Глас 4. В среду утром. Тропари и стихиры на каждый день

Седа́льны Кре́стны. Гла́с 4:

Искупи́л ны́ еси́ от кля́твы зако́нныя честно́ю Твое́ю Кро́вию, на Кресте́ пригвозди́вся, и копие́м пробо́дься, безсме́ртие источи́л еси́ челове́ком: Спа́се на́ш, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

На Кресте́ Тя, Спа́се, пригвозди́ша иуде́и, и́мже от язы́к на́с призва́л еси́, Христе́ Бо́же на́ш: просте́рл еси́ дла́ни на не́м во́лею твое́ю, копие́м же в ре́бра Твоя́ прия́л еси́ пробости́ся мно́жеством щедро́т Твои́х, еди́не Человеколю́бче.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Безневе́стная Ма́ти Твоя́, Христе́, я́ко узре́ на Кресте́ Тя возвыша́ема, рыда́ющи ма́терски такова́я веща́ше: что́ но́вое, и стра́нное сие́ чу́до, Сы́не Мо́й? Ка́ко беззако́нный со́нм ко Кресту́ Тя пригвожда́ет все́х Жизнода́вца, Све́те Мо́й Сладча́йший?

Седа́льны. Гла́с 4.

Ско́ро предвари́, пре́жде да́же не поработи́мся враго́м ху́лящым Тя́, и претя́щым на́м, Христе́ Бо́же на́ш: погуби́ Кресто́м Твои́м борю́щыя на́с, да уразуме́ют, ка́ко мо́жет правосла́вных ве́ра, моли́твами Богоро́дицы, еди́не Человеколю́бче.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

На Кресте́ пригво́ждься на ло́бнем во́лею свое́ю, мою́ дре́внюю я́зву грехо́вную исцели́л еси́, Влады́ко, мно́гия ра́ди благосты́ни: я́ко положи́лся еси́ хоте́нием, Человеколю́бче Спа́се на́ш, за ро́д челове́ческий, и от ре́бр Твои́х иска́пал еси́ кро́вь и во́ду, ве́рою пою́щым Тя́.

Сти́х: Ди́вен Бо́г во святы́х Свои́х, Бо́г Изра́илев.

Си́лою кре́стною подви́гшеся до́бре, сопоста́та врага́ низложи́сте кре́пко, терпе́нием ва́шим, святи́и страстоно́сцы: те́мже честны́я соверша́юще ве́рно па́мяти ва́шя, освяща́емся де́йством, и благода́тию ду́ха всесвята́го моли́твами ва́шими, свяще́ннии Христо́вы ору́жницы, о ми́ре Спасу́ моли́теся.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Де́ва и А́гница ви́девши на Кресте́, без се́мене из Нея́ А́гнца ро́ждшагося, и копие́м прободе́на, печа́ли уя́звена стрела́ми вопия́ше, боле́зненно восклица́ющи: что́ но́вое та́инство? Ка́ко умира́еши, И́же живота́ еди́н Госпо́дь? Те́мже воскресни́, па́дшаго совоздвиза́я пра́отца.

Седа́льны. Гла́с 4.

В раи́ мя лю́те па́дшаго, человекоуби́йцы го́рьким сове́том, на кра́ниевом ме́сте па́ки воздви́гл еси́, Христе́, дре́вом уврачева́в ю́же от Дре́ва кля́тву, уби́вый ле́стию умертви́вшаго мя́ зми́я, и дарова́л ми́ еси́ Боже́ственную жи́знь. Сла́ва Боже́ственному распя́тию Твоему́, Го́споди.

На Дре́ве разуме́в Тя́, пове́шена Со́лнца пра́веднаго Христе́, со́лнце све́т помрачи́, тва́рь же подвиза́шеся, и ме́ртвии я́ко от сна́ ско́ро из гробо́в воста́ху сло́ве, Боже́ственную песносло́вяще держа́ву Сла́вы Твоея́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Де́во Пренепоро́чная Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею, Сы́на Твоего́ и Бо́га: Его́же, Преблагослове́нная, моля́щи не преста́й, проще́ние прегреше́ний на́м дарова́ти.

На стихо́вне стихи́ры Кре́стны, гла́с 4:

Стена́ бу́ди на́м Кре́ст Тво́й, Иису́се Спа́се на́ш: ино́го бо упова́ния ве́рнии же и́мамы, то́чию Тебе́ на не́м пло́тию пригво́ждшагося, и подаю́ща на́м ве́лию ми́лость.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Да́л еси́ зна́мение боя́щымся Тебе́, Го́споди, Кре́ст Тво́й честны́й, и́мже посрами́л еси́ нача́ла тьмы́ и вла́сти, и возве́л еси́ на́с на пе́рвое блаже́нство. Те́мже Твое́ Человеколю́бное смотре́ние сла́вим, Иису́се всеси́льне, спа́се ду́ш на́ших.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Ка́ко ва́шым не удиви́мся подвиго́м, святи́и му́ченицы, я́ко те́лом умира́ющим обложе́ни, безпло́тныя враги́ победи́сте? Не устраши́ша ва́с мучи́тельская преще́ния, не ужаси́ша ва́с му́к приложе́ния: вои́стинну досто́йно от Христа́ просла́вистеся, и душа́м на́шым проси́те ве́лия ми́лости.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Крестобогоро́дичен: Умерщвля́ема ви́дящи Христа́, Пречи́стая Влады́чица, умерщвля́юща льсти́ваго, восклица́ше го́рце взыва́ющи, из утро́бы Тоя́ произше́дшему, и долготерпе́нию Его́ чудя́щися взыва́ше: Ча́до Мое́ Любе́знейшее, не забу́ди рабу́ Твою́, не закосни́, Человеколю́бче, мое́ утеше́ние.

Блаже́нна, гла́с 4:

Дре́вом Ада́м рая́ бы́сть изселе́н: Дре́вом же кре́стным разбо́йник в ра́й всели́ся. Ов у́бо вку́ш, за́поведь отве́рже сотво́ршаго: о́в же сраспина́ем, Бо́га испове́да тая́щагося, помяни́ мя, вопия́, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Пригвозди́лся еси́ на Кресте́, мно́гия ра́ди, Христе́, бла́гости, прободе́н бы́л еси́ в ре́бра, два́ исто́чника источи́вый оставле́ния: земля́ же не терпя́щи зре́ти дерзнове́ния тряса́шеся, ка́мение распада́шеся, угаса́ше со́лнце, колеба́хуся го́ры и хо́лми, стра́хом держа́вы Твоея́.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Просте́ртыя дре́вле неудержа́нно к Дре́ву разуме́ния пра́отчи ру́ки, исправля́я Христе́ поползне́ние, распросте́рлся еси́ во́лею, и Твои́ пригвозди́л еси́ ру́це, Долготерпели́ве, созда́вый челове́ка руко́ю, за безме́рную благосты́ню. Сла́ва па́че ума́ сло́ве, благоутро́бию Твоему́.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Онебеси́вше зе́млю святи́и пресве́тлыми сия́нии по́двигов честны́х, и́миже тьму́ всю́ разори́сте су́етства, и к све́ту незаходи́мому всели́стеся прича́стием обожа́еми, и все́м озаря́ете све́т разуме́ния, ва́с по до́лгу ублажа́ющым.

Сла́ва Отцу́ и Сы́ну и Свято́му Ду́ху:

Похвалу́ и сла́ву и че́сть, всевино́вней Тро́ице подае́м, и трисвяты́ми гла́сы а́нгельскую пе́снь принося́ще Отцу́ Безнача́льну, и Сы́ну, и Духу, взыва́ем разбо́йника благоразу́мнаго гла́с, воспева́юще и вопию́ще: помяни́ на́с во Ца́рствии Твое́м.

И ны́не и при́сно и во ве́ки веко́в. Ами́нь:

Богоро́дичен: Воздви́жена на Кресте́ во́лею ви́дящи, Пречи́стая, Сы́на Своего́ и Бо́га, дивя́щися пла́чущи глаго́лаше, вся́ческая удобри́вшему: где́ за́йде добро́та Твоя́, Го́споди? Что́ сия́ неблагода́рный Тебе́ воздаде́ собо́р, вме́сто благи́х? Пою́ па́че ума́ Твою́ благосты́ню.