Глас 6. В пятницу вечером. Тропари и стихиры на каждый день

Стихи́ры святы́м му́чеником, и святи́телем, и преподо́бным. Гла́с 6

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Христо́вых страсте́й по стопа́м ходя́ все́ му́ченическое сосло́вие, кре́пко за́йде к подвиго́м мно́гим, и Того́ пред нечести́выми мучи́тели, и беззако́нными цари́ Бо́га пропове́даша, и мно́ги му́ки претерпе́ша, по́чести ча́юще небе́сныя восприя́ти. И́хже ны́не ви́дяще ра́дуются, и со все́ми ли́ки Безпло́тных Си́л Го́сподеви предстоя́т.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в Сло́во Твое́, упова́ душа́ моя́ на Го́спода.

Ста́до Богоизбра́нное, Христа́ пе́рваго Па́стыря подо́бницы бы́сте, па́стырие всесвяще́ннии: сохрани́сте невре́дно до конца́, благоче́стия Боже́ственная сокро́вища, отгна́вше ди́вия во́лки: то́же во огра́ду Небе́сную до́бре возведо́сте. Иде́же у́бо ны́не водворя́еми, помина́йте любо́вию ва́с восхваля́ющих, и Христу́ со дерзнове́нием моли́теся о душа́х на́ших.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Преподо́бно пожи́вше отцы́ преподо́бнии вси́, бе́сы победи́сте, и со́вестная муче́ния страсте́й угаси́вше, разжже́ния до́блественне претерпе́сте, блаже́ннии, и ра́дуетеся ны́не с Небе́сными Си́лами: я́ко уподо́бистеся житию́ в пло́ти те́х безпло́тных. С ни́миже моли́те Христа́ Преблага́го Бо́га, избавле́ние обрести́ паде́ний, ва́с почита́ющым.

И́ны стихи́ры му́ченичны:

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

Му́ченицы Твои́, Го́споди, не отверго́шася Тебе́, ни отступи́ша от за́поведей Твои́х. Те́х моли́твами поми́луй на́с.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Му́ченицы Твои́, Го́споди, не отверго́шася Тебе́, ни отступи́ша от за́поведей Твои́х. Те́х моли́твами поми́луй на́с.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Страстоте́рпцы му́ченицы, Небе́снии гра́ждане, на земли́ пострада́вше, мно́гия му́ки терпе́ша. Моли́твами и́х, Го́споди, и моле́нием все́х на́с сохрани́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Кто́ Тебе́ не ублажи́т, Пресвята́я Де́во? кто́ ли не воспое́т Твоего́ Пречи́стаго Рождества́? Безле́тно бо от Отца́ возсия́вый Сы́н Единоро́дный, То́йже от Тебе́, Чи́стыя, про́йде, неизрече́нно вопло́щься: естество́м Бо́г Сы́й, и естество́м бы́в Челове́к на́с ра́ди, не во двою́ лицу́ разделя́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́м на́шым.

На стихо́вне стихи́ры му́ченичны. Гла́с 6:

Страда́вшии Тебе́ ра́ди, Христе́, мно́гия му́ки претерпе́ша, и соверше́нныя венцы́ прия́ша на Небесе́х, да мо́лятся о душа́х на́ших.

Сти́х: Блаже́ни, я́же избра́л и прия́л еси́, Го́споди.

Кре́ст Тво́й, Го́споди, му́чеником бы́сть ору́жие непобеди́мое: ви́дяху бо предлежа́щую сме́рть, и предзря́ще бу́дущую жи́знь, упова́нием е́же на Тя́ укрепля́хуся: те́х моли́твами поми́луй на́с.

Сти́х: Ду́шы и́х во благи́х водворя́тся.

Нача́ток ми́ и соста́в зижди́тельное Твое́ бы́сть повеле́ние: восхоте́в бо от неви́димаго и ви́димаго естества́, жи́ва мя́ соста́вити, от земли́ у́бо те́ло созда́в, да́л же ми́ еси́ ду́шу, Боже́ственным Твои́м и животворя́щим вдохнове́нием. Те́мже, Спа́се, рабы́ Твоя́ во стране́ живы́х, и в кро́вех пра́ведных упоко́й.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Моли́твами Ро́ждшия Тя́, Христе́, му́ченик Твои́х, и апо́стол, и проро́к, и святи́телей, преподо́бных, и пра́ведных, и все́х святы́х, усо́пшыя рабы́ Твоя́ упоко́й.