Трипеснец Во Вторник второй седмицы по Пасхе

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

И тропарь, глас 5, трижды:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды) Слава, и ныне:

О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Во вто́рник вторы́я неде́ли по Па́сце.

Трипе́снец, его́же краегране́сие: Воспою́ Богу Ио́сиф.

Гла́с 1.

Пе́снь 2.

Ирмо́с: Ви́дите ви́дите, я́ко Бог а́з е́смь, порабоще́ныя лю́ди израилевы Моисе́ю народоводи́ти в пусты́ни повеле́вый, и спасы́й я́ко си́лен вла́стию Свое́ю.

Припев: Слава Тебе, Боже наш, слава Тебе.

Пои́м дне́сь, Господеви, восклица́юще распе́ншемуся на́с ра́ди, и низложи́вшему злонача́льнаго врага́, и поло́жшемуся во гро́бе и оживи́вшему ме́ртвыя воскресе́нием свои́м. 

Припев: Слава Тебе, Боже наш, слава Тебе.

Свят Господь, из ме́ртвых тридне́вно воскресы́й я́ко си́лен, ученико́м явле́йся боголе́пно, и ра́дости неизглаго́ланныя си́х испо́лнивый ду́шы, ско́рби испо́лненныя пре́жде.

Сла́ва: Сло́ве Собезнача́льне, Отцу́ Безнача́льну сопресто́льне, распны́йся и вмени́выйся в ме́ртвых, и воскресы́й я́ко си́лен, мою́ ду́шу оживотвори́ умерщвле́ную преступле́ньми.

И ны́не, богоро́дичен: О чуде́с твои́х! О стра́шнаго слы́шания! Ражда́еши бо пло́тию Бога, разо́ршаго сме́ртныя у́зы, и от тли́ челове́ки изме́ншаго, Чи́стая Богоблагода́тная.

Пе́снь 8.

Ирмо́с: Его́же ужаса́ются ангели, и вся́ во́инства, я́ко Творца́ и Господа, по́йте свяще́нницы, просла́вите о́троцы, благослови́те лю́дие, и превозноси́те во вся́ ве́ки. 

Припев: Слава Тебе, Боже наш, слава Тебе.

Рыда́ет вся́ тва́рь о Твое́й страсти блаже, со́лнце поме́рче, Тебе́ заше́дшу на Кресте́, и во тме́ седя́щии вели́кий све́т ви́деша, пою́ще Тя́ ще́дро.

Припев: Слава Тебе, Боже наш, слава Тебе.

Вострепета́ а́д, Тя́ ви́дев с душе́ю к нему́ иду́ща Христе́ Всецарю́, и я́же от ве́ка ме́ртвыя издава́ше, воспева́ющыя Твое́ человеколю́бие.

Сла́ва: Яви́лся еси́ Христе́, от гро́ба воста́в, прине́сшым арома́ты божественным жена́м, и си́х рыда́ние претвори́л еси́, утеше́ние все́х сы́й во ве́ки.

И ны́не, богоро́дичен: Ви́девши, Его́же родила́ еси́ Бога, из ме́ртвых воста́вша, ра́дости яви́лася еси́ испо́лнена Дево Мари́е: того́ у́бо моли́ Чистая, вся́кую печа́ль на́шего се́рдца до конца́ потреби́ти.

Пе́снь 9.

Ирмо́с: Светоно́сный о́блак, во́ньже все́х Владыка, я́ко до́ждь с небесе́ на руно́ сни́де и воплоти́ся на́с ра́ди, бы́в Челове́к, Безнача́льный: велича́ем вси́ я́ко Матерь Бога на́шего Чи́стую.

Припев: Слава Тебе, Боже наш, слава Тебе.

Яко ви́де Тя́ на дре́ве во́лею распя́та, благоразу́мный разбо́йник, помяни́ мя, вопия́ше, егда́ прии́деши Иисусе во Царствии Твое́м: и бы́сть ра́еви жи́тель, ве́рою еди́ною оправда́вся.

Припев: Слава Тебе, Боже наш, слава Тебе.

Тя́ Спасе ви́дев в ме́ртвых а́д умертви́ся, и издава́ше мертвецы́, я́же пожре́ дре́вле, славосло́вящыя Христе́ Твою́ неизглаго́ланную си́лу, и мно́гое благосе́рдие, и́мже спа́сл еси́ на́с Всецарю́.

Сла́ва: Приидо́ша нося́щыя ми́ра на гро́б жены́, и ви́девше Тя́ Христе́ воста́вша из гро́ба, ра́дости испо́лнишася мно́гия, и апостолом Твои́м возвести́ша, я́ко воскресл и яви́лся еси́, совозста́вль ми́р ве́сь с Собо́ю.

И ны́не, богоро́дичен: Све́т невече́рний, просия́вший из ме́ртвых ви́девши Чистая, и ра́дости испо́лнившися мно́гия, ра́довалася еси́ с пресвяты́ми ученики́, с ни́миже и на́м испроси́ проще́ние безме́рных прегреше́ний, Богородице Засту́пнице ве́рных.

Вместо Достойно: поем:

А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся.

Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Господи, помилуй (трижды).

Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь

И паки: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. (Трижды.)

И нам дарова́ живо́т ве́чный, / покланя́емся Его́ / тридне́вному Воскресе́нию.