Глас 4. В четверг утром. Тропари и стихиры на каждый день

Седа́льны апо́стольски. Гла́с 4:

Апо́столов первопресто́льницы, и вселе́нныя учи́телие, Влады́ку все́х моли́те, ми́р вселе́нней дарова́ти, и душа́м на́шым ве́лию ми́лость.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Свети́ла в конце́х ученики́ Твоя́, Христе́, яви́л еси́, сия́ющыя душа́м су́щым во тьме́, ра́зум Тво́й, Влады́ко: и ле́сть и́дольскую те́х ра́ди омрачи́в, уче́ньми благоче́стия просвети́л еси́ ми́р. Те́х мольба́ми спаси́ ду́шы на́шя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Ско́ро приими́, Влады́чице, моли́твы на́шя, и сия́ принеси́ Сы́ну Твоему́ и Бо́гу, Госпоже́ Всепречи́стая: разруши́ обстоя́ния, к Тебе́ притека́ющих: разсы́пли приседа́ния и де́рзости, Де́во, ны́не вооружа́ющихся на рабы́ Твоя́.

Седа́льны. Гла́с 4.

Во всю́ зе́млю протече́ веща́ние ва́ше, и преле́стную объюроди́ му́дрость нему́друю, апо́столи сла́внии, привлече́ челове́ки из глубины́ пре́лести, показа́ же все́м спасе́ния стезю́, те́мже ны́не досто́йно ва́с ублажа́ем.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Ве́ры пропове́дники ученики́ Твоя́, Спа́се, ми́рови показа́л еси́, наставля́я те́ми язы́ки к ра́зуму Твоему́: заря́ми бо сло́ва просвети́ша вся́, тьму́ неразу́мия прогна́вше ве́рою. Те́х моли́твами спаси́ ду́шы на́шя.

Сти́х: Ди́вен Бо́г во святы́х Свои́х, Бо́г Изра́илев.

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́ Бо́га на́шего: иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́шы на́шя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Услы́ши, Влады́чице, от боле́зненныя души́ вопию́щаго раба́ Твоего́, и мно́гих мои́х зо́л пода́ждь ми́ оставле́ние, Тебе́ бо и́мам предста́тельницу в де́нь и но́щь: изба́ви, Богоро́дице, от огня́ гее́нскаго, и поста́ви мя́ одесну́ю Сы́на Твоего́ и Бо́га.

Седа́льны. Гла́с 4.

Лучи я́ко со́лнце пра́вды, ва́с Христо́с испусти́, просвети́ти всю́ зе́млю апо́столи сла́внии: Боже́ственными ва́шими моли́твами, озаря́ете Боже́ственным све́том невече́рним все́х, и просвеща́ете ве́рою соверша́ющих святу́ю ва́шу па́мять.

Ско́ро предвари́, о́тче Нико́лае, и спаси́ рабы́ твоя́ от находя́щих на́м бе́д и скорбе́й, и́маши бо к Созда́телю и Бо́гу дерзнове́ние. Прииди́ у́бо вско́ре ко ве́рою тя́ призыва́ющым, твое́ ны́не предста́тельство и покро́в да́руя.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Я́ко все́х еси́ творе́ний вы́шшая, воспева́ти Тя́ досто́йно недоумева́юще, Богоро́дице, ту́не, мо́лим Тя́, поми́луй на́с.

На стихо́вне стихи́ры апо́стольски, гла́с 4:

Апо́стольский ли́к Ду́хом Святы́м просвети́л еси́, Христе́: и на́шу скве́рну грехо́вную, те́х ра́ди омы́й, Бо́же, и поми́луй на́с.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Некни́жныя ученики́, Ду́х Тво́й Святы́й каза́тели яви́, Христе́ Бо́же: и многовеща́нным сли́чием язы́ков пре́лесть упраздни́, я́ко Всеси́лен.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Честна́ сме́рть святы́х Твои́х, Го́споди: меча́ми бо и огне́м, и сту́дению сокруша́еми, излия́ша кро́вь свою́, наде́жду иму́ще на Тя́, восприя́ти трудо́в мзду́: претерпе́ша, и прия́ша от Тебе́, Спа́се, ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Тя́ сте́ну стяжа́хом, Богоро́дице Пречи́стая, и благоути́шное приста́нище, и утвержде́ние. Те́мже молю́ся, и́же в житии́ обурева́ем, окорми́, и спаси́ мя.

Блаже́нна, гла́с 4:

Дре́вом Ада́м рая́ бы́сть изселе́н, Дре́вом же кре́стным разбо́йник в ра́й всели́ся: о́в у́бо вку́ш, за́поведь отве́рже Сотво́ршаго: о́в же сраспина́ем, Бо́га испове́да тая́щагося, помяни́ мя, вопия́, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Па́стыря и А́гнца слове́сная су́ще воспита́ния, посреде́ волко́в от Него́ я́ко а́гнцы му́дрии по́слани бы́сте, Боже́ственным пропове́данием, те́х претворя́юще свире́пство на кро́тость, ве́рою зову́ще неукло́нным по́мыслом: помяни́ на́с, Спа́се, во Ца́рствии Твое́м.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Проше́дше земна́я исполне́ния апо́столи госпо́дни, я́ко зве́зды све́тлыя, помраче́нныя пре́лести разори́сте, и све́т спаси́тельный прельще́ным облиста́сте. Те́мже блажи́м ва́с, Христо́вы пропове́дницы, прося́ще: моли́теся о на́с всегда́ ко Го́споду.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Умерщвля́еми му́дрии, и огне́м веще́ственным опаля́еми, попали́сте го́рькаго многобо́жия вещество́, блаже́ннии, и ны́не источа́ете исцеле́ний струи́ приходя́щым к ва́м с ве́рою, те́пле взыва́ющым, и вопию́щым Христу́: помяни́ на́с во Ца́рствии Твое́м.

Сла́ва Отцу́ и Сы́ну и Свято́му Ду́ху:

Непреткнове́нным по́мыслом, мы́слию трезвя́щеся рце́м, в вы́шних со отце́м седя́щему вку́пе и ду́хом: Тро́ице неразде́льная, я́же вся́ сло́вом пре́жде соста́вльшая, и все́х просвеща́ющая, ве́рою Тебе́ зову́щих, помяни́ на́с во Ца́рствии Твое́м.

И ны́не и при́сно и во ве́ки веко́в. Ами́нь:

Богоро́дичен: Апо́столов ра́досте, и страстоте́рпец вене́ц неувяда́емый вои́стинну еси́ Богороди́тельнице, всенепоро́чная Отрокови́це, с ни́миже испроси́ на́м, Влады́чице, прегреше́ний избавле́ние, и жития́ исправле́ние, ве́рою прося́щым Тя́, и вопию́щым Ти́: ра́дуйся, всеи́стинне благи́х сокро́вище.