабе́ют на пути́. И глаго́лаша Ему́ ученицы́ Его́: отку́ду нам в пусты́ни хле́би толи́цы, я́ко да насы́тится толи́к наро́д? И глаго́ла им Иису́с: коли́ко хле́бы и́мате? Они́ же ре́ша: седмь, и ма́ло ры́биц. И повеле́ наро́дом возлещи́ на земли́, и прие́м седмь хле́бы и ры́бы, хвалу́ возда́в преломи́ и даде́ ученико́м Свои́м, ученицы́ же наро́дом. И ядо́ша вси и насы́тишася, и взя́ша избы́тки укру́х, седмь ко́шниц испо́лнь. Я́дших же бя́ше четы́ре ты́сящи муже́й, ра́зве жен и дете́й. И отпусти́в наро́ды, вле́зе в кора́бль и прии́де в преде́лы Магдали́нски.