Трипеснец В понедельник Седьмой седмицы по Пасхе

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды) Слава, и ныне:

О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

В понеде́льник седмы́я неде́ли по Па́сце трипе́снец, гла́с 1.

Пе́снь 1.

Ирмо́с: Твоя́ победи́тельная Десни́ца, боголе́пно в кре́пости просла́вися: Та́ бо Безсме́ртне, я́ко Всемогу́щая, проти́вныя сотре́, Израильтяном пу́ть глубины́ новосоде́лавшая.

Припев: Слава Тебе, Боже наш, слава Тебе.

Твое́ е́же на зе́млю новоле́пное схожде́ние, не разуме́вшым ангелом тогда́, восходя́щу Ти́ ны́не на небеса́ познава́ют, глаго́люще: кто́ Се́й е́сть Царь Си́л;

Припев: Слава Тебе, Боже наш, слава Тебе.

Распя́тие во́льное Христе́ претерпе́в, воскре́сл еси́ тридне́вен, та́же возше́л еси́ к небесным, ученико́м зря́щым Тя́, и дивя́щымся па́че ума́ си́ле Твое́й.

Сла́ва: Облаки восхожде́ние Твое́ всеси́льною во́лею полага́яй недомы́сленный, от горы́ елео́нския ны́не восте́кл еси́ горе́, к высоте́ о́блаком носи́мь.

И ны́не, богоро́дичен: Чи́ны ангел небесных вои́стинну Чи́стая превозшла́ еси́, Сло́во воплоти́вши Отчее: Его́же ны́не приле́жно моли́, дея́ний безслове́сных на́м изба́витися Всенепоро́чная.

Пе́снь 8.

Ирмо́с: Песносло́вцы в пещи́ спа́сшаго де́ти, и громопла́менную прело́жшаго на ро́су, Христа́ Бога по́йте, и превозноси́те во вся́ ве́ки.

Припев: Слава Тебе, Боже наш, слава Тебе.

К Безначальносве́тлому Отцу́ возше́дшаго во сла́ве, и низпосла́вшаго апостолом Дух Святы́й, по́йте, благослови́те и превозноси́те во вся́ ве́ки.

Припев: Слава Тебе, Боже наш, слава Тебе.

Воспо́йте, и по́йте Господеви, воскли́кните стра́хом оте́чествия земна́я, вознесе́ бо Ся во сла́ве дне́сь, совокупи́в с небесными во вся́ ве́ки.

Сла́ва: Му́жие галиле́йстии, что́ зря́ще на высоту́ со стра́хом, та́ко стоите́, ученико́м безпло́тнии глаго́лаху; и́мже о́бразом ви́дите, и па́ки Христо́с во сла́ве прии́дет.

И ны́не, богоро́дичен: Невозде́ланно возрасти́вшая небесный кла́с, пита́ющий Боже́ственною си́лою концы́ Дево, насы́ти а́лчущую смире́нную ду́шу мою́.

Пе́снь 9.

Ирмо́с: Образ Чи́стаго Рождества́ Твоего, огнепали́мая купина́ показа́ неопа́льная: и ны́не на на́с напа́стей свире́пеющую угаси́ти мо́лимся пе́щь, да Тя́ Богородице непреста́нно велича́ем.

Припев: Слава Тебе, Боже наш, слава Тебе.

Стра́сть и распя́тие и сме́рть за на́с претерпе́л еси́ Безгре́шне, и воскре́с боголе́пно, возше́л еси́ к Безнача́льному Сло́ве Отцу́ Твоему́: те́мже Тебе́ покланя́емся непостижи́мому Божеству́.

Припев: Слава Тебе, Боже наш, слава Тебе.

Зове́т Моисе́й духом, ангельския си́лы да укрепя́тся, все́х Царю́ теле́сно восходя́щу от земли́ к го́рним ца́рствием, и на Престо́ле Оте́честем уставля́ющу естество́ отпа́дшее.

Сла́ва: Врата́ у́мная возми́те, проро́чески вопия́ше Давид духом, Единоро́дный Сын Божий воцари́ся над все́ми язы́ки, и восхо́дит Пло́тию ко Отцу́, Его́же снизходя́ не оста́ви.

И ны́не, богоро́дичен: Ве́сь сла́дость и жела́ние Тво́й Сын, Бог и Господь, Пресвята́я Чи́стая: Его́же приле́жно моли́ с вы́шними и безпло́тными во́инствы, го́рести душетле́нныя грехо́в изба́витися на́м.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Сла́ва, и ны́не: Го́споди, поми́луй, трижды.

Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь