Среда 4-й седмицы. Избранные службы Триоди Постной - богослужения Великого поста.

В СРЕДУ СРЕДНИЯ СЕДМИЦЫ
НА УТРЕНИ

Троичны гласа. По 1-м стихословии седальны Крестны Осмогласника.

По 2-м же стихословии
глаголем настоящий седален господина Иосифа, глас 6.
Подобен: Упова́ние мира:

Воздержа́ния вре́мя, / освяща́ющий боже́ственный и всечестны́й Крест в поклоне́ние лежи́т, / присту́пим со́вестию чи́стою, / почерпе́м освяще́ние, и просвеще́ние, / и со стра́хом возопии́м: / Человеколю́бче Спа́се наш, / сла́ва благоутро́бию Твоему́. [Дважды.]

Крестобогородичен. Подобен: Предстоя́щи Кресту́ Неискусобра́чная Ма́ти, / от Нея́ безсе́менно Ро́ждшагося, взыва́ше: / меч се́рдце Мое́ про́йде, о Сы́не! / Не терпя́щи пове́шена на Дре́ве Тя зре́ти, / Его́же трепе́щут вся́ческая, я́ко Созда́теля и Бо́га, / долготерпели́ве, сла́ва Тебе́.

По 3-м стихословии седален, господина Феодора, глас 1.
Подобен: Отча́янная:

Просвети́вшеся доброде́тельми, / присту́пим воздержа́ния чистоту́ стяжа́вше, / и Кресту́ честно́му вопию́ще поклони́мся: / освяти́ на́ша ду́ши и телеса́, / сподо́би нас и пречи́стей стра́сти Твое́й поклони́тися, / еди́не Бо́же всех, / да́руй нам и ми́лости твоя́. [Дважды.]

Крестобогородичен, глас тойже.
Подобен: Гроб Твой:

Зря́щи Тя, Христе́, Всенепоро́чная Ма́ти, / ме́ртва на Кресте́ просте́рта, вопия́ше: / Сы́не Мой собезнача́льне Отцу́ и Ду́хови, / ко́е неизрече́нное смотре́ние Твое́ сие́, / и́мже спасл еси́ пречи́стых рук Твои́х, Ще́дре, созда́ние?

Канон Креста,
егоже краестрочие: Всечестно́му поклони́мся Дре́ву.
Творение господина Феофана, глас 4.
Песнь 1.

Ирмос: Отве́рзу уста́ моя́:

Дре́ву свято́му, на не́мже Христо́с простре́ дла́ни, / побежда́яй сопроти́вная нача́ла, / поклони́мся, посто́м очи́стившеся, / в хвалу́ и сла́ву Вседержи́теля.

Ви́дится предлежи́мь, / освяще́ние подава́яй, Крест спаси́тельный, / к сему́ присту́пим, очи́стивше и те́ло и се́рдце, / и почерпе́м благода́ть спаси́тельную.

Огне́м мя очи́сти за́поведей Твои́х, Человеколю́бче, / и Твоя́ спаси́тельная пода́ждь ми стра́сти ны́не ви́дети, / и любо́вию поклони́тися, / Кресто́м огражда́ему, и соблюда́ему.

Богородичен: Вознесе́ние ви́дящи на Кресте́ Твое́, Человеколю́бче, / рыда́ше зову́щи Тя Ро́ждшая: / ка́ко осужде́н, хотя́й всем суди́ти, / ви́дится вися́й сла́вы Госпо́дь?

Песнь 3.

Ирмос: Твоя́ песносло́вцы:

Поста́ водо́ю сердца́ очи́стивше, / дре́во Кре́стное ве́рно обы́мем, / на не́мже Христо́с ви́ся, / во́ду нам оставле́ния, я́ко Благоде́тель, источи́.

Кре́стным ве́трилом окрили́вшеся, / кора́бль спаси́тельный се поста́ преполови́вше, / Месси́а Иису́се Бо́же, / и́мже нас стра́сти Твоея́ к приста́нищу окорми́.

Образова́ше Моисе́й / тя на горе́ враго́в на убие́ние, Кре́сте; / мы же вообража́ем тя се́рдцем, / и зря́ще тя, и покланя́ющеся, / побежда́ем враги́ безпло́тныя си́лою твое́ю.

Богородичен: Хоте́нием Твои́м Челове́к был еси́, / Бог сый, и всех Творе́ц, / и ны́не на Кресте́ Тя ви́сима зрю, / Сы́не Мой, Христе́, Тя ро́ждшая глаго́лаше, / и се́рдцем уязвля́юся.

Трипеснец, глас 6:
Песнь 3.

Ирмос: Госпо́дь сый всех:

Госпо́дь сый всех, и Зижди́тель Бог, / посреде́ земли́ на Кресте́ возне́слся еси́, / к Себе́ вознося́ челове́ческое существо́, / па́дшее злым врага́ сове́том. / Те́мже Тя ве́рно сла́вим, / стра́стию Твое́ю утвержда́еми.

Очи́стивше чу́вства поще́ния све́том, / Креста́ мы́сленными луча́ми, / бога́тно ве́рнии озари́мся, / и сей благогове́йно предлежа́щий днесь зря́ще, / устна́ми чи́стыми и усты́, / и се́рдцем целу́ем.

Ме́сту, на не́мже стоя́сте но́зе Христо́вы, / поклони́мся боже́ственному Кресту́, / на ка́мени Бо́жиих за́поведей / утверди́тися нога́м прося́ще души́ на́шея, / напра́витися сея́ стопа́м на путь ми́рный, / Боже́ственною благода́тию.

Богородичен: Из Отрокови́цы безму́жныя / проше́л еси́, Христе́, / прии́м от Сея́ плоть мы́сленную и одушевле́нную, / и Кресто́м Твои́м врага́ потреби́в, / истле́вшее челове́ческое существо́ па́ки обнови́л еси́: / те́мже сла́вим благоутро́бие Твое́.

Иный, глас 1.

Ирмос: Утверди́, Го́споди:

Восплещи́те вси концы́ пе́сньми, / зря́ще покланя́емое Дре́во, / на не́мже Христо́с пове́шен бысть, / и диа́вол уязви́ся.

Предлага́ется днесь живоно́сная ра́дость, / прииди́те вси поклони́мся со стра́хом / Христо́ву честно́му Кресту́, / да прии́мем Ду́ха Свята́го.

Троичен: Трилу́чное Со́лнце, трисия́нный Све́те, / Бо́же О́тче, Сы́не и Святы́й Ду́ше, / безнача́льное Естество́ и сла́во, / пою́щия Тя изба́ви от бед.

Богородичен: Пою́т Тя чи́ни а́нгельстии, / благослове́нная Богоро́дице всепе́тая и Де́во, / с ни́миже ны́не Тя род челове́ческий, / я́ко Безневе́стную славосло́вит.

Сла́ва Тебе́, Бо́же наш, сла́ва Тебе́.

Гряды́й прикосну́тися тебе́, живоно́сный Кресте́, / ужаса́юся язы́ком и мы́слию, прови́дя, / я́ко на тебе́ излия́ся, / Го́спода моего́, Боже́ственная кровь.

Ирмос: Утверди́, Го́споди, Це́рковь Твою́, / ю́же стяжа́л еси́ си́лою Креста́ Твоего́, / и́мже врага́ победи́л еси́, / и просвети́л еси́ вселе́нную.

Седальны, глас 6. Самогласны:

Днесь проро́ческое испо́лнися сло́во: / се бо покланя́емся на ме́сто, иде́же стоя́сте но́зе Твои́, Го́споди, / и Дре́ва спасе́ния вкуси́вше, / грехо́вных страсте́й свобо́ду улучи́хом, / моли́твами Богоро́дицы, еди́не Человеколю́бче.

Слава: Крест Твой, Го́споди, освяти́ся, / в нем бо быва́ют исцеле́ния боля́щим во гресе́х, / и́мже Тебе́ припа́даем, поми́луй нас.

И ныне: То́кмо водрузи́ся дре́во, Христе́, Креста́ Твоего́, / основа́ния поколеба́шася сме́рти, Го́споди, / Его́же бо поглоти́ жела́нием ад, / отпусти́ тре́петом. / Яви́л еси́ нам спасе́ние Твое́, Святы́й, / и славосло́вим Тя, Сы́не Бо́жий, поми́луй нас.

Песнь 4.

Ирмос: Седя́й в сла́ве:

Вообража́я зна́мение Креста́, / ру́це простира́ше премене́нием, / вну́чата дре́вле Иа́ков сла́вный благословля́я, / и зна́менуя спаси́тельное благослове́ние, / на всех нас приходя́щее.

Соблюда́еми печа́тию Креста́, / и предлежа́ща с ра́достию ду́ха того́ целу́юще, / к спаси́тельным страсте́м и́дем, / губи́тельныя стра́сти плотски́я умертви́вше.

Спаси́тельное тя ору́жие, непобеди́мую побе́ду, / ра́дости зна́мение, и́мже смерть умертви́ся, обы́мем, / сла́вою украша́ющеся на тебе́ Пригво́ждшагося, / Кре́сте всечестны́й.

Богородичен: Ви́димый Мно́ю, / ви́димь был еси́ а́нгелом непристу́пный, / Иису́се Сы́не Мой, плоть от Мене́ заимова́вый, / и ны́не зря́щи Тя на Дре́ве пригвожде́на, / рыда́ю, Христо́ва Ма́ти глаго́лаше.

Песнь 5.

Ирмос: Ужасо́шася:

Мертв был еси́ на Кресте́ пригвожда́емь, / всем сый жизнь и спасе́ние; / сего́ у́бо да́руй, очище́нною душе́ю, Спа́се, нам объя́ти, / и Твоя́ стра́сти спаси́тельныя ви́дети ра́дующимся.

Предстоя́т чи́нове Тебе́ безпло́тных трепе́щуще, / Дре́во животода́тельное, / на тебе́ бо честну́ю кровь Свою́ Христо́с излия́, / лучу́ испуща́я издале́ча, / бесо́м нося́ па́губу безконе́чную.

Ору́жием уя́звеннаго вра́жиим, / исцели́ мя кро́вию Твое́ю, Сло́ве, / и копие́м, грехо́в мои́х вско́ре раздери́, Спа́се, рукописа́ние, вопию́ Ти, / в кни́ги напису́я мя спасе́нных, / я́ко благоутро́бен.

Богородичен: Грозд зре́лый, ка́ко на Дре́ве обе́сился еси́? / Со́лнце сла́вы, ка́ко взя́лся еси́, / сия́ние со́лнца омрача́я, Спа́се, стра́стию Твое́ю? / Ро́ждшая Тя А́гница, дре́вле вопия́ше Ти, / ма́терски восклица́ющи.

Песнь 6.

Ирмос: Возопи́ прообразу́я:

Стрясл еси́ водруже́нный а́дово жили́ще, / ве́рным же непоколеби́мое утвержде́ние был еси́, / изве́стный покро́в, / Госпо́день Кресте́ всечестны́й.

Плодоно́сни доброде́тельми бы́вше, / обы́мем боже́ственнаго Дре́ва живоно́сныя плоды́, / я́же прозябе́, простры́йся на сем Иису́с, / плодови́тая лоза́.

Пое́м Твою́, Иису́се, мно́гую бла́гость, / покланя́ющеся Кресту́ Твоему́, копию́, тро́сти: / те́ми бо разруши́л еси́ вражды́, Ще́дре средогра́дие.

Богородичен: Вод Тя реку́ живото́чных роди́, Всечи́стая, / я́ко исто́чника на́шего обновле́ния, / на Кресте́ просте́ршагося, / и ка́пли спасе́ния источи́вшаго.

Ирмос: Возопи́, прообразу́я погребе́ние тридне́вное, / проро́к Ио́на, в ки́те моля́ся: / от тли изба́ви мя, Иису́се Царю́ сил.

Кондак, глас 7. Самогласен:

Не ктому́ пла́менное ору́жие храни́т врат Еде́мских, / на ты́я бо на́йде пресла́вный соу́з дре́во Кре́стное, / сме́ртное жа́ло и а́дова побе́да прогна́ся, / предста́л бо еси́, Спа́се мой, вопия́ су́щим во а́де: / вни́дите па́ки в рай.

Икос: Три кресты́ водрузи́ на Голго́фе Пила́т, / два разбо́йников, и еди́н Жизнода́вца. / Его́же ви́де ад, и рече́ су́щим до́ле: / о слуги́ мои́, и си́лы моя́! / Кто водрузи́в гво́здие в се́рдце мое́, / древяны́м мя копие́м внеза́пу прободе́? / И растерза́юся, вну́тренними мои́ми болю́, утро́бою уязвля́юся, / чу́вства моя́ смуща́ют дух мой, / и понужда́ются изрыга́ти Ада́ма, и су́щия от Ада́ма, дре́вом да́нныя ми: / Дре́во бо сия́ вво́дит па́ки в рай.

Песнь 7.

Ирмос: Не послужи́ша тва́ри:

Секи́ра, ю́же Елиссе́й взя от Иорда́на, / Христе́, Крест явля́ше, / и́мже из глубины́ су́етия язы́ки извле́кл еси́, воспева́ющия: / отце́в Госпо́дь и Бог благослове́н еси́.

Ра́дуются со земны́ми небе́сная, / поклоне́нию твоему́, Кре́сте, / тобо́ю бо а́нгелом и челове́ком / соедине́ние бысть всеси́льне, вопию́щим: / Го́споди Бо́же, благослове́н еси́.

Я́ко кипари́с милосе́рдие, / я́ко кедр же ве́ру благово́нную, / я́ко певк и́стинную любо́вь принося́ще, / Госпо́дню Кресту́ поклони́мся, / на нем сла́вяще Изба́вителя пригвозди́вшагося.

Богородичен: Не поколеба́в небе́сная, / во утро́бу Твою́ Бог всели́ся, / гра́де Бо́жий избра́нный, / на Кресте́ же ви́ся, тварь поколеба́. / Его́же моли́, на недви́жимом ка́мени Его́ / мне соблюсти́ся.

Песнь 8.

Ирмос: О́троки благочести́выя:

Просте́рл еси́ ру́це на Дре́ве, / руки́ неудержи́мыя разреша́я грех, / копие́м же пробо́дся еси́, / сим борца́ уязвля́я, Го́споди, / же́лчи же вкуси́л еси́, / сла́стную зло́бу изыма́я, / о́цтом напои́лся еси́, всех весе́лие.

Умо́м чи́стым и со́вестию / све́тло приступи́вше поклони́мся, / предлежи́т честно́е Дре́во и свято́е, / и́мже Христо́с безче́стную подъя́т смерть, / честь наложи́в высоча́йшую, / преступле́нием лю́те обезче́стившимся.

Дре́вом греха́ умертви́хся, / и вкуше́нием сла́стным погребо́хся, / оживи́ мя, Го́споди, воздви́гни мя, лежа́щаго, / покло́нника яви́ страсте́й Твои́х, / и прича́стника воста́ния Боже́ственнаго, / и насле́дника возлюби́вших Тя.

Богородичен: Вознесе́на Тя ви́дящи, / ни добро́ты в стра́сти, ни ви́да иму́ща, / Его́же воплоще́нна разуме́х, / красне́йша па́че сыно́в челове́ческих, / Тя единоро́дный Сы́не, Всечи́стая, вопия́ше Де́ва: / покажи́ Твою́ сла́ву, всех спасе́ние.

 

Иный. Ирмос: За зако́ны оте́ческия:

В полу́дни распе́ншуся Тебе́ посреде́ земли́ во́лею, / мирски́я концы́ из среды́ горта́ни зми́евы исто́ргл еси́, Ще́дре. / Те́мже в сре́днюю седми́цу боже́ственных посто́в, / покланя́ющеся сла́вим честны́й Крест Твой, / Го́спода по́йте, вопию́ще, и превозноси́те во ве́ки.

Ра́дости зна́мение, ору́жие неруши́мое, / Це́ркве стено́, му́чеников похвало́, / апо́столов украше́ние, архиере́ев утвержде́ние, / укрепи́в изнемо́гшую мою́ ду́шу, / поклони́тися сподо́би, / и пе́ти Тебе́ вопию́ща: / Го́спода по́йте дела́ и превозноси́те во вся ве́ки.

Рыда́ю и пла́чу, / егда́ во уме́ мое́м прииму́ / суди́ще неумы́тное, долготерпели́ве, осужде́н сый. / Те́мже пощади́ мя, / и отягче́нное бре́мя души́ моея́ облегчи́, / да ра́дуяся зову́: / Го́спода по́йте дела́, и превозноси́те во вся ве́ки.

Богородичен: Образоваше купина тайну, паче ума Твоего́ Рождества, Дево Всенепорочная: якоже бо она, пребыла еси́, неопально огнь рождшая Христа́ Спаса, вознесшагося на Крест. Его́же моли, избавити мя огня вечнаго, вопиюща: Го́спода воспевайте дела, и превозноси́те во вся ве́ки.

 

Иный. Ирмос: Сей нарече́нный и святы́й день:

Прииди́те, Крест предлежа́щий Госпо́день, / посто́м очи́стившеся, облобыза́им любо́вию: / сокро́вище бо нам свяще́ния есть и си́лы. / Те́мже пое́м Его́ во ве́ки.

Сей Крест трича́стный и вели́кий, / малови́димь сый, небе́с ши́рший есть си́лою свое́ю, / челове́ки к Бо́гу возво́дит при́сно, / и́мже благослови́м Христа́ во ве́ки.

Благослови́м Отца́ и Сы́на и Свята́го Ду́ха, Го́спода.

Еди́но в трех начерта́ниих Существо́ сла́вя, / не слива́ю единоли́чно трех, / ниже́ пресеца́ю зра́ка, Отца́, и Сы́на, со Ду́хом: / еди́н бо над все́ми Бог в Тро́ице.

И ны́не и при́сно и во ве́ки веко́в, ами́нь.

Еди́на в ма́терех показа́лася еси́, / Де́во Богоневе́сто Мари́е, / без му́жа роди́вшая Спа́са Христа́, / чистоты́ печа́ть сохра́нши, / Тя блажи́м челове́цы во ве́ки.

Сла́ва Тебе́, Бо́же наш, сла́ва Тебе́.

Сие́ всесвято́е Дре́во да почти́тся, / е́же проро́к дре́вле вложи́ти в хлеб Христо́в взыва́ет, / от изра́ильтян, распе́нших Его́. / Его́же превозно́сим во вся ве́ки.

Ирмос: Ру́це в ров ве́рженный львов, / иногда́ вели́кий во проро́цех, / крестообра́зно просте́р Дании́л, / неврежде́н от сих сне́ди спасе́ся, / благословя́ Христа́ Бо́га во ве́ки.

Песнь 9.

Ирмос: Всяк земноро́дный:

Копие́м Твое́ ребро́ отверза́еши, / оставле́ния распростира́я ми исто́чник, / на Дре́ве же пригвозди́лся еси́, / дре́вом уставля́я осужде́ние, / посреде́ земли́, Человеколю́бче, / е́же мы преполове́нием поста́ ны́не облобыза́ем, / воспева́юще Твою́ благосты́ню.

Го́ры сла́дость, хо́лми ра́дование, / любо́вию иска́пайте; / древа́ же польска́я, Лива́нстии ке́дри лику́йте, / поклоне́нием днесь живоно́снаго Креста́; / проро́цы, му́ченицы, апо́столи, / и пра́ведных ду́си взыгра́йте.

При́зри на лю́ди и достоя́ние Твое́, Го́споди, / стра́хом пою́щия Тя, / смерть во́льную и́хже ра́ди претерпе́л еси́, / да не победи́т Твоего́ благоутро́бия / безме́рное мно́жество зол на́ших, / но спаси́ вся ны Преблаги́й Кресто́м Твои́м, / я́ко Человеколю́бец.

Богородичен: Манове́нием Твои́м коле́блеши ви́димый мир, / распина́емый, пребыва́еши же ви́симый, / Богоро́дица пла́чущи глаго́лаше, / страстна́я умышле́ния первозда́ннаго, Христе́, потреби́ти хотя́, / и исцели́ти того́ сокруше́ние бла́гостию.

 

Иный. Ирмос: Недоуме́ет всяк:

Елиссе́й дре́вле из реки́ се́чиво влеки́й, / дре́вом тя Кре́сте, животода́тельное дре́во вообража́ше, / и́мже извлече́ из глубины́ Христо́с / язы́ки и́дольскаго бесова́ния, / на тебе́ пригвозди́вся, / те́мже покланя́ющеся тебе́, / держа́ву Его́ сла́вим.

Со́лнечныя лучи́, Спа́се, / преложи́шася во тьму, Твои́м распя́тием, / осия́ние же луны́ угасе́, / и стихи́и тре́петом изменя́хуся вся. / Те́мже вопию́ Ти: / измене́на тьмо́ю страсте́й помышле́ния моя́, Сло́ве, / Твое́ю десни́цею премени́в просвети́, / и спаси́ мя.

Я́звою Твое́ю исцели́ души́ моея́ стра́сти, / ребр Твои́х прободе́нием уста́ви боле́зненная прободе́ния бесо́в, / гвоздьми́ Твои́ми, Христе́, изгвозди́ сластна́я и страстна́я похоте́ния, / подая́ ми безстра́стно / страсте́м Твои́м честны́м поклони́тися и Воскресе́нию.

Богородичен: Кра́снаго добро́тою, родила́ Тя кра́сная Отрокови́ца, / Его́же зря́щи ни добро́ты в страда́нии, ниже́ ви́да иму́ща, Спа́се, / рыда́ющи глаго́лаше: / дивлю́ся па́че ума́, Сы́не Мой, Твоему́ смире́нию, / и́мже спаса́еши смири́вшееся естество́ челове́ческое.

 

Иный. Ирмос: Свети́ся, свети́ся:

Предгряди́те, уясни́теся вси лю́дие Бо́жии, / и Дре́во кре́стное предви́дяще предлежа́щее, / целу́йте со стра́хом, и приими́те ра́дость, / на нем Го́спода сла́вы возне́сшагося / сла́вяще при́сно.

Ору́жие Боже́ственное ты жи́зни мое́й Кре́сте, / на тебе́ Влады́ка возше́д спасе́ мя, / источи́ кровь и во́ду, прободе́н в ре́бра, / и́мже причаща́юся ра́дуяся, сла́вя Его́.

Троичен: Тро́ице Ли́цы, Еди́нице Естество́м, / покланя́юся Тебе́, Божество́ Свято́е, / Отцу́, и Сы́ну, со Святы́м же Ду́хом, / еди́ному нача́лу, еди́ному Ца́рству, / все́ми влады́чествующему.

Богородичен: Гора́ вели́кая, в ню́же всели́ся Христо́с, / Ты яви́лася еси́, Де́во, / я́коже боже́ственный Дави́д вопие́т, / Е́юже мы вознесо́хомся к небеси́, / всыни́вшеся Ду́хом Всеблаже́нная.

Сла́ва Тебе́, Бо́же наш, сла́ва Тебе́.

Ски́петре боже́ственный ца́рский Кре́сте, / во́инства му́жество, во упова́нии твое́м ра́тники побежда́ем, / побе́ды при́сно тебе́ кла́няющимся / на ва́рвары пода́ждь нам.

Ирмос: О Ма́ти Де́во, и Богоро́дице нело́жная, / ро́ждшая безсе́менно Христа́ Бо́га на́шего, / на Крест возне́сшагося пло́тию: / Тя ве́рнии вси досто́йно с Ним ны́не велича́ем.

Светилен гласа, и настоящий ексапостиларий.
Подобен: Ду́хом:

Преполове́нием посто́в / всечестно́е Дре́во всех в поклоне́ние призыва́ет, / ели́цы страстьми́ свои́ми, / Христо́вым страсте́м досто́йно спосле́дуют, / прииди́те вси ве́рнии, / поклони́мся Дре́ву стра́шнаго та́инства.

Крестобогородичен: Безневе́стная и Всечи́стая Бо́га Сло́ва Ма́ти, / вопия́ше крича́щи, пла́чем рыда́ющи: / сицевы́я ли Ми Гаврии́л ра́дости принося́ше благове́щения, Ча́до? / Отыди́ испо́лнити неизрече́нный сове́т / и Боже́ственное смотре́ние.

На стиховне самогласен дне, дважды, глас 8:

Поще́ния путь преполови́вше, / веду́щий ко Кресту́ Твоему́ честно́му, / Твой день ви́дети, его́же ви́де Авраа́м, / и возра́довася я́ко из гро́ба хо́лма жи́ва Исаа́ка прие́м. / Благоволи́ и нас ве́рою изба́вившихся от врага́, / и Ве́чери причасти́тися Та́йней, / в ми́ре зову́щих: / просвеще́ние и Спаси́телю наш, сла́ва Тебе́.

Мученичен: Му́ченицы Христо́вы непобеди́мии, / победи́вше пре́лесть си́лою Кре́стною, / восприя́сте благода́ть ве́чныя жи́зни, / мучи́телей преще́ния не убоя́стеся, / му́ками ураня́еми веселите́ся, / и ны́не кро́ви ва́ша бы́ша исцеле́ния душ на́ших. / Моли́те спасти́ся душа́м на́шим.

Слава, глас тойже: Преполови́вше пучи́ну воздержа́ния, / приста́нище прии́мем спасе́ния, / вре́мя стра́сти Твоея́ во́льныя, Го́споди, / но я́ко Благоутро́бен и Щедр, / и день сла́внаго Воскресе́ния Твоего́, / в ми́ре сподо́би нас ви́дети Человеколю́бче.

И ныне, паки тойже.

Крестопоклонение же бывает в 1-й час, воньже поем преднаписанныя стихиры недельныя, самогласны, глас 2: Прииди́те, ве́рнии: И прочая. И отпуст.

НА 6-М ЧАСЕ

Тропарь пророчества, глас 6:

Кресту́ Твоему́ покланя́емся, Влады́ко, / и свято́е воскресе́ние Твое́ сла́вим.

Сла́ва, и ны́не: и повторяем тойжде.

Прокимен, псалом 69, глас 6: Да возра́дуются и возвеселя́тся о Тебе́ / вси и́щущии Тебе́, Бо́же. Стих: Да возвратя́тся вспять и постыдя́тся хотя́щии ми зла́я.

Проро́чества Иса́иина чте́ние.

Се Госпо́дь от свята́го ме́ста наво́дит гнев на живу́щия на земли́, и откры́ет земля́ кровь свою́, и не покры́ет избие́нных. В той день наведе́т Госпо́дь меч святы́й и вели́кий, и кре́пкий на дра́конта зми́а бежа́ща, на дра́конта зми́я лука́ваго, и убие́т дра́конта су́щаго в мо́ри. В той день виногра́д до́брый, жела́ние пе́ти над ним. Аз град кре́пкий, град вою́емый, всу́е напою́ его́: плене́н бо бу́дет но́щию, в день же паде́тся стена́ его́. Несть того́, и́же не во́змет его́. Кто мя приста́вит стрещи́ сте́блия на ни́ве? Ра́ди вражды́ сея́ отри́нух и́, у́бо сего́ ра́ди сотвори́ Госпо́дь Бог вся, ели́ка совеща́. И сгоре́х, возопию́т живу́щии в нем: сотвори́м мир ему́, сотвори́м мир. Приходя́щая ча́да Иа́ковля, прозя́бнет и процвете́т Изра́иль, и напо́лнится вселе́нная плода́ его́. Еда́ я́коже той порази́, и сам си́це уязви́тся? И я́коже сам уби́, та́кожде убие́н бу́дет. Сваря́ся и укоря́я отпу́стит я́. Не ты ли был еси́ помышля́я ду́хом жесто́ким уби́ти я́ ду́хом я́рости? Сего́ ра́ди оты́мется беззако́ние Иа́ковле, и сие́ есть благослове́ние его́, егда́ отыму́ грех его́, егда́ положа́т все ка́мение тре́бищ сокруше́но а́ки прах дро́бный, и не пребу́дут древеса́ их, и куми́ры их бу́дут посе́чени, а́ки дубра́ва дале́че.

Ис 26:21; 27:1–9

Прокимен, псалом 70, глас 6: На Тя, Го́споди, упова́х, / да не постыжу́ся в век. Стих: Пра́вдою Твое́ю изба́ви мя.

В СРЕДУ СРЕДНИЯ СЕДМИЦЫ ВЕЧЕРА

На Го́споди воззва́х, поставим стихов 10: и поем настоящия самогласны, и мученичен, и в Минеи 4.

Самогласен, глас 4:

Пост благи́х хода́тай, / свое́ преполове́ние ны́не введе́, / преше́дшими де́ньми благоугоди́в, / и про́чими по́льзование предложи́в: / и́бо благи́х напряже́ние, мно́жайшее благодея́ние твори́т. / Те́мже всех благи́х да́телю Христу́ бла́гоугожда́юще, вопие́м: / пости́выйся нас ра́ди, и распя́тие претерпе́вый, / неосужде́ны нас сподо́би, причасти́тися / и Боже́ственныя Па́схи Твоея́, / в ми́ре пожи́вшия, / и досто́йно со Отце́м Тебе́ и Ду́хом сла́вящия.

Ин, глас 5: В та́йне доброде́тели де́лающии, / духо́вная воздая́ния ча́ющии, / не посреде́ то́ржищ и распу́тий явля́ют сия́, / но внутрь се́рдца но́сят па́че, / и всех ви́дяй быва́емая в та́йне, / мзду воздержа́ния подае́т нам. / Пост соверша́им, не се́тующе ли́цы, / но в кле́тех душ на́ших моля́щеся, / непреста́нно возопии́м: О́тче наш, И́же еси́ на небесе́х, / не введи́ нас во искуше́ние, мо́лимся, / но изба́ви нас от лука́ваго.

Мученичен: Несы́тною любо́вию души́, / Христа́ не отверго́стеся святи́и му́ченицы, / и́же разли́чныя ра́ны страсте́й претерпе́вше, / мучи́телей де́рзость низложи́сте, / непрекло́нну и невреди́му ве́ру сохра́нше, на небеса́ преста́вистеся. / Те́мже и дерзнове́ние получи́вше к Нему́, / проси́те дарова́ти мир ми́рови, / и душа́м на́шим ве́лию ми́лость.

Ины стихиры, глас 1.
Подобен: Прехва́льнии му́ченицы:

Поста́ водо́ю, ду́ши вси омы́им, / и приступи́вше к честно́му и животворя́щему Кресту́ Госпо́дню, / ве́рою поклони́мся, Боже́ственное просвеще́ние почерпа́юще, / и ве́чное спасе́ние ны́не приобрета́юще, / мир и ве́лию ми́лость.

Апо́столов похвало́, Кре́сте, / его́же окружа́ют нача́ла, си́лы, арха́нгели, / покланя́ющияся тебе́ от вся́каго вре́да спаса́й, / и боже́ственное по́прище воздержа́ния нас сподо́би до́бре соверша́ющия, / день спаси́тельный дости́гнути, и́мже и спаса́емся.

Ин подобен, глас 7. Подобен: Днесь бдит:

Днесь Кресту́ Госпо́дню покланя́ющеся возопии́м: / ра́дуйся, Дре́во жи́зни, а́да разори́телю. / Ра́дуйся ра́досте мира, и тле́ния потреби́телю. / Ра́дуйся, бе́сы прогоня́яй си́лою твое́ю, / ве́рных утвержде́ние, ору́жие неруши́мое, / облобыза́ющия тя соблюди́, освяти́, мо́лимся.

И Минеи 4. Слава, и ныне, самогласен, глас 8:

Днесь неприкоснове́нный существо́м, / прикоснове́н мне быва́ет, / и стра́ждет стра́сти, свобожда́яй мя от страсте́й, / свет подава́яй слепы́м, / от беззако́нных усте́н оплева́ется, / и дае́т плещи́ за плене́нныя на ра́ны. / Сего́ Чи́стая Де́ва и Ма́ти на Кресте́ зря́щи, / боле́зненно веща́ше: / увы́ Мне, Ча́до Мое́, что сие́ сотвори́л еси́? / Кра́сный добро́тою па́че всех челове́к, / бездыха́нный, беззра́чный явля́ешися, / не име́я ви́да, ниже́ добро́ты; / увы́ Мне Мой све́те, / не могу́ спя́ща зре́ти Тя, / утро́бою уязвля́юся, / и лю́тое ору́жие се́рдце Мое́ прохо́дит. / Воспева́ю Твоя́ стра́сти, / покланя́юся благоутро́бию Твоему́; / Долготерпели́ве, сла́ва Тебе́.

Вход. Све́те ти́хий:

Прокимен, псалом 71, глас 4: Благослове́н Госпо́дь Бог Изра́илев, / творя́й чудеса́ Еди́н. Стих: Бо́же, суд Твой царе́ви даждь, и пра́вду Твою́ сы́ну царе́ву.

1. Бытия́ чте́ние.

Бы́ша сы́нове Но́евы изше́дшии из ковче́га: Сим, Хам, Иа́фет, Хам же бя́ше оте́ц Ханаа́нь. Трие́ си́и суть сы́нове Но́евы, от сих разсе́яшася по всей земли́. И нача́т Но́е челове́к де́латель бы́ти земли́, и насади́ виногра́д, и испи́ от вина́, и упи́ся, и обнажи́ся в дому́ свое́м. И ви́де Хам, оте́ц Ханаа́нь, наготу́ отца́ своего́, и изше́д вон пове́да обе́ма бра́тома свои́ма. И взе́мше Сим и Иа́фет ри́зу, возложи́ша ю́ на о́бе ра́ме свои́, и идо́ша вспять зря́ще, и покры́ша наготу́ отца́ своего́, и лице́ их вспять зря, и наготы́ отца́ своего́ не ви́деша. Истрезви́ся же Но́е от вина́, и разуме́ ели́ка сотвори́ ему́ сын его́ юне́йший. И рече́: про́клят бу́ди Ханаа́н о́трок, раб бу́дет бра́тиям свои́м. И рече́: благослове́н Госпо́дь Бог Си́мов, и бу́дет Ханаа́н о́трок раб ему́. Да распространи́т Бог Иа́фета, и да всели́тся в селе́ниих Си́мовых, и да бу́дет Ханаа́н раб ему́. Поживе́ же Но́е по пото́пе лет три́ста пятьдеся́т. И бы́ша вси дни́е Но́евы, лет де́вять сот пятьдеся́т, и у́мре. Сия же суть бытия́ сыно́в Но́евых, Си́ма, Ха́ма, Иа́фета, и роди́шася им сы́нове по пото́пе.

Быт 9:18–29; 10:1

Прокимен, псалом 72, глас 4: Мне же прилепля́тися Бо́гови / бла́го есть. Стих: Коль благ Бог Изра́илев, пра́вым се́рдцем.

2. При́тчей чте́ние.

Муж разуми́вый престо́л чу́вствия, се́рдце же безу́мных сря́щет кля́твы. Рука́ избра́нных одержи́т удо́бь, льсти́вии же бу́дут в плене́нии. Стра́шное сло́во се́рдце му́жа пра́ведна смуща́ет, весть же блага́я весели́т его́. Разуми́в пра́ведник себе́ друг бу́дет, мы́сли же нечести́вых некро́тки. Согреша́ющих пости́гнут зла́я, путь же нечести́вых прельсти́т я́. Не улучи́т льсти́вый лови́твы, стяжа́ние же честно́е муж чи́стый. В путе́х пра́вды живо́т, путие́ же злопо́мнящих в смерть. Сын благоразу́мный послушли́в отцу́, сын же непокорли́вый в поги́бель. От плодо́в пра́вды снесть благи́й, ду́ши же беззако́нных погиба́ют безвре́менно. И́же храни́т своя́ уста́, соблюда́ет свою́ ду́шу, проде́рзивый же устна́ма, устраши́т себе́. В по́хотех есть всяк пра́здный, ру́ки же му́жественных в прилежа́нии. Словесе́ непра́ведна ненави́дит пра́ведник, нечести́вый же стыди́тся, и не возыме́ет дерзнове́ния. Пра́вда храни́т незло́бивыя, нечести́выя же злы твори́т грех. Суть богатя́ще себе́, ничесо́же иму́ще, и суть смиря́ющеся во мно́зе бога́тстве. Избавле́ние му́жа души́ свое́ ему́ бога́тство, ни́щий же не терпи́т преще́ния. Свет пра́ведным всегда́, свет же нечести́вых угаса́ет, ду́ши льсти́выя заблужда́ют во гресе́х, пра́веднии же ще́дрят и ми́луют.

Притч 12:23–28; 13:1–9

И прочее последование Преждеосвященных.

От сего же дне начинает священник, [или диакон, аще есть] двосугубая елико оглашения просвещаемых и молитву. Глаголются же даже до Среды Великия, кроме суббот и Недель.