Синаксарь Недели о Самаряныне

Стихи́: Во́ду прия́ти прише́дши тле́нную же́но:

Живу́ю почерпа́еши, е́юже скве́рны душе́вныя омыва́еши.

В то́йже де́нь, в неде́лю пя́тую по Па́сце, самаряны́ни пра́здник пра́зднуем: поне́же в то́й Христо́с Месси́ю Себе́ я́ве испове́доваше, е́же е́сть Христо́с [или́ пома́зан]: Ме́са бо у евре́й, еле́й. Сего́ бо ра́ди мню́ и в средопентико́стную седми́цу учине́н бы́сть. И я́ко в пре́жде тоя́ у́бо неде́ли в купе́ли чудоде́йствует, в се́й же над Иа́ковлим студенце́м, к жене́ бесе́дуя Христо́с, и́же студене́ц са́м Иа́ков ископа́, и дарова́ Ио́сифу сы́ну своему́: изря́дно бо бе́ ме́сто сие́, иде́же и бли́з су́щу горы́ Сомо́ры, самаря́не населя́ху гра́ды мно́ги. В Сиха́рь же прихо́дит Христо́с, иде́же обита́вшу дре́вле Иа́кову, с Ди́ною дще́рию свое́ю, и с сы́нми, Сихе́м сы́н Емо́ров Хоре́й возжеле́ ея́, и наси́лив бы́сть с не́ю. И отту́ду бра́тия тоя́ раздражи́вшеся на ре́вность зело́, внеза́пу вше́дше в гра́д, вку́пе вся́ убива́ют, и того́ Сихе́ма, и отца́ его́ Емо́ра. Обита́ет у́бо та́мо Иа́ков, и настоя́щий студене́ц ископа́. Не самари́тяне же пре́жде обита́ху у тоя́ горы́, но исра́ильтяне Бо́гу прирази́вшеся, Факе́ю ца́рствующу, пе́рвым пле́ном и вторы́м, Ассири́ом прише́дшым под да́нь си́х подложи́ша: и пома́ле Оси́ю ца́рствующу, прилага́ются к ефио́пляном: е́же уве́дев ассири́йский ца́рь, преселя́ет я́ в Вавило́н. На о́ном же ме́сте разли́чным язы́ком жи́ти повеле́: но Бо́г львы́ на иноплеме́нники о́ныя пуща́ет. Ца́рь же ассири́йский па́ки уве́дев сие́, свяще́нники от иуде́й те́м посыла́ет, [еще́ бо та́мо бя́ху плене́ннии,] я́ко да и Бо́жия зако́ны прии́мут. И от и́дол у́бо ско́ро отскочи́ша. Еди́ны же пя́теры кни́ги Моисе́овы прия́ша, отмета́ющеся проро́к, и про́чаго писа́ния. Си́и и самаря́не зово́ми бя́ху, я́ко от горы́ Сомо́ры: и ненави́дими бя́ху евре́йми, от плене́ния возвраща́ющимися, зане́ и́сполу иуде́йствоваху, и не ядя́ху с ни́ми, ме́рзостны я́ непщу́юще. Те́мже и Христа́ самаряни́на мно́гажды нарица́ху, я́ко не́кая от зако́нных у́бо презира́юща и разруша́юща, я́коже они́. Прихо́дит у́бо в Сиха́рь Госпо́дь, и труди́вся от путеше́ствия, се́де о часе́ шесто́м дне́. Жена́ же не́кая от гра́да прии́де почерпсти́ воды́, ученико́м отше́дшым на ку́плю пи́щи: про́сит у́бо воды́ Иису́с. Она́ же не прикаса́тися предлага́ет, позна́ бо его́ и от гла́са, и от оде́жды. О́н же возво́дит ю́, духо́вную во́ду принося́ в среду́, ю́же неоску́дную и чисти́тельную показу́ет: Ду́х бо воде́ и огню́ при́сно уподобля́ется. Жена́ же неотсту́пно прилежа́щи не име́ти о́ному во́ду такову́ю, за е́же почерпа́ла не носи́ти, и студенцу́ бы́ти глубоку́ приглаго́лет. Та́же и на пра́отца Иа́кова возно́сит сло́во, я́ко са́м студене́ц ископа́: и о́н, и о́вцы его́ от него́ пия́ху, бога́тое отсю́ду исто́чнику представля́ющи, и е́же и́нако благопотре́бну и студену́. Христо́с у́бо не бо́льша себе́ глаго́лет Иа́кова, да не жену́ устраши́т, но о воде́ глаго́лет, представля́я отсю́ду тоя́ предо́брое: пия́й от воды́ о́ноя ника́коже вжа́ждет. Про́сит же воды́ жена́, о́н же глаго́лет своего́ е́й му́жа пригласи́ти, я́ко тверде́йших слове́с тре́бующи разуме́ния. Она́ же отри́чется не име́ти му́жа. Ве́дый же вся́, глаго́лет: до́бре рекла́ еси́, пя́ть бо име́ла еси́, я́коже зако́н повелева́ет, и его́же ны́не и́маши шеста́го я́ко беззако́нно о́ному сбыва́ющая, не́сть ти́ му́ж. Не́цыи у́бо пя́ть муже́й, пя́ть кни́г моисе́овых непщева́ша бы́ти, я́же самаря́не прие́мляху: шеста́го же та́ словеса́ Христо́ва, я́же не бы́ша еще́ о́ная: и́бо не у́ благода́ть излия́на бе́. Друзи́и же, да́нныя пя́ть зако́ны от Бо́га, и́же в раи́, и по изгна́нии, и́же при Но́и, и́же при Авраа́ме, и́же при Моисе́и. Шесты́й же Ева́нглие, е́же и еще́ не имя́ше. Су́ть же и́же и пя́ть чу́вствий глаго́лют. Отвещава́ет ему́ жена́, Проро́ка его́ имену́ющи. Та́же вопроша́ет Его́ и о горе́, где́ подоба́ет кла́нятися, в Сомо́ре ли, или́ во Иерусали́ме. Не мня́ху бо самаря́не, я́ко соверше́нно везде́ Бо́гу бы́ти, но та́мо пребыва́ти то́чию Бо́гу, иде́же и поклоня́хуся, в Гари́зе я́ве горе́, за е́же та́мо да́тися благослове́нию от Бо́га. Или́ зане́ та́мо пе́рвый Авраа́м же́ртвенник водрузи́ Бо́гу, я́коже иуде́и па́ки глаго́лаху: во Иерусали́ме подоба́ет покланя́тися Еди́ному Бо́гу. Те́мже и́же и отвсю́ду в пра́здник та́мо собира́хуся. Христо́с же отвещава́ет, от иуде́й глаго́ля спасе́ние ми́рови: оба́че рече́, Бо́г невеще́ственный е́сть, и покланя́тися сподо́бльшиися, не в же́ртвах уже́ покло́нятся, но в Ду́се и и́стине. Или́ и си́це Бо́га позна́ют, не еди́наго, но в Ду́се Свято́м и Сы́не, то́й бо и́стина. Жена́ па́ки глаго́лет: слы́шим от писа́ний, я́ко Месси́а гряде́т, е́же е́сть Христо́с. Иису́с же глаго́лет: А́з е́смь, благонра́вие жены́ разуме́в. Ве́даша же самаря́не и о Месси́и от моисе́йских кни́г, изря́днее же от Сего́: е́же проро́ка ва́м возста́вит Госпо́дь Бо́г, и от ины́х мно́гих. Конча́вшейся же бесе́де, и ученицы́ прихо́дят, и кра́йнему удивля́ются схожде́нию, ка́ко с жено́ю глаго́лаше? Оба́че же моля́ху его́ я́сти, ку́пно у́бо за е́же потруди́тися, и за вре́мене зно́йное. О́н же о ве́чной пи́щи те́м глаго́лет челове́ческаго я́ве спасе́ния, и я́ко подоба́ет и́м проро́ческия труды́ пожа́ти. Но жене́ во гра́д дости́гшей, и я́же о себе́ сказа́вшей, вси́ воздви́гшеся, и ко Христу́ прихо́дят ве́ровавше: я́ко не бы́ жена́ себе́ порекла́, а́ще не бы́ вели́ко что́ разуме́ла. И мольбу́ излия́вше, тому́ пребы́ти у ни́х во дню́ двою́, умоля́ют его́. И пребы́в, мно́жайша соде́я чудеса́, я́же у́бо от мно́жества во Ева́нглии не писа́шася. Сия́ же е́сть самаряны́ня, последи́ от Христа́ Фоти́ниа именова́нная, я́же и муче́ния венце́м увязе́ся при Неро́не ке́саре, и с седмию́ свои́ми сы́ны, по мно́зе озлобле́нии, и строга́нии, и сосцу́ отре́зании, сокруше́нии ру́к, и тросте́й то́нких под но́гти влага́нии, и о́лова напое́нии, и ины́х безчи́сленных му́к истяза́нии, наконе́ц от двою́ фи́нику привяза́нии и расторгну́тии. Ве́домо же бу́ди, я́ко студенца́ о́наго го́рлище, си́речь у́стие, ца́рь Иустиниа́н че́стне отту́ду прине́с, в Бо́жия сло́ва вели́ком хра́ме святы́я Софи́и положи́: но и ка́мень, на не́мже Христо́с седя́ самаряны́ни бесе́доваше, и досе́ле обоя́ пребыва́ют пред па́пертом от восто́ка, в хра́м входя́щым на ле́вой стране́, вся́к неду́г исцеля́юща, па́че же от огне́виц страда́ти приключа́ющымся, и тряса́вицею боля́щым, очища́ют же и отго́нят и чарова́ния быва́емая. Твоея́ му́ченицы Фоти́нии моли́твами, Христе́ Бо́же, поми́луй на́с. ами́нь.