Неделя Третья по Пасхе, Жен-мироносиц. Избранные службы Цветной Триоди.

В СУББОТУ НА МАЛЕЙ ВЕЧЕРНИ

Стихиры воскресны, 3. Глас 2:

Пре́жде век от Отца́ Ро́ждшемуся Бо́жию Сло́ву, / Вопло́щшемуся от Де́вы Мари́и, / прииди́те, поклони́мся: / крест бо претерпе́в, / погребе́нию предаде́ся, я́ко Сам восхоте́: / и воскре́се из ме́ртвых, / спасе́ мя заблужда́ющаго челове́ка.

Христо́с Спас наш, / е́же на ны рукописа́ние пригвозди́в на Кресте́ загла́ди, / и сме́рную держа́ву упраздни́: / поклоня́емся Его́ Тридне́вному Воскресе́нию.

Со Арха́нгелы воспои́м Христо́во Воскресе́ние: / Той бо есть Изба́витель и Спас душ на́ших, / и в сла́ве стра́шней и кре́пцей си́ле, / па́ки гряде́т суди́ти мiру, его́же созда́.

И восточен {анатолиев} 1, глас тойже:

Тебе́ Распе́ншагося и Погребе́ннаго, / А́нгел пропове́да Влады́ку, и глаго́лаше жена́м: / прииди́те ви́дите, иде́же лежа́ше Госпо́дь: / воскре́се бо, я́коже рече́, я́ко Всеси́лен. / Те́мже Тебе́ поклоня́емся, Еди́ному Безсме́ртному: / Жизнода́вче Христе́, поми́луй нас.

Слава, глас 2: Почто́ ми́ра со слеза́ми, о учени́цы растворя́ете, / ка́мень отвали́ся, гроб истощи́ся, / ви́дите тлю живото́м попра́нную, / печа́ти свиде́тельствующя я́вственно, / спя́щия лю́те стра́жники непокори́вых, / сме́ртное спасе́ся пло́тию Бо́жиею, ад рыда́ет. / Те́кша ра́достию рцы́те апо́столом: / умертви́вый смерть Христо́с, перворожде́н из ме́ртвых, / вас предваря́ет в Галиле́и.

И ныне: догматик, глас тойже: О преве́лия та́инства! / Зря чудеса́, пропове́дую Божество́: / Емману́ил бо естества́ у́бо врата́ отве́рзе, я́ко Человеколю́бец, / де́вства же заключе́ния не разруши́, я́ко Бог, / но си́це от утро́бы про́йде, я́коже слу́хом вни́де, / та́ко воплоти́ся, я́коже зача́тся. / Безстра́стно вни́де, несказа́нно изы́де, по проро́ку глаго́лющему: / сия́ врата́ заключе́на бу́дут, никто́же про́йдет и́ми, / то́кмо еди́н Госпо́дь Бог Изра́илев, / име́яй ве́лию ми́лость.

Све́те ти́хий: Прокимен: Госпо́дь воцари́ся:

На стиховне стихира воскресна, глас 2:

Воскресе́ние Твое́, Христе́ Спа́се, / всю просвети́ вселе́нную, / и призва́л еси́ Твое́ созда́ние, / Всеси́льне Го́споди, сла́ва Тебе́.

И Богородицы, глас 2.
Подобен: Егда́ от Дре́ва:

Стих: Помяну́ и́мя Твое́ во вся́ком ро́де и ро́де.

Всех скорбя́щих ра́досте и оби́димых предста́тельнице, / и убо́гих пита́тельнице, стра́нных же утеше́ние, / и же́зле слепы́х, немощны́х посеще́ние, / тружда́ющихся покро́ве и засту́пнице, и си́рых помо́щнице, / Ма́ти Бо́га Вы́шняго Ты еси́, Пречи́стая, / потщи́ся, мо́лимся, спасти́ся рабо́м Твои́м.

Стих: Слы́ши Дщи и виждь, и приклони́ у́хо Твое́.

Вся́кое беззако́ние неща́дно, / вся́кий грех невозде́ржно окая́нный соде́лах, / вся́каго осужде́ния досто́ин есмь, / вины́ покая́ния мне пода́ждь, Де́во, / я́ко да не осужде́н та́мо явлю́ся. / Тя бо напису́ю моли́твенницу, / Тя призыва́ю предста́тельницу, / да мя не посрами́ши, Богоневе́стная.

Стих: Лицу́ Твоему́ помо́лятся бога́тии лю́дстии.

Ино́го прибе́жища, Чи́стая, к Творцу́ и Влады́це мы не и́мамы, / ра́зве Тебе́, Богоневе́сто, / да не отри́неши нас те́плым Твои́м предста́тельством, / ниже́ посрами́ши любо́вию притека́ющих под кров Твой, / Ма́ти Бо́га на́шего, / потщи́ся и Твою́ по́мощь даждь, / и ны́нешняго гне́ва нас спаси́.

Слава, и ныне, глас 2: Мироно́сицы ра́но бы́вша, / и гроб Твой со тща́нием дости́гша, / иска́ху Тебе́, Христе́, во е́же пома́зати пречи́стое те́ло Твое́. / И а́нгеловыми глаго́лы огласи́вшеся, / радостотво́рныя о́бразы апо́столом пропове́даху, / я́ко воскре́се Нача́льник спасе́ния на́шего, плени́вый смерть, / ми́рови же да́руяй живо́т ве́чный / и ве́лию ми́лость.

По Трисвятом тропарь, глас 2:

Благообра́зный Ио́сиф, / с Дре́ва снем Пречи́стое Те́ло Твое́, / плащани́цею чи́стою обви́в, и благоуха́ньми, / во гро́бе но́ве, закры́в, положи́, / но тридне́вен воскре́сл еси́, Го́споди, / подая́й ми́рови ве́лию ми́лость.

И отпуст.

НА ВЕЛИЦЕЙ ВЕЧЕРНИ

Христо́с воскре́се: яко обычно. Таже псалом предначинательный: Благослови́ душе́ моя́ Го́спода: И кафисма 1 Псалтира.

На Го́споди воззва́х: поставим стихов 10, и поем:
Стихиры воскресны, 3, глас 2.

Стих: Изведи́ из темни́цы ду́шу мою́, / испове́датися И́мене Твоему́.

Пре́жде век от Отца́ ро́ждшемуся Бо́жию Сло́ву, / вопло́щшемуся от Де́вы Мари́и, / прииди́те поклони́мся: / Крест бо претерпе́в, / погребе́нию предаде́ся, я́ко Сам восхоте́: / и воскре́с из ме́ртвых, / спасе́ мя заблужда́ющаго челове́ка.

Стих: Мене́ ждут пра́ведницы, / до́ндеже возда́си мне.

Христо́с Спас наш, / е́же на ны рукописа́ние пригвозди́в на Кресте́ загла́ди, / и сме́ртную держа́ву упраздни́: / покланя́емся Его́ тридне́вному Воскресе́нию.

Стих: Из глубины́ воззва́х к Тебе́, Го́споди, / Го́споди, услы́ши глас мой.

Со арха́нгелы воспои́м Христо́во Воскресе́ние: / Той бо есть Изба́витель и Спас душ на́ших, / и в сла́ве стра́шной, и кре́пцей си́ле, / па́ки гряде́т суди́ти ми́ру, его́же созда́.

И восточны {анатолиевы} 4. Глас тойже.

Стих: Да бу́дут у́ши Твои́ / вне́млюще гла́су моле́ния моего́.

Тебе́ распе́ншагося и погребе́ннаго, / А́нгел пропове́да Влады́ку, и глаго́лаше жена́м: / прииди́те ви́дите, иде́же лежа́ше Госпо́дь: / воскре́се бо, я́коже рече́, я́ко всеси́лен. / Те́мже Тебе́ покланя́емся еди́ному безсме́ртному, / Жизнода́вче Христе́, поми́луй нас.

Стих: А́ще беззако́ния на́зриши, Го́споди, Го́споди, кто постои́т? / Я́ко у Тебе́ очище́ние есть.

Кресто́м Твои́м упраздни́л еси́, ю́же от дре́ва кля́тву, / погребе́нием Твои́м умертви́л еси́ сме́рти держа́ву: / воста́нием же Твои́м просвети́л еси́ род челове́ческий. / Сего́ ра́ди вопие́м Ти: / благоде́телю Христе́ Бо́же наш, сла́ва Тебе́.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, / упова́ душа́ моя́ на Го́спода.

Отверзо́шася Тебе́ Го́споди, стра́хом врата́ сме́ртная, / вра́тницы же а́довы ви́девше Тя, убоя́шася: / врата́ бо ме́дная сокруши́л еси́, / и вереи́ желе́зныя стерл еси́, / и изве́л еси́ нас от тьмы и се́ни сме́ртныя, / и у́зы на́ша растерза́л еси́.

Стих: От стра́жи у́тренния до но́щи, от стра́жи у́тренния, / да упова́ет Изра́иль на Го́спода.

Спаси́тельную песнь пою́ще, от уст возсле́м: / прииди́те вси, в дому́ Госпо́днем припаде́м, глаго́люще: / на Дре́ве распны́йся, и из ме́ртвых воскресы́й, / и сый в не́дрех О́тчих, / очи́сти грехи́ на́ша.

Таже стихиры мироносицам
самогласны 3, глас 2. Анатолиа.

Стих: Я́ко у Го́спода ми́лость, и мно́гое у Него́ избавле́ние, / и Той изба́вит Изра́иля от всех беззако́ний его́.

Мироно́сицы жены́, у́тру глубоку́, / арома́ты взе́мша, Госпо́дня гро́ба достиго́ша, / я́же не наде́яхуся обре́тша / помышля́ху благогове́юще ка́менному отвале́нию, / и друга́ ко друзе́й глаго́лаху: / где суть печа́ти гро́ба; / где есть Пила́това кустоди́а и опа́сное утверже́ние? / Бысть же возвести́тель не разумева́ющим жена́м, / блиста́яйся А́нгел, и глаго́ляй к ним: / что с рыда́нием и́щете жива́го и оживотвори́вшаго род челове́ческий? / Воста́ Христо́с Бог наш из ме́ртвых, я́ко всеси́лен, / подая́й всем нам нетле́ние и жизнь, / просвеще́ние и ве́лию ми́лость.

Стих: Хвали́те Го́спода вси язы́цы, / похвали́те Его́ вси лю́дие.

Почто́ ми́ра со слеза́ми, о учени́цы растворя́ете, / ка́мень отвали́ся, гроб истощи́ся: / ви́дите тлю живото́м попра́нную, / печа́ти свиде́тельствующя я́вственно, / спя́щия лю́те стра́жники непокори́вых, / сме́ртное спасе́ся пло́тию Бо́жиею, ад рыда́ет. / Те́кша ра́достию рцы́те апо́столом: / умертви́вый смерть Христо́с, перворожде́н из ме́ртвых, / вас предваря́ет в Галиле́и.

Стих: Я́ко утвердися милость Его́ на нас, / и истина Госпо́дня пребывает во век.

Мироно́сицы ра́но бы́вша, / и гроб Твой со тща́нием дости́гша, / иска́ху Тебе́, Христе́, во е́же пома́зати пречи́стое те́ло Твое́. / И а́нгеловыми глаго́лы огласи́вшеся, / радостотво́рныя о́бразы апо́столом пропове́даху, / я́ко воскре́се Нача́льник спасе́ния на́шего, плени́вый смерть, / ми́рови же да́руяй живо́т ве́чный / и ве́лию ми́лость.

Слава, глас 6. Космы монаха:

Мироно́сицы жены́, гро́ба Твоего́ дости́гша, / и печа́ти гро́бныя ви́девша, / не обре́тша же пречи́стаго те́ла Твоего́, / рыда́юща со тща́нием приидо́ша, глаго́люща: / кто укра́де на́ше упова́ние; / кто взят ме́ртва на́га сми́рною пома́зана, / Ма́тери еди́но утеше́ние? / О ка́ко ме́ртвыя оживи́вый умертви́ся; / ад плени́вый, ка́ко погребе́ся? / Но воскресни́, Спа́се, самовла́стно, / я́коже рекл еси́, / тридне́вен, спаса́яй ду́ши на́ша.

И ныне, Богородичен, глас 2:

Пре́йде сень зако́нная, / благода́ти прише́дши, / я́коже бо купина́ не сгара́ше опаля́ема, / та́ко Де́во родила́ еси́, / и Де́ва пребыла́ еси́. / Вме́сто столпа́ о́гненнаго, пра́ведное возсия́ Со́лнце: / вме́сто Моисе́я, Христо́с, / спасе́ние душ на́ших.

Вход: Све́те ти́хий: Прокимен: Госпо́дь воцари́ся:

На литии стихиры самогласны, глас 1:

Мироно́сицы жены́, ко гро́бу что приидо́сте; / что и́щете жива́го в ме́ртвых? / Воскре́се Госпо́дь, дерза́йте, вопие́т А́нгел.

Со стра́хом приидо́ша жены́ на гроб, / арома́ты те́ло Твое́ пома́зати тща́щияся, / и сие́ не обре́тше, / недоумева́хуся друга́ ко друзе́й, не ве́дуще Воскресе́ния. / Но предста́ им А́нгел, и рече́: / воскре́се Христо́с, / да́руяй нам ве́лию ми́лость.

Приидо́ша на гроб Магдали́на / и друга́я Мари́я и́щуще Го́спода, / и А́нгела ви́деша, я́ко мо́лнию, / седя́ща на ка́мени и глаго́люща им: / что и́щете жива́го с ме́ртвыми; / воскре́се, я́коже рече́: / в Галиле́и Его́ обря́щете. / К Нему́ же возопии́м: / воскресы́й из ме́ртвых, Го́споди, сла́ва Тебе́.

Слава, глас 6: Проси́ Ио́сиф те́ло Иису́сово, / и положи́ е́ в но́вом свое́м гро́бе, / подоба́ше бо Ему́ из гро́ба, / я́ко от черто́га проити́. / Сокруши́вый держа́ву сме́рти, / и отве́рзый врата́ ра́йская челове́ком, / Го́споди, сла́ва Тебе́.

И ныне, Богородичен, глас тойже: Творе́ц и Изба́витель мой, Пречи́стая, / Христо́с Госпо́дь из Твои́х ложе́сн проше́д, / в мя оболки́йся, / пе́рвыя кля́твы Ада́ма свободи́. / Те́мже Ти, Всечи́стая, / я́ко Бо́жии Ма́тери же и Де́ве, / вои́стинну вопие́м немо́лчно: / ра́дуйся а́нгельски, ра́дуйся, Влады́чице, / предста́тельство и покро́ве, / и спасе́ние душ на́ших.

На стиховне стихира воскресна, глас 2:

Воскресе́ние Твое́, Христе́ Спа́се, / всю просвети́ вселе́нную, / и призва́л еси́ Твое́ созда́ние, / Всеси́льне Го́споди, сла́ва Тебе́.

Таже стихиры Пасхи с припевы их.
Глас 5.

Стих: Да воскре́снет Бог, / и расточа́тся врази́ Его́.

Па́сха / свяще́нная нам днесь показа́ся; / Па́сха но́ва свята́я; / Па́сха та́инственная; / Па́сха всечестна́я. / Па́сха Христо́с Изба́витель; / Па́сха непоро́чная; / Па́сха вели́кая; / Па́сха ве́рных. / Па́сха две́ри ра́йския нам отверза́ющая. / Па́сха всех освяща́ющая ве́рных.

Стих: Я́ко исчеза́ет дым, / да исче́знут.

Прииди́те / от виде́ния жены́ благове́стницы, / и Сио́ну рцы́те: / приими́ / от нас ра́дости благове́щения, Воскресе́ния Христо́ва: / красу́йся, лику́й / и ра́дуйся, Иерусали́ме, / Царя́ Христа́ узре́в из гро́ба, / я́ко жениха́ происходя́ща.

Стих: Та́ко да поги́бнут гре́шницы от Лица́ Бо́жия, / а пра́ведницы да возвеселя́тся.

Мироно́сицы жены́, / у́тру глубоку́, / предста́вша гро́бу Живода́вца, / обрето́ша А́нгела / на ка́мени седя́ща, / и той провеща́в им, / си́це глаго́лаше: / что и́щете Жива́го с ме́ртвыми; / что пла́чете Нетле́ннаго во тли? / Ше́дше, пропове́дите ученико́м Его́.

Стих: Сей день, его́же сотвори Госпо́дь, / возра́дуемся и возвесели́мся в онь.

Па́сха кра́сная, / Па́сха, Госпо́дня Па́сха! / Па́сха всечестна́я / нам возсия́. Па́сха, / ра́достию друг дру́га обы́мем. / О Па́сха! / Избавле́ние ско́рби, / и́бо из гро́ба днесь, / я́ко от черто́га / возсия́в Христо́с, / жены́ ра́дости испо́лни, глаго́ля: / пропове́дите апо́столом.

Слава, глас 5: Тебе́, оде́ющагося све́том я́ко ри́зою, / снем Ио́сиф с Дре́ва с Никоди́мом, / и ви́дев ме́ртва на́га непогребе́нна, / благосе́рдный плач восприи́м, / рыда́я глаго́лаше: / увы мне, сладча́йший Иису́се! / Его́же вма́ле со́лнце на Кресте́ ви́сима узре́вше, / мра́ком облага́шеся, / и земля́ стра́хом колеба́шеся, / и раздира́шеся церко́вная заве́са, / но се ны́не ви́жду Тя, / мене́ ра́ди во́лею подъе́мша смерть. / Ка́ко погребу́ Тя, Бо́же мой; / или́ ка́ко плащани́цею обвию́; / ко́има ли рука́ма прикосну́ся нетле́нному Твоему́ те́лу; / или́ ки́я пе́сни воспою́ Твоему́ исхо́ду, Ще́дре; / велича́ю стра́сти Твоя́, / песносло́влю и погребе́ние Твое́ со Воскресе́нием, зовы́й: / Го́споди, сла́ва Тебе́.

И ныне, глас тойже: Воскресе́ния день, / и просвети́мся торжество́м, / и друг дру́га обы́мем. / Рцем бра́тие, / и ненави́дящим нас, / прости́м вся Воскресе́нием, / и та́ко возопии́м: / Христо́с воскре́се из ме́ртвых, / сме́ртию смерть попра́в, / и су́щим во гробе́х живо́т дарова́в.

Таже, Ны́не отпуща́еши: На благословении хлебов тропарь Богоро́дице Де́во: трижды. И обычное чтение Деяний.

Аще ли случится не быти бдению: поются на Го́споди воззва́х: стихиры воскресны, 4. И мироносиц с литийными, на 6. Вход. Прокимен. На стиховне стихиры Пасхи. Сла́ва, и ны́не, глас 5, Тебе́ одеющагося светом: На Полунощнице канон Троичен поется по обычаю.

Ведомо же буди, яко от Недели святаго Фомы, не бывает хлеболомление по благословении хлебов, за краткость нощи.

НА УТРЕНИ

На Бог Господь: тропарь, глас 2.

Егда́ снизше́л еси́ к сме́рти, Животе́ Безсме́ртный, / тогда́ ад умертви́л еси́ блиста́нием Божества́; / егда́ же и уме́ршия от преиспо́дних воскреси́л еси́, / вся Си́лы Небе́сныя взыва́ху: / Жизнода́вче, Христе́ Бо́же наш, сла́ва Тебе́. [Дважды.]

Слава: Благообра́зный Ио́сиф, / с Дре́ва снем Пречи́стое Те́ло Твое́, / плащани́цею чи́стою обви́в, и благоуха́ньми, / во гро́бе но́ве, закры́в, положи́, / но тридне́вен воскре́сл еси́, Го́споди, / подая́й ми́рови ве́лию ми́лость.

И ныне: Мироно́сицам жена́м, при гро́бе предста́в А́нгел, вопия́ше: / ми́ра ме́ртвым суть прили́чна, / Христо́с же истле́ния яви́ся чуждь. / Но возопи́йте: воскре́се Госпо́дь, / подая́й ми́рови ве́лию ми́лость.

По 1-м стихословии седальны, глас 2:

Ка́мень гро́бный запеча́тати не возбрани́в, / ка́мень ве́ры воскресы́й по́дал еси́ всем: / Го́споди сла́ва Тебе́.

Стих: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Не́дро пречи́стое в вы́шних не истощи́вый, / погребе́ние и Воскресе́ние о всех прия́л еси́, / Го́споди, сла́ва Тебе́.

Слава, и ныне, Богородичен: Вся па́че смы́сла, / вся пресла́вная Твоя́, Богоро́дице, та́инства, / чистоте́ запеча́танней, и де́вству храни́му, / Ма́ти позна́лася еси́ нело́жна, / Бо́га ро́ждши и́стиннаго: / Того́ моли́, спасти́ся душа́м на́шим.

По 2-м стихословии седальны, глас 2:

Мироно́сицы у́тро прише́дшия, / и гроб тощ ви́девшия, апо́столом глаго́лаху: / тле́ние низложи́ держа́вный, / и су́щия во а́де исхити́ уз, / пропове́дите дерзнове́нием, я́ко воскре́се Христо́с Бог, / да́руяй ми́рови ве́лию ми́лость.

Стих: Испове́мся Тебе́ Го́споди всем се́рдцем мои́м, / пове́м вся чудеса́ Твоя́.

Ми́ры погребе́ния Твоего́ жены́ нося́ща, / тай ко гро́бу приидо́ша ура́нше, / иуде́йския боя́щеся де́рзости, / и во́инов предзря́ще утвержде́ние. / Но естество́ немощно́е му́жество победи́, / я́ко наме́рение ми́лостивное Бо́гу угоди́. / Прили́чно у́бо взыва́ху: / воскресни́, Го́споди, помози́ нам, / и изба́ви нас сла́вы ра́ди и́мене Твоего́.

Слава, и ныне, Богородичен: Препросла́вленна еси́ Богоро́дице Де́во, пое́м Тя: / Кресто́м бо Сы́на Твоего́ низложи́ся ад / и смерть умертви́ся: / умерщвле́ннии воста́хом и живота́ сподо́бихомся, / рай восприя́хом дре́внее наслажде́ние. / Тем благодаря́ще славосло́вим, / я́ко держа́внаго Христа́ Бо́га на́шего, / и еди́наго Многоми́лостиваго.

И чтение во Евангелии толковом по чину своему.

По Непорочнах тропари: А́нгельский собо́р:

И абие ипакои. Глас 2:

По стра́сти ше́дша во гроб жены́, / во е́же пома́зати те́ло Твое́, Христе́ Бо́же, / ви́деша а́нгелы во гро́бе, и ужасо́шася: / глас бо слы́шаху от них, я́ко воскре́се Госпо́дь, / да́руя мiрови ве́лию ми́лость.

И чтение.

И абие степенны, глас 2, по дважды.
Антифон 1:

На не́бо о́чи пуща́ю моего́ се́рдца, к Тебе́, Спа́се, / спаси́ мя Твои́м осия́нием.

Поми́луй нас согреша́ющих Тебе́ мно́го, / на вся́кий час, о Христе́ мой, / и даждь о́браз пре́жде конца́ пока́ятися Тебе́.

Слава: Свято́му Ду́ху, Е́же ца́рствовати подоба́ет, / освяща́ти, подвиза́ти тварь: / Бог бо есть, Единосу́щен Отцу́ и Сло́ву.

И ныне, тойже.

Антифон 2:

А́ще не Госпо́дь бы был в нас, / кто дово́лен цел сохране́н бы́ти от врага́, / ку́пно и человекоуби́йцы?

Зубо́м их не преда́ждь, Спа́се, Твоего́ раба́, / и́бо льво́вым о́бразом на мя подвиза́ются врази́ мои́.

Слава: Свято́му Ду́ху живонача́лие и честь, / вся бо созда́нная, / я́ко Бог сый си́лою, / соблюда́ет во Отце́, Сы́ном же.

И ныне, тойже.

Антифон 3:

Наде́ющиися на Го́спода, уподо́бишася горе́ святе́й, / и́же ника́коже дви́жутся прило́ги вра́жиими.

В беззако́нии рук свои́х да не про́струт боже́ственне живу́щии, / не оставля́ет бо Христо́с жезла́ на жре́бии Свое́м.

Слава: Святы́м Ду́хом то́чится вся́ка прему́дрость, / отсю́ду благода́ть апо́столом, / и страда́льчествы венча́ются му́ченицы, и проро́цы зрят.

И ныне, тойже.

Прокимен, глас 2:

Воста́ни, Го́споди, Бо́же мой, повеле́нием, и́мже запове́дал еси́, / и сонм люде́й обы́дет Тя. Стих: Го́споди Бо́же мой, на Тя упова́х, спаси́ мя.

Таже другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие утреннее воскресное 3,
от Марка, зачало 71. [Мк. 16, 9 – 20.]

Во вре́мя о́но воскре́с Иису́с зау́тра, в пе́рвую суббо́ту, яви́ся пре́жде Мари́и Магдали́ни, из нея́же изгна́ седмь бесо́в. Она́ же ше́дши возвести́ с Ним бы́вшим, пла́чущимся и рыда́ющим. И они́ слы́шавше, я́ко жив есть, и ви́ден бысть от нея́, не я́ша ве́ры. По сих же двема́ от них гряду́щема яви́ся ине́м о́бразом, иду́щема на село́. И та ше́дша возвести́ста про́чим: и ни те́ма ве́ры я́ша. Последи́ же возлежа́щим им единомуна́десяте яви́ся, и поноси́ неве́рствию их и жестосе́рдию, я́ко ви́девшим Его́ воста́вша не я́ша ве́ры. И рече́ им: ше́дше в мир весь, пропове́дите Ева́нгелие всей тва́ри. И́же ве́ру име́т и крести́тся, спасе́н бу́дет, а и́же не име́т ве́ры, осужде́н бу́дет. Зна́мения же ве́ровавшим сия́ после́дуют: и́менем Мои́м бе́сы иждену́т; язы́ки возглаго́лют но́вы; зми́я возму́т; а́ще и что сме́ртно испию́т, не вреди́т их; на неду́жныя ру́ки возложа́т, и здра́ви бу́дут. Госпо́дь же у́бо, по глаго́лании Его́ к ним, вознесе́ся на не́бо, и се́де одесну́ю Бо́га. Они́ же изше́дше пропове́даша всю́ду, Го́споду поспе́шствующу и сло́во утвержа́ющу после́дствующими зна́меньми. Ами́нь.

Таже глаголем трижды:

Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному. / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим. / Ты бо еси́ Бог наш, / ра́зве Тебе́ ино́го не зна́ем, / и́мя Твое́ имену́ем. / Прииди́те, вси ве́рнии, / поклони́мся Свято́му Христо́ву Воскресе́нию: / се бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию смерть разруши́.

Псалом 50. И целование Евангелиа.

Слава: Моли́твами апо́столов, / Ми́лостиве, очи́сти / мно́жества согреше́ний на́ших.

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

Посем стихира: Воскре́с Иису́с от гро́ба, / я́коже прорече́, / даде́ нам живо́т ве́чный / и ве́лию ми́лость.

Таже, Спаси́ Бо́же лю́ди Твоя́:

Канон Пасхи со ирмосом, и с Богородичны его, на 6. Таже настоящия Недели, Триоди канон на 8, глас 2: Творение господина Андреа Критскаго. Катавасия: Воскресе́ния день:

Канон Пасхи. Глас 1.
Песнь 1.

Ирмос: Воскресе́ния день, / просвети́мся, лю́дие. / Па́сха, Госпо́дня Па́сха, / от сме́рти бо к жи́зни, / и от земли́ к небеси́, / Христо́с Бог нас преведе́, / побе́дную пою́щия.

Припев: Христо́с воскре́се из ме́ртвых.

Очи́стим чу́вствия, и у́зрим / непристу́пным све́том / Воскресе́ния, Христа́ / блиста́ющася, / и ра́дуйтеся, реку́ща, / я́сно да услы́шим, / побе́дную пою́ще.

Припев: Христо́с воскре́се из ме́ртвых.

Небеса́ у́бо досто́йно да веселя́тся, / земля́ же да ра́дуется, / да пра́зднует же мир, / ви́димый же весь и неви́димый: / Христо́с бо воста́, / весе́лие ве́чное.

Иный канон Богородичен, подобен.
Егоже краестрочие на первых тропарех: Феофа́нус. Глас тойже.

Припев: Пресвята́я Богоро́дице, спаси́ нас.

Умерщвле́ния преде́л сломи́ла еси́, / ве́чную жизнь ро́ждшая Христа́, / из гро́ба возсия́вшаго днесь, / Де́во Всенепоро́чная, / и мир просвети́вшаго.

Припев: Пресвята́я Богоро́дице, спаси́ нас.

Воскре́сшаго ви́девши Сы́на Твоего́ и Бо́га, / ра́дуйся со апо́столы Богоблагода́тная Чи́стая: / и е́же ра́дуйся пе́рвее, / я́ко всех ра́дости вина́, восприя́ла еси́, / Богома́ти Всенепоро́чная.

Иный канон мироносиц, в немже поставим стихов 8.
Песнь 1. Глас 2.

Ирмос: Моисе́йскую песнь восприи́мши, возопи́й душе́: / Помо́щник и Покрови́тель бысть мне во спасе́ние, / Сей мой Бог и просла́влю Его́.

Распя́лся еси́ пло́тию, безстра́стный естество́м О́тчим, / прободе́н был еси́ в ре́бра, источи́вый ми́рови кровь и во́ду. / Ты Бог наш и прославля́ем Тя.

Крест Твой почита́ю, и погребе́ние сла́влю, Бла́же, / и пою́, и покланя́юся воста́нию Твоему́, и взыва́ю: / Ты Бог наш и прославля́ем Тя.

А́ще и вкуси́л еси́ же́лчи, сла́досте церко́вная, / но источи́л еси́ нам нетле́ние от ребр Твои́х. / Ты Бог наш и прославля́ем Тя.

Вмени́лся еси́, Спа́се, с ме́ртвыми, ме́ртвыя воздви́гнувый, / вкуси́л еси́ тли, / истле́ния бо вся́ко не позна́л еси́. / Ты Бог наш и прославля́ем Тя.

Да весели́тся Сио́н, да ра́дуется и не́бо, / воскре́се Христо́с, ме́ртвыя воздви́гнувый, песносло́вящия: / Ты Бог наш и прославля́ем Тя.

Плащани́цами обви́в Ио́сиф те́ло Твое́, Христе́, / во гро́бе но́ве положи́ Тя, спасе́ние: / Ты же ме́ртвыя, я́ко Бог, воскреси́л еси́.

Предвари́вшия у́тро жены́, ви́деша Христа́, / и боже́ственным вопия́ху ученико́м: / вои́стинну Христо́с воскре́се, / прииди́те с на́ми воспо́йте Его́.

Слава: Всесвята́я Тро́ице, еди́но Божество́, безнача́льная Еди́нице, / О́тче и Сы́не и Боже́ственный Ду́ше, спаса́й мир, / Ты Бог наш и прославля́ем Тя.

И ныне: Дре́внюю кля́тву разреши́вши, Чи́стая, во утро́бе Твое́й / возрасти́ла еси́ нам благослове́ние, Младе́нца роди́вши: / Сей бо Бог, а́ще и плоть но́сит.

Катавасия: Воскресе́ния день, / просвети́мся, лю́дие. / Па́сха, Госпо́дня Па́сха, / от сме́рти бо к жи́зни, / и от земли́ к небеси́, / Христо́с Бог нас преведе́, / побе́дную пою́щия.

Песнь 3.

Ирмос: Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник / из гро́ба одожди́вша Христа́, / в Не́мже утвержда́емся.

Припев: Христо́с воскре́се из ме́ртвых.

Ны́не вся испо́лнишася све́та, / не́бо же и земля́, и преиспо́дняя: / да пра́зднует у́бо вся тварь / воста́ние Христо́во, / в не́мже утвержда́ется.

Припев: Христо́с воскре́се из ме́ртвых.

Вчера́ спогребо́хся Тебе́ Христе́, / совостаю́ днесь / воскре́сшу Тебе́, / сраспина́хся Тебе́ вчера́, / Сам мя спросла́ви Спа́се во Ца́рствии Твое́м.

Припев: Пресвята́я Богоро́дице, спаси́ нас.

На нетле́нную жизнь прихожду́ днесь / бла́гостию ро́ждшагося из Тебе́, Чи́стая, / и всем конце́м свет облиста́вшаго.

Припев: Пресвята́я Богоро́дице, спаси́ нас.

Бо́га, Его́же родила́ еси́ пло́тию, / из ме́ртвых, я́коже рече́, / воста́вша ви́девши, Чи́стая, лику́й, / и Сего́ я́ко Бо́га Пречи́стая возвелича́й.

Ин. Ирмос: Непло́дствовавший мой ум, / плодоно́сен, Бо́же, покажи́ ми, / де́лателю до́брых, насади́телю благи́х, / благоутро́бием Твои́м.

Дла́ни на Кресте́ просте́рл еси́, Иису́се, / язы́ки вся от пре́лести собра́в, / к позна́нию Твоему́ созва́л еси́, Спа́се.

Иуде́йстии лю́дие Пила́ту вопию́т: / отпусти́ нам злоде́йственнаго разбо́йника, / возми́, возми́, распни́ Безгре́шнаго.

Распе́ншуся Тебе́, Христе́, помрачи́ся свет, земля́ потрясе́ся, / и из гробо́в ме́ртвии воста́ша мно́зи, стра́хом держа́вы Твоея́.

Предстоя́щи Кресту́ А́гница Твоя́, Иису́се, пла́чем вопия́ше: / ка́мо и́деши, Сы́не? / Ка́мо гряде́ши, А́гнче, за всех закла́выйся?

Покланя́юся Твоему́ Кресту́, воспева́ю и погребе́ние, / почита́ю стра́сти, и гво́здия руку́, и копие́, Иису́се, / и Воскресе́ние Твое́.

Воскре́сл еси́, Иису́се, плене́н бысть враг, / Ада́м изба́вися, и Е́ва с ним от уз и тли, Воскресе́нием Твои́м.

Воскре́сшу Тебе́, Христе́, / сокруши́шася вереи́ и врата́ а́дова, / и сме́ртныя у́зы разруши́шася, а́бие стра́хом держа́вы Твоея́.

Богоприе́мче Ио́сифе, гряди́, ста́ни с на́ми, / воскре́се, зовы́й, Иису́с Изба́витель, / воздви́гнувый Ада́ма благоутро́бием Свои́м.

Да ра́дуется с на́ми ученико́в двоенадеся́тица, / с мироно́сицами жена́ми и Ио́сифом, / и со други́ми ученики́ и учени́цами Христо́выми.

Слава: Со Отце́м и Сы́ну и Ду́ху Пра́вому, / еди́ному Естеству́ покланя́юся и воспева́ю, / Ли́цы разделя́я и Существо́м соединя́я.

И ныне, Богородичен: Блаже́нна еси́, Чи́стая, из ко́рене Иессе́ова су́щая, / из него́же жезл и цвет Христа́, по пло́ти нас ра́ди возрасти́вшая.

Катавасия: Прииди́те, пи́во пие́м но́вое, / не от ка́мене непло́дна чудоде́емое, / но нетле́ния исто́чник / из гро́ба одожди́вша Христа́, / в Не́мже утвержда́емся.

Таже кондак, глас 8:

А́ще и во гроб снизше́л еси́, Безсме́ртне, / но а́дову разруши́л еси́ си́лу, / и воскре́сл еси́, я́ко победитель, Христе́ Бо́же, / жена́м мироно́сицам веща́вый: ра́дуйтеся, / и Твои́м апо́столом мир да́руяй, / па́дшим подая́й воскресе́ние.

Икос: Е́же пре́жде со́лнца Со́лнце заше́дшее иногда́ во гроб, / предвари́ша ко у́тру, и́щущия я́ко дне мvроно́сицы де́вы, / и друга́ ко друзе́й вопия́ху: / о други́ни! Прииди́те, воня́ми пома́жем те́ло живоно́сное и погребе́ное, / плоть воскреси́вшаго па́дшаго Ада́ма, лежа́щую во гро́бе. / И́дем, потщи́мся я́коже волсви́, и поклони́мся, / и принесе́м мира я́ко да́ры, не в пелена́х, но в плащани́це обви́тому, / и пла́чим, и возопии́м: о Влады́ко, воста́ни, / па́дшим подая́й воскресе́ние.

И седален глас 2.
Подобен: Вы́шних ища́:

Ми́ра те́пле гро́бу прино́сят жены́, Спа́се, / А́нгела све́тлостию ду́ши веселя́ху, / и Бо́га Тя всех пропове́даху, и ученико́м вопия́ху: / вои́стинну воскре́се из гро́ба всех Жизнь.

Слава и ныне, глас тойже: Ученико́в Твои́х лик с мироно́сицами жена́ми ра́дуется согла́сно, / о́бщий бо пра́здник с ни́ми пра́зднуют, / в сла́ву и честь Твоего́ Воскресе́ния. / И те́ми вопие́м Ти, Человеколю́бче Го́споди: / лю́дем Твои́м пода́ждь ве́лию ми́лость.

Песнь 4.

Ирмос: На Боже́ственней стра́жи / богоглаго́ливый Авваку́м / да ста́нет с на́ми и пока́жет / светоно́сна А́нгела / я́сно глаго́люща: / днесь спасе́ние ми́ру, / я́ко воскре́се Христо́с, / я́ко всеси́лен.

Припев: Христо́с воскре́се из ме́ртвых.

Му́жеский у́бо пол, / я́ко разве́рзый де́вственную утро́бу, / яви́ся Христо́с, / я́ко челове́к же, / А́гнец нарече́ся, / непоро́чен же, / я́ко невку́сен скве́рны, / на́ша Па́сха, / и я́ко Бог и́стинен / соверше́н рече́ся.

Припев: Христо́с воскре́се из ме́ртвых.

Я́ко единоле́тный а́гнец, / благослове́нный нам вене́ц Христо́с, / во́лею за всех закла́н бысть, / Па́сха чисти́тельная, / и па́ки из гро́ба кра́сное / пра́вды нам возсия́ Со́лнце.

Припев: Христо́с воскре́се из ме́ртвых.

Богооте́ц у́бо Дави́д / пред се́нным ковче́гом скака́ше игра́я, / лю́дие же Бо́жии святи́и, / образо́в сбытие́ зря́ще, / весели́мся Боже́ственне, / я́ко воскре́се Христо́с, / я́ко Всеси́лен.

Припев: Пресвята́я Богоро́дице, спаси́ нас.

Созда́вый Ада́ма, Твоего́ пра́отца, Чи́стая, / зи́ждется от Тебе́, / и сме́ртное жили́ще разори́ Свое́ю сме́ртию днесь, / и озари́ вся / боже́ственными блиста́ньми воскресе́ния.

Припев: Пресвята́я Богоро́дице, спаси́ нас.

Его́же родила́ еси́ Христа́, / прекра́сно из ме́ртвых возсия́вша, Чи́стая, зря́щи, / до́брая и непоро́чная в жена́х и кра́сная, / днесь во спасе́ние всех, / со апо́столы ра́дующися, Того́ прославля́й.

Ин. Ирмос: Е́же от Де́вы Твое́ рождество́ проро́к предзря́, / воспропове́даше вопия́: / слух Твой услы́шах и убоя́хся, / я́ко от ю́га и из горы́ святы́я приосене́нныя / прише́л еси́, Христе́.

Кресто́м плени́л еси́ а́дово чре́во, / и совоздви́гл еси́ ме́ртвыя, / и сме́рти разруши́л еси́ мучи́тельство, / те́мже, и́же от Ада́ма покланя́ющиися, / пое́м погребе́ние Твое́ и воста́ние, Христе́.

Благоволи́вый, Спа́се наш, / за благоутро́бие ми́лости пригвозди́тися на Кресте́, / и от пра́отчия изба́вити ны кля́твы, / разреши́ у́зы мно́гих мои́х согреше́ний, / мо́жеши бо, ели́ка хо́щеши, твори́ти.

На Кресте́ пригвозди́вый мою́ дре́внюю кля́тву, / и источи́вый мне, Спа́се, благослове́ние кро́вию от ребр Твои́х, / разреши́ у́зы мно́гих мои́х согреше́ний, / мо́жеши бо, ели́ка хо́щеши, твори́ти.

Ад, Спа́се, срет Тя в преиспо́дних, огорчи́ся / помышля́я, я́ко я́же дре́вле пожре́ти возмоги́й, / ны́не нево́лею отда́в, истязу́ется в до́льних, / и пленя́емь, и обнажа́емь быва́ет ме́ртвых.

А́ще и ка́мень запеча́тася с кустоди́ею, о беззако́ннии врази́, / но воскре́се Госпо́дь, я́коже прорече́, / разреша́я у́зы мно́гих мои́х согреше́ний, / мо́жет бо, ели́ка хо́щет, твори́ти.

Воскресы́й из гро́ба, и плени́вый а́да, и оживи́вый ме́ртвыя, / и нетле́ние источи́вый мне Твои́м воста́нием, / разреши́ у́зы мно́гих мои́х согреше́ний, / мо́жеши бо, ели́ка хо́щеши, твори́ти.

Вои́стинну постыди́теся беззако́ннии, / Христо́с бо воскре́се, и совоздви́же ме́ртвыя, зовы́й: / дерза́йте, аз победи́х мир. / Ве́руйте у́бо Ему́, или́ умолчи́те лестцы́, / отмета́ющиися Воскресе́ния Его́.

Мироно́сицам, е́же ра́дуйтеся, / воскресы́й от гро́ба, возгласи́в, Бла́же, / и апо́столом пропове́дайте воста́ние Мое́, / разреши́ у́зы мно́гих мои́х согреше́ний, / мо́жеши бо, ели́ка хо́щеши, твори́ти.

Ио́сифа благообра́знаго, / ревни́теля благоче́стия, сове́тника и ученика́, / с мироно́сицами почти́м и апо́столами, зову́ще с ни́ми, / и ве́рно воспева́юще Спа́сово Воскресе́ние све́тло.

Слава: Пресу́щнаго Божества́ неразде́льную сла́ву, кто возмо́жет изрещи́? / Еди́но бо Естество́м су́щи Тро́ица пое́тся безнача́льная, / сра́сленная я́ко Еди́ница, / в Тро́ице пева́емая Ипоста́сьми просты́ми.

И ныне, Богородичен: Во чре́во Твое́ все́льшагося безму́жно ро́ждшая, Ма́ти Де́во Чи́стая, / непреста́нно моли́, я́ко Богоро́дица, / разреши́ти у́зы мно́гих мои́х согреше́ний, / мо́жеши бо, ели́ка хо́щеши, помощи́.

Катавасия: На Боже́ственней стра́жи / богоглаго́ливый Авваку́м / да ста́нет с на́ми и пока́жет / светоно́сна А́нгела / я́сно глаго́люща: / днесь спасе́ние ми́ру, / я́ко воскре́се Христо́с, / я́ко всеси́лен.

Песнь 5.

Ирмос: У́тренюем у́треннюю глубоку́, / и вме́сто ми́ра песнь принесе́м Влады́це, / и Христа́ у́зрим / пра́вды Со́лнце, / всем жизнь возсия́юща.

Припев: Христо́с воскре́се из ме́ртвых.

Безме́рное Твое́ благоутро́бие, / а́довыми у́зами содержи́мии зря́ще, / к све́ту идя́ху, Христе́, / весе́лыми нога́ми, / Па́сху хва́ляще ве́чную.

Припев: Христо́с воскре́се из ме́ртвых.

Присту́пим свещено́снии, / исходя́щу Христу́ из гро́ба, я́ко жениху́, / и спра́зднуем любопра́зднственными чи́нми / Па́сху Бо́жию спаси́тельную.

Припев: Пресвята́я Богоро́дице, спаси́ нас.

Просвеща́ется боже́ственными луча́ми и живоно́сными / воскресе́ния Сы́на Твоего́, / Богома́ти Пречи́стая, / и ра́дости исполня́ется благочести́вых собра́ние.

Припев: Пресвята́я Богоро́дице, спаси́ нас.

Не разве́рзл еси́ врата́ де́вства в воплоще́нии, / гро́ба не разруши́л еси́ печа́тей, Царю́ созда́ния, / отону́дуже воскре́сшаго Тя зря́щи, Ма́ти, ра́довашеся.

Ин. Ирмос: Мглу души́ моея́, Спа́се мой, разгна́в / све́том за́поведей Твои́х озари́ мя, / я́ко еди́н Царь ми́ра.

Ты пе́рвую оде́жду мою́, / ю́же ми истка́, увы́ мне, се́ятель греха́, / совле́кл еси́, Спа́се мой, обле́кся в мя.

Ли́ствие смоко́вное сши мне грех мой, увы мне, / не сохра́ншему, Спа́се мой, пречи́стую за́поведь Твою́, / змии́ным сове́том.

Уязви́вшуюся ду́шу мою́ разбо́йническими помышле́ньми мои́ми, / предста́вый и́же от Мари́и, и еле́й возлия́в, исцели́, Христо́с.

У Креста́ предстоя́щи Пречи́стая Богоро́дица, ма́терски взыва́ше: / оста́вил Мя еси́ еди́ну, о Сы́не Мой и Бо́же!

Ты злонача́льнаго зми́я / ору́жием Креста́ Твоего́ низложи́в, / Твои́м воста́нием, сокруши́л еси́ жа́ло сме́рти, Иису́се.

Где твое́, сме́рте, жа́ло; / где твоя́, а́де, побе́да? / Ада́м да свопие́т: / сокруши́лся еси́ оживле́нием воздви́гшаго ме́ртвыя.

Мироно́сицы жены́ гро́ба Твоего́ дости́гшия, оживи́вшаго до́льных, / глас слы́шаху глаго́лющий: воскре́се Христо́с.

Благочести́вых мироно́сиц па́мять соверша́юще, / и всех учени́к Твои́х, в све́тлом Твое́м воста́нии, / воспева́ем Тя, Христе́.

Благообра́знаго вси почти́м досто́йно, / и́же те́ло Госпо́дне от Дре́ва сня и погребе́ ве́рно.

Слава: Тебе́, Бо́гу и Отцу́ и Сы́ну и Ду́ху, покланя́юся, трем Ипоста́сем, / и еди́но три ве́рую, Существо́м еди́нем.

И ныне: Тя, безсе́менным Рождество́м роди́вшую па́че естества́ / обнови́вшаго естество́, Христа́ еди́наго Влады́ку воспева́ем, ве́рнии.

Катавасия: У́тренюем у́треннюю глубоку́, / и вме́сто ми́ра песнь принесе́м Влады́це, / и Христа́ у́зрим / пра́вды Со́лнце, / всем жизнь возсия́юща.

Песнь 6.

Ирмос: Снизше́л еси́ в преиспо́дняя земли́, / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от гро́ба.

Припев: Христо́с воскре́се из ме́ртвых.

Сохрани́в це́ла зна́мения Христе́, / воскре́сл еси́ от гро́ба, / ключи́ Де́вы не вреди́вый в рождестве́ Твое́м, / и отве́рзл еси́ нам ра́йския две́ри.

Припев: Христо́с воскре́се из ме́ртвых.

Спа́се мой, / живо́е же и неже́ртвенное заколе́ние, / я́ко Бог Сам Себе́ / во́лею приве́л Отцу́, / совоскреси́л еси́ всеро́днаго Ада́ма, / воскре́с от гро́ба.

Припев: Пресвята́я Богоро́дице, спаси́ нас.

Возведе́ся дре́вле держи́мое сме́ртию и тле́нием, / воплоти́вшимся от Твоего́ пречи́стаго чре́ва, / к нетле́нней и присносу́щней жи́зни, / Богоро́дице Де́во.

Припев: Пресвята́я Богоро́дице, спаси́ нас.

Сни́де в преиспо́дняя земли́, / в ложесна́ Твоя́, Чи́стая, сше́дый, / и всели́выйся и воплоти́выйся па́че ума́, / и воздви́же с Собо́ю Ада́ма, / воскре́с от гро́ба.

Ин. Ирмос: Во глубине́ грехо́вней содержи́мь есмь, Спа́се, / и в пучи́не жите́йстей обурева́емь, / но я́коже Ио́ну от зве́ря, / и мене́ от страсте́й возведи́, и спаси́ мя.

Мертв есть ад, дерза́йте, земноро́днии, / Христо́с бо на Дре́ве ви́сяй, / ве́рже ору́жие нань, и лежи́т мертв, / я́же бо имя́ше, плени́ся обнажи́вся.

Плени́ся ад, дерза́йте ме́ртвии, и гро́би отверзо́шася, / воста́ните от а́да, вопие́т вам Христо́с, / вся прише́дый изба́вити от сме́рти и тли.

Ме́ртвыя я́коже возмо́г поже́рл еси́ иногда́, ны́не истязу́емь / а́де, отда́ждь Ми, вопие́т тебе́ Жизнода́вец и Бог, / вся прише́дый изба́вити от несы́таго твоего́ чре́ва.

Жены́ мироно́сицы, что тщите́ся про́чее? / Что же живо́му ми́ра прино́сите, / воскре́се Христо́с, я́коже предрече́. / Да преста́нут ва́ша сле́зы, преше́дшия на ра́дость.

Плащани́цею Тя, Христе́, обви́в Ио́сиф благообра́зный, во гро́бе положи́, / миропома́зав же разоре́нный Твоего́ телесе́ храм, / привали́ ка́мень вели́кий ко гро́бу.

Госпо́дь воскре́се плени́вый врага́, / и у́зники исто́ргнув, возведе́ вся, / и первозда́ннаго Ада́ма, того́ возставля́я, / я́ко Благоутро́бен и Человеколю́бец Бог.

Слава: Тро́ицу во Еди́нстве воспои́м, ве́рнии, / с Сы́ном Отца́ сла́вяще, и Ду́ха единосу́щна Сы́ну, и су́ща во Отце́ / собезнача́льнаго и присносу́щнаго Бо́га.

И ныне, Богородичен: Во чре́ве невозде́ланно зачала́ еси́, Чи́стая, нетле́ния грозд, я́ко лоза́, / из нея́же безсме́ртия то́ки, / я́коже вино́ нам источа́ют ве́чную жизнь.

Катавасия: Снизше́л еси́ в преиспо́дняя земли́, / и сокруши́л еси́ вереи́ ве́чныя, / содержа́щия свя́занныя, Христе́, / и тридне́вен, я́ко от ки́та Ио́на, / воскре́сл еси́ от гро́ба.

Кондак, глас 2:

Ра́доватися мироно́сицам повеле́л еси́, / плачь прама́тере Е́вы утоли́л еси́ / воскресе́нием Твои́м, Христе́ Бо́же, / апо́столом же Твои́м пропове́дати повеле́л еси́: / Спас воскре́се от гро́ба.

Икос: На гроб Твой, Спа́се, мироно́сицы иду́щия, / к себе́ недоумева́хуся умо́м и веща́ху: / кто нам ка́мень отвали́т гро́бный? / И воззре́вша ви́дят, я́ко ка́мень отвале́н бе, / зра́ку же а́нгелову со одея́нием дивля́хуся, / содержи́ми же бя́ху тре́петом, и бежа́ти помышля́ху. / И к ним ю́ноша возопи́: / не бо́йтеся вы, Его́же и́щете, воста́, / прииди́те, ви́дите ме́сто, иде́же лежа́ше те́ло Иису́сово, / и ско́ро ше́дшия возвести́те ученико́м: / Спас воскре́се от гро́ба.

Синаксарь Минеи. Таже Триоди.

Песнь 7.

Ирмос: О́троки от пе́щи изба́вивый, / быв Челове́к, / стра́ждет я́ко сме́ртен, / и стра́стию сме́ртное, / в нетле́ния облачи́т благоле́пие, / Еди́н благослове́н / отце́в Бог, и препросла́влен.

Припев: Христо́с воскре́се из ме́ртвых.

Жены́ с ми́ры богому́дрыя в след Тебе́ теча́ху, / Его́же, я́ко ме́ртва, со слеза́ми иска́ху, / поклони́шася ра́дующияся Живо́му Бо́гу, / и Па́сху та́йную / Твои́м, Христе́, ученико́м благовести́ша.

Припев: Христо́с воскре́се из ме́ртвых.

Сме́рти пра́зднуем умерщвле́ние, / а́дово разруше́ние, / ино́го жития́ ве́чнаго нача́ло, / и игра́юще пое́м Вино́внаго, / Еди́наго благослове́ннаго / отце́в Бо́га, и препросла́вленнаго.

Припев: Христо́с воскре́се из ме́ртвых.

Я́ко вои́стинну свяще́нная, / и всепра́зднственная сия́ спаси́тельная нощь, / и светоза́рная, / светоно́снаго дне, / воста́ния су́щи провозве́стница, / в не́йже безле́тный Свет из гро́ба пло́тски всем возсия́.

Припев: Пресвята́я Богоро́дице, спаси́ нас.

Умертви́в Сын Твой смерть, Всенепоро́чная, днесь, / всем сме́ртным пребыва́ющий живо́т / во ве́ки веко́в дарова́, / еди́н благослове́нный / отце́в Бог и препросла́вленный.

Припев: Пресвята́я Богоро́дице, спаси́ нас.

Всем ца́рствуяй созда́нием, быв челове́к, / всели́ся в Твою́, Богоблагода́тная, утро́бу, / и распя́тие претерпе́в и смерть, / воскре́се боголе́пно, / совозста́вив нас я́ко всеси́лен.

Ин. Ирмос: Херуви́мы подража́юще о́троцы в пещи́ ликовствова́ху, вопию́ще: / благослове́н еси́ Бо́же, / я́ко и́стиною и судо́м наве́л еси́ сия́ вся, грех ра́ди на́ших, / препе́тый и препросла́вленный во вся ве́ки.

Ты, я́ко Человеколю́бец, хотя́й вся спасти́ от пре́лести, я́же созда́л еси́, / претерпе́л еси́ пригвозди́тися на Кресте́, / да погребе́нный о́браз страстьми́, сей пло́тию Твое́ю обнови́ши, Спа́се, / и ад низложи́в, воскреси́л еси́ и уме́ршия с Собо́ю.

На Кресте́ возвыша́емь, вся призва́л еси́ / к Себе́, Ще́дре, я́коже обеща́л еси́, Бла́же, / я́ко вои́стинну вся сия́ грехо́в ра́ди на́ших пострада́ти благоволи́л еси́. / Те́мже и разбо́йнику ра́йская врата́ отве́рзл еси́, Спа́се.

Ты храм теле́сный воздви́гл еси́ разоре́нный, / тридне́вно из гро́ба, я́коже обеща́л еси́, Бла́же, / да вои́стинну ска́жеши сла́ву Твою́, / ю́же нам источа́еши ве́рою, / у́зы разреши́в, и́хже держа́ше дре́вле ад свя́занных.

О иуде́йское безу́мие! О неи́стовство беззако́нных! / Что неве́рное ви́девше, не ве́ровасте Христу́? / Я́ко немощны́я, не сло́вом ли воздви́же? / Или я́ко весь мир Той не спасе́ ли, / да уверя́ют вас поне́ во́ини, или́ воскре́сшие из ме́ртвых.

Омертве́вшии стра́жие ны́не да глаго́лют, / ка́ко укра́ден бысть, Его́же не ви́деша неразу́мнии всегда́? / А́ще бо воскре́сша не ви́деша, ни ощути́ша, / ка́ко укра́дена Сего́ разуме́ти можа́ху когда́? / Да уве́рит вы поне́ ка́мень сей и погреба́льная Христо́ва.

Что я́ко ме́ртва блюде́те? / Что печа́ти на ка́мени положи́сте евре́е, стра́хом боя́щеся краде́ния? / Се вои́стинну гроб запечатле́ся. / Ка́ко у́бо воскре́се, а́ще не бы Бог был Христо́с? / Да уверя́ют вы воскре́сшии и ви́дени бы́вшии мно́гими.

Слава: Со Отце́м сла́вим Сы́на, и Ду́ха Свята́го, / вопию́ще непреста́нным гла́сом: / Тро́ице, еди́нственное Существо́, поми́луй, спаси́ вся, / в трие́х Ли́цех Еди́нице, уще́дри ны, / препросла́вленный Бо́же, во ве́ки.

И ныне, Богородичен: Во чре́ве Твое́м, Пречи́стая, ка́ко вмести́ла еси́ Младе́нца, / Его́же трепе́щут си́лы а́нгельския я́ко Бо́га? / Ра́зве я́коже восхоте́, я́коже весть всели́ся, / вся спасти́ хотя́й от Ада́ма земноро́дныя, / разреши́вый Ада́ма кля́твы о́ныя, сне́дию го́рькою.

Катавасия: О́троки от пе́щи изба́вивый, / быв Челове́к, / стра́ждет я́ко сме́ртен, / и стра́стию сме́ртное, / в нетле́ния облачи́т благоле́пие, / Еди́н благослове́н / отце́в Бог, и препросла́влен.

Песнь 8.

Ирмос: Сей нарече́нный и святы́й день, / Еди́н суббо́т Царь и Госпо́дь, / пра́здников пра́здник / и торжество́ есть торже́ств, / во́ньже благослови́м Христа́ во ве́ки.

Припев: Христо́с воскре́се из ме́ртвых.

Прииди́те, но́ваго виногра́да рожде́ния, / Боже́ственнаго весе́лия, / в наро́читом дни Воскресе́ния, / Ца́рствия Христо́ва приобщи́мся, / пою́ще Его́, / я́ко Бо́га, во ве́ки.

Припев: Христо́с воскре́се из ме́ртвых.

Возведи́ о́крест о́чи твои́, Сио́не, и виждь: / се бо приидо́ша к тебе́, / я́ко богосве́тлая свети́ла, / от за́пада, и се́вера, и мо́ря, / и восто́ка ча́да твоя́, / в тебе́ благословя́щая Христа́ во ве́ки.

Припев: Пресвята́я Тро́ице, Бо́же наш, сла́ва Тебе́.

Троичен: О́тче Вседержи́телю, и Сло́ве, и Ду́ше, / треми́ соединя́емое во Ипоста́сех Естество́, / Пресу́щественне и Пребоже́ственне, / в Тя крести́хомся, / и Тя благослови́м во вся ве́ки.

Припев: Пресвята́я Богоро́дице, спаси́ нас.

Прии́де Тобо́ю в мир Госпо́дь, Де́во Богоро́дице, / и чре́во а́дово расто́рг, / сме́ртным нам воскресе́ние дарова́, / те́мже благослови́м Его́ во ве́ки.

Припев: Пресвята́я Богоро́дице, спаси́ нас.

Всю низложи́в сме́рти держа́ву Сын Твой, Де́во, / Свои́м воскресе́нием, / я́ко Бог кре́пкий совознесе́ нас и обожи́, / те́мже воспева́ем Его́ во ве́ки.

Ин. Ирмос: В купине́ Моисе́ю Де́вы чу́до, / на Сина́йстей горе́, прообрази́вшаго иногда́, / по́йте, благослови́те / и превозноси́те во вся ве́ки.

Со́лнечныя зари́ спря́тахуся стра́хом Христо́вых страда́ний, / и востая́ху ме́ртвии, и го́ры прекланя́хуся, / и колеба́шеся земля́, и ад обнажа́шеся.

В пещи́ су́щии иногда́ треблаже́ннии о́троцы / возвыша́юще ру́ки, прообража́ху, Бла́же, пречестны́й Крест Твой, / и́мже низложи́л еси́, Христе́, вра́жию си́лу.

О иуде́е слепи́и преле́стницы и престу́пницы, / Христо́ву Воскресе́нию неве́рующии, я́ко ло́жному, / что неве́рное ви́дите, я́ко воскре́се Христо́с, ме́ртвыя воздви́гий?

О иуде́е врази́, а́ще и нам не ве́руете, / ва́ша во́ины вы вопроси́те, что пострада́ша они́? / Кто отвали́вый рука́ми ка́мень от гро́ба?

Кто изсуши́вый смоко́вницу? / Кто же суху́ю исцели́вый ру́ку? / Кто насы́тивый иногда́ мно́жества в пусты́ни, / а́ще не Христо́с Бог, ме́ртвыя воздви́гнувый?

Кто просвети́вый слепцы́, и прокаже́нныя очи́стивый, и хромы́я испра́вивый, / и пешеше́ствовавый мо́ре немо́кренно я́ко су́шу, / а́ще не Христо́с Бог, ме́ртвыя воздви́гнувый?

Кто воздви́гнувый ме́ртва четверодне́вна из гро́ба, вдови́ча сы́на? / Кто стягну́вый, я́ко Бог, разсла́блена на одре́, / а́ще не Христо́с Бог, ме́ртвыя воздви́гнувый?

Зове́т ка́мень са́мый, печа́ти вопию́т, я́же вы положи́вше, / поста́висте стра́жу храня́щую гроб: / вои́стинну воскре́се Христо́с и живе́т во ве́ки.

Вои́стинну воскре́се Христо́с, / плене́н бысть ад, умертви́ся змий, / изба́вися Ада́м, потрясо́шася до́льнии, / что не ве́руете про́чее, врази́ и престу́пницы?

Благослови́м Отца́ и Сы́на и Свята́го Ду́ха, Го́спода.

Со Отце́м Сы́на и Ду́ха Свята́го / Святу́ю Тро́ицу в Божестве́ еди́ном прославля́ем, вопию́ще: / Свят, Свят, Свят еси́ во ве́ки.

И ны́не и при́сно и во ве́ки веко́в, ами́нь.

Богородичен: Во чре́ве Твое́м, Чи́стая, присноживо́тный хлеб, / смеше́ный несме́сно, смеше́нием на́шим, / родила́ еси́ непрело́жно еди́наго Христа́ Бо́га во двою́ существу́.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катавасия: Сей нарече́нный и святы́й день, / Еди́н суббо́т Царь и Госпо́дь, / пра́здников пра́здник / и торжество́ есть торже́ств, / во́ньже благослови́м Христа́ во ве́ки.

Честне́йшую: не поем до отдания Пасхи во вся Недели.

Песнь 9.

Ирмос: Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Припев: Христо́с воскре́се из ме́ртвых.

О Боже́ственнаго, о любе́знаго, / о сладча́йшаго Твоего́ гла́са! / С на́ми бо нело́жно / обеща́лся еси́ бы́ти, / до сконча́ния ве́ка, Христе́, / Его́же, ве́рнии, / утвержде́ние наде́жди иму́ще, ра́дуемся.

Припев: Христо́с воскре́се из ме́ртвых.

О Па́сха ве́лия и свяще́ннейшая, Христе́! / О му́дросте, и Сло́ве Бо́жий, и си́ло! / Подава́й нам и́стее Тебе́ причаща́тися, / в невече́рнем дни Ца́рствия Твоего́.

Припев: Пресвята́я Богоро́дице, спаси́ нас.

Согла́сно, Де́во, Тебе́ блажи́м ве́рнии: / ра́дуйся, две́ре Госпо́дня, / ра́дуйся, гра́де одушевле́нный, / ра́дуйся, Ея́же ра́ди нам ны́не возсия́ свет, / из Тебе́ Рожде́ннаго из ме́ртвых Воскресе́ния.

Припев: Пресвята́я Богоро́дице, спаси́ нас.

Весели́ся и ра́дуйся, боже́ственная две́ре Све́та, / заше́дый бо Иису́с во гроб возсия́, / просия́в со́лнца светле́е, / и ве́рныя вся озари́в, / Богора́дованная Влады́чице.

Ин. Ирмос: Преесте́ственно пло́тию заче́ншую во чре́ве, / от Отца́ безле́тно предвозсия́вшее Сло́во, / в пе́снех немо́лчных / велича́ем ве́рнии.

И́же на Кресте́ разбо́йника, позна́вша Тя, Бо́га, / насле́дника соде́лал еси́ мы́сленному раю́, / е́же помяни́ мя, вопию́ща, Всеси́льне Спа́се.

Зауше́н нас ра́ди, / и оплева́н был еси́, Иису́се, от беззако́нников, / скрижа́ли зако́на начерта́вый в Сина́и, уго́днику Моисе́ю.

О́цта и же́лчи, Спа́се, напое́н был еси́ нас ра́ди, / да́вый нам те́ло и честну́ю кровь, / в снедь же и питие́ ве́чныя Твоея́ жи́зни.

В животво́рная ре́бра копие́м прободе́н быв, Христе́, / пречи́стую Твою́ кровь и честну́ю во́ду / источи́л еси́ ми́рови, я́ко присноживо́тный исто́чник.

Вмени́лся еси́ в ме́ртвых, оживле́й ме́ртвыя, / во гро́бе положе́н еси́, истощи́вый гро́бы, / плени́л еси́ ад, воскреси́в Ада́ма.

Воскре́сл еси́, Иису́се, / свя́зан бысть враг, плени́ся ад, испраздни́шася гро́би, / воста́ша до́льнии, покланя́ющеся Тебе́, Христе́.

Кто укра́дый ме́ртваго, па́че же и на́га? / Что льстите́ся евре́е? / Христо́с воскре́се, и разруша́ются а́довы у́зы и вереи́.

Сла́ва Тебе́, Христе́ Спа́се, источи́вый жизнь, / и свет возсия́вый су́щим во тьме неве́дения, / и всю зе́млю просвети́вый воста́нием Твои́м.

Благообра́зный сове́тник Ио́сиф, / да пое́тся с мироно́сицами и боже́ственными ученики́, / я́ко пропове́дник сый и сей, воста́ния Христо́ва.

Ио́сифа чу́днаго да восхва́лим ве́рнии, / ку́пно с Никоди́мом и мироно́сицами ве́рными, / вопию́щия: Госпо́дь воскре́се вои́стинну.

Слава: Безнача́лен еси́ О́тче, / несозда́нен еси́ Сы́не, / сопресто́лен и Ду́ше Святы́й, / еди́но [Сия́ три] Естество́м и три Ли́цы, / еди́не Бо́же и́стинный.

И ныне, Богородичен: Да весели́тся Иессе́й, да ликовству́ет и Дави́д, / се бо Де́ва Богора́сленный жезл прозябе́, / цвет присноживо́тный Христа́.

Вместо Достойно: ирмос, катавасия: Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Таже, Свят Госпо́дь Бог наш. На глас 2.

Ексапостиларий. Самогласен:

Пло́тию усну́в, / я́ко мертв, / Царю́ и Го́споди, / тридне́вен воскре́сл еси́, / Ада́ма воздви́г от тли, / и упраздни́в смерть, / Па́сха нетле́ния, / ми́ра спасе́ние. [Единожды.]

Слава: мироносицам: Жены́ услы́шите глас ра́дования: / мучи́теля а́да попра́вый, от тли мир воздви́же, / тецы́те, друго́м рцы́те Мои́м благове́стия: / хощу́ бо созда́ние Свое́ ра́достию озари́ти, / отону́дуже прии́де печа́ль.

И ныне: тойже.

На хвалитех, Вся́кое дыха́ние: поставим стихов 8. И поем
стихиры воскресны 4, глас 2.

Стих: Сотвори́ти в них суд напи́сан: / сла́ва сия́ бу́дет всем преподо́бным Его́.

Вся́кое дыха́ние и вся тварь, / Тя сла́вит, Го́споди, / я́ко Кресто́м смерть упраздни́л еси́, / да пока́жеши лю́дем, е́же из ме́ртвых Твое́ Воскресе́ние, / я́ко еди́н Человеколю́бец.

Стих: Хвали́те Бо́га во святы́х Его́, / хвали́те Его́ в утверже́нии си́лы Его́.

Да реку́т иуде́и, ка́ко во́ини погуби́ша стрегу́щии Царя́? / Почто́ бо ка́мень не сохрани́ Ка́мене жи́зни? / Или́ погребе́ннаго да дадя́т, / или́ Воскре́сшему да покло́нятся, глаго́люще с на́ми: / сла́ва мно́жеству щедро́т Твои́х, / Спа́се наш, сла́ва Тебе́.

Стих: Хвали́те Его́ на си́лах Его́, / хвали́те Его́ по мно́жеству вели́чествия Его́.

Ра́дуйтеся, лю́дие, и весели́теся, / А́нгел седя́й на ка́мени гро́бнем, / той нам благовести́, рек: / Христо́с воскре́се из ме́ртвых, Спас ми́ра, / и испо́лни вся́ческая благоуха́ния: / ра́дуйтеся, лю́дие, и весели́теся.

Стих: Хвали́те Его́ во гла́се тру́бнем, / хвалите Его́ во псалти́ри и гу́слех.

А́нгел у́бо, е́же ра́дуйся, / пре́жде Твоего́ зача́тия, Го́споди, Благода́тней принесе́; / А́нгел же ка́мень сла́внаго Твоего́ гро́ба в Твое́м Воскресе́нии отвали́. / Ов у́бо в печа́ли ме́сто, весе́лия о́бразы возвеща́я: / сей же вме́сто сме́рти, Влады́ку Жизнода́вца пропове́дуя нам. / Те́мже вопие́м Ти: / Благоде́телю всех, Го́споди, сла́ва Тебе́.

Стих: Хвали́те Его́ в тимпа́не и ли́це, / хвали́те Его́ во стру́нах и орга́не.

И восточны {анатолиевы} 4:

Возлия́ша ми́ра со слеза́ми на гроб Твой жены́, / и испо́лнишася ра́дости уста́ их, / внегда́ глаго́лати: воскре́се Госпо́дь.

Стих: Хвали́те Его́ в кимва́лех доброгла́сных, хвали́те Его́ в кимва́лех восклица́ния, / вся́кое дыха́ние да хва́лит Го́спода.

Да похва́лят язы́цы / и лю́дие Христа́ Бо́га на́шего, / во́лею нас ра́ди Крест претерпе́вшаго, / и во а́де тридне́вновавшаго, / и да покло́нятся Его́ из ме́ртвых Воскресе́нию, / и́мже просвети́шася всего́ ми́ра концы́.

Стих: Воскресни́ Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Ра́спят и погребе́н был еси́, Христе́, / я́коже изво́лил еси́, / испрове́ргл еси́ смерть, / и воскре́сл еси́ во сла́ве, я́ко Бог и Влады́ка, / да́руя ми́рови жизнь ве́чную, и ве́лию ми́лость.

Стих: Испове́мся Тебе́ Го́споди всем се́рдцем мои́м, / пове́м вся чудеса́ Твоя́.

[Сия же запевы по вся воскресения.]

О вои́стинну беззако́ннии, / печа́тавше ка́мень, бо́льших нас чуде́с сподо́бисте! / И́мут ра́зум стра́жие, / днесь про́йде из гро́ба, и глаго́лаху: / рцы́те, я́ко нам спя́щим, / приидо́ша ученицы́, и украдо́ша Его́. / И кто кра́дет мертвеца́, па́че же и на́га; / Сам воскре́се самовла́стно, я́ко Бог, / оста́вль во гро́бе и погреба́тельная Своя́. / Прииди́те, ви́дите, иуде́е, / ка́ко не расто́рже печа́ти, смерть попра́вый / и ро́ду челове́ческому безконе́чную жизнь да́руяй, / и ве́лию ми́лость.

Слава, глас 2. Стихира евангельская:

С ми́ры прише́дшим я́же с Мари́ею жена́м, / и недоумева́ющимся, / ка́ко бу́дет им улучи́ти жела́ние, / яви́ся ка́мень взят, / и Боже́ственный ю́ноша утоля́я мяте́ж душ их, / воста́ бо, глаго́лет, Иису́с Госпо́дь. / Те́мже пропове́дите пропове́дником Его́, / ученико́м в Галиле́ю тещи́, / и ви́дети Его́ воскре́сша из ме́ртвых, / я́ко Жизнода́вца и Го́спода.

И ныне, глас тойже: Преблагослове́нна еси́ Богоро́дице Де́во:

Славословие великое. Тропарь воскресен. Ектении, и отпуст. И обычное исхождение в притвор. И поучение Студитово. И час 1-й. И совершенный отпуст. На часех тропарь воскресен. Сла́ва: Благообра́зный Ио́сиф: И ны́не: Богородичен часов. По Трисвятом кондак: Ра́доватися мироно́сицам: Такожде бывает и на прочих часех.

НА ЛИТУРГИИ

Блаженна гласа, на 4, глас 2:

Помяни́, Благоутро́бне, и нас, / я́коже помяну́л еси́ разбо́йника во Ца́рствии Небе́снем.

Дре́во изгна́ Ада́ма, / Крест введе́ разбо́йника в Ца́рство Небе́сное.

Гроб подъя́т Тя, Спа́се, гро́бы истощи́вшаго, / и ме́ртвым живо́т дарова́вшаго, я́ко Бо́га.

Апо́столи сла́внии Христо́вы, / Того́ моли́те приле́жно, да от бед спасе́т ны.

И от канона дне, песнь 6, на 4.

По входе тропарь, глас 2.

Егда́ снизше́л еси́ к сме́рти, Животе́ Безсме́ртный, / тогда́ ад умертви́л еси́ блиста́нием Божества́; / егда́ же и уме́ршия от преиспо́дних воскреси́л еси́, / вся Си́лы Небе́сныя взыва́ху: / Жизнода́вче, Христе́ Бо́же наш, сла́ва Тебе́.

Другий, глас той же

Благообра́зный Ио́сиф, / с Дре́ва снем Пречи́стое Те́ло Твое́, / плащани́цею чи́стою обви́в, и благоуха́ньми, / во гро́бе но́ве, закры́в, положи́, / но тридне́вен воскре́сл еси́, Го́споди, / подая́й ми́рови ве́лию ми́лость.

Слава, кондак Триоди, глас 2:

Ра́доватися мироно́сицам повеле́л еси́, / плачь прама́тере Е́вы утоли́л еси́ / воскресе́нием Твои́м, Христе́ Бо́же, / апо́столом же Твои́м пропове́дати повеле́л еси́: / Спас воскре́се от гро́ба.

И ныне, кондак Пасхи, глас 8:

А́ще и во гроб снизше́л еси́, Безсме́ртне, / но а́дову разруши́л еси́ си́лу, / и воскре́сл еси́, я́ко победитель, Христе́ Бо́же, / жена́м мироно́сицам веща́вый: ра́дуйтеся, / и Твои́м апо́столом мир да́руяй, / па́дшим подая́й воскресе́ние.

Прокимен, глас 6:

Спаси́, Го́споди, лю́ди Твоя́, / и благослови́ достоя́ние Твое́. Стих: К Тебе́, Го́споди, воззову́, Бо́же мой, да не премолчи́ши от мене́.

Апостол Деяний, зачало 16. [Деян. 6, 1 – 7.]

Во дни о́ны, умно́жившимся ученико́м, бысть ропта́ние е́ллином ко евре́ем, я́ко презира́еми быва́ху во вседне́внем служе́нии вдови́цы их. Призва́вше же двана́десять мно́жество учени́к, ре́ша: не уго́дно есть нам, оста́вльшим сло́во Бо́жие, служи́ти трапе́зам. Усмотри́те у́бо, бра́тие, му́жи от вас свиде́телствованы седмь, испо́лнены Ду́ха Свя́та и прему́дрости, и́хже поста́вим над слу́жбою се́ю. Мы же в моли́тве и служе́нии сло́ва пребу́дем. И уго́дно бысть сло́во сие́ пред всем наро́дом. И избра́ша Стефа́на, му́жа испо́лнена ве́ры и Ду́ха Свя́та, и Фили́ппа, и Про́хора и Никано́ра, и Ти́мона, и Парме́на, и Никола́а прише́льца Антиохи́йскаго. И́же поста́виша пред апо́столы, и помоли́вшеся положи́ша на ня ру́ки. И сло́во Бо́жие растя́ше, и мно́жашеся число́ учени́к во Иерусали́ме зело́: мног же наро́д свяще́нников послу́шаху ве́ры.

Аллилуиа, глас 8: Благоволи́л еси́ Го́споди зе́млю Твою́, возврати́л еси́ плен Иа́ковль. Стих: Ми́лость и и́стина срето́стеся, пра́вда и мир облобыза́стася.

Евангелие от Марка, зачало 69. [Мк. 15, 43 – 16, 8.]

Во вре́мя о́но прии́де Ио́сиф, и́же от Аримафе́а, благообра́зен сове́тник, и́же и той бе ча́я Ца́рствия Бо́жия, дерзну́в вни́де к Пила́ту, и проси́ те́ло Иису́сово. Пила́т же диви́ся, а́ще уже́ у́мре, и призва́в со́тника, вопроси́ его́: а́ще уже́ у́мре? И уве́дев от со́тника, даде́ те́ло Ио́сифови. И купи́в плащани́цу, и снемь Его́, обви́т плащани́цею, и положи́ Его́ во гроб, и́же бе изсе́чен от ка́мене: и привали́ ка́мень над две́ри гро́ба. Мари́я же Магдали́на, и Мари́я Иоси́ева зря́сте, где Его́ полага́ху. И мину́вши суббо́те, Мари́я Магдали́на и Мари́я Иа́ковля и Саломи́а, купи́ша арома́ты, да прише́дша пома́жут Иису́са. И зело́ зау́тра во еди́ну от суббо́т приидо́ша на гроб, возсия́вшу со́лнцу, и глаго́лаху к себе́: кто отвали́т нам ка́мень от две́рий гро́ба? [И воззре́вша ви́деша, я́ко отвале́н бе ка́мень:] бе бо ве́лий зело́. И вле́зше во гроб, ви́деша ю́ношу седя́ща в десны́х, оде́яна во оде́жду белу́, и ужасо́шася. Он же глаго́ла им: не ужаса́йтеся. Иису́са и́щете Назаряни́на распя́таго: воста́, несть зде; се, ме́сто, иде́же положи́ша Его́. Но иди́те, рцы́те ученико́м Его́ и Петро́ви, я́ко варя́ет вы в Галиле́и: та́мо Его́ ви́дите, я́коже рече́ вам. И изше́дше бежа́ша от гро́ба: имя́ше же их тре́пет и у́жас. И ни кому́же ничто́же ре́ша, боя́ху бо ся.

Вместо же Достойно: поем:

А́нгел вопия́ше Благода́тней: / Чи́стая Де́во, ра́дуйся! / И па́ки реку́: ра́дуйся! / Твой Сын воскре́се / тридне́вен от гро́ба, / и ме́ртвыя воздви́гнувый: / лю́дие, весели́теся.

Таже ирмос, глас 1: Свети́ся, свети́ся, / но́вый Иерусали́ме, / сла́ва бо Госпо́дня / на тебе́ возсия́. / Лику́й ны́не / и весели́ся, Сио́не. / Ты же, Чи́стая, красу́йся, Богоро́дице, / о воста́нии Рождества́ Твоего́.

Причастный:

Те́ло Христо́во приими́те, / исто́чника безсме́ртнаго вкуси́те. Другий: Хвали́те Го́спода с Небе́с, / хвали́те Его́ в вы́шних. / Аллилу́иа. трижды.

Аще храм святых жен мироносиц, на Малей и Велицей вечерни, и на Утрени, и на Литургии, поем во всем подобне, якоже великомученику Георгию. Точию на Вечерни паремии чтем, писаны в Неделю всех святых.

На Утрени по полиелеи величание поем сице:

Велича́ем вас / святы́я мироно́сицы, / и чтем святу́ю па́мять ва́шу, / вы бо мо́лите о нас / Христа́ Бо́га на́шего.

Псалом: Блаже́н муж боя́йся Го́спода: и прочая.