6 августа 2025 года - Вторник

Мученице Христине Тирской (житие / история праздника)

Тропарь, глас 4:

Зва́нием ева́нгельски Христу́ уневе́стившися,/ Христи́но сла́вная,/ сла́ву ми́ра сего́ и по́хоть бре́нную вмени́ла еси́ ни во что же,/ о само́м телеси́ небрегу́щи,/ му́ки претерпе́ла еси́ до́блественно,/ тем твое́ страда́ние хвала́ми почита́ем,// му́ченице, Христу́ тезоимени́тая.

Кондак, глас 4:

Светови́дная голуби́ца позна́лася еси́, криле́ иму́щи зла́те,/ и к высоте́ Небе́сней возлете́ла еси́, Христи́но честна́я./ Те́мже твой сла́вный пра́здник соверша́ем,/ ве́рою покланя́ющеся твои́х моще́й ра́це,/ из нея́же истека́ет всем оби́льно/ исцеле́ние Боже́ственное,// душа́м же и те́лом.

Благоверным князьям Борису и Глебу, во святом Крещении Роману и Давиду (житие / история праздника)

Тропарь, глас 2:

Правди́вая страстоте́рпца/ и и́стинная Ева́нгелия Христо́ва послу́шателя,/ целому́дренный Рома́не с незло́бивым Дави́дом,/ не сопроти́в ста́ста врагу́ су́щу бра́ту,/ убива́ющему телеса́ ва́ша,/ душа́м же косну́тися не могу́щу./ Да пла́чется у́бо злый властолю́бец,/ вы же ра́дующеся с ли́ки А́нгельскими,/ предстоя́ще Святе́й Тро́ице,/ моли́теся о держа́ве сро́дников ва́ших, богоуго́дней бы́ти,// и сыново́м Росси́йским спасти́ся.

Тропарь, глас 4:

Я́ко плодови́та виногра́да, о́трасли доброде́телей су́ще,/ Небе́сный дождь Христо́в прия́сте,/ источа́юще оте́честву своему́ струю́ Правосла́вия,/ Бори́се пречу́дне с до́блим Гле́бом,/ вку́пе моли́теся Го́сподеви сохрани́ти град и лю́ди,/ и на враги́ посо́бствовати,// и ду́шам на́шим дарова́ти ве́лию ми́лость.

Тропарь, глас 4:

Му́ченическою кро́вию порфи́ру окропи́вше све́тло,/ укра́шени предстои́те, страда́льцы сла́внии, Царю́ Безсме́ртному,/ и, венцы́ сла́вы от Него́ прии́мше,/ моли́теся стране́ на́шей пода́ти на враги́ одоле́ние// и душа́м на́шим ве́лию ми́лость.

Кондак, глас 3:

Возсия́ днесь пресла́вная па́мять ва́ша,/ благоро́днии страстоте́рпцы Христо́вы, Рома́не и Дави́де,/ созыва́ющи нас к похвале́нию Христа́ Бо́га на́шего./ Тем притека́юще к ра́це моще́й ва́ших,/ исцеле́ния дар прие́млем моли́твами ва́шими, святи́и:// вы бо боже́ственнии вра́чеве есте́.

Кондак, глас 8:

А́ще и убие́ни бы́сте и во гробе́х положе́ни,/ но на Вы́шнее Ца́рство преидо́сте,/ о́ваго бо ко́пии насу́нуша,/ друга́го же, я́ко а́гнца незло́бива, ноже́м заре́заша,/ тем и кровь ва́ша бысть исцеле́ние ми́ру,// ве́рою призыва́ющим вас, святи́и, на по́мощь.

Молитва:

О, дво́ице свяще́нная, бра́тие прекра́сная, до́блии страстоте́рпцы Бори́се и Гле́бе, от ю́ности Христу́ ве́рою, чи́стотою и любо́вию послужи́вшии, и кровми́ свои́ми, я́ко багряни́цею укра́сившиися и ны́не со Христо́м ца́рствующии, не забу́дите и нас су́щих на земли́, но я́ко те́плии засту́пницы, ва́шим си́льным хода́тайством пред Христо́м Бо́гом, сохрани́те ю́ных во святе́й ве́ре и чистоте́ неврежде́нными от вся́каго прило́га неве́рия и нечистоты́, огради́те всех нас от вся́кия ско́рби, озлобле́ний и напра́сныя сме́рти, укроти́те вся́кую вражду́ и зло́бу, де́йством воздвиза́емую от бли́жних и чу́ждых. Мо́лим вас, христолюби́вии страстоте́рпцы, испроси́те у Великодарови́таго Влады́ки всем нам оставле́ние прегреше́ний на́ших, единомы́слие и здра́вие, избавле́ние от наше́ствия иноплеме́нных, междоусо́бныя бра́ни, я́звы и гла́да. Снабдева́йте свои́м заступле́нием всех чту́щих святу́ю па́мять ва́шу во ве́ки веко́в. Ами́нь.

Преподобному Поликарпу, архимандриту Печерскому (житие / история праздника)

Тропарь, глас 4:

Тезоимени́т зва́нию твоему́,/ я́ко многопло́дное дре́во,/ насажде́н сый во оби́тели Бо́жия Ма́тере,/ мно́гая и чу́дная тща́нием твои́м исправле́ния показа́вый,/ му́дре Полика́рпе,/ моли́ Христа́ Бо́га о нас,// я́ко да и мы, мно́гия плоды́ доброде́телей Ему́ прине́сше, спасе́мся.

Кондак, глас 8:

Я́ко преподо́бным Пече́рским совсе́льника/ и жити́й их в себе́ де́лом и писа́нием изобрази́теля нело́жна,/ вку́пе же сла́вы Небе́сныя с те́ми о́бщника я́вльшагося,/ прииди́те, ве́рнии, пе́сньми свяще́нными преподо́бнаго Полика́рпа ублажи́м, зову́ще:// ра́дуйся, архимандри́тов Пече́рских похвало́.

Священноисповеднику Иоанну, чудотворцу Оленевскому (житие / история праздника)

Тропарь, глас 4:

Земли́ Ру́сския моли́твеннице,/ жи́зни во Христе́ и покая́ния пропове́дниче./ От ю́ности в труде́х и посте́х о́браз бы́в доброде́тели./ В годи́ну тя́жкую тесноту́ и лише́ния от безбо́жных власте́й претерпе́л еси́./ Ко все́м стра́ждущим, о́тче преподо́бне Иоа́нне,/ се́рдце Твое́ распросте́рл еси́.// Поспеши́ и ны́не в по́мощь на́м, все́м се́рдцем чту́щим Тя́.

Кондак, глас 2:

Дне́сь земля́ Пе́нзенская прославля́ет Иоа́нна преди́внаго,/ в ли́ке но́вых страстоте́рпцев росси́йских просия́вшаго./ Его́же моли́твами, Христе́ Бо́же,// спаси́ ве́рныя лю́ди Твоя́.

Молитва:

О, преди́вный и сла́вный уго́дниче Христо́в, преподо́бне о́тче Иоа́нне испове́дниче. В житии́ свое́м и по́двизех преподо́бному Серафи́му и пра́ведному Иоа́нну Кроншта́дтскому уподо́бился еси́. Та́кожде и мы́, к Твоему́ тве́рдому заступле́нию прибега́юще, в сокруше́нии серде́чном мо́лим Тя́: озари́ на́с све́том дарова́нной Тебе́ благода́ти и моли́твенным предста́тельством пред престо́лом Бо́жиим утверди́ и умно́жь ве́ру на́шу. Ты́ бо и в годи́ну лю́тых гоне́ний явля́л немощны́м подкрепле́ние и утеше́ние, боля́щим исцеле́ние и заступле́ние, заблу́ждшим исправле́ние, бе́дствующим благовре́менную по́мощь. И ны́не не оста́ви на́с, с ве́рою и наде́ждою к ра́це моще́й Твои́х притека́ющих. Умоли́ Всеблага́го Го́спода наро́ды Оте́чества на́шего в единомы́слии ве́ры и во вся́ком благоче́стии соблюсти́, междоусо́бныя бра́ни умири́ти, ду́х благоче́стия, братолю́бия и стра́ха Бо́жия в сыне́х ру́сских возроди́ти. И́мамы бо Тя́, неусыпа́ющаго моли́твенника и предста́теля, непреста́нно с любо́вию славосло́вим ди́внаго во святы́х Свои́х Бо́га — Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.