Ина служба. Неделя вторая по Пятидесятнице, Всех святых в Земле Русской просиявших. Избранные службы Цветной Триоди.

По изданию: Великий сборник. Часть третья. Свято-Троицкий монастырь. Типография пр. Иова Почаевского в Джорданвилле. 1956 г.

НА ВЕЛИЦЕЙ ВЕЧЕРНИ

В первую неделю по памяти всех святых, сиесть в первую неделю поста святых славных и всехвальных Апостол, память совершаем всех святых, в земли Российстей просиявших.

На Го́споди, воззва́х: стихиры на 10.
И поем стихиры воскресны 3, глас 1:

Вече́рния на́ша моли́твы / приими́, Святы́й Го́споди, / и пода́ждь нам оставле́ние грехо́в, / я́ко Еди́н еси́ / явле́й в ми́ре Воскресе́ние.

Обыди́те лю́дие Сио́н, / и обыми́те его́, / и дади́те сла́ву в нем Воскре́сшему из ме́ртвых, / я́ко Той есть Бог наш, / избавле́й нас от беззако́ний на́ших.

Прииди́те лю́дие, / воспои́м, и поклони́мся Христу́, / сла́вяще Его́ из ме́ртвых Воскресе́ние, / я́ко Той есть Бог наш, / от пре́лести вра́жия мiр избавле́й.

Ина стихира Анатолиева, глас тойже:

Весели́теся Небеса́, / воструби́те основа́ния земли́, / возопи́йте го́ры весе́лие, / се бо Емману́ил грехи́ на́ша на Кресте́ пригвозди́, / и живо́т дая́й, смерть умертви́, / Ада́ма воскреси́вый, я́ко Человеколю́бец.

И стихиры святых 6. Глас 1:

Прииди́те, собо́ри Росси́йстии, / су́щия в стране́ на́шей святы́я восхва́лим, / преподо́бныя, и иера́рхи, и кня́зи благове́рныя, / му́ченики и священному́ченики, / и Христа́ ра́ди юро́дивыя, / и жен святы́х сосло́вие, / вку́пе имену́емыя и неимену́емыя, / си́и бо вои́стинну де́лы и словесы́, и многови́дным житие́м, / и от Бо́га дарова́ньми / соде́лашася свя́ти, / и́хже и гро́бы Бог чудесы́ просла́ви. / И ны́не несре́дственне просла́вльшему их Христу́ предстоя́ще, / мо́лятся приле́жно о нас, / любо́вию соверша́ющих све́тлое их торжество́.

Глас 2: Ки́ими пе́сненными добро́тами / похва́лим Богому́дрыя святи́тели Росси́йския, / Христо́вы Це́ркве све́тлое украше́ние, / свяще́нства венцы́, благоче́стия управле́ние, / исто́чники Боже́ственных исцеле́ний неисчерпа́емыя, / проли́тие дарова́ний духо́вных, / ре́ки мно́гих чуде́с, / зе́млю Росси́йскую веселя́щия тече́нием, / благове́рным лю́дем те́плыя посо́бники, / и́хже ра́ди Христо́с враго́в возноше́ния низложи́, / име́яй ве́лию ми́лость.

Глас 8: Земля́ весели́тся и Не́бо ра́дуется, / отцы́ преподо́бнии, / восхваля́юще по́двиги и труды́ ва́ша, / душе́вное благомо́щие и ума́ чистоту́, / зако́ном бо естества́ не победи́стеся. / О собо́ре святы́й и по́лче Боже́ственный, / земли́ на́шея утвержде́ние вы есте́ вои́стинну.

Глас тойже. Подобен: О, пресла́внаго чудесе́:

Блаже́ннии богому́дрии кня́зи Росси́йстии, / правосла́вною му́дростию сия́ющии, / доброде́телей же све́тлостию блиста́ющии, / озаря́ете ве́рных исполне́ния, / бесо́в тьму отгоня́юще. / Те́мже, я́ко прича́стники невече́рния благода́ти / и насле́дия ва́шего храни́тели непосты́дныя, / вас почита́ем, досточу́днии.

Му́ченицы Христо́вы преблаже́ннии, / на во́льное заколе́ние са́ми себе́ преда́сте, / и зе́млю Ру́сскую кровьми́ ва́шими освяти́сте, / и возду́х просвети́сте преставле́нием; / ны́не же живете́ на Небесе́х, во све́те невече́рнем, / о нас всегда́ моля́щеся, богови́дцы.

Доброде́телей ва́ших исправле́ния / уясни́ша ве́рных сердца́, / Христа́ ра́ди юро́дивии и пра́веднии, в Росси́и просия́вшии; / кто бо слы́ша безме́рное ва́ше смире́ние и терпе́ние, не удиви́тся; / ко всем кро́тость и незло́бие, / к скорбя́щим ми́лование и су́щим в беда́х ско́рое поможе́ние, / пла́вающим немяте́жное приста́нище / и путеше́ствующим благо́е поспеше́ние; / вся благоле́пно предвари́сте, досточу́днии. / И ны́не неувяда́емыми венцы́ венча́лися есте́ / от руки́ Вседержи́теля Бо́га; / Его́же моли́те спасти́ся душа́м на́шим.

Слава, глас 5: Ра́дуйся, держа́во Росси́йская ве́рная, / ра́дуйся, кня́зю благове́рный Влади́мире пребога́тый, / ра́дуйся, О́льго избра́нная! / Вы бо есте́ ко Влады́це всех на́ши хода́таи, / и нача́льницы правосла́вия, / и наста́вницы ко и́стинней ве́ре. / Ра́дуйся, вся́ко ме́сто, и страна́, и град, / гра́жданы воспита́вшии Небе́снаго Ца́рства. / Си́и святи́и свети́ла душа́м на́шим яви́шася, / си́и чуде́с заре́ю, и де́лы, и зна́меньми / просия́ша мы́сленно во вся концы́, / и ны́не Христу́ мо́лятся о спасе́нии душ на́ших.

И ныне, Богородичен, догматик. Глас 1: Всемiрную сла́ву, / от челове́к Прозя́бшую, / и Влады́ку Ро́ждшую, / Небе́сную Дверь, / воспои́м Мари́ю Де́ву, / Безпло́тных песнь, и ве́рных удобре́ние, / Сия́ бо яви́ся Не́бо, и Храм Божества́, / Сия́ прегражде́ние вражды́ разруши́вши, / мир введе́, и Ца́рствие отве́рзе. / Сию́ у́бо иму́ще ве́ры утвержде́ние, / Побо́рника и́мамы из Нея́ ро́ждшагося Го́спода. / Дерза́йте у́бо, дерза́йте лю́дие Бо́жии, / и́бо Той победи́т враги́, я́ко всеси́лен.

Вход. Све́те ти́хий: Прокимен: Госпо́дь воцари́ся:

Пророчества Исаиина чтение. [Глава 43]:

Та́ко глаго́лет Госпо́дь: вси язы́цы собра́шася вку́пе, и соберу́тся кня́зи от них. Кто возвести́т сия́; или́ я́же от нача́ла, кто слы́шана сотвори́т вам? Да приведу́т свиде́тели своя́, и оправдя́тся, и да услы́шат, и да реку́т и́стину. Бу́дите Ми свиде́тели, и Аз свиде́тель, глаго́лет Госпо́дь Бог, и О́трок его́же избра́х, да позна́ете, и ве́руете Ми, и разуме́ете, я́ко Аз есмь, пре́жде Мене́ не бысть ин бог, и по Мне не бу́дет. Аз есмь Бог, и несть ра́зве Мене́ спаса́яй. Аз возвести́х и спасо́х, уничижи́х, и не бе в вас чу́ждий. Вы Мне свиде́тели, и Аз Госпо́дь Бог, и еще́ от нача́ла Аз есмь, и несть от рук Мои́х избавля́яй, сотворю́, и кто отврати́т то? Си́це глаго́лет Госпо́дь Бог, избавля́яй вас Святы́й Изра́илев.

Премудрости Соломони чтение. [Глава 3]:

Пра́ведных ду́ши в руце́ Бо́жией, и не прико́снется их му́ка. Непщева́ни бы́ша во очесе́х безу́мных умре́ти, и вмени́ся озлобле́ние исхо́д их. И е́же от нас ше́ствие сокруше́ние, они́ же суть в ми́ре. И́бо пред лице́м челове́ческим, а́ще и му́ку прии́мут, упова́ние их безсме́ртия испо́лнено. И в ма́ле нака́зани бы́вше, вели́кими благоде́тельствовани бу́дут, я́ко Бог искуси́ я́, и обре́те их досто́йны Себе́. Я́ко зла́то в горни́ле искуси́ их, и я́ко всепло́дие же́ртвенное прия́т я́. И во вре́мя посеще́ния их возсия́ют, и я́ко и́скры по сте́блию потеку́т. Су́дят язы́ком и облада́ют людьми́, и воцари́тся Госпо́дь в них во ве́ки. Наде́ющиися Нань разуме́ют и́стину, и ве́рнии в любви́ пребу́дут Ему́. Я́ко благода́ть и ми́лость в преподо́бных Его́, и посеще́ние во избра́нных Его́.

Премудрости Соломони чтение. [Глава 5]:

Пра́ведницы во ве́ки живу́т, и в Го́споде мзда их, попече́ние их у Вы́шняго. Сего́ ра́ди прии́мут ца́рствие благоле́пия, и вене́ц добро́ты от руки́ Госпо́дни, зане́ десни́цею покры́ет я́, и мы́шцею защити́т их. Прии́мет всеору́жие рве́ние Свое́, и вооружи́т тварь в месть враго́м. Облече́тся в броня́ пра́вды, и возложи́т шлем, суд нелицеме́рен. Прии́мет щит непобеди́мый, преподо́бие, поостри́т же напра́сный гнев ору́жие, спобо́рет же с Ним мир на безу́мныя. По́йдут праволу́чныя стре́лы мо́лниины, и я́ко от благокру́гла лу́ка облако́в, на наме́рение полетя́т. И от каменоме́тныя я́рости, испо́лнь паду́т гра́ды. Вознегоду́ет на них вода́ морска́я, ре́ки же потопя́т я́ на́гло. Сопроти́в ста́нет им дух си́лы, и я́ко ви́хор разве́ет их, и опустоши́т всю зе́млю беззако́ние, и злоде́йство преврати́т престо́лы си́льных. Слы́шите у́бо ца́рие и разуме́йте, навы́кните судии́ конце́в земли́. Внуши́те держа́щии мно́жества, и гордя́щиися о наро́дех язы́к. Я́ко дана́ есть от Го́спода держа́ва вам, и си́ла от Вы́шняго.

На литии стихира храма
и святых стихира, глас 8:

Сра́дуйтеся с на́ми, вси ли́цы святы́х / и вся а́нгельская чинонача́лия, / духо́вно совоку́пльшеся, прии́дем и воспои́м / благода́рную песнь Христу́ Бо́гу; / се бо безчи́сленный сонм сро́дник на́ших, Бо́гу благоугоди́вших, / предстои́т Царю́ Сла́вы, и моле́бно хода́тайствует о нас. / Си́и суть правосла́вныя ве́ры столпи́ и красота́, / си́и Це́рковь Бо́жию просла́виша по́двиги / и крове́й излия́нии, уче́нии и де́лы; / си́и чудесы́ и зна́мении ве́ру Христо́ву утверди́ша; / си́и от всех преде́л земли́ на́шея возсия́ша, / и ве́ру правосла́вную в них утверди́ша, / и во ины́я страны́ пронесо́ша, апо́стольски ревну́юще; / ини́и же пусты́ни и гра́ды оби́тельми святы́ми украси́ша, / а́нгельское житие́ показу́юще. / Мно́зи от сыно́в ве́ка сего́ руга́нии и ра́нами, / и лю́тою сме́ртию искуси́шася. / Мно́зи же и ине́ми по́двиги / во вся́цем чи́не подвиза́шася, / и вси мо́лятся Го́сподеви / изба́вити от бед Оте́чество на́ше, / и нам терпе́ния и злострада́ния о́браз подаю́т.

Слава, и ныне, глас тойже: Сра́дуются с на́ми, у́мная чинонача́лия, / духо́вный совоку́пльше лик, / ви́дяще Цари́цу и Влады́чицу всех, / многоиме́нне ве́рными сла́виму; / ра́дуются же и ду́си пра́ведных, / су́щии зри́телие виде́ния, / на возду́се моле́бно простира́ющу всечестне́и Свои́ ру́це, / прося́щу умире́ния мiру, / и стране́ Росси́йстей утвержде́ния, / и спасе́ния душ на́ших.

На стиховне
стихиры воскресны, глас 1:

Стра́стию Твое́ю, Христе́, / от страсте́й свободи́хомся, / и воскресе́нием Твои́м / из истле́ния изба́вихомся, / Го́споди, сла́ва Тебе́.

Стих: Госпо́дь воцари́ся, / в ле́поту облече́ся.

Да ра́дуется тварь, небеса́ да веселя́тся, / рука́ми да воспле́щут язы́цы с весе́лием, / Христо́с бо Спас наш, / на Кресте́ пригвозди́ грехи́ на́ша, / и смерть умертви́в, живо́т нам дарова́, / па́дшаго Ада́ма всеро́днаго воскреси́вый, / я́ко Человеколю́бец.

Стих: И́бо утверди́ вселе́нную, / я́же не подви́жется.

Царь сый небесе́ и земли́ Непостижи́ме, / во́лею распя́лся еси́ за человеколю́бие. / Его́же ад срет до́ле, огорчи́ся, / и пра́ведных ду́ши прие́мша, возра́довашася, / Ада́м же, ви́дев Тя, Зижди́теля в преиспо́дних, воскре́се. / О чудесе́! Ка́ко сме́рти вкуси́ всех Жизнь; / но я́коже восхоте́ мiр просвети́ти / зову́щий и глаго́лющий: / Воскресы́й из ме́ртвых, Го́споди, сла́ва Тебе́.

Стих: До́му Твоему́ подоба́ет святы́ня, / Го́споди, в долготу́ дний.

Жены́ мvроно́сицы, мv́ра нося́ща, / со тща́нием и рыда́нием гро́ба Твоего́ достиго́ша, / и не обре́тша Пречи́стаго Те́ла Твоего́, / от А́нгела же уве́девша но́вое и пресла́вное чу́до, / Апо́столом глаго́лаху: / воскре́се Госпо́дь, / подая́ мíрови ве́лию ми́лость.

Слава, глас 4: Ле́тнюю па́мять днесь / святы́х сро́дник на́ших соверша́юще, / досто́йно сия́ да ублажи́м. / Ти́и вои́стинну чрез вся блаже́нства Госпо́дня проидо́ша; / обнища́вше бо, ду́хом обогати́шася; / и кро́тцы бы́вше, зе́млю кро́тких насле́доваша; / пла́кавше, уте́шишася; / алка́вше пра́вды, насы́тишася; / поми́ловавше, поми́ловани бы́ша; / чи́сти се́рдцем, Бо́га, я́коже мо́щно, узре́ша; / миротвори́вше, Боже́ственнаго сподо́бишася сыноположе́ния; / го́ними же и му́чими пра́вды ра́ди и благоче́стия, / на Небесе́х ны́не веселя́тся и ра́дуются; / и приле́жно мо́лятся Го́сподеви / поми́ловатися Оте́честву на́шему.

И ныне, Богородичен, глас 5: Востру́бим трубо́ю пе́сней, / воспои́м согла́сно Засту́пнице страны́ на́шея, / Цари́це Богоро́дице: / ра́дуйся, благоволе́нием Твои́м Оте́чество на́ше от лет дре́вних венча́вшая / и благода́ть Твою́ тому́ источа́ющая. / Те́мже и прече́стный Твой Покро́в / и па́мяти тем чуде́с Твои́х / Це́рковь на́ша Росси́йская све́тло пра́зднует. / Не отыми́ от нас, Влады́чице, и ны́не ми́лости Твоя́; / при́зри на ско́рби и тесноту́ на́шу / и воздви́гни нас держа́вным заступле́нием Твои́м.

На благословении хлебов поем, Богоро́дице Де́во: [Дважды.]

И святым тропарь, глас 8, единожды:

Я́коже плод кра́сный Твоего́ спаси́тельнаго се́яния, / земля́ Росси́йская прино́сит Ти, Го́споди, вся святы́я, в той просия́вшия. / Тех моли́твами в ми́ре глубо́це / Це́рковь и страну́ на́шу Богоро́дицею соблюди́, Многоми́лостиве.

НА УТРЕНИ

На Бог Господь: тропарь воскресен, глас 1:

Ка́мени запеча́тану от иуде́й / и во́ином стрегу́щим Пречи́стое Те́ло Твое́, / воскре́сл еси́ тридне́вный, Спа́се, / да́руяй ми́рови жизнь. / Сего́ ра́ди Си́лы Небе́сныя вопия́ху Ти, Жизнода́вче: / сла́ва Воскресе́нию Твоему́, Христе́, / сла́ва Ца́рствию Твоему́, / сла́ва смотре́нию Твоему́, еди́не Человеколю́бче. [Дважды.]

Слава, тропарь русских святых, глас 8:

Я́коже плод кра́сный Твоего́ спаси́тельнаго се́яния, / земля́ Росси́йская прино́сит Ти, Го́споди, вся святы́я, в той просия́вшия. / Тех моли́твами в ми́ре глубо́це / Це́рковь и страну́ на́шу Богоро́дицею соблюди́, Многоми́лостиве.

И ныне, Богородичен, глас тойже:

И́же нас ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию смерть, / и воскресе́ние явле́й, я́ко Бог, / не пре́зри, я́же созда́л еси́ руко́ю Твое́ю; / яви́ человеколю́бие Твое́, Ми́лостиве, / приими́ ро́ждшую Тя Богоро́дицу, моля́щуюся за ны, / и спаси́, Спа́се наш, лю́ди отча́янныя.

Таже обычное стихословие Псалтира.

По 1-м стихословии
седальны воскресны, глас 1:

Гроб Твой, Спа́се, во́ини стрегу́щии, / ме́ртвии от облиста́ния я́вльшагося а́нгела бы́ша, / пропове́дающа жена́м воскресе́ние. / Тебе́ сла́вим тли потреби́теля, / Тебе́ припа́даем, Воскре́сшему из гро́ба, / и Еди́ному Бо́гу на́шему.

Стих: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Ко Кресту́ пригво́ждься во́лею, Ще́дре, / во гро́бе положе́н быв я́ко мертв, Животода́вче, / держа́ву стерл еси́, Си́льне, сме́ртию Твое́ю: / Тебе́ бо вострепета́ша вра́тницы а́довы, / Ты совоздви́гл еси́ от ве́ка уме́ршыя, / я́ко Еди́н Человеколю́бец.

Слава, и ныне, Богородичен: Ма́терь Тя Бо́жию све́мы вси Де́ву вои́стинну, и по Рождестве́ я́вльшуюся, / и́же любо́вию прибега́ющии к Твое́й бла́гости: / Тебе́ бо и́мамы гре́шнии предста́тельство, / Тебе́ стяжа́хом в напа́стех Спасе́ние, / Еди́ну Всенепоро́чную.

По 2-м стихословии, седальны воскресны, глас 1.
Подобен: Ка́мени запеча́тану:

Жены́ ко гро́бу приидо́ша ура́нша, / и а́нгельское явле́ние ви́девша, трепета́ху: / гроб облиста́ жизнь, чу́до удивля́ше я́: / сего́ ра́ди ше́дша, ученико́м пропове́даху воста́ние: / ад плени́ Христо́с, я́ко Еди́н кре́пок и си́лен, / и истле́вшыя вся совоздви́же, / осужде́ния страх разруши́в Кресто́м.

Стих: Испове́мся Тебе́ Го́споди всем се́рдцем мои́м, / пове́м вся чудеса́ Твоя́.

На Кресте́ пригвозди́лся еси́, Животе́ всех, / и в ме́ртвых вмени́лся еси́, Безсме́ртный Го́споди, / воскре́сл еси́ тридне́вен, Спа́се, / совоздви́г Ада́ма от тле́ния. / Сего́ ра́ди си́лы небе́сныя вопия́ху Тебе́, Жизнода́вче Христе́: / сла́ва Воскресе́нию Твоему́, / сла́ва снизхожде́нию Твоему́, / Еди́не Человеколю́бче.

Слава, и ныне, Богородичен: Мари́е, честно́е Влады́ки Прия́телище, / воскреси́ ны па́дшыя в про́пасть лю́таго отча́яния, и прегреше́ний и скорбе́й, / Ты бо еси́ гре́шным Спасе́ние и по́мощь, и кре́пкое Предста́тельство, / и спаса́еши рабы́ Твоя́.

Полиелей и величание:

Велича́ем вас, / святи́и вси, в земли́ Росси́йстей просия́вшии, / и чтем святу́ю па́мять ва́шу, / вы бо мо́лите за нас / Христа́, Бо́га на́шего.

Псалом избранный.

1 лик: Услы́шите сия́ вси язы́цы, внуши́те вси́, живу́щии по вселе́нней. 2 Уста́ моя́ возглаго́лют прему́дрость, и поуче́ние се́рдца моего́ ра́зум. 1 Прииди́те, ча́да, послу́шайте мене́, стра́ху Госпо́дню научу́ вас. 2 Благовести́х пра́вду в це́ркви вели́цей. 1 И́стину Твою́ и спасе́ние Твое́ рех. 2 Пове́м И́мя Твое́ бра́тии мое́й, посреде́ це́ркве воспою́ Тя. 1 Услы́шати ми глас хвалы́ Твоея́ и пове́дати вся чудеса́ Твоя́. 2 Го́споди, возлюби́х благоле́пие дому́ Твоего́, и ме́сто селе́ния сла́вы Твоея́. 1 Возненави́дех це́рковь лука́внующих, и с нечести́выми не ся́ду. 2 Я́ко сохрани́х пути́ Госпо́дни, и нече́ствовах от Бо́га моего́. 1 Уста́ пра́веднаго поуча́тся прему́дрости, и язы́к его́ возглаго́лет суд. 2 Пра́вда Его́ пребыва́ет в век ве́ка. 1 Свяще́нницы Твои́ облеку́тся пра́вдою, и преподо́бнии Твои́ возра́дуются. 2 Блаже́ни живу́щии в дому́ Твое́м, в ве́ки веко́в восхва́лят Тя.

Сла́ва, и ны́не: Аллилу́иа. [Трижды.]

По Непорочных тропари воскресные: А́нгельский собо́р:

Таже ипакои, глас 1:

Разбо́йничо покая́ние рай окра́де, / плачь же мироно́сиц ра́дость возвести́, / я́ко воскре́сл еси́, Христе́ Бо́же, / подая́й ми́рови ве́лию ми́лость.

И седальны святых.
Глас 8. Подобен: Повеле́нное:

Святы́х мо́лниями озари́вшеся, / я́ко в рай кра́сный входя́ще, / сла́дости пото́ка наслади́хомся, / и сих до́блести чу́дно смотря́юще, / поревну́им доброде́телем их, Спа́су взыва́юще: / моли́твами их, Бо́же, / Ца́рствия Твоего́ прича́стники нас сотвори́.

Глас 1. Подобен: Гроб Твой, Спа́се:

Я́ко со́лнце све́тлое, / я́ко блиста́ющая денни́ца, / па́мять честна́я в земли́ Росси́йстей просия́вших святы́х возсия́, / всех нас освеща́ющи / и согрева́ющи сердца́ на́ша / к подража́нию житию́ их Боже́ственному / и к ре́вности о ве́ре.

Слава, глас 8: В па́мяти святы́х Твои́х, Го́споди, / вси ве́рнии лю́дие Росси́йстии пра́зднуют; / Небеса́ ра́дуются, / и земли́ на́шея концы́ веселя́тся. / Тех моли́твами да́руй душа́м на́шим ве́лию ми́лость.

И ныне, глас тойже: С вы́шних призира́я, убо́гия прие́мля, / посети́ ны, озло́бленныя грехи́, Влады́ко Всеми́лостиве, / моли́твами Богоро́дицы и всех святы́х росси́йских / да́руй душа́м на́шим ве́лию ми́лость.

Степенна воскресна, глас 1. Антифон 1.
Ихже стихи повторяюще поем:

Внегда́ скорбе́ти ми, услы́ши моя́ боле́зни, / Го́споди, Тебе́ зову́.

Пусты́нным непреста́нное Боже́ственное жела́ние быва́ет, / мíра су́щим су́етнаго кроме́.

Слава: Свято́му Ду́ху честь и сла́ва, / я́коже Отцу́ подоба́ет, ку́пно же и Сы́ну, / сего́ ра́ди да пое́м Тро́ице Единодержа́вие.

И ныне, тойже.

Антифон 2:

На го́ры Твои́х возне́сл еси́ мя зако́нов, / доброде́тельми просвети́, Бо́же, да пою́ Тя.

Десно́ю Твое́ю руко́ю прии́м Ты, Сло́ве, / сохрани́ мя, соблюди́, / да не огнь мене́ опали́т грехо́вный.

Слава: Святы́м Ду́хом вся́кая тварь обновля́ется, / па́ки теку́щи на пе́рвое: / равномо́щен бо есть Отцу́ и Сло́ву.

И ныне, тойже.

Антифон 3:

О ре́кших мне, вни́дем во дворы́ Госпо́дни, / возвесели́ся мой дух, сра́дуется се́рдце.

В дому́ Дави́дове страх вели́к: / та́мо бо престо́лом поста́вленным, / су́дятся вся племена́ земна́я, и язы́цы.

Слава: Свято́му Ду́ху, честь, поклоне́ние, сла́ву и держа́ву, / я́коже Отцу́ досто́ит, и Сы́нови подоба́ет приноси́ти: / Еди́ница бо есть Тро́ица Естество́м, но не Ли́цы.

И ныне, тойже.

Прокимен воскресный, глас 1:

Ны́не воскресну́, глаго́лет Госпо́дь, / положу́ся во спасе́ние, не обиню́ся о нем. Стих: Словеса́ Госпо́дня, словеса́ чи́ста.

Таже другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие воскресное 2-е, от Марка,
зачало 70. [Мк 16, 1–8]:

Во вре́мя о́но, мину́вши суббо́те, Мари́я Магдали́на, и Мари́я Иа́ковля, и Саломи́я купи́ша арома́ты, да прише́дше пома́жут Иису́са. И зело́ зау́тра во еди́ну от суббо́т приидо́ша на гроб, возсия́вшу со́лнцу. И глаго́лаху к себе́: кто отвали́т нам ка́мень от две́рий гро́ба? [И воззре́вше ви́деша, я́ко отвале́н бе ка́мень,] бе бо ве́лий зело́. И вле́зше во гроб, ви́деша ю́ношу седя́ща в десны́х, оде́яна в оде́жду белу́, и ужасо́шася. Он же глаго́ла им: не ужаса́йтеся. Иису́са и́щете Назаряни́на распя́таго, воста́, несть зде; се, ме́сто, иде́же положи́ша Его́. Но иди́те, рцы́те ученико́м Его́ и Петро́ви, я́ко варя́ет вы в Галиле́и; та́мо Его́ ви́дите, я́коже рече́ вам. И изше́дше бежа́ша от гро́ба, имя́ше же их тре́пет и у́жас. И никому́же ничто́же ре́ша, боя́ху бо ся.

Таже глаголем: Воскресе́ние Христо́во ви́девше: По 50-м псалме: Сла́ва: Моли́твами Апо́столов: Стихира воскресна, глас 6-й: Воскре́с Иису́с от гро́ба: И глаголет диакон: Спаси́, Бо́же, лю́ди Твоя́:

Каноны: воскресен 1-го гласа со ирмосом на 4, и Богородицы на 2, и святых на 8.

Канон воскресен, глас 1.
Песнь 1.

Ирмос: Твоя́ победи́тельная десни́ца / Боголе́пно в кре́пости просла́вися, / та бо, Безсме́ртне, / я́ко всемогу́щая, проти́вныя сотре́, / Изра́ильтяном / путь глубины́ новосоде́лавшая.

И́же рука́ма пречи́стыма от пе́рсти / богоде́тельне испе́рва созда́в мя, / ру́це распросте́рл еси́ на кресте́, / от земли́ взыва́я тле́нное мое́ те́ло, / е́же от Де́вы прия́л еси́.

Умерщвле́ние подъя́л еси́ мене́ ра́ди, / и ду́шу сме́рти пре́дал еси́, / И́же вдохнове́нием боже́ственным ду́шу ми вложи́вый, / и отреши́в ве́чных уз, и совоскреси́в / нетле́нием просла́вил еси́.

Богородичен: Ра́дуйся, благода́ти исто́чниче, / ра́дуйся ле́ствице, и две́ре небе́сная, / ра́дуйся све́щнице, и ру́чко злата́я, и горо́ несеко́мая, / Я́же Жизнода́вца Христа́ мíрови ро́ждшая.

Ин канон, Пресвятей Богородице.
Песнь 1, глас тойже.

Ирмос: Твоя́ победи́тельная:

Ку́ю Ти досто́йную песнь на́ше принесе́т неможе́ние? / То́чию обра́довательную, / е́йже нас Гаврии́л та́йно научи́л есть: / ра́дуйся, Богоро́дице Де́во, Ма́ти Неневе́стная.

Присноде́ве и Ма́тери Царя́ вы́шних сил, / от чисте́йша се́рдца, ве́рнии, духо́вне возопии́м: / ра́дуйся, Богоро́дице Де́во, Ма́ти Неневе́стная.

И канон всем святым, глас 8.
Песнь 1.

Ирмос: Песнь возсле́м, лю́дие, / чу́дному Бо́гу на́шему, / свободи́вшему Изра́иля от рабо́ты, / песнь побе́дную пою́ще и вопию́ще: / пои́м Тебе́, еди́ному Влады́це.

Припев: Вси святи́и земли́ ру́сския, моли́те Бо́га о нас.

Вси в пе́снех духо́вных воспои́м согла́сно / в благоче́стии просия́вшия Боже́ственныя отцы́ на́ша, / и́хже изнесе́ Ру́сския земли́ вся́ко ме́сто и страна́, / и я́же Це́рковь Ру́сская воспита́.

Ра́дуйтеся, святи́телие седмочи́сленнии: / Васи́лие, Ефре́ме, Евге́ние, Елпи́дие, Агафодо́ре, Евфе́рие и Капито́не, / в Херсони́се епи́скопствовавшии / и зе́млю на́шу кровьми́ свои́ми освяти́вшии.

Прииди́те, мучениколю́бцы ве́рнии, / пе́сньми почти́м первому́ченики росси́йския, / Фео́дора и ю́наго Иоа́нна, / и́долом не порабо́тавшия и кро́ви своя́ за Христа́ да́вшия.

Вели́чие на́ше и похвала́ ты еси́, О́льго Богому́драя, / тобо́ю бо от и́дольския ле́сти свободи́хомся. / И ны́не моли́ся за лю́ди, я́же Бо́гу привела́ еси́.

Ра́дуйся и весели́ся, ра́бе Христо́в, / кня́же вели́кий и му́дрый Влади́мире, / моли́твенниче о душа́х на́ших; / тобо́ю бо мы вси изба́влени есмы́ бесо́вския ле́сти. / Тем, ра́дуйся, вопие́м ти.

Сия́ет, я́ко звезда́ на небеси́, Бо́жий иера́рх Михаи́л, / зе́млю Росси́йскую просвети́вый / све́том позна́ния Боже́ственныя ве́ры / и Влады́це приведы́й лю́ди но́вы, / ба́нею креще́ния обновле́нныя.

Слава: О блаже́ннии страстоте́рпцы Христо́вы, Бори́се и Гле́бе, / не забу́дьте Оте́чества ва́шего; / глад и озлобле́ние отжени́те, / междоусо́бныя бра́ни и вся́каго грехопаде́ния изба́вите нас, упова́ющих на вас.

И ныне: С чи́нми А́нгел, Влады́чице, / с честны́ми и сла́вными проро́ки, верхо́вными апо́столы и священному́ченики и со Арха́нгелы / за ны, гре́шныя, Бо́гу помоли́ся, / Твоего́ Покро́ва пра́здник в Росси́йстей земли́ просла́вльшия.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3.

Ирмос: Еди́не ве́дый челове́ческаго существа́ не́мощь / и ми́лостивно в не вообра́жся, / препоя́ши мя с высоты́ си́лою, / е́же вопи́ти Тебе́, Святы́й, / одушевле́нный хра́ме / неизрече́нныя сла́вы Твоея́, Человеколю́бче.

Бог Сый мне, Бла́же, па́дшаго уще́дрил еси́, / и сни́ти ко мне благоволи́в, возне́сл мя еси́ распя́тием, / е́же вопи́ти Тебе́, Святы́й: / Хра́ме одушевле́нный неизрече́нныя Твоея́ сла́вы, Человеколю́бче.

Живо́т ипоста́сный Христе́ сый, / в истле́вша мя, я́ко Милосе́рдый Бог, обо́лкся, / в персть сме́ртную соше́д, Влады́ко, / сме́ртную держа́ву разруши́л еси́, / и мертв тридне́вен воскре́с, / в нетле́ние мя обле́кл еси́.

Богородичен: Бо́га заче́нши во чре́ве, Де́во, Ду́хом Пресвяты́м, / пребыла́ еси́ неопали́ма, / поне́же Тя купина́ законополо́жнику Моисе́ю, / пали́мую нежего́мо, я́ве предвозвести́, / огнь нестерпи́мый прие́мшую.

Ин, ирмос: Еди́не ведый:

О́блак Тя ле́гкий нело́жно, Де́во, имену́ем, / проро́ческим возсле́дующе рече́нием, / прии́де бо на Тебе́ Госпо́дь / низложи́ти еги́петския пре́лести рукотворе́ния, / и просвети́ти сим служа́щия.

Тя запеча́танный вои́стинну лик проро́ческий исто́чник, / и заключе́нную дверь именова́, де́вства Твоего́, Всепе́тая, / я́вственне зна́мения нам пи́шуще, / е́же сохрани́ла еси́ и по рождестве́.

Ин, ирмос: Несть свят, я́ко Госпо́дь, / и несть пра́веден, я́ко Бог наш, / Его́же пое́т вся тварь: / несть пра́веден па́че Тебе́, Го́споди.

Пропове́дует пресла́вно и па́че трубы́ вопие́т / свяще́нная и вели́кая Ла́вра, / тобо́ю нача́ло прии́мшая, о́тче преподо́бне Анто́ние, / всех росси́йских мона́хов нача́льниче, / дом же Бо́жия Ма́тери све́тло хва́лится, поя́ Бо́гу: / утверди́хся Тобо́ю, Го́споди.

Воспои́м све́тло изря́днаго в чудесе́х, вели́каго в доброде́телех / мона́шескаго о́бщаго жития́ на Руси́ нача́льника, / сла́внаго уго́дника Христо́ва и Пречи́стыя Богоро́дицы, блаже́ннаго Феодо́сия, / с ни́мже и Не́стора, достопа́мятных дея́ний списа́теля, / и Али́пия, живописа́ния на Руси́ нача́льника.

Рай мы́сленный еси́, Пече́рская свята́я горо́, / умно́жившая у́мная древеса́, блаже́нныя отцы́, / и́хже исчести́ поеди́ному не могу́ще, / о всех вку́пе хвалу́ и песнь принесе́м Еди́ному Влады́це.

Анто́ние му́чениче, и тве́рдый Евста́фие, вку́пе со Иоа́нном, / Ли́товския земли́ украше́ние, / горды́ню Олге́рдову низложи́вшии, / умерщвля́ющия мя стра́сти угаси́те.

Хода́таи бу́дите, Афана́сие преподобному́чениче, / и ты, о́троче Гаврии́ле, / за Оте́чество ва́ше земно́е, / и за град, иде́же подвиза́лися есте́, уму́ченнии. / Научи́те и нас дерзнове́нно Правосла́вие испове́дати / и стра́ха вра́жия не боя́тися.

Да почти́тся И́ов преподо́бный, Ла́вры Поча́евския украше́ние, / вку́пе со все́ми уго́дники и чудотво́рцы Волы́нскими, / де́лы свои́ми и чудесы́ облиста́вшии земли́ на́шея концы́.

Слава: Пе́сньми свяще́нными восхва́лим Афана́сия, Царегра́дскаго святи́теля, / свое́ благослове́ние земли́ Росси́йстей прине́сшаго / и честны́я своя́ мо́щи, я́ко зало́г со Вселе́нскою Це́рковию едине́ния, нам оста́вльшаго.

И ныне: Се вре́мя заступле́ния Пресвяты́я Богоро́дицы прии́де, / умно́жившимся собла́зном, / се вре́мя на́ших к Ней воздыха́ний, о бра́тие, / рцем у́бо от всего́ се́рдца на́шего: / Влады́чице, Влады́чице, помози́ лю́дем Твои́м.

Катавасия: Твоя́ песносло́вцы, Богоро́дице, / Живы́й и Незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Кондак, глас 3.
Подобен: Де́ва днесь:

Днесь лик святы́х, в земли́ на́шей Бо́гу угоди́вших, предстои́т в Це́ркви / и неви́димо за ны моли́тся Бо́гу. / А́нгели с ним славосло́вят, / и вси святи́и Це́ркве Христо́вы ему́ спра́зднуют, / о нас бо мо́лят вси ку́пно / Преве́чнаго Бо́га.

Икос: Еде́мскаго рая́ древеса́ добропло́дная и кра́сная яви́шася святи́и, / цве́ты благово́нныя уче́ний и плоды́ дел творя́щии, / от ни́хже ду́ши на́ша пита́ются и глад наш духо́вный утоля́ется. / Прииди́те у́бо, притеце́м под сень их и ублажи́м, / я́ко страны́ на́шея отра́ду и украше́ние, и я́ко жития́ о́браз нам и начерта́ние, / ти́и бо венцы́ прия́ша нетле́нныя от Преве́чнаго Бо́га.

Седален, глас 4.
Подобен: Ско́ро предвари́:

Со́лнце пра́вды Христо́с, я́коже лучи́ вас посла́, / просвеща́ющия зе́млю Ру́сскую, уго́дницы Бо́жии, / от ро́да на́шего просия́вшии, / те́мже помраче́нную ду́шу мою́ / Боже́ственными ва́шими моли́твами осия́йте, Богоблаже́ннии.

Слава, и ныне, глас тойже: Притеце́м, ве́рнии, / к Боже́ственней и цельбоно́сней ри́зе Спаси́теля на́шего Бо́га, / благоизво́лившаго сию́ пло́тию носи́ти / и на Кресте́ Святу́ю Свою́ Кровь излия́ти, / е́юже искупи́ нас от рабо́ты вра́жия. / Те́м благода́рственно вопие́м Ему́: / спаси́ святе́йшия патриа́рхи правосла́вныя, и архиере́и, / и гра́ды, и вся лю́ди честно́ю Твое́ю ри́зою защити́, / и спаси́ ду́ши на́ша, я́ко Человеколю́бец.

Песнь 4.

Ирмос: Го́ру Тя благода́тию Бо́жиею приосене́нную, / прозорли́выма Авваку́м / усмотри́в очи́ма, / из Тебе́ изы́ти Изра́илеву провозглаша́ше Свято́му, / во Спасе́ние на́ше / и обновле́ние.

Кто сей Спас и́же из Едо́ма и́сходя, вене́ц нося́ терно́вен, / очервле́нну ри́зу имы́й, на дре́ве ви́ся? / Изра́илев есть Сей Святы́й, / во Спасе́ние на́ше и обновле́ние.

Ви́дите лю́дие непокори́вии, и устыди́теся, / Его́же бо я́ко злоде́я вы вознести́ на крест у Пила́та испроси́сте умовре́дне, / сме́рти разруши́в си́лу, боголе́пно воскре́с из гро́ба.

Богородичен: Дре́во Тя, Де́во, жи́зни ве́мы, / не бо сне́ди плод смертоно́сный челове́ком из Тебе́ прозябе́, / но живота́ присносу́щнаго наслажде́ние, / во Спасе́ние нас пою́щих Тя.

Ин, ирмос: Го́ру Тя благода́тию:

Слы́ши чуде́с не́бо, и внуша́й земле́, / я́ко Дщи пе́рстнаго у́бо па́дшаго Ада́ма, Бо́гу нарече́на бысть, / и Своему́ Соде́телю Роди́тельница, / на Спасе́ние на́ше и обновле́ние.

Пое́м вели́кое и стра́шное Твое́ та́инство, / преми́рных бо утаи́вся чинонача́лий, / на Тя И́же сый сни́де я́ко дождь на руно́, Всепе́тая, / на Спасе́ние нас пою́щих Тя.

Ин, ирмос: Из горы́ приосене́нныя Сло́ве, проро́к, / еди́ныя Богоро́дицы, / хотя́ще воплоти́тися, богови́дно усмотри́, / и со стра́хом славосло́вяше си́лу Твою́.

Основа́теля и первонача́льника гра́да Москвы́, / Богоблаже́нный кня́же Дании́ле, показа́ тя Госпо́дь; / к Нему́ же непреста́нно моля́ся, / град Москву́, и всю зе́млю ру́сскую от бед спаси́, / и благове́рныя лю́ди ми́лостивно посети́.

Мо́лим вас, святи́телие Христо́вы / Пе́тре, Алекси́е, Ио́но и Фили́ппе, и вси про́чии Моско́встии чудотво́рцы, / душе́вное смуще́ние и печа́ли бу́рю разори́ти / и тишину́ нам пода́ти к Бо́гу ва́шими моли́твами.

Первопресто́льник Апо́стольския Це́ркве, / и испове́дник Правосла́вныя ве́ры, / и други́й Златоу́ст во обличе́ние грехолю́бных и мяте́жных, / и строи́тель правосла́внаго ца́рствия был еси́, святи́телю Ермоге́не, / и за сие́ темни́цею и гла́дом му́чим был еси́, / и прия́т от Бо́га неувяда́емый вене́ц. / Те́мже с му́ченики весели́шися.

Днесь ра́дуется сла́вный град Москва́, / и весе́лия исполня́ется вся Росси́я; / честна́я же оби́тель твоя́, Богоблаже́нне Се́ргие, хва́лящися украша́ется, / име́ющи в себе́ честны́я мо́щи твоя́, / я́ко сокро́вище неоску́дное и пречу́дное.

Пе́сньми свяще́нными восхва́лим / преподо́бнаго Ни́кона, послуша́ния рачи́теля, / с ни́мже воспои́м и Стефа́на, Са́вву, Андрони́ка / и вся преподо́бныя ученики́ и собесе́дники вели́каго Се́ргия, / и́хже моли́твами сы́нове росси́йстии спаса́ются.

Егда́ не бысть ни гра́да, ни ве́си, ни де́бри, / во е́же укры́тися лю́дем росси́йским от мучи́тельства враго́в, / и́мже грех ра́ди свои́х пре́дани бы́ша, / тогда́ ты, преподо́бне Диони́сие, / кре́пкое прибе́жище всем стра́ждущим яви́лся еси́.

Слава: О прему́дрии Васи́лие, Макси́ме и Иоа́нне Моско́встии, / и вси Христа́ ра́ди юро́дивии Росси́йстии, чу́днии житие́м и ра́зумом! / Мо́лим вас, блаже́ннии, / моли́те Христа́ Бо́га на́шего за земно́е Оте́чество ва́ше, / и всем ве́рным спасе́ние испроси́те.

И ныне: Богоро́дице Де́во, упова́ние христиа́ном, / проба́ви и нам дре́вния ми́лости Твоя́, бы́вшия отце́м на́шим, / покры́й и соблюди́ нас от вся́каго зла.

Катавасия: Седя́й в Сла́ве / на Престо́ле Божества́ / во о́блаце ле́гце, / прии́ди Иису́с Пребоже́ственный, / Нетле́нною Дла́нию / и спасе́ зову́щия: / сла́ва, Христе́, си́ле Твое́й.

Песнь 5.

Ирмос: Просвети́вый сия́нием прише́ствия Твоего́, Христе́, / и освети́вый Кресто́м Твои́м / ми́ра концы́, / сердца́ просвети́ / све́том Твоего́ Богоразу́мия, / правосла́вно пою́щих Тя.

Па́стыря овца́м вели́каго и Го́спода, / иуде́и дре́вом кре́стным умертви́ша, / но Той я́ко о́вцы, ме́ртвыя, во а́де погребе́нныя, / держа́вы сме́ртныя изба́ви.

Кресто́м Твои́м мир благовести́в, / и пропове́дав пле́нным, Спа́се мой, оставле́ние, / держа́ву иму́щаго посрами́л еси́, Христе:́ / на́га, обнища́вша показа́вый Боже́ственным воста́нием Твои́м.

Богородичен: Проше́ния ве́рно прося́щих, Всепе́тая, не пре́зри, / но приими́, и сия́ доноша́й Сы́ну Твоему́, Пречи́стая, / Бо́гу Еди́ному Благоде́телю, / Тебе́ бо Предста́тельницу стяжа́хом.

Ин, ирмос: Просвети́вый сия́нием:

Веселя́тся небе́сныя си́лы зря́ще Тя, / ра́дуются с ни́ми челове́ков собра́ния, / Рождество́м бо Твои́м совокупи́шася, Де́во Богоро́дице, / е́же досто́йно сла́вим.

Да дви́жатся вси язы́цы челове́честии и мы́сли, / к похвале́ челове́ческаго вои́стинну удобре́ния, / Де́ва предстои́т я́ве сла́вящи, / ве́рою Тоя́ пою́щих чудеса́.

Ин, ирмос: Страсте́й мя мглы, / я́ко от глубо́кия но́щи избавля́яй, / у́треневати сподо́би дух мой, молю́ся, / во све́те дне повеле́ний Твои́х, Христе́.

Вели́каго Нова́града первопа́стырие, / Ники́то, Иоа́нне и Григо́рие, / Феокти́сте, Евфи́мие, и Серапио́не, / вы в дому́ Прему́дрости Бо́жия, я́ко фи́никсы, процвели́ есте́, / словесы́ благопло́дными и непоро́чным житие́м.

Све́тло да похва́лятся кня́зи Новгоро́дстии, / Влади́мир, Святы́я Софи́и пречу́дныя устрои́тель, / с ма́терию свое́ю А́нною, и Мстисла́в, и Фео́дор, / с ни́ми же и вси от ро́да князе́й Росси́йских житие́м богоуго́дным просия́вшии, / Боже́ственными да воспою́тся пе́сньми.

Ди́внаго Варлаа́ма, Новгоро́дскую добро́ту, всеросси́йскаго свети́льника, / и Анто́ния, от Ри́ма на ка́мени по волна́м морски́м преплы́вшаго, / кто досто́йно просла́вит от земны́х?

Еде́мскаго рая́, прииди́те, ви́дим цве́ты присножи́зненныя и богопрозябе́нныя, / по́двиги отце́в, в преде́лех Новгоро́дских просия́вших, / и́хже есть еди́н де́латель Госпо́дь.

Все́волод кро́ткий и Довмо́нт, Пско́ву стена́ необори́мая, / и Нико́ла блаже́нный и Корни́лий, / Ливо́нскую чудь святы́м креще́нием просвети́вый, / пе́сньми да воспою́тся.

Ве́ру правосла́вную пред лати́ны пропове́давшии, / к ве́чным востеко́ша оби́телем, Иси́дор пресви́тер, / и с ним собо́р му́ченический во Ю́рьеве, гра́де Ливо́нстем, / и све́тло Царе́ви сил предстоя́ще, / мо́лятся о нас, почита́ющих па́мять их.

Слава: Евфроси́нию, ра́дование По́лотское и де́вам сия́ние, / Христе́ мой, Тебе́ приво́дим моли́твенницу, / ея́же ра́ди спаси́ ны.

И ныне: Те́плая Засту́пница к Тебе́ прибега́ющим и ненаде́ющихся наде́жда, / виждь озлобле́ние люде́й Твои́х / и зна́мение ми́лости яви́ нам, Пречи́стая.

Катавасия: Ужасо́шася вся́ческая / о Боже́ственней сла́ве Твое́й, / Ты бо, Неискусобра́чная Де́во, / име́ла еси́ во утро́бе над все́ми Бо́га / и родила́ еси́ Безле́тнаго Сы́на, / всем воспева́ющим Тя / мир подава́ющая.

Песнь 6.

Ирмос: Обы́де нас после́дняя бе́здна, / несть избавля́яй, / вмени́хомся, / я́ко о́вцы заколе́ния, / спаси́ лю́ди Твоя́, Бо́же наш, / Ты бо кре́пость немощству́ющих и исправле́ние.

Согреше́нием первозда́ннаго, Го́споди, лю́те уязви́хомся, / ра́ною же исцели́хомся Твое́ю, / е́юже за ны уязви́лся еси́, Христе́, / Ты бо кре́пость немощству́ющих и исправле́ние.

Возве́л ны еси́ из а́да, Го́споди, / ки́та уби́в всея́дца, Всеси́льне, / Твое́ю держа́вою низложи́в того́ си́лу, / Ты бо Живо́т, и Свет еси́, и Воскресе́ние.

Богородичен: Веселя́тся о Тебе́, Де́во Пречи́стая, / ро́да на́шего пра́отцы, Еде́м восприе́мше Тобо́ю, / его́же преступле́нием погуби́ша, / Ты бо, Чи́стая, и пре́жде Рождества́, и по Рождестве́ еси́.

Ин, ирмос: Обы́де нас:

Предстоя́т раболе́пне Рождеству́ Твоему́ чи́ни небе́снии, / дивя́щеся досто́йно Твоему́ безсе́менному Рождеству́, Присноде́во, / Ты бо, Чи́стая, и пре́жде Рождества́, и по Рождестве́ еси́.

Воплоти́ся пре́жде сый Безпло́тен, Сло́во из Тебе́, Пречи́стая, / вся́ческая во́лею творя́й, / безтеле́сных во́инства приведы́й от небытия́, я́ко Всеси́лен.

Ин, ирмос: Содержи́ма мя приими́, Человеколю́бче, грехи́ мно́гими / и припа́дающа щедро́там Твои́м, / я́ко проро́ка, Го́споди, и спаси́ мя.

Ева́нгельски, преподо́бнии Зоси́мо, Савва́тие и Ге́рмане, Христа́ возлюби́вше, / мiра отврати́стеся, / в непроходи́мыя же пусты́я о́стровы Солове́цкия заше́дше, / вся́кия доброде́тели о́бразу навыко́сте, / му́дрей пчеле́ подо́бящеся, / и прия́телище изря́дно Ду́ху Свято́му бы́сте, прему́дрии.

Вели́каго в чудесе́х преподо́бнаго Три́фона воспои́м, Ко́льскаго просвети́теля, / в после́дних конце́х се́верныя страны́ возсия́вша, / и от го́рькия рабо́ты бесо́вския лю́ди изба́вльша, / и святы́м креще́нием просвети́вша.

Ра́дуйся, пусты́не, пре́жде безпло́дная и необита́емая, / ны́не же, я́ко крин, цвету́щая и и́ноков мно́жеством испо́лненная; / взыгра́йте, го́ры Валаа́ма и вся древа́ дубра́вная, / хва́ляще Се́ргия и Ге́рмана, / вку́пе же и Арсе́ния Коне́вскаго со Алекса́ндром Сви́рским, / отцы́ всехва́льныя.

Жития́ сего́ непостоя́нную пучи́ну / немяте́жно преше́л еси́, преподо́бне Кири́лле, / ко́рмчую Ма́терь Бо́жию име́я, / и ты, Ио́сифе, Во́лоцкая похвало́, и Ни́ле нестяжа́телю, / на воде́ поко́йне и на зла́це воздержа́ния / учени́к ва́ших стада́ му́дре упа́сшии, / и ны́не с ни́ми неви́димо водворя́ющеся, / моли́теся о чту́щих па́мять ва́шу.

Я́ко со́лнце просия́л еси́ в мона́шеских собо́рех, / от ю́наго во́зраста освяще́н был еси́, / я́коже зарю́ испуща́я доброде́тели твоего́ жития́, Прилу́цкий Дими́трие, / Богоно́се о́тче преподо́бне.

Богоуго́дно пожи́в, пусты́ни, я́ко гра́ды, сотвори́л еси́ потре́бны и душеполе́зны, / исто́чник исцеле́ний пролива́я ве́рою чту́щим тя, Диони́сие преподо́бне.

Слава: Лику́й, Фиваи́до Ру́сская, / красу́йтеся, пусты́ни и де́бри Оло́нецкия, Белозе́рския и Волого́дския, / возрасти́вшия свято́е и сла́вное отце́в мно́жество, / чу́дным житие́м всех наставля́ющих мiру не прилепля́тися, / крест же свой на ра́мена взя́ти и во след Христу́ ше́ствовати.

И ныне: Твое́ю Де́во, всечестно́ю ико́ною Творе́ц всех чудоде́йствова, / спасе́ ца́рский град от нахожде́ния иноплеме́нных; / си́це и Росси́йстей стране́ бу́ди, Госпоже́ Цари́це, покро́в и заступле́ние, / спаса́ющи от всех наве́т вра́жиих.

Катавасия: Боже́ственное сие́ и всечестно́е / соверша́юще пра́зднество, / Богому́дрии, Богома́тере, / прииди́те, рука́ми воспле́щим, / от Нея́ ро́ждшагося Бо́га сла́вим.

Кондак воскресен, глас 1.
Подобен: Егда́ прии́деши:

Воскре́сл еси́, я́ко Бог, из гро́ба во сла́ве, / и мир совоскреси́л еси́; / и естество́ челове́ческое я́ко Бо́га воспева́ет Тя, и смерть исчезе́; / Ада́м же лику́ет, Влады́ко; / Е́ва ны́не от уз избавля́ема ра́дуется, зову́щи: / Ты еси́, И́же всем подая́, Христе́, воскресе́ние.

Икос воскресен: Воскре́сшаго тридне́вно воспои́м я́ко Бо́га Всеси́льна, / и врата́ а́дова сте́ршаго, / и я́же от ве́ка из гро́ба воздви́гшаго, / мvроно́сицам я́вльшагося, я́коже благоизво́лил есть, / пре́жде сим е́же ра́дуйтеся, реки́й, / и апо́столом ра́дость возвеща́я, я́ко Еди́н Жизнода́вец. / Те́мже ве́рою жены́ ученико́м зна́мения побе́ды благовеству́ют, / и ад стене́т, и смерть рыда́ет, / мiр же весели́тся, и вси с ним ра́дуются. / Ты бо по́дал еси́, Христе́, всем Воскресе́ние.

Песнь 7.

Ирмос: Тебе́ у́мную, Богоро́дице, пещь / разсмотря́ем, ве́рнии, / я́коже бо о́троки спасе́ три Превозноси́мый, / мир обнови́, / во чре́ве Твое́м всеце́л, / хва́льный отце́в Бог и препросла́влен.

Убоя́ся земля́, сокры́ся со́лнце, и поме́рче свет, / раздра́ся церко́вная боже́ственная заве́са, / ка́мение же разсе́деся, / на кресте́ бо ви́сит Пра́ведный, / Хва́льный отце́в Бог, и препросла́влен.

Ты быв а́ки безпомо́щен, / и уя́звен в ме́ртвых во́лею нас ра́ди / превозноси́мый, вся свободи́л еси́, / и держа́вною руко́ю совоскреси́л еси́, / хва́льный отце́в Бог, и препросла́влен.

Богородичен: Ра́дуйся, исто́чниче присноживы́я воды́. / Ра́дуйся, раю́ пи́щный. / Ра́дуйся, стено́ ве́рных. / Ра́дуйся, Неискусобра́чная. / Ра́дуйся, всемíрная Ра́досте, / Е́юже нам возсия́ / Хва́льный отце́в Бог, и препросла́влен.

Ин, ирмос: Тебе́ у́мную:

Тя, Богоро́дице, ле́ствицу Иа́ков проро́чески разумева́ет, / Тобо́ю бо Превозноси́мый на земли́ яви́ся, / и с челове́ки поживе́, я́ко благоволи́, / Хва́льный отце́в Бог и Препросла́влен.

Ра́дуйся, Чи́стая, из Тебе́ про́йде Па́стырь, / И́же во Ада́мову ко́жу обо́лкся вои́стинну Превозноси́мый, / во всего́ мя челове́ка, за благоутро́бие непости́жное, / Хва́льный отце́в Бог и Препросла́влен.

Ин, ирмос: На по́ле Деи́ре / иногда́ мучи́тель пещь поста́ви на муче́ние богоно́сных, / в не́йже три о́троки песносло́вяху Еди́наго Бо́га, / тро́ично воспева́ху, глаго́люще: / отце́в Бо́же, благослове́н еси́.

Лео́нтий, Иса́ия и Игна́тий, Иа́ков и Фео́дор, / честни́и Ду́ха сосу́ды и Росто́ву честно́е украше́ние, / Авраа́мий, бесо́в лука́вых му́жественный томи́тель, / и други́й Иоаса́ф, в Росси́и просия́вый, Петр царе́вич / и Ирина́рх, самопроизво́льный страда́лец, / со ины́ми Росто́вскими чудотво́рцы Боже́ственными да воспою́тся пе́сньми.

Засту́пницы и покрови́телие гра́ду Влади́миру вы есте́ по Бо́зе, / му́жественный Алекса́ндре, Све́ев победи́телю, / Гео́ргие, ду́шу свою́ на бра́ни за це́рковь Бо́жию и за лю́ди положи́вый; / Андре́е, Ру́сския земли́ устрои́телю, с целому́дренным Гле́бом, и Авраа́мие преподо́бне, / я́ко Ева́нгельский купе́ц страда́ньми свои́ми Ца́рство Небе́сное купи́вый; / напра́вите нас ко приста́нищу спасе́ния, / вы бо есте́ ве́рным огражде́ние.

Иоа́нну и Фео́дору сла́ва, Су́ждальским свети́льником, / с ни́ми да пою́тся и Евфи́мий, в по́двизех превысо́кий, / вели́каго Се́ргия собесе́дник, / и Евфроси́ния, пресве́тлая Су́ждальская звезда́.

Да почте́н бу́дет Ники́та, / покая́ния о́браз, на столпе́ подвиза́выйся / и от сро́дник смерть прие́мый, / и Дании́л, ме́ртвых погреба́тель; / с ни́миже и Андре́й, сла́ву княже́ния оста́вивый / и в нище́тне о́бразе житие́ сконча́вый, / Переясла́встии чудотво́рцы.

Константи́не, апо́столе и просвети́телю Му́ромския земли́, / с благоро́дными ча́ды твои́ми Фео́дором и Михаи́лом, / и Пе́тре хра́брый и благочести́вый, го́рдости зми́я победи́вый, / с му́дрою супру́жницею твое́ю Февро́ниею / и с пра́ведною Иулиани́ею ми́лостивою / о нас Христа́ моли́те.

Тверска́я похвало́, Арсе́ние святи́телю, / Михаи́ле кня́же и му́чениче, / и А́нно, гра́да Ка́шина сокро́вище; / Ни́ле и Мака́рие преподо́бнии, / Ефре́ме, гра́да Торжка́ просвети́телю, / со Арка́дием и Иулиани́ею, цве́том целому́дрия, / о нас Христа́ умоли́те.

Слава: Ору́жием ва́ших моли́тв, / благове́рнии кня́зи и преподо́бнии Фео́доре и Дави́де с Константи́ном, / победи́сте де́моны и с Небесе́ благода́ть прия́сте / исцеля́ти боле́зни и отгоня́ти ду́хи лука́выя от взыва́ющих: / благослове́н еси́, Бо́же оте́ц на́ших.

И ныне: Пода́ждь нам по́мощь мольба́ми Твои́ми, Пречи́стая Богоро́дице; / ско́рби у́бо нахо́дят на ны и печа́ли умножа́ются, врази́ ополча́ются. / Но Ты, Пречи́стая, предста́вши, изба́ви, / враго́в на́ших возноше́ние низложи́, / побе́ду нам да́руй, / да посра́мятся вси, явля́ющии рабо́м Твои́м зла́я.

Катавасия: Не послужи́ша тва́ри Богому́дрии / па́че Созда́вшаго, / но, о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.

Песнь 8.

Ирмос: В пещи́ о́троцы Изра́илевы, / я́коже в горни́ле, / добро́тою благоче́стия чисте́е зла́та блеща́хуся, глаго́люще: / благослови́те, вся дела́ Госпо́дня, Го́спода, / по́йте и превозноси́те во вся ве́ки.

И́же во́лею вся творя́й, и претворя́яй, / обраща́яй сень сме́ртную в ве́чную жизнь, / стра́стию Твое́ю, Сло́ве Бо́жий, / Тебе́ непреста́нно вся дела́ Госпо́дня, / Го́спода пои́м, и превозно́сим во вся ве́ки.

Ты разори́л еси́ сокруше́ние, Христе́, и окая́нство, / во врате́х и тверды́нях а́довых, / воскре́с из гро́ба тридне́вен. / Тебе́ непреста́нно вся дела́, я́ко Го́спода, пою́т, / и превозно́сят во вся ве́ки.

Богородичен: Я́же без се́мене и преесте́ственне от облиста́ния Боже́ственнаго / Ро́ждшую би́сера многоце́ннаго Христа́, воспои́м глаго́люще: / благослови́те вся дела́ Госпо́дня, Го́спода, / по́йте и превозноси́те Его́ во вся ве́ки.

Ин, ирмос: В пещи́ о́троцы Изра́илевы:

Черто́г светови́дный, из него́же всех Влады́ка, / я́ко Жени́х произы́де Христо́с, / воспои́м вси вопию́ще: / вся дела́ Госпо́дня, Го́спода по́йте, / и превозноси́те во вся ве́ки.

Ра́дуйся, Престо́ле сла́вный Бо́жий, / ра́дуйся, ве́рных стено́, / Е́юже су́щим во тьме возсия́ свет Христо́с, / Тебе́ блажа́щим, и вопию́щим: / вся дела́ Госпо́дня, Го́спода по́йте, / и превозноси́те во вся ве́ки.

Ин, ирмос: Победи́тели мучи́теля и пла́мене / благода́тию Твое́ю бы́вше, / за́поведей Твои́м зело́ прилежа́ще, / о́троцы вопия́ху: / благослови́те, вся дела́ Госпо́дня, Го́спода.

Красу́йся, гра́де Каза́нь, име́я моли́твенники своя́, / преподо́бных Гу́рия, Варсоно́фия и Ге́рмана, отгна́вших от тебе́ тьму неве́рия, / и Иоа́нна му́ченика, и Стефа́на, и Петра́, / оте́ческое нече́стие оста́вльших и мече́м от соплеме́нник в Небе́сное оте́чество преше́дших.

Свяще́ннаго Писа́ния от ю́ности научи́вся, богоно́се Стефа́не, / ра́лом слове́с твои́х оледене́вшая Пе́рмских люде́й сердца́ возде́лал еси́, / и Боже́ственное се́мя в них все́яв, / плод кра́сный Христу́ прине́сл еси́.

Да весели́тся Сиби́рская страна́; / в тебе́ бо Госпо́дь яви́ уго́дники Своя́, / пра́веднаго Симео́на Верхоту́рскаго, и Ирку́тския святи́тели: Инноке́нтия, Софро́ния и Иоа́нна, / но́выя ди́вныя свети́льники и чудотво́рцы.

Иера́рше Богому́дре Дими́трие, / жити́й святы́х списа́телю и ревни́телю о́нем до́брый, / тех сла́вы моли́твами твои́ми яви́ ны о́бщники.

Святи́телю о́тче Митрофа́не, пе́рвый Воро́нежу па́стырю, / му́жество ве́лие яви́вый, / преще́ния царе́ва и сме́рти не убоя́вся / и в простоте́ ду́шу свою́ спасы́й, моли́ Бо́га о нас.

Я́ко пчела́, мед сла́дкий от цве́тов скороувяда́ющих собра́л еси́, о́тче Ти́хоне, / от тле́ннаго мiра духо́вное сокро́вище, / и́мже всех нас услажда́еши.

Благослови́м Отца́ и Сы́на и Свята́го Ду́ха, Го́спода.

Вои́стинну ди́вна и па́че сло́ва чудеса́ Твоя́, Феодо́сие, о́тче наш; / яви́лся бо еси́ красота́ гра́ду Черни́гову, / сла́ва це́ркви Росси́йстей, / правосла́вныя ве́ры небе́сный пропове́дник, / и́стины свиде́тель непрело́жный.

И ны́не и при́сно и во ве́ки веко́в, ами́нь.

Ты похвала́ христиа́ном еси́, Влады́чице, / Ты ору́жие на враги́ и стена́ к Тебе́ прибега́ющим. / Тя и ны́не на по́мощь призыва́ем, Госпоже́, / не даждь вознести́ся на лю́ди Твоя́ враго́м, / и́же Тебе́ не хва́лят, ни Сы́на Твоего́, Богоро́дице, / и Твое́й ико́не не кла́няются; / сих победи́, и ду́ши на́ша спаси́.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: О́троки благочести́выя в пе́щи / Рождество́ Богоро́дичо спасло́ есть; / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте, дела́, / и превозноси́те Его́ во вся ве́ки.

Поем, Честне́йшую:

Песнь 9.

Ирмос: О́браз чи́стаго рождества́ Твоего́, / огнепали́мая купина́ / показа́ неопа́льная; / и ны́не на нас / напа́стей свире́пеющую угаси́ти, мо́лимся, пещь, / да Тя, Богоро́дице, / непреста́нно велича́ем.

О ка́ко, лю́дие беззако́ннии и непокори́вии, / лука́вая совеща́вше, / го́рдаго и нечести́ваго оправди́ша, / Пра́веднаго же на дре́ве осуди́ша Го́спода сла́вы, / Его́же досто́йно велича́ем!

Спа́се А́гнче Непоро́чне, / И́же мíра грехи́ взе́мый, / Тебе́ сла́вим воскре́сшаго тридне́вно, / со Отце́м и Боже́ственным Твои́м Ду́хом, / и Го́спода сла́вы, / Его́же богосло́вяще, велича́ем.

Богородичен: Спаси́ лю́ди Твоя́, Го́споди, / и́хже стяжа́л еси́ честно́ю Твое́ю кро́вию, / це́рквам Твои́м подая́ мир, Человеколю́бче, / Богоро́дицы моли́твами.

Ин, ирмос: О́браз чи́стаго:

Из ко́рене Дави́дова прозябла́ еси́ проро́ческаго, Де́во, и богооте́ческаго, / но и Дави́да я́ко вои́стинну Ты просла́вила еси́, / я́ко ро́ждши проро́чествованнаго Го́спода сла́вы, / Его́же досто́йно велича́ем.

Всяк похва́льный, Пречи́стая, зако́н / побежда́ется вели́чеством сла́вы Твоея́. / Но о, Влады́чице, от раб Твои́х недосто́йных, / от любве́ Тебе́ приноси́мое приими́, Богоро́дице, / со усе́рдием пе́ние похва́льное.

Ин, ирмос: О де́вства край, Богоро́дице! / Пе́сньми же сла́вными / пра́здники возвыша́ющая благода́тей Твои́х / и ны́не де́вственною Сло́ва Твоего́ па́мятию / наи́тием та́йным украша́ющая в ней / Тя велича́ющия.

О ра́досте на́ша, Серафи́ме преподо́бне! / Вели́кия твоя́ пусты́нныя по́двиги и труды́, / и сла́дость уче́ния твоего́ почита́ем, / и́миже мно́гия приходя́щия к тебе́ просвети́л еси́, / и научи́л еси́ воспева́ти единосу́щную Тро́ицу.

О святи́телю Белогра́дский Иоаса́фе! / Пра́вило ве́ры и о́браз милосе́рдия / благочести́вым житие́м твои́м всем яви́вый, / ко Го́споду непреста́нно моли́ся, / да утверди́т в земли́ ру́сской правове́рие, мир и благоче́стие.

О Ио́сифе, святи́телю и му́чениче! / Град А́страхань и вся Во́лжская страна́ тобо́ю хва́лится / и почита́ет тя, за пра́вду от безбо́жных мяте́жников лю́те пострада́вшаго.

О но́вых страстоте́рпцев! / По́двиг проти́ву зло́бы у́бо претерпе́ша, / ве́ру Христо́ву я́ко щит пред уче́нии мiра сего́ держа́ще, / и нам о́браз терпе́ния и злострада́ния досто́йно явля́юще.

О тве́рдости и му́жества по́лка му́ченик Христо́вых, / за Христа́ убие́нных! / Ти́и бо Це́рковь Правосла́вную украси́ша / и в стране́ свое́й кро́ви своя́, я́ко се́мя ве́ры да́ша, / и ку́пно со все́ми святы́ми досто́йно да почту́тся.

О вели́цыи на́ши отцы́, имени́тии и безыме́ннии, явле́ннии и неявле́ннии, / Небе́снаго Сио́на дости́гшии, и сла́ву мно́гу от Бо́га прии́мшии, / утеше́ние нам в ско́рби су́щим испроси́те, / страну́ на́шу па́дшую возста́вите, и лю́ди расточе́нныя собери́те, / от нас я́ко дар песнь благодаре́ния прие́млюще.

Слава: О Тро́ице Пресвята́я! / Приими́, я́же Ру́сская земля́ прино́сит Ти, / я́ко нача́тки и я́ко фимиа́м избра́нный, / вся угоди́вшия и пре́жде, и по́слежде в ней, / зна́емыя и незна́емыя, / моли́твами их от вся́каго вре́да сию́ сохраня́й.

И ныне: О Де́во Благода́тная! / Гра́ды и ве́си на́ша честна́го зра́ка Твоего́ изображе́нии, / я́ко благоволе́ния зна́меньми, обогати́вшая, / благодаре́ние на́ше приими́ и от бед лю́тых оте́чество на́ше изба́ви; / вси бо Тя, я́ко Покро́в всемо́щный страны́ на́шея, велича́ем.

Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице, Чи́стая Присноде́во.

По 9-й песни ектения и Свят Госпо́дь Бог наш:

Ексапостила́рий воскресный 2-й:

Ка́мень узре́вша отвале́н, мироно́сицы ра́довахуся, / ви́деша бо ю́ношу седя́ща во гро́бе, / и той тем рече́: се Христо́с воста́л есть, / рцы́те с Петро́м ученико́м, / на го́ру приспе́йте Галиле́йскую, та́мо вам яви́тся, / я́коже предрече́ друго́м.

Слава, светилен святых:

В пе́снех восхва́лим свети́ла незаходи́мая земли́ Росси́йския, / таи́нники Боже́ственнаго Сло́ва, Христа́ сла́вяще, / сих просвети́вшаго и возлюби́вшаго, / и помо́щники нам да́вшаго в ско́рби.

И ныне, Богородичен воскресен:

А́нгел у́бо принесе́ Де́ве, е́же ра́дуйся, / пре́жде Твоего́ зача́тия, Христе́, / А́нгел же ка́мень отвали́ гро́ба Твоего́, / вме́сто печа́ли ов у́бо ра́дости неизрече́нныя зна́мения, / ов же в сме́рти ме́сто пода́теля Тя жи́зни пропове́дуя и велича́я, / и глаго́ля воскресе́ние жена́м, и таи́нником.

На хвалитех
стихиры воскресны 4, глас 1:

Стих: Сотвори́ти в них суд напи́сан: / сла́ва сия́ бу́дет всем преподо́бным Его́.

Пое́м Твою́, Христе́, спаси́тельную страсть, / и сла́вим Твое́ Воскресе́ние.

Стих: Хвали́те Бо́га во святы́х Его́, / хвали́те Его́ в утверже́нии си́лы Его́.

Крест претерпе́вый, и смерть упраздни́вый, / и воскресы́й из ме́ртвых, / умири́ на́шу жизнь, Го́споди, / я́ко еди́н Всеси́лен.

Стих: Хвали́те Его́ на си́лах Его́, / хвали́те Его́ по мно́жеству вели́чествия Его́.

А́да плени́вый, и челове́ка воскреси́вый, / Воскресе́нием Твои́м, Христе́, / сподо́би нас чи́стым се́рдцем / Тебе́ пе́ти и сла́вити.

Стих: Хвали́те Его́ во гла́се тру́бнем, / хвалите Его́ во псалти́ри и гу́слех.

Боголе́пное Твое́ снисхожде́ние сла́вяще, / пое́м Тя, Христе́. / Роди́лся еси́ от Де́вы, / и не разлуче́н был еси́ от Отца́, / пострада́л еси́, я́ко челове́к, / и во́лею претерпе́л еси́ Крест, / воскре́сл еси́ от гро́ба, я́ко от черто́га произше́д, / да спасе́ши мiр, / Го́споди сла́ва Тебе́.

И стихиры святых 4. Глас 1:

Стих: Хвали́те Его́ в тимпа́не и ли́це, / хвали́те Его́ во стру́нах и орга́не.

Ду́ха Твоего́, Го́споди, / посла́л еси́ в разу́мную ду́шу кня́зя Влади́мира / позна́ти Тя, Еди́наго в Тро́ице Бо́га. / Те́мже креще́нием просвети́в избра́нныя своя́, / Тобо́ю поруче́нныя ему́ лю́ди, / приведе́ их ве́рою, / в Це́ркви Твое́й вопию́щия: / Изба́вителю наш, сла́ва Тебе́.

Глас 2: Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния, / вся́кое дыха́ние да хва́лит Го́спода.

Свети́ла ру́сския земли́, му́ченики прехва́льныя, / святи́тели, просвети́тели на́ша и ве́ры утвержде́ние, / преподо́бныя же гра́жданы пусты́нныя и наста́вники благоче́стия, / соше́дшеся согла́сно ублажи́м, вопию́ще к ним: / преподо́бнии и му́ченицы, и пра́веднии, и вси Росси́йстии святи́и, / моли́те Христа́ Бо́га, / дарова́ти нам ве́лию ми́лость.

Стих: Воззва́ша пра́веднии, / и Госпо́дь услы́ша их.

Преподо́бнии отцы́, / бы́сте цве́ти духо́внии Росси́йстей земли́, / похвала́ на́ша и утвержде́ние, / и всем благоути́шное приста́нище, / о вас бо земля́ на́ша хва́лится, / стяжа́вши вас я́ко неистощи́мое сокро́вище. / И ны́не а́ще теле́сне язы́к ваш умолче́, / оба́че чудеса́ свиде́тельствуют просла́вившаго вас Го́спода. / Ему́же моли́теся, дарова́ти душа́м на́шим ве́лию ми́лость.

Глас 4. Стих: Блаже́ни вси боя́щиися Го́спода, / ходя́щии в путе́х Eгó.

Глас Ева́нгельский услы́шавше / и апо́стольскою ре́вностию распали́вшеся, / к науче́нию неве́рных язы́ков устреми́стеся, / Богоблаже́ннии и равноапо́стольнии / Ку́кшо, Лео́нтие, Стефа́не и Гу́рие, / и досточу́дный Инноке́нтие, / вели́кия Сиби́рския страны́ апо́столе / и просвеще́ния за мо́рем су́щих, / но́вых стран первонача́льниче. / Те́мже со все́ми про́чими, / в благове́стии Христо́ве потруди́вшимися, / досто́йно ублажа́етеся.

Слава, стихира евангельская вторая, глас 2:

С ми́ры прише́дшим я́же с Мари́ею жена́м, / и недоумева́ющимся, / ка́ко бу́дет им улучи́ти жела́ние, / яви́ся ка́мень взят, / и Боже́ственный ю́ноша утоля́я мяте́ж душ их, / воста́ бо, глаго́лет, Иису́с Госпо́дь. / Те́мже пропове́дите пропове́дником Его́, / ученико́м в Галиле́ю тещи́, / и ви́дети Его́ воскре́сша из ме́ртвых, / я́ко Жизнода́вца и Го́спода.

И ныне, глас тойже: Преблагослове́на еси́, Богоро́дице Де́во, / Вопло́щшим бо ся из Тебе́ ад плени́ся, / Ада́м воззва́ся, / кля́тва потреби́ся, / Е́ва свободи́ся, / смерть умертви́ся, и мы ожи́хом. / Тем воспева́юще вопие́м: / благослове́н Христо́с Бог, / благоволи́вый та́ко, сла́ва Тебе́.

Славословие великое.

По Трисвятом тропарь воскресен:

Днесь спасе́ние мiру бысть, / пое́м Воскре́сшему из гро́ба, / и Нача́льнику жи́зни на́шея: / разруши́в бо сме́ртию смерть, / побе́ду даде́ нам и ве́лию ми́лость.

Ектения и отпуст.

НА ЛИТУРГИИ

Блаженна воскресна 1-го гласа на 6:

Во Ца́рствии Твое́м помяни́ нас, Го́споди, егда́ прии́деши, во Ца́рствии Твое́м.

Блаже́ни ни́щии ду́хом, я́ко тех есть Ца́рство Небе́сное.

Блаже́ни пла́чущии, я́ко ти́и уте́шатся.

Блаже́ни кро́тции, я́ко ти́и насле́дят зе́млю.

Сне́дию изведе́ из рая́ враг Ада́ма, / Кресто́м же разбо́йника введе́ Христо́с в онь, / помяни́ мя, зову́ща, / егда́ прии́деши во Ца́рствии Твое́м.

Блаже́ни а́лчущии и жа́ждущии пра́вды, я́ко ти́и насы́тятся.

Покланя́юся страсте́м Твои́м, / славосло́влю и Воскресе́ние со Ада́мом и разбо́йником, / со гла́сом све́тлым вопию́ Ти: / помяни́ мя Го́споди, / егда́ прии́деши во Ца́рствии Твое́м.

Блаже́ни ми́лостивии, я́ко ти́и поми́ловани бу́дут.

Распя́лся еси́, безгре́шне, / и во гро́бе положи́лся еси́ во́лею, / но воскре́сл еси́, я́ко Бог, / совоздви́гнувый Себе́ Ада́ма, / помяни́ мя, зову́ща, / егда́ прии́деши во Ца́рствии Твое́м.

Блаже́ни чи́стии се́рдцем, я́ко ти́и Бо́га у́зрят.

Храм Твой теле́сный тридне́вным Воскреси́вый погребе́нием, / со Ада́мом, и и́же от Ада́ма, воскреси́л еси́, Христе́ Бо́же, / помяни́ нас, зову́щих, / егда́ прии́деши во Ца́рствии Твое́м.

Блаже́ни миротво́рцы, я́ко ти́и сы́нове Бо́жии нареку́тся.

Мvроно́сицы приидо́ша, пла́чуща, / на гроб Твой Христе́ Бо́же, зело́ ра́но, / и в бе́лых ри́зах обрето́ша А́нгела седя́ща, / что и́щете; зову́ща. / Воскре́се Христо́с, не рыда́йте про́чее.

Блаже́ни изгна́ни пра́вды ра́ди, я́ко тех есть Ца́рство Небе́сное.

Апосто́ли Твои́, Го́споди / на го́ру, а́може повеле́л еси́ им, прише́дше Спа́се, / и Тя ви́девше, поклони́шася. / И́хже и посла́л еси́ во язы́ки учи́ти и крести́ти я́.

Блаженна святых на 4, глас 8:

Блаже́ни есте́, егда́ поно́сят вам, и изжену́т, и реку́т всяк зол глаго́л на вы лжу́ще Мене́ ра́ди.

Не мече́м зе́млю на́шу насле́дихом, / но десни́цею Твое́ю и мы́шцею Твое́ю, / и просвеще́нием лица́ Твоего́, / и святы́х Твои́х слеза́ми, / по́двиги и по́ты, / кровьми́ и уче́нии / оте́чество на́ше утверди́ся.

Ра́дуйтеся и весели́теся, я́ко мзда ва́ша мно́га на небесе́х.

Егда́ отступи́хом от Тебе́ / и за́поведи Твоя́ не сотвори́хом, / тогда́ отри́нул ны еси́ и низложи́л еси́, / и па́че всех язы́к ума́лихомся, / но пощади́ нас, Бо́же, Спаси́телю наш, / святы́х Твои́х мольба́ми.

Слава: О Тро́ице Пребоже́ственная! / Возврати́ плене́ние на́ше, / уврачу́й боле́зни и ско́рби на́ша, / воздви́гни дух наш от ле́ности и сна грехо́внаго, / да досто́йни бу́дем отце́в и бра́тий на́ших, / по́двиги свои́ми / в земли́ на́шей И́мя Твое́ просла́вльших.

И ныне: Расточе́нныя собери́, / отлуче́нныя возврати́, / отпа́дшия от ве́ры Правосла́вныя па́ки обрати́, / пла́чущия и скорбя́щия уте́ши, / земли́ на́шея подви́гшияся сокруше́ние исцели́, Благода́тная, / со святы́ми соо́тчичи на́шими / Бо́га о нас умоля́ющи.

По входе Тропарь воскресен, глас 1:

Ка́мени запеча́тану от иуде́й / и во́ином стрегу́щим Пречи́стое Те́ло Твое́, / воскре́сл еси́ тридне́вный, Спа́се, / да́руяй ми́рови жизнь. / Сего́ ра́ди Си́лы Небе́сныя вопия́ху Ти, Жизнода́вче: / сла́ва Воскресе́нию Твоему́, Христе́, / сла́ва Ца́рствию Твоему́, / сла́ва смотре́нию Твоему́, еди́не Человеколю́бче.

Тропарь святых, глас 8:

Я́коже плод кра́сный Твоего́ спаси́тельнаго се́яния, / земля́ Росси́йская прино́сит Ти, Го́споди, вся святы́я, в той просия́вшия. / Тех моли́твами в ми́ре глубо́це / Це́рковь и страну́ на́шу Богоро́дицею соблюди́, Многоми́лостиве.

Кондак воскресен, глас 1.
Подобен: Егда́ прии́деши:

Воскре́сл еси́, я́ко Бог, из гро́ба во сла́ве, / и мир совоскреси́л еси́; / и естество́ челове́ческое я́ко Бо́га воспева́ет Тя, и смерть исчезе́; / Ада́м же лику́ет, Влады́ко; / Е́ва ны́не от уз избавля́ема ра́дуется, зову́щи: / Ты еси́, И́же всем подая́, Христе́, воскресе́ние.

Кондак святых, глас 3.
Подобен: Де́ва днесь:

Днесь лик святы́х, в земли́ на́шей Бо́гу угоди́вших, предстои́т в Це́ркви / и неви́димо за ны моли́тся Бо́гу. / А́нгели с ним славосло́вят, / и вси святи́и Це́ркве Христо́вы ему́ спра́зднуют, / о нас бо мо́лят вси ку́пно / Преве́чнаго Бо́га.

Прокимен, глас 1:

Бу́ди, Го́споди, ми́лость Твоя́ на нас, / я́коже упова́хом на Тя. Стих: Ра́дуйтеся, пра́веднии, о Го́споде, пра́вым подоба́ет похвала́.

Прокимен, глас 7: Честна́ пред Го́сподем смерть преподо́бных Его́.

К Римляном послания святаго Апостола Павла чтение.
[Зачало 81 от полу. Рим. 2, 10 – 16.]

Бра́тие, сла́ва и честь и мир вся́кому де́лающему благо́е, иуде́еви же пре́жде и е́ллину. Несть бо на лица́ зре́ния у Бо́га. Ели́цы бо беззако́нно согреши́ша, беззако́нно и поги́бнут, и ели́цы в зако́не согреши́ша, зако́ном суд прии́мут. Не слы́шателие бо зако́на пра́ведни пред Бо́гом, но творцы́ зако́на, си́и оправдя́тся. Егда́ бо язы́цы, не иму́ще зако́на, естество́м зако́нная творя́т, си́и, зако́на не иму́ще, са́ми себе́ суть зако́н. И́же явля́ют де́ло зако́нное напи́сано в сердца́х свои́х, спослушеству́ющи им со́вести, и между́ собо́ю помысло́м осужда́ющым или́ отвеща́ющым, в день, егда́ су́дит Бог та́йная челове́ком, по благове́стию моему́, Иису́сом Христо́м.

И святых,
Апостол ко Евреем. [Зачало 330. Евр. 11, 33 – 12, 2.]

Бра́тие, святи́и вси ве́рою победи́ша ца́рствия, соде́яша пра́вду, получи́ша обетова́ния, загради́ша уста́ львов, угаси́ша си́лу о́гненную, избего́ша о́стрея меча́, возмого́ша от не́мощи, бы́ша кре́пцы во бране́х, обрати́ша в бе́гство полки́ чужи́х. Прия́ша жены́ от воскресе́ния ме́ртвыя своя́, ини́и же избие́ни бы́ша, не прие́мше избавле́ния, да лу́чшее воскресе́ние улуча́т, друзи́и же руга́нием и ра́нами искуше́ние прия́ша, еще́ же и уз и темни́ц. Ка́мением побие́ни бы́ша, претре́ни бы́ша, искуше́ни бы́ша, уби́йством меча́ умро́ша, проидо́ша в ми́лотех, и в ко́зиях ко́жах, лише́ни, скорбя́ще, озло́блени. И́хже не бе досто́ин [весь] мир, в пусты́нях скита́ющеся, и в гора́х, и в верте́пах, и в про́пастех земны́х. И си́и вси послу́шествовани бы́вше ве́рою, не прия́ша обетова́ния, Бо́гу лу́чшее что о нас предзре́вшу, да не без нас соверше́нство прии́мут. Те́мже у́бо и мы, толи́к иму́ще облежа́щь нас о́блак свиде́телей, го́рдость вся́ку отло́жше, и удо́бь обстоя́тельный грех, терпе́нием да тече́м на предлежа́щий нам по́двиг, взира́юще на нача́льника ве́ры и соверши́теля Иису́са.

Аллилуиа, глас 1:

Бог дая́й отмще́ние мне, и покори́вый лю́ди под мя. Стих: Велича́яй спасе́ния царе́ва, и творя́й ми́лость христу́ своему́ Дави́ду, и се́мени Его́ до ве́ка.

И святых. Стих: Весели́теся о Го́споде и ра́дуйтеся, пра́веднии.

Евангелие воскресное рядовое, от Матфея,
зачало 9. [Мф. 4, 18 – 23.]

Во вре́мя о́но, ходя́ Иису́с при мо́ри Галиле́йстем, ви́де два бра́та, Си́мона глаго́лемаго Петра́, и Андре́я бра́та его́, вмета́юща мре́жи в мо́ре, бе́ста бо ры́баря. И глаго́ла и́ма: гряди́та по Мне, и сотворю́ вы ловца́ челове́ком. О́на же а́бие оста́вльша мре́жи, по Нем идо́ста. И преше́д отту́ду, ви́де и́на два бра́та, Иа́кова Зеведе́ева, и Иоа́нна бра́та его́, в корабли́ с Зеведе́ом отце́м ею́, завязу́юща мре́жи своя́, и воззва́ я́. О́на же а́бие оста́вльша кора́бль и отца́ своего́, по нем идо́ста. И прохожда́ше всю Галиле́ю Иису́с, учя́ на со́нмищах их и пропове́дая Ева́нгелие Ца́рствия, исцеля́я всяк неду́г и вся́ку я́зю в лю́дех.

И святых,
Евангелие от Матфея, зачало 10.
[Мф. 4, 25 – 5, 12.]

Во вре́мя о́но, по Иису́се идо́ша наро́ди мно́зи от Галиле́и и десяти́ град, и от Иерусали́ма и Иуде́и, и со óнаго по́лу Иoрда́на. Узре́в же наро́ды, взы́де на гору́ и се́дшу Eму́, приступи́ша к Нему́ ученицы́ Eго́. И отверз уста́ Своя́, уча́ше их, глаго́ля: блаже́ни ни́щии ду́хом, я́ко тех eсть Ца́рствие Небе́сное. Блаже́ни пла́чущии, я́ко ти́и уте́шатся. Блаже́ни кро́тцыи, я́ко ти́и насле́дят зе́млю. Блаже́ни а́лчущии и жа́ждущии пра́вды, я́ко ти́и насы́тятся. Блаже́ни ми́лостивии, я́ко ти́и поми́ловани бу́дут. Блаже́ни чи́стии се́рдцем, я́ко ти́и Бо́га у́зрят. Блаже́ни миротво́рцы, я́ко ти́и сы́нове Бо́жии нареку́тся. Блаже́ни изгна́ни пра́вды ра́ди, я́ко тех eсть Ца́рствие Небе́сное. Блаже́ни eсте́, eгда́ поно́сят вам, и иждену́т, и реку́т всяк зол глаго́л на вы лжу́ще, Менé ра́ди. Ра́дуйтеся и весели́теся, я́ко мзда ва́ша мно́га на небесе́х.

Причастен воскресен:

Хвали́те Го́спода с Небе́с, / хвали́те Его́ в вы́шних. И святых: Ра́дуйтеся, пра́веднии, о Го́споде, / пра́вым подоба́ет похвала́. / Аллилу́иа. [Трижды.]