Богослужебные чтения 3 февраля 2026 года

Паримии на преподобнаго Максима Грека

1. Прему́дрости Соломо́новы чте́ние.

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и е́же от нас ше́ствие сокруше́ние, они же суть в ми́ре. И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено. И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я́ и обре́те их досто́йны Себе́. Я́ко зла́то в горни́ле, искуси́ их и, я́ко всепло́дие же́ртвенное, прия́т я́. И во вре́мя посеще́ния их возсия́ют и, я́ко и́скры по сте́блию, потеку́т. Су́дят язы́ком, и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему́. Я́ко благода́ть и ми́лость в преподо́бных Его́, и посеще́ние во избра́нных Его́.

Прем 3:1–9

2. Прему́дрости Соломо́новы чте́ние.

Пра́ведницы во ве́ки живу́т, и в Го́споде мзда их, и попече́ние их у Вы́шняго. Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я́ и мы́шцею защити́т их. Прии́мет всеору́жие рве́ние Свое́ и вооружи́т тварь в месть враго́м. Облече́тся в броня́ пра́вды и возложи́т шлем, суд нелицеме́рен. Прии́мет щит непобеди́мый, преподо́бие. Поостри́т же напра́сный гнев во ору́жие; спобо́рет же с ним мир на безу́мныя. По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т. И от каменоме́тныя я́рости испо́лнь паду́т гра́ды, вознегоду́ет на них вода́ морска́я, ре́ки же потопя́т я́ на́гло. Сопроти́в ста́нет им дух си́лы и, я́ко ви́хор, разве́ет их и опустоши́т всю зе́млю беззако́ние, и злоде́йство преврати́т престо́лы си́льных. Слы́шите у́бо, ца́рие, и разуме́йте, навы́кните судии́ конце́в земли́. Внуши́те, держа́щии мно́жества и гордя́щиися о наро́дех язы́ков, я́ко дана́ есть от Го́спода держа́ва вам и си́ла от Вы́шняго.

Прем 5:15–24; 6:1–3

3. Прему́дрости Соломо́новы чте́ние.

Пра́ведник, а́ще пости́гнет сконча́тися, в поко́и бу́дет: ста́рость бо честна́ не многоле́тна, ниже́ в числе́ лет исчита́ется. Седи́на же есть му́дрость челове́ком, и во́зраст ста́рости житие́ нескве́рно. Благоуго́ден Бо́гу быв, возлю́блен бысть, и живы́й посреде́ гре́шник преста́влен бысть, восхище́н бысть, да не зло́ба измени́т ра́зума его́ или́ лесть прельсти́т ду́шу его́. Раче́ние бо зло́бы помрача́ет до́брая и паре́ние по́хоти пременя́ет ум незло́бив. Сконча́вся вма́ле, испо́лни ле́та до́лга, уго́дна бо бе Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ положи́вше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

Прем 4:7–15

Утр. – Мф., 43 зач., XI, 27–30 . Лит. – 2 Пет., 66 зач., I, 20 – II, 9. Мк., 59 зач., XIII, 9–13 – за понедельник и за вторник (под зачало): 2 Пет., 67 зач., II, 9–22. Мк., 60 зач., XIII, 14–23. Прп. и мч.: Евр., 330 зач., XI, 33 – XII, 2. Лк., 64 зач., XII, 8–12, или прп. Максима Грека: Гал., 213 зач., V, 22 – VI, 2. Лк., 24 зач., VI, 17–23.

Евангелие от Матфеа, зачало 43

Рече́ Госпо́дь Свои́м ученико́м: вся Мне предана́ суть Oтце́м Мои́м, и никто́же зна́ет Сы́на, то́кмо Oте́ц, ни Oтца́ кто зна́ет, то́кмо Сын, и ему́же а́ще во́лит Сын откры́ти. Прииди́те ко Мне вси тружда́ющиися и обремене́ннии, и Аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь и смире́н се́рдцем, и обря́щете поко́й душа́м ва́шим. И́го бо Мое́ бла́го, и бре́мя Мое́ легко́ есть.

Соборное послание Петрова второе, зачало 66

Возлю́бленнии, сие́ пре́жде ве́дуще, я́ко вся́ко проро́чество кни́жное по своему́ сказа́нию не быва́ет. Ни бо во́лею бысть когда́ челове́ком проро́чество, но от Свята́го Ду́ха просвеща́еми глаго́лаша святи́и Бо́жии челове́цы. Бы́ша же и лжи́вии проро́цы в лю́дех, я́коже и в вас бу́дут лжи́вии учи́телие, и́же внесу́т е́реси поги́бели, и иску́пльшаго их Влады́ки отмета́ющеся, приводя́ще себе́ ско́ру поги́бель. И мно́зи после́дствуют их нечистота́м, и́миже путь и́стинный поху́лится. И в преумноже́нии льсти́вых слове́с вас уловя́т: и́хже суд искони́ не косни́т, и поги́бель их не дре́млет. А́ще бо Бог а́ггелов согреши́вших не пощаде́, но плени́цами мра́ка связа́в, предаде́ на суд му́чимы блюсти́. И пе́рваго ми́ра не пощаде́, но осма́го Но́а пра́вды пропове́дника сохрани́, пото́п ми́ру нече́ствовавших наведе́. И гра́ды Содо́мския и Гомо́ррския сжег, разоре́нием осуди́, о́браз хотя́щым нече́ствовати положи́в. И пра́веднаго Ло́та, оби́дима от беззако́нных в нечистоте́ сожи́тия, изба́ви. Виде́нием бо и слу́хом пра́ведный, живы́й в них, день от дне ду́шу пра́ведну беззако́нными де́лы му́чаше. Весть Госпо́дь благочести́выя от напа́сти избавля́ти, непра́ведники же на день су́дный му́чимы блюсти́.

Евангелие от Марка, зачало 59

Рече́ Госпо́дь Свои́м ученико́м: блюди́теся вы са́ми, предадя́т бо вы в со́нмища, и на собо́рищах бие́ни бу́дете, и пред воево́дами и цари́ веде́ни бу́дете Мене́ ра́ди, во свиде́тельство им. И во всех язы́цех подоба́ет пре́жде пропове́датися Ева́нгелию. Егда́ же поведу́т вы предаю́ще, не пре́жде пецы́теся, что возглаго́лете, ни поуча́йтеся, но е́же а́ще да́стся вам в той час, се глаго́лите, не вы бо бу́дете глаго́лющии, но Дух Святы́й. Преда́ст же брат бра́та на смерть, и оте́ц ча́до, и воста́нут ча́да на роди́тели и убию́т их. И бу́дете ненави́дими все́ми и́мене Моего́ ра́ди, претерпе́вый же до конца́, сей спасе́н бу́дет.

Соборное послание Петрова второе, зачало 67

Возлю́бленнии, весть Госпо́дь благочести́выя от напа́сти избавля́ти, непра́ведники же на день су́дный му́чимы блюсти́, наипа́че же во след плотски́я по́хоти скверне́ния ходя́щыя и о госпо́дьстве нерадя́щыя, продерза́теле, себе́ уго́дницы, сла́вы не трепе́щут ху́ляще, иде́же А́нгели кре́постию и си́лою бо́льши су́ще, не терпя́т на ся от Го́спода укори́знена суда́. Си́и же, я́ко ско́ти живо́тни естество́м бы́вше в поги́бель и тлю, в ни́хже не разуме́ют ху́ляще, во истле́нии свое́м истле́ют, прие́млюще мзду непра́ведну, сласть мня́ще вседне́вное насыще́ние, скверни́тели и поро́чницы, пита́ющеся лестьми́ свои́ми, яду́ще с ва́ми, о́чи иму́ще испо́лнь блудодея́ния и непреста́емаго греха́, прельща́юще ду́шы неутвержде́ны, се́рдце науче́но лихои́мству иму́ще, кля́твы ча́да, оста́вльше пра́вый путь заблуди́ша, после́довавше пути́ Валаа́мову Восо́рова, и́же мзду непра́ведну возлюби́, обличе́ние же име́ своего́ беззако́ния, подъяре́мник безгла́сен, челове́ческим гла́сом провеща́вш, возбрани́ проро́ка безу́мие. Си́и суть исто́чницы безво́дни, о́блацы и мглы от ветр преноси́ми, и́мже мрак те́мный во ве́ки блюде́тся. Прего́рдая бо суеты́ веща́юще, прельща́ют в скве́рны плотски́я по́хоти, отбега́юще их отню́д живу́щих во льсти, свобо́ду им обещава́юще, са́ми раби́ су́ще тле́ния, и́мже бо кто побежде́н быва́ет, сему́ и рабо́тен есть. А́ще бо отбе́гше скверн ми́ра в ра́зум Го́спода и Спа́са на́шего Иису́са Христа́, си́ми же па́ки спле́тшеся побежда́еми быва́ют, бы́ша им после́дняя го́рша пе́рвых. Лу́чше бо бе им не позна́ти пути́ пра́вды, не́жели позна́вшым возврати́тися вспять от пре́данныя им святы́я за́поведи. Случи́ся бо им и́стинная при́тча: пес возвра́щься на свою́ блево́тину, и свиния́, омы́вшися, в кал ти́нный.

Евангелие от Марка, зачало 60

Рече́ Госпо́дь Свои́м ученико́м: егда́ у́зрите ме́рзость запусте́ния, рече́нную Дании́лом проро́ком, стоя́щу, иде́же не подоба́ет, чтый да разуме́ет, тогда́ су́щии во Иуде́и да бежа́т на го́ры, и и́же на кро́ве, да не сла́зит в дом, ни да вни́дет взя́ти чесо́ от до́му своего́, и и́же на селе́ сый, да не возврати́тся вспять взя́ти ри́зу свою́. Го́ре же непра́здным и доя́щым в ты́я дни. Моли́теся же, да не бу́дет бе́жество ва́ше в зиме́. Бу́дут бо дни ти́и скорбь, якова́ не бысть такова́ от нача́ла созда́ния, е́же созда́ Бог, доны́не, и не бу́дет. И а́ще не бы Госпо́дь прекрати́л дний, не бы у́бо спасла́ся вся́ка плоть, но избра́нных ра́ди, и́хже избра́, прекрати́т дни. Тогда́ а́ще кто рече́т вам: се зде Христо́с, или́ се о́нде, не ими́те ве́ры. Воста́нут бо лжехри́сти и лжепроро́цы и дадя́т зна́мения и чудеса́, е́же прельсти́ти, а́ще возмо́жно, и избра́нныя. Вы же блюди́теся, се пре́жде рех вам вся.

Послание ко евреем, зачало 330

Бра́тие, святи́и вси ве́рою победи́ша ца́рствия, соде́яша пра́вду, получи́ша обетова́ния, загради́ша уста́ львов, угаси́ша си́лу о́гненную, избего́ша о́стрея меча́, возмого́ша от не́мощи, бы́ша кре́пцы во бране́х, обрати́ша в бе́гство полки́ чужи́х. Прия́ша жены́ от воскресе́ния ме́ртвыя своя́; ини́и же избие́ни бы́ша, не прие́мше избавле́ния, да лу́чшее воскресе́ние улуча́т; друзи́и же руга́нием и ра́нами искуше́ние прия́ша, еще́ же и уз, и темни́ц. Ка́мением побие́ни бы́ша, претре́ни бы́ша, искуше́ни бы́ша, уби́йством меча́ умро́ша, проидо́ша в ми́лотех, и в ко́зиях ко́жах, лише́ни, скорбя́ще, озло́блени. И́хже не бе досто́ин весь мир, в пусты́нях скита́ющеся, и в гора́х, и в верте́пах, и в про́пастех земны́х. И си́и вси послу́шествовани бы́вше ве́рою, не прия́ша обетова́ния, Бо́гу лу́чшее что о нас предзре́вшу, да не без нас соверше́нство прии́мут. Те́мже у́бо и мы, толи́к иму́ще облежа́щь нас о́блак свиде́телей, го́рдость вся́ку отло́жше, и удо́бь обстоя́тельный грех, терпе́нием да тече́м на предлежа́щий нам по́двиг, взира́юще на нача́льника ве́ры и соверши́теля Иису́са.

Евангелие от Луки, зачало 64

Рече́ Госпо́дь: всяк, и́же а́ще испове́сть Мя пред челове́ки, и Сын Челове́ческий испове́сть его́ пред А́нгелы Бо́жиими, а отверги́йся Мене́ пред челове́ки отве́ржен бу́дет пред А́нгелы Бо́жиими. И всяк и́же рече́т сло́во на Сы́на Челове́ческаго, оста́вится ему́, а на Свята́го Ду́ха ху́лившему не оста́вится. Егда́ же приведу́т вы на собо́рища и вла́сти и влады́чества, не пецы́теся, ка́ко или́ что отвеща́ете, или́ что рече́те, Святы́й бо Дух научи́т вы в той час, я́же подоба́ет рещи́.

Послание к галатом, зачало 213

Бра́тие, плод духо́вный есть любы́, ра́дость, мир, долготерпе́ние, бла́гость, милосе́рдие, ве́ра, кро́тость, воздержа́ние: на таковы́х несть зако́на. А и́же Христо́вы суть, плоть распя́ша со страстьми́ и похотьми́. А́ще живе́м ду́хом, ду́хом и да хо́дим. Не быва́им тщесла́вни, друг дру́га раздража́юще, друг дру́гу зави́дяще. Бра́тие, а́ще и впаде́т челове́к в не́кое прегреше́ние, вы духо́внии исправля́йте такова́го ду́хом кро́тости: блюды́й себе́, да не и ты искуше́н бу́деши. Друг дру́га тяготы́ носи́те, и та́ко испо́лните зако́н Христо́в.

Евангелие от Луки, зачало 24

Во вре́мя о́но, ста Иису́с на ме́сте ра́вне, и наро́д учени́к Его́, и мно́жество мно́го люде́й от всея́ Иуде́и и Иерусали́ма, и помо́рия Ти́рска и Сидо́нска, и́же приидо́ша послу́шати Его́ и исцели́тися от неду́г свои́х, и стра́ждущии от дух нечи́стых, и исцеля́хуся. И весь наро́д иска́ше прикаса́тися Ему́, я́ко си́ла от Него́ исхожда́ше, и исцеля́ше вся. И той возве́д о́чи свои́ на ученики́ своя́, глаго́лаше: блаже́ни ни́щии ду́хом, я́ко ва́ше есть Ца́рствие Бо́жие. Блаже́ни, а́лчущии ны́не, я́ко насы́титеся. Блаже́ни, пла́чущии ны́не, я́ко возсмее́теся. Блаже́ни бу́дете, егда́ возненави́дят вас челове́цы, и егда́ разлуча́т вы и поно́сят, и пронесу́т и́мя ва́ше я́ко зло, Сы́на Челове́ческаго ра́ди. Возра́дуйтеся в той день и взыгра́йте, се бо мзда ва́ша мно́га на небеси́.