Четверопеснец В Субботу Шестой седмицы по Пасхе

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды) Слава, и ныне:

О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

В суббо́ту 6-я неде́ли по Па́сце, четверопе́снец, гла́с 8.

Пе́снь 6.

Ирмо́с: Моли́тву пролию́ ко Господу, и тому́ возвещу́ печа́ли моя́, я́ко зо́л душа́ моя́ испо́лнися, и живо́т мо́й а́ду прибли́жися, и молю́ся я́ко Ио́на: от тли́ Боже возведи́ мя.

Припев: Слава Тебе, Боже наш, слава Тебе.

Испо́лнив я́же на земли́ Сла́вы Твоея́, возне́слся еси́ со сла́вою несказа́нною, и Отцу́ прине́сл еси́ Пло́ть, в ню́же от на́с за милосе́рдие обле́клся еси́: и воспе́ша небе́сныя си́лы Тебе́, Еди́не Человеколю́бче.

Припев: Слава Тебе, Боже наш, слава Тебе.

Возми́теся небесная врата́, и приими́те Бога, плотоно́сца, мы́сленныя вопия́ху си́лы повину́ющымся: кто́ Се́й, Его́же глаго́лете, и хвалу́ я́ко Творцу́ вся́ческих непреста́нно прино́сите;

Сла́ва: Восхо́д стра́шный зря́ще Сло́ва ученицы́, вопия́ху: посли́ на́м Пресвята́го Духа, и си́ры не оста́ви рабы́ Твоя́, ве́дящыя Тя́ Истиннаго Бога, и Челове́ка безгре́шна.

И ны́не, богоро́дичен: Обожи́л еси́ челове́ческое естество́, неизрече́нно роди́вся от Девы, Отца́ Единосу́щное Сло́во, и возне́слся еси́ со сла́вою: да́руй ми́р Твои́м ученико́м, и ми́рови бога́тую милость.

Пе́снь 7.

Ирмо́с: Отроцы евре́йстии в пещи́ попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́ Господи Боже во ве́ки.

Припев: Слава Тебе, Боже наш, слава Тебе.

Стра́сть и сме́рть претерпе́л, и тридне́вен воста́л еси́, я́коже ре́кл еси́, и к небесным возше́л еси́, пою́щым Тя́ ученико́м, Господи Боже во ве́ки.

Припев: Слава Тебе, Боже наш, слава Тебе.

Духа на́м, я́коже обеща́л еси́, Пресвята́го посли́ Ще́дре, му́дрии ученицы́ вопия́ху, умудря́юща и вразумля́юща вся́ ве́рныя во ве́ки.

Сла́ва: Рука́ми восплещи́те язы́цы, воскли́кните Богу в весе́лии: вознесе́ся Христо́с, и седи́т во сла́ве одесну́ю, я́ко Сопресто́лен Отцу́, во ве́ки.

И ны́не, богоро́дичен: Не́дра Отча не истощи́в, в не́дрех Твои́х Сло́во восклони́ся, безслове́сия на́с избавля́я, Дево, пою́щих Господа Бога во ве́ки.

Пе́снь 8.

Ирмо́с: Седмери́цею пе́щь, халде́йский мучи́тель, богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Припев: Слава Тебе, Боже наш, слава Тебе.

Вообра́жся, я́коже пи́шет, па́че ума́ в чу́ждее, и страстьми́ все́м ве́рным безстра́стие я́ве да́руя, от земли́ восхо́дит, ны́не яви́тися Отеческому лицу́: ангелом, архангелом, престо́лом и господьством, того́ славосло́вящым во вся́ ве́ки.

Припев: Слава Тебе, Боже наш, слава Тебе.

Белоно́сцы ангели апостолом предста́ша, недоумышля́ющымся но́вому виде́нию Твоего вознесе́ния, Сло́ве Отцу́ Безнача́льне, глаго́люще: вы́ что́ взира́ете, та́ко чудя́щеся, на высоту́; Иисус Се́й па́ки прии́дет суди́ти ми́ру, и́мже о́бразом ви́дите.

Сла́ва: Вся́ соверши́вый Господи, я́ко Бог непрело́жен, к небесным с Пло́тию восте́кл еси́, повину́ющымся Тебе́ ангельским си́лам, и ра́достно ученико́м Тебе́ сла́вящым, и со стра́хом пою́щым: свяще́нницы воспо́йте, лю́дие превозноси́те во вся́ ве́ки.

И ны́не, богоро́дичен: Богороди́тельнице Пречистая, души́ моея́ я́звы, и греха́ моего стру́пы очи́сти, исто́чники излива́ющи из ре́бр Рождества́ Твоего, и и́же из Него очища́ющи струя́ми: к Тебе́ бо взыва́ю, и к Тебе́ припа́даю, и Тебе́ призыва́ю еди́ну спаси́тельницу.

Пе́снь 9.

Ирмо́с: Устраши́ся вся́к слу́х, неизрече́нна Божия снизхожде́ния, я́ко вы́шний во́лею сни́де да́же и до Пло́ти, от Деви́ческаго Чре́ва бы́в челове́к: те́мже Пречистую Богородицу ве́рнии велича́ем.

Припев: Слава Тебе, Боже наш, слава Тебе.

Возми́те врата́ мы́сленныя, небесныя си́лы, прии́де Царь на́ш, ме́ртвенное существо́ прии́м, и вни́дет Бог Сы́й и Челове́к ко Отцу́ Своему́, соде́лав стра́шная и пресла́вная.

Припев: Слава Тебе, Боже наш, слава Тебе.

По́йте вси́ разу́мно, воскли́кните Богу, сотвори́вшему дела́ пресла́вная, и возше́дшему к небесным, и апостолом Свята́го Духа низпосла́вшему, просвеща́ющему на́с сла́вящих Божество́ Его.

Сла́ва: Разруши́ся а́д погребе́нием, и воста́ние челове́ком дарова́ся воскресе́нием Твои́м, и озари́ся земля́, и небесная вознесе́нием Твои́м Христе́, Еди́не Непреме́нне и Всеси́льне, Да́телю Благи́х, и Спаси́телю на́ш.

И ны́не, богоро́дичен: Гла́с Ти́ Гаврии́лов со все́ми ангелы прино́сим: ра́дуйся пала́то Царя́ возжеле́нная: ра́дуйся земна́я с небесными Дево совокупи́вшая, ея́же ра́ди спаса́емся, ве́дуще Тя́ Чи́стую Богома́терь.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Сла́ва, и ны́не: Го́споди, поми́луй, трижды.

Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь