Богослужебные чтения 13 августа 2025 года

Послание к коринфяном первое, зачало 165

Бра́тие, а́ще досто́йно бу́дет и мне ити́, со мно́ю по́йдут. Прииду́ же к вам, егда́ Македо́нию прейду́: Македо́нию бо прохожду́. У вас же, а́ще случи́тся мне, пребу́ду, или́ и озиме́ю, да вы мя прово́дите, а́може а́ще поиду́. Не хощу́ бо вас ны́не в мимохожде́нии ви́дети, упова́ю же вре́мя не́кое пребы́ти у вас, а́ще Госпо́дь повели́т. Пребу́ду же во Ефе́се до Пентико́стии, дверь бо ми отве́рзеся вели́ка и поспе́шна, и сопроти́внии мно́зи. А́ще же прии́дет Тимофе́й, блюди́те, да без стра́ха бу́дет у вас, де́ло бо Госпо́дне де́лает, я́коже и аз. Да никто́же у́бо его́ уничижи́т, проводи́те же его́ с ми́ром, да прии́дет ко мне, жду бо его́ с бра́тиею. О Аполло́се же бра́те, мно́го моли́х его́, да прии́дет к вам с бра́тиею, и вся́ко не бе во́ля, да ны́не прии́дет, прии́дет же, егда́ упраздни́тся.

Евангелие от Матфеа, зачало 86

Рече́ Госпо́дь при́тчу сию́: челове́к не́кий имя́ше два сы́на, и прише́д к пе́рвому, рече́: ча́до, иди́ днесь, де́лай в виногра́де мое́м. Он же отвеща́в рече́: не хощу́, последи́ же раска́явся, и́де. И присту́пль к друго́му, рече́ та́коже. Он же отвеща́в рече́: аз, го́споди иду́, и не и́де. Кий от обою́ сотвори́ во́лю о́тчу? Глаго́лаша Ему́: пе́рвый. Глаго́ла им Иису́с: ами́нь глаго́лю вам, я́ко мытари́ и любоде́йцы варя́ют вы в Ца́рствии Бо́жии. Прии́де бо к вам Иоа́нн Крести́тель путе́м пра́ведным, и не ве́ровасте ему́, мытари́ же и любоде́йцы ве́роваша ему́, вы же ви́девше, не раска́ястеся последи́ ве́ровати ему́.

Послание к коринфяном второе, зачало 167А

Па́вел, посла́нник Иису́с Христо́в во́лею Бо́жиею, и Тимофе́й брат, це́ркви Бо́жией су́щей в Кори́нфе, со святы́ми все́ми су́щими во всей Аха́ии: благода́ть вам и мир от Бо́га Отца́ на́шего, и Го́спода Иису́са Христа́. Благослове́н Бог и Оте́ц Го́спода на́шего Иису́са Христа́, Оте́ц щедро́т и Бог вся́кия уте́хи, утеша́яй нас о вся́кой ско́рби на́шей, я́ко возмощи́ нам уте́шити су́щыя во вся́кой ско́рби, утеше́нием, и́мже утеша́емся са́ми от Бо́га. Зане́ я́коже избы́точествуют страда́ния Христо́ва в нас, та́ко Христо́м избы́точествует и утеше́ние на́ше. А́ще ли же скорби́м, о ва́шем утеше́нии и спасе́нии, де́йствующемся в терпе́нии те́хже страда́ний, я́же и мы стра́ждем, и упова́ние на́ше изве́стно о вас. А́ще ли утеша́емся, о ва́шем утеше́нии и спасе́нии, ве́дяще, зане́ я́коже о́бщницы есте́ страсте́м на́шым, та́кожде и утеше́нию.

Евангелие от Матфеа, зачало 88

Рече́ Госпо́дь ко прише́дшым к Нему́ иуде́ем: глаго́лю вам, я́ко оти́мется от вас Ца́рствие Бо́жие и да́стся язы́ку творя́щему плоды́ его́. И пады́й на ка́мени сем сокруши́тся, а на не́мже паде́т, сотры́ет и́. И слы́шавше архиере́е и фарисе́е при́тчи Его́, разуме́ша, я́ко о них глаго́лет, и и́щуще Его́ я́ти, убоя́шася наро́да, поне́же я́ко Проро́ка Его́ име́яху.

Послание к галатом, зачало 213

Бра́тие, плод духо́вный есть любы́, ра́дость, мир, долготерпе́ние, бла́гость, милосе́рдие, ве́ра, кро́тость, воздержа́ние: на таковы́х несть зако́на. А и́же Христо́вы суть, плоть распя́ша со страстьми́ и похотьми́. А́ще живе́м ду́хом, ду́хом и да хо́дим. Не быва́им тщесла́вни, друг дру́га раздража́юще, друг дру́гу зави́дяще. Бра́тие, а́ще и впаде́т челове́к в не́кое прегреше́ние, вы духо́внии исправля́йте такова́го ду́хом кро́тости: блюды́й себе́, да не и ты искуше́н бу́деши. Друг дру́га тяготы́ носи́те, и та́ко испо́лните зако́н Христо́в.

Евангелие от Матфеа, зачало 43

Рече́ Госпо́дь Свои́м ученико́м: вся Мне предана́ суть Oтце́м Мои́м, и никто́же зна́ет Сы́на, то́кмо Oте́ц, ни Oтца́ кто зна́ет, то́кмо Сын, и ему́же а́ще во́лит Сын откры́ти. Прииди́те ко Мне вси тружда́ющиися и обремене́ннии, и Аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шим. И́го бо Мое́ бла́го, и бре́мя Мое́ легко́ есть.