Шрифт
Каноны Триоди Постной
Трипеснец в Понедельник Третьей седмицы
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кано́н трипе́снец. Гла́с 8.
Пе́снь 1
Ирмо́с: Пои́м Бо́гу, о го́рькия рабо́ты фарао́новы изба́вльшему Изра́иля, и о́гненным столпо́м и све́тлым о́блаком наста́вльшему, я́ко просла́вися.
Припев: Поми́луй мя, Бо́же, поми́луй мя.
Име́яй я́ко Бо́г ми́лостивное, ка́ющася приими́ мя́, ижди́вшаго житие́ мое́ блу́дно, вопию́ Ти́: согреши́х, клеветнико́в не тре́бую, сту́д де́л мои́х принося́.
Припев: Поми́луй мя, Бо́же, поми́луй мя.
Сне́дь оста́вль а́нгельскую, уподо́бихся ското́м, внегда́ пита́тися скве́рною зло́бою: но у́бо обраща́ющася приими́ мя́, я́ко еди́наго от нае́мник Твои́х, Небе́сный О́тче.
Припев: Поми́луй мя, Бо́же, поми́луй мя.
Но́щь сласте́й от пи́щи прибыва́ющую вси́ ве́рнии оста́вивше, к све́ту и́стины тща́тельно присту́пим, да светоно́сныя трапе́зы сподо́бимся.
Припев: Пресвята́я Богоро́дице, спаси́ на́с.
Богоро́дичен: Ра́дуйся пресвяты́й хра́ме, руно́ богоро́сное, запечатле́нный исто́чниче безсме́ртныя струи́: ста́до Твое́ Влады́чице сохраня́й от вся́ких ра́тников невоева́но.
Припев: Поми́луй мя, Бо́же, поми́луй мя.
Ны́не в седми́цах трие́х, я́коже дре́вле тридне́вне Изра́иль, очи́стившеся бра́тие, в го́ру моли́тв дости́гнем, и отту́ду боже́ственный гла́с услы́шавше, Христа́ воспои́м.
Припев: Поми́луй мя, Бо́же, поми́луй мя.
Я́коже Сампсо́н посто́м укре́пльшеся, прииди́те, я́коже ина́го зве́ря порази́м лю́дие, чре́внаго бе́са, и не посмее́тся Дали́да страсте́й, прельща́ющая на́с.
Припев: Поми́луй мя, Бо́же, поми́луй мя.
Ве́рою я́коже Дави́д, и мы смиренному́дрием вооружи́вшеся, я́ко ина́го голиа́фа го́рдаго ума́ низложи́вше, посеце́м ку́пно и тьмы́ страсте́й.
Сла́ва, тро́ичен: Три́ пою́ херуви́мски, Свято́е Тебе́ Божество́: Све́ты и Све́т, и Живо́т и Животы́, Бо́га ро́ждшаго, Бо́га рожде́ннаго, Бо́га от Отца́ исходя́щаго, Ду́ха Жива́го.
И ныне. Богоро́дичен: Ра́дуйся Е́вы ра́досте, и́бо о́ныя печа́ль Рождество́м Твои́м преста́ Чи́стая. Ра́дуйся, незаходи́маго Све́та све́тлый о́блаче, из него́же возсия́ Христо́с Бо́г.
Пе́снь 8
Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.
Припев: Поми́луй мя, Бо́же, поми́луй мя.
Ижди́в бога́тство оте́ческое со блудни́цами, изгна́н бы́х от преддве́рий благода́ти окая́нный: но приими́ мя́ о́тче, за безчи́сленную ми́лость.
Припев: Поми́луй мя, Бо́же, поми́луй мя.
Во светле́йшем поста́ светозаре́нии моли́тв просвети́вшеся, светови́дни бу́дем, я́ко да грехо́вныя тьмы́ избе́гнем.
Припев: Поми́луй мя, Бо́же, поми́луй мя.
Мо́лит Тя́ ли́к безпло́тных, херуви́ми мо́лят, и святы́х чи́нове, ду́шы на́шя спаси́ Христе́, Многоми́лостиве.
Припев: Пресвята́я Богоро́дице, спаси́ на́с.
Богоро́дичен: Неде́ланный гро́зд заче́ншая, омраче́нна мя́ пия́нством греха́ уцелому́дри Богоро́дице Де́во, наде́ждо ду́ш на́ших.
Припев: Поми́луй мя, Бо́же, поми́луй мя.
Оте́ческаго сокро́вища, име́ния чу́днаго, ма́тере все́х послужи́вших Влады́це Христу́, прииди́те наслади́мся бра́тие поста́: и́бо се́й укрепля́ет те́ло, и просвеща́ет у́м и се́рдце.
Припев: Поми́луй мя, Бо́же, поми́луй мя.
Гедео́на чу́днаго подража́ющи душе́, доброде́тели нося́щи, ве́ру, наде́жду и любо́вь Христо́ву, изы́ди убива́ющи иноплеме́нныя стра́сти, я́коже о́ный с треми́ сты́, Мадиа́мский язы́к потребля́я.
Припев: Поми́луй мя, Бо́же, поми́луй мя.
Егда́ прии́деши во сла́ве Твое́й суди́ти все́й земли́, с ты́сящами и тьма́ми си́л Твои́х: тогда́ мя́ Го́споди пощади́, осла́би, и изба́ви осужде́ния, не посрами́ мене́, ниже́ осуди́ огню́ ве́чному.
Слава. Тро́ичен: И Тро́ицу сла́влю Тя́, и я́ко Еди́ницу пою́ Тя́, Божество́ еди́но, О́тче Вседержи́телю, и Единонача́льне Сы́не, Ду́ше Святы́й, и Всевлады́чняя держа́во, еди́но Естество́, еди́но Ца́рство, в трие́х начерта́ниих же покланя́емое.
И ныне. Богоро́дичен: Я́же в рождестве́ убеже́ боле́зни преесте́ственно, в Твое́й честне́й стра́сти позна́ Ро́ждшая Тя́, и боле́зноваше зря́щи на Кресте́ Тя́ пригвожде́на во́лею от иуде́ев, на вода́х зе́млю основа́вшаго.
Пе́снь 9
Ирмо́с: Велича́ем Тя́ всенепоро́чную Ма́терь Христа́ Бо́га на́шего, Ю́же осени́ Ду́х Святы́й.
Припев: Поми́луй мя, Бо́же, поми́луй мя.
От Твоея́ удали́вшася О́тче любве́, и во́льными стремле́ньми сласте́й порабоще́на, обраща́ющася я́ко блу́днаго приими́: еди́н бо еси́ Многоми́лостив.
Припев: Поми́луй мя, Бо́же, поми́луй мя.
Непло́дная яви́хся смоко́вница, еди́ну то́кмо зло́бу де́лая окая́нный, о́гнь мне́ исхода́таившую: Ты́ у́бо Го́споди плодоно́сна мя́ покажи́, дея́ния блага́я плодонося́ща Тебе́.
Припев: Поми́луй мя, Бо́же, поми́луй мя.
Пости́ся душе́ моя́ зло́бы и лука́вства, удержи́ся гне́ва и я́рости, и вся́каго греха́: Иису́с бо такова́го хо́щет поста́, Человеколю́бец Бо́г на́ш.
Припев: Пресвята́я Богоро́дице, спаси́ на́с.
Богоро́дичен: Ты́ еси́ Богоро́дице ору́жие на́ше, и стена́, Ты́ еси́ заступле́ние к Тебе́ прибега́ющих: Тя́ и ны́не на моли́тву дви́жем, да изба́вимся от враго́в на́ших.
Припев: Поми́луй мя, Бо́же, поми́луй мя.
Чи́стый по́ст, злы́х отложе́ние принесе́м, я́ко да́ры благоприя́тны, Христу́ Бо́гу на́шему.
Припев: Поми́луй мя, Бо́же, поми́луй мя.
Елиссе́й дре́вле ка́ко пита́ше проро́ки, уве́девши душе́, любе́зно пита́йся, благодаря́щи Христа́.
Припев: Поми́луй мя, Бо́же, поми́луй мя.
Дании́л в ро́ве зве́ри укроти́, воздержа́ния броздо́ю, и мы́ постя́щеся стра́сти удручи́м.
Сла́ва, тро́ичен: Триипоста́сное еди́но Тя́ Божество́ воспева́ю, Ли́цы зра́к, Отца́ безнача́льнаго, и Сы́на, и Ду́ха Жива́го.
И ныне, Богоро́дичен: Богома́ти Отрокови́це, черто́же Небе́снаго Царя́ Христа́, спаси́ моли́твами твои́ми, любо́вию пою́щыя Тя́.
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. (Поклон земной.)
Дух же целому́дрия, смиренному́дрия, терпе́ния, и любве́, да́руй ми рабу́ Твоему́. (Поклон земной.)
Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (Поклон земной.)
Таже малых 12, глаголюще на кийждо поклон: Бо́же, очи́сти мя гре́шнаго.
И паки последи молитву всю:
Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми. Дух же целому́дрия, смиренному́дрия, терпе́ния, и любве́, да́руй ми рабу́ Твоему́. Ей, Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь. (И поклон един великий.)
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва, и ны́не: Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.
