Четверопеснец в Субботу Второй седмицы.

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Четверопе́снец, гла́с 3.

Пе́снь 6

Ирмо́с: Глубина́ страсте́й воста́ на мя́, и бу́ря проти́вных ве́тров: но предвари́в мя́ Ты спаси́ Спа́се, и изба́ви от тли́, я́ко спа́сл еси́ от зве́ря проро́ка.

Припев: Ди́вен Бо́г во святы́х Свои́х, Бог Израилев

Святи́и мно́жайшими му́ками, мно́гия враго́в тьмы́ низложи́ти сподо́бишася Спа́се, и мно́гих бла́г Твои́х улучи́ша моли́твами и́х я́ко Бла́г, мно́гая моя́ очи́сти прегреше́ния.

Припев: Ди́вен Бо́г во святы́х Свои́х, Бог Израилев

Воспои́м Христо́вы страстоте́рпцы, и возопии́м к ни́м единому́дренно: Влады́чним подо́бницы страсте́м, ду́ш на́ших стра́сти исцели́те, пости́тися же от зла́го обы́чая на́с укрепи́те.

Припев: Ди́вен Бо́г во святы́х Свои́х, Бог Израилев

Преложи́л еси́ сме́рть на со́н, боле́зненно во гро́бе поспа́л еси́, и ме́ртвым живо́т дарова́л еси́: преста́вльшыяся у́бо Спа́се сподо́би стоя́ния избра́нных, страстоте́рпец святы́х мольба́ми.

Припев: Пресвята́я Богоро́дице, спаси́ на́с.

Богоро́дичен: Пости́тися ми́, и отступи́ти от вся́каго греха́ укрепи́, Отрокови́це, си́льнаго и безгре́шнаго сло́ва, воплоще́нна неизрече́нно ро́ждшая, и да́ждь ми́ чисти́тельную оскверне́ний, Всенепоро́чная, сле́зу.

Припев: Ди́вен Бо́г во святы́х Свои́х, Бог Израилев

Му́чеников па́мять соверша́ем боже́ственно мучениколю́бцы, прииди́те возра́дуемся, пе́сньми ты́я венча́юще, подвигополо́жника Христа́ благослови́м.

Припев: Ди́вен Бо́г во святы́х Свои́х, Бог Израилев

Ра́н пе́рвее иску́с прие́мше, пото́м же ка́мением побие́ни бы́вше, претре́ни бы́вше, звере́м на сне́дь да́ни бы́сте, и закла́ни бы́сте я́ко а́гнцы Христо́вы: но живе́те при́сно страстоте́рпцы.

Припев: Сла́ва Тебе́ Бо́же на́ш, сла́ва Тебе́.

Кро́вь ва́шего терпе́ния, Го́споду мо́лится непреста́нно о на́с, му́ченицы: те́мже и ны́не помоли́теся пости́тися на́м от страсте́й безче́стия.

Припев: Ду́шы и́х во благи́х водворя́тся.

Всему́ хотя́й суди́ти ми́ру, предстоя́щым тьма́м а́нгелов, неосужде́нно тогда́ предста́ти Тебе́ сподо́би усо́пшыя, ве́рно Всеще́дрый.

Сла́ва: Три́ еди́ным Естество́м совокупля́я, еди́но же треми́ разсека́я Ли́цы, я́же Божество́ е́сть: Саве́ллиа же и А́риа, равноме́рныя стремни́ны отбега́ю.

И ныне. Богоро́дичен: Де́ва яви́лася еси́ и по рождестве́, чисто́тствуеши во обою́, и ражда́еши: странноле́пное виде́ние, глаго́лемое и разумева́емое, соде́янное в Тебе́ Богома́ти.

Пе́снь 7

Ирмо́с: Пла́мень ороси́вый пе́щный и о́троки неопали́мы спасы́й, благослове́н еси́ во ве́ки, Го́споди Бо́же оте́ц на́ших.

Припев: Ди́вен Бо́г во святы́х Свои́х, Бог Израилев

Ту́чами крове́й угаси́сте пресла́внии пла́мень пре́лести: огня́ у́бо бу́дущаго на́с моли́твами я́же ко Христу́ изба́вите, Госпо́дни страстоте́рпцы.

Припев: Ди́вен Бо́г во святы́х Свои́х, Бог Израилев

Уста́ загради́вше льво́в, му́к же опале́ния претерпе́вше страстоте́рпцы, сла́дость лу́чшую насле́довасте: ея́же улучи́ти моли́теся, и на́м во ве́ки.

Припев: Ди́вен Бо́г во святы́х Свои́х, Бог Израилев

Все́м све́том просвети́вшеся Ду́ха до́блии страстоте́рпцы, преста́вльшымся ве́рным осла́бу проси́те, и рая́ вхо́д, и жи́зни прича́стие.

Припев: Пресвята́я Богоро́дице, спаси́ на́с.

Богоро́дичен: Пе́снь приношу́ Ти́ Де́во, не пре́зри мене́ злы́ми одержи́маго, но да́ждь Чи́стая исправле́ние соверше́нное посто́м, и все́м житие́м благонра́вным.

Припев: Ди́вен Бо́г во святы́х Свои́х, Бог Израилев

О́гнь, и ме́чь, и зве́ри, страстоте́рпцы, я́ко сла́дость вмени́вше, внегда́ страда́ти удиви́сте уби́йцы ва́шя, воспева́юще Бо́га оте́ц на́ших.

Припев: Ди́вен Бо́г во святы́х Свои́х, Бог Израилев

На у́ды разсека́еми, и опаля́еми, Бо́гу принесо́стеся же́ртва благово́нная, Христо́вы му́ченицы: но Того́ о на́с при́сно моли́те.

Припев: Сла́ва Тебе́ Бо́же на́ш, сла́ва Тебе́.

Му́чеников собо́ри, с небесе́ предста́вше, ва́с воспева́ющыя благослови́те, освяти́те, усе́рдно посто́в вре́мя сконча́ти.

Припев: Ду́шы и́х во благи́х водворя́тся.

Ве́рою к Тебе́ преста́вльшыяся, ве́дый дела́ челове́ков, во́льная и нево́льная прегреше́ния проща́я, упоко́й я́ко Бо́г.

Сла́ва: В Тро́ице еди́наго Бо́га сла́влю, Отца́, Сы́на и Ду́ха: Еди́ницу про́стую, Тро́ицу честну́ю, нача́ло преднача́льное и единосу́щное.

И ныне. Богоро́дичен: Всесвята́я влады́чице Богоро́дице, моли́твы рабо́в Твои́х прие́млющи, принеси́ все́х Бо́гу, да спасе́т на́с от вся́каго искуше́ния.

Пе́снь 8

Ирмо́с: Из безнача́льнаго Отца́ рожде́ннаго пре́жде ве́к Бо́га, и в после́дняя от Богоро́дицы в пло́ть обле́кшася, я́ко соверше́нна Челове́ка и Бо́га и́стинна, по́йте, благослови́те и превозноси́те во вся́ ве́ки.

Припев: Ди́вен Бо́г во святы́х Свои́х, Бог Израилев

Му́к ви́ды не́мощию те́ла претерпе́вше, вра́чеве боля́щым страстоте́рпцы яви́стеся. Те́мже зову́: мою́ неду́гующую ду́шу исцели́те, во вре́мя поста́ покая́нием.

Припев: Ди́вен Бо́г во святы́х Свои́х, Бог Израилев

Увы́ мне́, ка́ко преидо́ша вси́ дни́е мои́ в ле́ности! и се́ коне́ц приближа́ется, вари́т несоверше́нна до́брыми де́лы прия́ти мя́: до́бре сконча́вшии тече́ние му́ченицы, да ми́ коне́ц благи́й бу́дет, моли́теся.

Припев: Ди́вен Бо́г во святы́х Свои́х, Бог Израилев

Ка́плями крове́й запале́ния безбо́жия угаси́сте, боже́ственнии страстоте́рпцы, и отше́дшым от сего́ жития́ испроси́те вои́стинну Боже́ственный поко́й, и соде́янных разреше́ние во ве́ки.

Припев: Пресвята́я Богоро́дице, спаси́ на́с.

Богоро́дичен: Иезеки́иль тя́ две́рь непроходи́мую чи́стая прови́де, покая́ния врата́ все́м отверза́ющую отча́янным. те́мже молю́ тя́: стези́ мне́ отве́рзи, ко о́ным веду́щыя упокое́нием.

Припев: Ди́вен Бо́г во святы́х Свои́х, Бог Израилев

Многострада́льныя ра́ны разли́чно претерпе́вше, о́вии у́бо сгоре́вше, друзи́и сожже́ни бы́вше, ини́и же посека́еми, веселите́ся страда́льцы воспева́юще Христу́: по́йте, благослови́те и превозноси́те во вся́ ве́ки.

Припев: Ди́вен Бо́г во святы́х Свои́х, Бог Израилев

Кровьми́ ва́шими освяща́ете концы́, ма́лыми кропле́ньми, струи́ исцеле́ний все́м источа́юще, всехва́льнии му́ченицы. те́мже вопиете́ при́сно: по́йте, благослови́те и превозноси́те во вся́ ве́ки.

Припев: Сла́ва Тебе́ Бо́же на́ш, сла́ва Тебе́.

Страстоте́рпцев ли́че, моли́теся ко Спа́су спасти́ ны, моли́твы и ны́не творя́ще, служи́ти чи́сте воздержа́нием Ему́: по́йте, благослови́те и превозноси́те во вся́ ве́ки.

Припев: Ду́шы и́х во благи́х водворя́тся.

Усо́пшыя благоче́стно наде́ждею воскре́сния, к ве́чной жи́зни воста́ти Го́споди сподо́би, хвали́ти Тя́ чи́сте, и сла́вити псало́мски: по́йте, благослови́те, и превозноси́те во вся́ ве́ки.

Слава: Триипоста́сная Еди́нице, О́тче, Сы́не и Ду́ше Живы́й, еди́но Божество́, еди́но Ца́рство: Тебе́ хва́лят незаходи́маго Све́та а́нгельская во́инства, и мы́ су́щии на земли́ пое́м, благослови́м и превозно́сим во вся́ ве́ки.

И ныне. Богоро́дичен: Се́ вси́ ро́ди блажи́м Тя́ Пречи́стая, вели́чия Твоя́ зря́ще: Ты́ бо ражда́еши преесте́ственно все́х Творца́, Бо́га су́ща и Челове́ка. Те́мже Тя́ благослови́м, и превозно́сим во вся́ ве́ки.

Пе́снь 9

Ирмо́с: Тебе́ безсме́ртный исто́чник, и святы́х исцеле́ния челове́чу ро́ду подаю́ща, при́сно велича́ем, я́ко спаса́еши ду́шы на́шя.

Припев: Ди́вен Бо́г во святы́х Свои́х, Бог Израилев

Яви́стеся боже́ственнии я́ко у́глие, вещество́ лука́вое безбо́жие попали́вше, и мече́м бесо́вския полки́ посе́кше, до́блии страстоте́рпцы, светово́дцы серде́ц на́ших.

Припев: Ди́вен Бо́г во святы́х Свои́х, Бог Израилев

Тьму́ муче́ний проидо́сте, и к све́ту мы́сленному пресели́стеся, до́блии страстоте́рпцы: те́мже просвети́те смире́нную ду́шу мою́, омраче́нную согреше́ньми.

Припев: Ди́вен Бо́г во святы́х Свои́х, Бог Израилев

Поболе́ша боле́зни пренося́ще пресла́внии страстоте́рпцы телесе́, и ны́не преста́вльшымся ве́рным, неболе́зненный поко́й про́сят, и рая́ наслажде́ние.

Припев: Пресвята́я Богоро́дице, спаси́ на́с.

Богоро́дичен: Яви́ся Чи́стая Влады́чице Боже́ственная помо́щница, непотре́бным рабо́м Твои́м, во вре́мя воздержа́ния, моли́твы на́шя принося́щи Го́сподеви, ве́ки ца́рствующему.

Припев: Ди́вен Бо́г во святы́х Свои́х, Бог Израилев

Я́коже о́гнь вложе́ни бы́вше от Бо́га в зе́млю, попали́сте вся́кую ле́сть и́дольскую, вже́гше свети́ло в концы́ благоче́стия страстоте́рпцы Христо́вы.

Припев: Ди́вен Бо́г во святы́х Свои́х, Бог Израилев

Ва́с ни пла́мень, ни заколе́ние, ни коле́са, ни стягну́тия, ни опале́ния, ни ина́я му́ка го́рькая, разлучи́ от любви́ Христо́вы, страстоте́рпцы.

Припев: Сла́ва Тебе́ Бо́же на́ш, сла́ва Тебе́.

Мно́жество му́ченик честно́е, Христа́ моли́те, в ми́ре исполня́ющым на́м тече́ние посто́в, ви́дети и поклони́тися и страсте́м Его́.

Припев: Ду́шы и́х во благи́х водворя́тся.

Ме́ртвых и живы́х я́ко Бо́г, умертви́вый сме́рть, и жи́знь воста́нием Твои́м все́м подая́й Христе́, упоко́й и рабы́ Твоя́, я́же преста́вил еси́.

Сла́ва: Еди́но и три́ воспева́ю благоче́стно божество́ зра́ком, ли́цы совокупля́я и разделя́я: Оте́ц, Сы́н, и Святы́й Ду́х, Сия́ еди́но су́ть.

И ныне, Богоро́дичен: Тя́ от ко́рене Иессе́ова, и Дави́да пра́отца прозя́бшии же́зл, Всепречи́стая Чи́стая велича́ем, я́ко спаса́еши ду́шы на́шя.

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва, и ны́не: Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, помилуй и спаси́ мя, гре́шнаго. Аминь.