Глас 6. В субботу утром. Тропари и стихиры на каждый день

Седа́льны му́ченичны. Гла́с 6:

Све́т пра́ведным всегда́ Ты́, Го́споди: святи́и бо о Тебе́ просвети́вшеся, сия́ют при́сно я́ко свети́ла, свети́льник нечести́вых угаси́вше: и́хже моли́твами, Спа́се на́ш, Ты́ просвети́ свети́льник мо́й, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Страда́льческий по́двиг претерпе́вше святи́и, и по́чести побе́дныя от Тебе́ прия́ша, упраздни́ша помышле́ния беззако́нных, и прия́ша венцы́ нетле́нныя. Те́ми, Бо́же, умоле́н быва́я, да́руй на́м ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: И́же Благослове́нную нареки́й Твою́ Ма́терь, прише́л еси́ на стра́сть во́льным хоте́нием, возсия́в на Кресте́, взыска́ти хотя́ Ада́ма, глаго́ля А́нгелом: сра́дуйтеся Мне́, я́ко обре́теся поги́бшая дра́хма. Вся́ му́дре устро́ивый, Бо́же на́ш, сла́ва Тебе́.

Седа́льны. Гла́с 6.

Страда́льческое стоя́ние в по́двизе, и мучи́тельския ра́ны на му́ченицех: и стоя́ху ли́цы безпло́тных, по́чести держа́ще побе́дныя: удиви́ша му́дрии мучи́телей, и царе́й прему́дрии: низложи́ша отсту́пника испове́данием Христо́вым. Укрепи́вый и́х, Го́споди, сла́ва Тебе́.

Сти́х: Ди́вен Бо́г во святы́х Свои́х, Бо́г Изра́илев.

Го́споди, святы́х Твои́х па́мять дне́сь показа́ся, я́ко ра́й, и́же во Eде́ме, в не́й бо ра́дуется вся́ тва́рь: и подае́ши на́м те́х мольба́ми ми́р и ве́лию ми́лость.

Сти́х: Мно́ги ско́рби пра́ведным, и от все́х и́х изба́вит я́ Госпо́дь.

Вои́стинну суета́ вся́ческая, житие́ же се́нь и со́н: и́бо всу́е мяте́тся вся́к земноро́дный, я́коже рече́ Писа́ние: егда́ ми́р приобря́щем, тогда́ во гро́б всели́мся, иде́же вку́пе ца́рие и убо́зии. Те́мже, Христе́ Бо́же, преста́вленныя упоко́й: я́ко Человеколю́бец.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: От се́рдца воздыха́ния и от утро́бы приношу́ Ти. Твое́, Всенепоро́чная, молю́ благопремени́тельное заступле́ние: поми́луй всестра́стную мою́ ду́шу, умоли́ многоми́лостиваго Бо́га изба́вити мя́ суда́, и е́зера о́гненнаго, Еди́на Благослове́нная.

На хвали́тех стихи́ры му́ченичны, гла́с 6:

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Го́споди, в па́мять святы́х Твои́х, вся́ тва́рь пра́зднует, небеса́ ра́дуются со А́нгелы, и земля́ весели́тся с челове́ки. Те́х моли́твами поми́луй на́с.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Го́споди, а́ще не бы́хом святы́я Твоя́ име́ли моли́твенники, и благосты́ню Твою́ ми́лующую на́с: ка́ко сме́ли бы́хом, Спа́се, пе́ти Тя́, Его́же славосло́вят непреста́нно А́нгели? Сердцеве́дче, пощади́ ду́шы на́шя.

Сти́х: Хвали́те Его́ во гла́се тру́бнем: хвали́те Его́ во псалти́ри и гу́слех.

Па́мять му́ченик, ра́дость боя́щымся Го́спода: пострада́вше бо Христа́ ра́ди, венцы́ от Него́ прия́ша: и ны́не со дерзнове́нием мо́лятся о душа́х на́ших.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Избра́нныя удиви́ святы́я Бо́г на́ш, ра́дуйтеся и весели́теся вси́ раби́ Его́, ва́м бо угото́вал е́сть венцы́ и Ца́рствие Свое́: но мо́лим вы́, и на́с не забу́дите.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Боле́знь Ада́му бы́сть, дре́ва вкуше́ние дре́вле во Еде́ме, егда́ зми́й я́д отры́гну: того́ бо ра́ди вни́де сме́рть всеро́дная снеда́ющи челове́ка. Но прише́д Влады́ка, низложи́ зми́я, и воскресе́ние на́м дарова́. К нему́же у́бо возопии́м: пощади́, Спа́се, и и́хже прия́л еси́, со святы́ми упоко́й, я́ко Человеколю́бец.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Бо́га из Тебе́ воплоти́вшагося разуме́хом, Богоро́дице Де́во: Того́ моли́ о спасе́нии ду́ш на́ших.

На стихо́вне стихи́ры поко́йны. Гла́с 6.

Име́яй непостижи́мое е́же о на́с благоутро́бие, и исто́чник неистощи́мый Боже́ственныя бла́гости, Многоми́лостиве, и́же к Тебе́, Влады́ко, преше́дшыя, на земли́ живы́х всели́, в селе́ния возлю́бленная и жела́емая, одержа́ние да́руя, всегда́ пребыва́ющее. Ты́ бо за все́х пролия́л еси́ кро́вь Твою́, Спа́се, и живоно́сною цено́ю ми́р искупи́л еси́.

Сти́х: Блаже́ни, я́же избра́л и прия́л еси́ Го́споди.

Умерщвле́ние претерпе́л еси́ животворя́щее во́лею и живо́т источи́л еси́, и пи́щу присносу́щную ве́рным да́л еси́, в не́йже учини́ усо́пшыя о упова́нии воскресе́ния, те́х согреше́ния вся́ проща́я благода́тию я́ко Еди́н Безгре́шен, и Еди́н Бла́г и Человеколю́бец: да все́ми пое́тся Твое́ И́мя, Христе́, спаси́тельное сла́вим Человеколю́бие Твое́.

Сти́х: Ду́ши и́х во благи́х водворя́тся.

Живы́ми госпо́дьствующа, Богонача́льною вла́стию, и ме́ртвыми влады́чествующа, Тебе́, Христе́, зна́юще мо́лимся, ве́рныя рабы́ Твоя́, к Тебе́ Еди́ному Благода́телю отше́дшыя, те́х упоко́й со избра́нными Твои́ми, Человеколю́бче, на ме́сте утеше́ния, во святы́х све́тлостех: Воли́тель бо ми́лости еси́, и спаса́еши я́ко Бо́г, и́хже по о́бразу Твоему́ созда́л еси́, Еди́не Многоми́лостиве.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Яви́лася еси́ пребыва́лище боголе́пно, Пречи́стая: Бо́га бо вмести́ла еси́, и Христа́ родила́ еси́, Неискусобра́чная Ма́ти Де́во, во двою́ Существу́, во Еди́ной же Ипоста́си. Того́ умоли́, Чи́стая, Единоро́днаго Пе́рвенца, Тя́ Де́ву Непоро́чную, и по рождестве́ сохра́ншаго, ду́шы упоко́ити ве́рою усо́пших во све́те, и в нетле́ннем блаже́нстве.

Блаже́нна, гла́с 6:

Помяни́ мя, Бо́же Спа́се мо́й, егда́ прии́деши во Ца́рствии Твое́м: и спаси́ мя, я́ко еди́н Человеколю́бец.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Огня́ и меча́, и звере́й ди́виих устремле́ния свире́паго, страстоте́рпцы сла́внии не убоя́вшеся, присносу́щнаго живота́ сподо́бистеся.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

И́же проро́ки и учи́тели, и преподо́бныя и пра́ведныя просла́вивый, Человеколю́бче: те́х моли́твами спаси́ ду́шы на́шя.

Ра́дуйтеся и весели́теся, я́ко мзда́ ва́ша мно́га на Небесе́х.

Со все́ми святы́ми и пра́ведными учини́ сло́ве, и́хже в ве́ре преста́вил еси́ от вре́менных, я́ко да сла́вим Тя́.

Сла́ва Отцу́ и Сы́ну и Свято́му Ду́ху:

Отца́ и Сы́на славосло́вим, и Свята́го Ду́ха, глаго́люще: Тро́ице Свята́я, спаси́ ду́шы на́шя.

И ны́не и при́сно и во ве́ки веко́в. Ами́нь:

Богоро́дичен: Блаже́нна в роде́х все́х яви́лася еси́: Бо́га бо вои́стинну Блаже́ннаго несказа́нно родила́ еси́, Пречи́стая.