Трипеснец В понедельник Пятой седмицы по Пасхе

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

И тропарь, глас 5, трижды:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды) Слава, и ныне:

О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

В понеде́льник пя́тыя неде́ли по Па́сце.

Трипе́снец, его́же краегране́сие: Сла́ва Богу на́шему

Гла́с 4.

Пе́снь 1.

Ирмо́с: Триста́ты кре́пкия, рожде́йся от Девы, безстра́стия во глубине́, души́ трича́стное потопи́, молю́ся, да Тебе́ я́ко в тимпа́не, во умерщвле́нии телесе́ побе́дное воспою́ пе́ние.

Припев: Слава Тебе, Боже наш, слава Тебе.

Связа́в вра́жию губи́тельную держа́ву у́зами, и́миже претерпе́л еси́ на́с ра́ди Человеколю́бче: Кресто́м твои́м умири́л еси́ Господи расточе́нныя, и вражду́ разори́л еси́ средосте́ния: те́мже воспева́ем Тя́.

Припев: Слава Тебе, Боже наш, слава Тебе.

Господь, я́коже предрече́ пре́жде Страсти, Воскре́се держа́вно, плени́в я́ко Бог а́дова ца́рствия, вся́ же воздви́г ту́ спя́щыя от ве́ка, Того́ велича́ющыя.

Сла́ва: Дивя́ся виде́нию и о́бразу мироно́сиц ли́к Боже́ственнаго служи́теля, от него науча́хуся: се́ Христо́с Воскре́се, ше́дше пропове́дите ученико́м, рыда́ющым и пла́чущым.

И ны́не, богоро́дичен: Возсия́, Чи́стая, я́ко Жени́х красе́н из ме́ртвых, от Твои́х ложе́сн воплоти́выйся, па́че ума́ бла́гостию: те́мже со апо́столы ви́девши, сла́вила еси́ тридне́вное Его Воскресе́ние.

Пе́снь 8.

Ирмо́с: Изба́вителю все́х Всеси́льне, посреде́ пла́мене благоче́ствовавшыя снизше́д ороси́л еси́, и научи́л еси́ пе́ти: вся́ дела́ благослови́те, по́йте Господа.

Припев: Слава Тебе, Боже наш, слава Тебе.

Пречи́стыя просте́рл еси́ дла́ни Твои́ на Кресте́ во́лею Долготерпели́ве, объя́т все́х, и от руки́ изба́вив чужда́го: сего ра́ди Тя́ со стра́хом сла́вим.

Припев: Слава Тебе, Боже наш, слава Тебе.

Якоже положи́лся еси́ во́лею во гро́бе, спя́щии дре́вле во гробе́х, е́же из ме́ртвых воста́нием Твои́м совозста́ша, стра́хом вопию́ще: благослови́те вся́ дела́ Господня Господа.

Припев: Слава Тебе, Боже наш, слава Тебе.

Ди́вна и пресла́вна чудеса́, де́йствуяй Христе́ Твои́м глаго́лом, собо́р евре́йский ви́дев Тя́ осужда́ет на сме́рть, Жи́знь все́х су́щую, благоутро́бне Господи.

Сла́ва: Во дне́х Христе́ четы́редесятих, с му́дрыми и честны́ми апостолы я́ве водворя́яся, вве́рил еси́ боже́ственное смотре́ние, и́мже спа́сл еси́ ми́р пою́щий Тя́.

И ны́не, богоро́дичен: Яко стра́шное Твое́ Рождество́ Непоро́чная, и́мже вси́ стра́шнаго паде́ния изба́влени бы́хом, зову́ще: ра́дуйся все́х челове́ков предста́тельнице, ра́дуйся ми́ра па́дшаго воззва́ние.

Пе́снь 9.

Ирмо́с: Ева у́бо неду́гом преслуша́ния кля́тву всели́ла е́сть: Ты́ же Дево Богородице, прозябе́нием чревоноше́ния ми́рови благослове́ние процвела́ еси́: те́м Тя́ вси́ велича́ем.

Припев: Слава Тебе, Боже наш, слава Тебе.

Просте́рлся еси́ во́лею на Кресте́, и со́лнце зря́ Тебе́ Преблаги́й, стра́хом скры́ лучы́, и поколеба́шася земли́ основа́ния, и ка́мение распаде́ся, Владыко, и церко́вная заве́са раздра́ся.

Припев: Слава Тебе, Боже наш, слава Тебе.

Пома́зав Тя́ дре́вле Ио́сиф, и плащани́цею обви́в, положи́ в но́вем гро́бе, Жи́знь су́щую все́х, и воскре́сл еси́ тридне́вно, истощи́в а́дова ца́рствия Боже́ственною си́лою Всемоги́й.

Сла́ва: Ви́ден бы́л еси́ апостолы, из гро́ба воста́в тридне́вно, и возопи́л еси́: иди́те дру́зи и ученицы́ Мои́, пропове́дите во все́х язы́цех, я́же ви́десте чудеса́, и ю́же па́че сло́ва си́лу Мою́.

И ны́не, богоро́дичен: Ме́ртвым вдыха́ющаго Жи́знь, я́коже ви́де Всенепоро́чная, из гро́ба воста́вша со сла́вою, испо́лнися ра́дости, зову́щи: Сыне Мо́й и Боже Мо́й, велича́ю Твое́ е́же па́че сло́ва снизхожде́ние.

Вместо Достойно: поем:

А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся.

Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Господи, помилуй (трижды).

Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь

И паки: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. (Трижды.)

И нам дарова́ живо́т ве́чный, / покланя́емся Его́ / тридне́вному Воскресе́нию.