Глас 7. В субботу утром. Тропари и стихиры на каждый день

Седа́льны му́ченичны. Гла́с 7:

Святи́и, моли́теся, оставле́ние да́ти на́м прегреше́ний на́ших, и ча́емых лю́тых изба́витися на́м, и го́рькия сме́рти, мо́лимся.

Сти́х: Ди́вен Бо́г во святы́х Свои́х, Бо́г Изра́илев.

Святи́и Твои́, Го́споди, на земли́ подви́гшеся, врага́ попра́ша, и и́дольскую ле́сть упраздни́ша: те́мже и венцы́ от Тебе́ прия́ша, Человеколю́бца Влады́ки, и Ми́лостиваго Бо́га, подаю́щаго ми́ру ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Я́ко на́шего воскресе́ния сокро́вище, на Тя́ наде́ющияся, Всепе́тая, от ро́ва и глубины́ прегреше́ний возведи́: Ты́ бо пови́нныя греху́ спасла́ еси́, ро́ждшая Спасе́ние на́ше, я́же пре́жде Рождества́ Де́ва, и в Рождестве́ Де́ва, и по Рождестве́ па́ки пребыва́еши Де́ва.

Седа́льны. Гла́с 7.

Ра́дуйтеся, пра́веднии, и да веселя́тся Небе́сная: на земли́ бо му́ченицы подви́гшеся, врага́ попра́ша, и ле́сть и́дольскую упраздни́ша: да взыгра́ется Це́рковь, победи́тельная пра́зднующи Подвигополо́жнику и Еди́ному Победотво́рцу Христу́ Бо́гу, подаю́щему ми́рови ве́лию ми́лость.

Сти́х: Ди́вен Бо́г во святы́х Свои́х, Бо́г Изра́илев.

Му́ченицы Твои́, Го́споди, врага́ победи́ша, и ле́сть и́дольскую посрами́ша, вооружи́вшеся Креста́ Твоего́ си́лою: те́мже и со а́нгелы воспева́юще зову́т побе́дную пе́снь, славосло́вяще Тебе́, Христе́. Те́х моли́твами пода́ждь душа́м на́шим очище́ние и ве́лию ми́лость.

Сти́х: Мно́ги ско́рби пра́ведным, и от все́х и́х изба́вит я́ Госпо́дь.

Во стране́ живу́щих, Го́споди, и в селе́ниих пра́ведных Твои́х учини́ ду́хи, и́мже сотворя́ем па́мять, Человеколю́бче: и а́ще что́ согреши́ша в житии́ су́ще, я́ко Ми́лостив, и Благопремени́тель Бо́г, прости́, подая́ ми́рови ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Неискусобра́чная Отрокови́це Всенепоро́чная, от Твои́х крове́й воплоще́ннаго Бо́га на́шего, при́сно со проро́ки, и святи́тели, и му́ченики, моли́ спасти́ся душа́м на́шим.

На хвали́тех стихи́ры му́ченичны, гла́с 7:

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Па́мять святы́х Твои́х страстоте́рпец пра́зднующе, Тебе́ пое́м, Христе́, вопию́ще: Го́споди, сла́ва Тебе́.

Сти́х: Хвали́те Его́ во гла́се тру́бнем: хвали́те Его́ во псалти́ри и гу́слех.

Посреде́ суди́ща законопресту́пных, ра́дующеся, вопия́ху, Христе́, страстоте́рпцы: Го́споди, сла́ва Тебе́.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Еди́но ды́шуще, и ко еди́ному взира́юще страстоте́рпцы му́ченицы, еди́н пу́ть живота́ обре́тше, е́же за Христа́ сме́рть, ревну́юще дру́г дру́га кончи́не. Оле чудесе́, я́ко сокро́вища му́ки предвосхища́ху! Дру́г ко дру́гу глаго́лаху, я́ко а́ще не ны́не у́мрем, у́мрем же вся́ко, и бытию́ до́лжная послу́жим, сотвори́м ну́жду любоче́стием, о́бщее свое́ изво́ливше, сме́ртию живо́т ку́пим: моли́твами и́х, Бо́же, поми́луй на́с.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Во стране́ пра́ведных Твои́х, Ми́лостиве, ве́рою к Тебе́ преста́вленныя от вре́менных, учини́, Человеколю́бче.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Моли́, Де́во, со апо́столы и му́ченики, обрести́ на Суде́ преста́вльшимся ве́лию ми́лость.

На стихо́вне стихи́ры поко́йны. Гла́с 7.

Умерщвле́н ви́ден бы́л еси́ на Кресте́, Еди́не Безсме́ртне, и во гро́бе, я́ко ме́ртв, положе́н бы́л еси́, умерщвле́ния и тли́ сме́ртныя челове́ки избавля́я. Но я́ко Пучи́на Милосе́рдия сы́й неистощи́мая, и Исто́чник Благосты́ни, ду́ши Твои́х ра́б, от на́с преста́вленых, упоко́й.

Сти́х: Блаже́ни, я́же избра́л и прия́л еси́ Го́споди.

Нетле́нною Твое́ю добро́тою, и сла́достию красоты́ и Боже́ственнаго Твоего́ Све́та луча́ми просвеща́тися сподо́би, к Тебе́ преста́вльшияся, Бла́же, в невеще́ственнем светоли́тии светоявле́ния Твоего́, со а́нгелы ликовству́ющыя о́крест Тебе́ Влады́ки, и Царя́ Сла́вы, и Го́спода.

Сти́х: Ду́ши и́х во благи́х водворя́тся.

Я́ко неиждива́емое име́я даро́в великоле́пие, я́ко сокро́вище неоску́дное бога́тыя благосты́ни, к Тебе́ преста́вльшияся, я́ко Бо́г всели́ в страна́х избра́нных Твои́х, на ме́сте ослабле́ния, в дому́ сла́вы Твоея́, в пи́щи ра́йстей, в де́вственнем черто́зе, я́ко Милосе́рд.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Зако́на Исполне́ние родила́ еси́, Изба́вителя Пло́тию бы́вшаго, не бо бы́сть су́щим пре́жде в Зако́не оправда́ние: Христо́с же на́с ра́ди распя́тся и оправда́. Я́ко у́бо иму́щая дерзнове́ние, я́ко Ма́ти, моли́ Сы́на Твоего́ Благоутро́бнаго, ду́ши упокои́ти благоче́стно от на́с преста́вленных, Всепе́тая.

Блаже́нна, гла́с 7:

Красе́н бе́ и до́бр в сне́дь, и́же мене́ умертви́вый пло́д: Христо́с е́сть Дре́во Живо́тное, от Него́же яды́й не умира́ю, но вопию́ с разбо́йником: помяни́ мя, Го́споди, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Сконча́вше до́брый по́двиг, и ве́ру соблю́дше, венцы́ нетле́нныя от Бо́га прия́ли есте́: и сла́вы Его́ сподо́бистеся, му́ченицы всехва́льнии, а́нгелом сожи́телие.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Священноде́йственных и преподо́бных собо́ри, и проро́к, и честны́х же́н сосло́вие да почти́тся свяще́нно, во хра́мех перворо́дных ны́не живу́ще в ра́дости, и соводворя́ющеся со безпло́тными чи́нми.

Ра́дуйтеся и весели́теся, я́ко мзда́ ва́ша мно́га на Небесе́х.

Учини́ в хра́мех святы́х, я́же преста́вил еси́ от на́с, Сло́ве Бо́жий, те́х презре́в душе́вная согреше́ния, в ве́дении и неве́дении соде́яная на земли́, и уще́дри рабы́ Твоя́.

Сла́ва Отцу́ и Сы́ну и Свято́му Ду́ху:

Раби́ Твои́, о Тро́ице Свята́я, умира́ющии к Тебе́ прихо́дят, изба́витися от стра́шных о́нех му́к, и улучи́ти про́сят благи́х сла́вы святы́я Твоея́, в ча́с су́дный.

И ны́не и при́сно и во ве́ки веко́в. Ами́нь:

Богоро́дичен: Всели́ся в Твое́й утро́бе, Всесвята́я Чи́стая, Отчее Сия́ние, и прельще́ныя вра́жиим злы́м сове́том, и впа́дшия во тлю́, па́ки обнови́л е́сть.