Трипеснец В понедельник второй седмицы по Пасхе

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас. Ами́нь.

И тропарь, глас 5, трижды:

Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в.

Святы́й Бо́же, Святы́й кре́пкий, Святы́й безсме́ртный, поми́луй нас. (Трижды)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды) Слава, и ныне:

О́тче наш, И́же еси́ на небесе́х, да святи́тся и́мя Твое́, да прии́дет ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

В понеде́льник вторы́я неде́ли по Па́сце трипе́снец, его́же краегране́сие: Воспое́т же тя́ Ио́сиф. Гла́с 1.

Пе́снь 1.

Ирмо́с: Твоя́ победи́тельная десни́ца, боголе́пно в кре́пости просла́вися: та́ бо безсме́ртне, я́ко всемогу́щая, проти́вныя сотре́, израильтяном пу́ть глубины́ новосоде́лавшая.

Припев: Слава Тебе, Боже наш, слава Тебе.

Воспои́м Богу я́ко победи́телю, низложи́вшему сме́ртию сме́рть, и воскреси́вшему с собо́ю ро́д челове́ческий, и нетле́нием пребога́тно поче́тшему.

Припев: Слава Тебе, Боже наш, слава Тебе.

Свя́зан бы́в, сме́ртныя у́зы я́ко си́лен кре́постию растерза́л еси́: разреши́в же челове́ки от тли́, из а́да воскреси́л еси́ воспева́ющыя держа́ву Твою́, Многоми́лостиве.

Сла́ва: Благоутро́бне Христе́, мене́ ра́ди да́же до а́да бы́вый во́лею, лежа́ща мя́ в гро́бе грехо́вном, и в ро́ве преступле́ний, Твои́м присеще́нием воскреси́в поми́луй.

И ны́не, богоро́дичен: Ви́девши Христа́ от ме́ртвых, Богороди́тельнице, пло́тию воста́вша, ра́довалася еси́: испроси́ же и мне́ радостотво́рный пла́чь ны́не дарова́ти, я́ко да обря́щу тогда́ Чи́стая, боже́ственное утеше́ние.

Пе́снь 8.

Ирмо́с: В пещи́ о́троцы израилевы, я́коже в горни́ле, добро́тою благоче́стия чисте́е зла́та блеща́хуся, глаго́люще: благослови́те вся́ дела́ Господня Господа, по́йте и превозноси́те во вся́ ве́ки.

Припев: Слава Тебе, Боже наш, слава Тебе.

Кресто́м Твои́м разреши́л еси́ кля́тву, положи́вся во гро́бе, и а́дово мра́чное Христе́ мо́й Иисусе, низложи́в ца́рство, и воскре́с, всю́ тва́рь с собо́ю воскреси́л еси́: те́мже Тя́ пое́м во вся́ ве́ки.

Припев: Слава Тебе, Боже наш, слава Тебе.

Возше́дшу Ти́ на крест со́лнце угасе́, во а́д же соше́дшу Ти́ человеколю́бче, све́т возсия́ душа́м во тме́ су́щым, и погребе́ным под го́рькою сме́ртью. Те́мже тя́ пое́м во вся́ ве́ки.

Сла́ва: Свя́зана мя́ плени́цами грехо́вными, разреши́ Христе́, и осия́й ми́ покая́ния боже́ственную све́тлость Спасе, от тмы́ ве́чныя избавле́й челове́ки, Твои́м стра́шным воста́нием, е́же воспева́ем во вся́ ве́ки.

И ны́не, богоро́дичен: На руку́ нося́щая Христа́, из Тебе́ воплоще́нна Дево, того́ моли́ прия́ти ны́не и мене́, безпу́тием вся́цем жития́, и согреше́ньми безчи́сленными заблу́ждшаго, срета́ющу ми́ нра́ву ле́ностному всегда́.

Пе́снь 9.

Ирмо́с: Образ чи́стаго рождества́ твоего огнепали́мая купина́ показа́ неопа́льная, и ны́не на на́с напа́стей свире́пеющую угаси́ти, мо́лимся, пе́щь: да тя́ Богородице непреста́нно велича́ем.

Припев: Слава Тебе, Боже наш, слава Тебе.

Ви́дя со́лнце распина́ема омрачи́ся, посреде́ разбо́йнику Тя́ Сло́ве, Со́лнца незаходи́маго: го́ры, хо́лми, земля́ и мо́ре уклони́шася: а́д вострепета́, ю́зники разреша́я, я́же держа́ше, воспева́ющыя Тя́.

Припев: Слава Тебе, Боже наш, слава Тебе.

Яви́лся еси́ я́коже вели́кое Со́лнце, под зе́млю заше́д, возсия́л же еси́ незаходи́мое свети́ло от ме́ртвых, озари́в пресла́вно земны́я концы́: те́мже Тя́ Животода́вче непреста́нно велича́ем.

Припев: Слава Тебе, Боже наш, слава Тебе.

Спасе Иисусе, твое́ю сме́ртию сме́рть разори́вый, воскреси́вый же вся́ та́мо держи́мыя, воскреси́ и мене́, в ро́ве преиспо́днем страсте́й смертоно́сных и грехо́в су́ща, зову́ Ти Человеколю́бче.

Сла́ва:  Приидо́ша мироно́сицы пла́чуще на гро́б ра́но, и не обре́тше Тя́, ви́деша в бе́лых ри́зах председя́ща ангела, и вопию́ща: воста́ Господь, спеши́те возвести́ти воста́ние ученико́м его.

И ны́не, богоро́дичен: Диви́тся вся́ тва́рь Владычице, е́же па́че ума́ та́инству рождества́ Твоего: ражда́еши бо Бога Емману́ила, бы́вша на́с ра́ди Челове́ка Всенепоро́чная, и разруши́вшаго сме́рти мучи́тельства Кресто́м Свои́м.

Вместо Достойно: поем:

А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся.

Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Господи, помилуй (трижды).

Господи Иисусе Христе, Сыне Божий, молитвами Пречистыя Твоея Матере, преподобных и богоносных отец наших и всех святых помилуй и спаси нас, яко Благ и Человеколюбец. Аминь

И паки: Христо́с воскре́се из ме́ртвых, / сме́ртию смерть попра́в / и су́щим во гробе́х живо́т дарова́в. (Трижды.)

И нам дарова́ живо́т ве́чный, / покланя́емся Его́ / тридне́вному Воскресе́нию.